Read Samo, Southern LWS 21 Bible Online

LWS 21 - Samo, Southern bible

LWS 21

¹Dɛnaa Lawa pɛ Muizu ni: Boo da ka wúlu-bɔle Aarɔn tɔrɔn kɛn nɛ, n pɛ ǹ nɛ: Lawa a wúlu-bɔle kɔn doamaa bie a n mɔrɔ ǹ dɔɔ̃n gere ganaa, a *gɔ̀ da a din-a wa,

²yǎa a din wɔ taãn: a yɛ ǹ dan nɛ, a yɛ ǹ di ni, a nɛlɔ nɛ, ǹ gologiĩ laanka ǹ diɛ̃giĩ ni.

³Á boe la a gɔ̀ da a din ganaa, ka ǹ miãnɛn dɔ gere ne. A giala, bɛ̀ ǹ miãnɛn lɛ tɔn wɔ giĩ li wa, a n tɔn nə ǹ di kion minin wɔbaa-n bɔrɔ.

⁴Lawa a wúlu-bɔle di kion minin bii, minin nyɛɛnaan bɔ ǹ dí na a gɔn. A doamaa bie a gɔ̀ da a din-a, a yaa kiɛ̃ min kooro biɛ wa.

⁵ Bɛ̀ gɛ̀ gã, Lawa a wúlu-bɔlen doamaa bie ǹ nə n mìi paǹ goon kɔɔ̃ wa, ǹ doamaa bie ǹ nə n lɛtoro ka kuru a wàãn ganaa wa, ǹ doamaa bie ǹ nyaǹ dɔ kiɛ̃ ǹ dinin ganaa wa.

⁶Ǹ doamaa nɛ ǹ nə n dinin kɔ maa dí la, ǹ nə n nyɛnaa ma tɔ kɛ a ziziɛ̃ nɛ. Ǹ dinin lɛn man Dɛnaa Lawa a wúlu mànan koe la. Bɛ nə ǹ Lawa lɛ a màn-bii lɛa. Bɛ lɛ taman yii, ǹ doamaa nɛ ǹ goã *yoreene.

⁷Lɔ kɔrɔ nɛ, lɔ mɛn dɔ bɛ́ á saa lɛlɛ á giĩ kɔsɔ dɔ̃, ka ǹ mɛn dɔ bɛ́ ǹ zuũ loo, Lawa a wúlu-bɔle doamaa bie a bɛ kɔn saa lɔ lɛa wa. A giala, masɛ Lawa n má wúlu-bɔle lɛ bɔ má koa ma din a dí-nyali lɛa.

⁸Ka Lawa a wúlu-bɔlen lɛn kũ masɛ din wɔn lɛa. A giala, ka bɛ́ die wúlu mànan mɛnɛn koe masɛ la, ǹ dinin lɛn man a sii yɔrɔ boe. Ka ga ǹ ganaa masɛ a minin lɛa. Masɛ Dɛnaa Lawa dinmaa n yoreene. Man má ka dinin Izirayeli minin lɛn dɔn bɔ ma din wɔn lɛa, màn mɛn bɛ́ toɛ, ka goã yoreene.

⁹Bɛ̀ Lawa a wúlu-bɔle a nɛlɔ kɔrɔbaa zɛnaa, á n din ziziɛ̃ nɛ, a na á ǹ di tɔ ziziɛ̃. Ǹ nɛlɔ lɛ kũ ǹ da tɛ-n ǹ tã.

¹⁰Wúlu-bɔlen kiã n wúlu-bɔlen mìi la. Nyɔɔ na á n kaa a din lɛ mìi ni, ǹ nə́ bɔ ǹ nə́ koa, ǹ nə́ dí wɔ a gɔn. A doamaa nɛ, a na a dí lɛ a nya ǹ mɔnaan wɔ. A doamaa bie a n mìi ka toa lɔloɛ-n kɔn ka gɛ̀ na á gã la wa, a doamaa bie a na a mɔnaan dɔn tɔtoɛ̃, a na a foo busii nyaa-n wa.

¹¹A doamaa bie a wo min kɔn gere la wa. Haalɛ ǹ di laanka ǹ dan a gɛ̀ li, a doamaa bie a gɔ̀ da a din ganaa wa.

¹²A doamaa bie a soo, bɛ̀ a n bɔ masɛ a bǎã sonbore kɛ nɛ, a wo bǎã tumaa-n wa. Bɛ̀ á bɛ zɛnaa, a n die masɛ a bǎã lɛ ziziɛ̃. A giala, Lawa a nyɔɔ sonbore kɛ na á n kaa wúlu-bɔle lɛ mìi ni, ǹ nə́ bɔ ǹ nə́ koa, mà a masɛ a dí nya. Masɛ din ni Dɛnaa Lawa lɛa.

¹³Nɛlɔ mɛn bɛ́ a tɔn giĩ dɔ̃ wa, a bɛ saa lɔ lɛa.

¹⁴A baran lɔ giɔɔrɔ saa lɔ lɛa wa, lɔ mɛn bɛ́ ǹ zuũ daa, a baran bɛ saa wa, ka ǹ mɛn dɔ bɛ́ á kɔrɔbaa zɛnaa, á n din ziziɛ̃ nɛ. Sɛnɛ, a na a din tɔrɔ wúlu-bɔlen kɛn nɛlɔ saa a lɔ lɛa,

¹⁵màn mɛn bɛ́ toɛ, a baran tɔrɔ kɔsɔn lɔlɔ a din tɔrɔ wúlu-bɔlen kɛn ganaa wa. A giala, masɛ Dɛnaa Lawa din ni má bɔ má koa maa dí mìi la.

¹⁶Dɛnaa Lawa boo da ka Muizu ni á pɛ nɛ:

¹⁷A pɛ Aarɔn nɛ: Biikoo woo biikoo, n tɔrɔ minin lɛn bii, wɔ̀lɔ̀ bɛ́ ǹ mɛn ganaa, bɛ nyan toa a n mɔrɔ *wúlu bɔ ǹ bǎã kɛ ganaa, a pɛ mà a n masɛ a màn-bii kɛ koe ma la wa.

¹⁸Bɛ̀ wɔ̀lɔ̀ tá wúlu-bɔle mɛn ganaa, a doamaa bie sonbore a n mɔrɔ wa: yii tere-a nɛ, gɔnaa nɛ, min mɛn bɛ́ a nyin nə́ kunu pataraa nɛ, ka min mɛn bɛ́ a gɔn hinlaa a gòã goon sasa kɔ á la ǹ miã nɛ,

¹⁹min mɛn bɛ́ a gòã hinlaa a gɔn yiɛ lɛlɛ,

²⁰gùũnaa nɛ, pɛrɛ a la yii-n wole ne, màn bɛ́ á bɔ min mɛn yii la, gɔ̀nɔn ki busu babaraa dɛnaa nɛ, ka min mɛn bɛ́ giĩbaa ná a ba a lon wa, bɛ kɔn ba boe la a Lawa a wúlu-bɔle baa wa.

²¹N din Aarɔn tɔrɔn kɛn, bɛ̀ wɔ̀lɔ̀ tá ǹ mɛn ganaa, bɛ nyan toa a n mɔrɔ wúlu bɔ ǹ bǎã kɛ ganaa, a pɛ mà a n *wúlu màn koe masɛ Dɛnaa Lawa la wa. Wɔ̀lɔ̀ lɛ bɛ́ a ganaa, a doamaa bie a n mɔrɔ wúlu bɔ ǹ bǎã kɛ nɛ, a pɛ mà a n màn-bii koe masɛ la wa.

²²Bɛ̀ ǹ nə́ daa wúlu mànan mɛnɛn kɔ masɛ Lawa la, màn mɛn bɛ́ doe wúlu-bɔlen dininsɔɔ̃nɔn ganaa, ka ǹ mɛn dɔ bɛ́ doe ǹ laanka ǹ kion minin ganaa, ǹ tá boe la ǹ bɛn sɔ̃.

²³Sɛnɛ, ǹ wɔ̀lɔ̀ lɛ taman yii, ǹ doamaa bie ǹ wo yǎa kion bii kuru kɔn-a ǹ mɔnaa kɛ li wa, ǹ doamaa bie ǹ nə n mɔrɔ wúlu bɔ ǹ bǎã kɛ dɔ ganaa wa. Ǹ doamaa bie ǹ masɛ a bǎã sonbore kɛ ziziɛ̃ wa. A giala, masɛ Dɛnaa Lawa din ni má wúlu-bɔlen lɛn bɔ, má ǹ koa maa dí mìi la.

²⁴Muizu bɛa boon lɛn pɛ Aarɔn laanka a nɛgiĩn manɛ, ka Izirayeli minin lɛn tumaa nɛ.