Read Samo, Southern LWS 25 Bible Online

LWS 25 - Samo, Southern bible

LWS 25

¹ Muizu bɛ́ Sinayii kele la, Dɛnaa Lawa boo da nɛ, á pɛ nɛ:

²Boo da ka Izirayeli minin lɛn nɛ, n pɛ ǹ nɛ: ma bɛ́ gána mɛn lɛ koe ka la, bɛ̀ ka kaa a nɛ ǹ mɛn waáraa, ka goã bɛ̀ ka susui kɔ tánan la biikoo tɛn li, masɛ Dɛnaa Lawa a lɛa.

³Min tá boe la a dí nya wuru goon ne yǎa lɛ̀ sɔrɔ, a rezɛ̃ wuru goon a dan gùrù bɔ yǎa lɛ̀ sɔrɔ, a màn bɔ a nɛ.

⁴Sɛnɛ, a lɛ̀ sɔbaabaa ǹ wɔ ke, ka bɛ koa susu ǹ lɛ̀ lɛa masɛ Dɛnaa Lawa a lɛa, ka susui kɔ tán la, a n susu. Bɛa lɛ̀ lɛ-a, ka baran kaa wurun da wa, ka baran kaa *rezɛ̃ da gùrùn bɔbɔ wa.

⁵Ka màn mɛn kuru a-n lɛlɛ, bɛa tìĩ mɛn bɛ́ á bɔ tán a din li ka baran bɛ kuru a ma waáraa wa. Rezɛ̃ dan kɛn lɛn dɔn, ka n ka ǹ gùrùn bɔbɔ wa, bɛ̀ bɛn nə́ ma, ka baran ǹ nɛ na wa. Tán lɛ dɔ a susu ǹ lɛ̀ n ka bɛ nɛ.

⁶Bɛa susu ǹ lɛ̀ lɛ gɔ́ɔ̃ nɛ, tán bɛ́ re màn woo màn boe, ka tá re n dinin toe ka bɛ nɛ: ka dinin ni, kaa bɛ̀rɛgiĩn laanka kaa bɛ̀rɛlɔn nɛ, kaa dí-nyalin mɛnɛn bɛ́ ka tá ǹ sarɛɛ, tiin mɛnɛn bɛ́ n yui ka la, min mɛn din tumaa bɛ́ kaa kion.

⁷Kaa tɔɔn nɛ, gána lɛ a don mànan nɛ, tán lɛ bɛ́ re màn mɛn tumaa boe, bɛn dɔn tá re n dinin toe ka bɛ lɛ nɛ.

⁸Dɛnaa Lawa wusoo á pɛ Muizu-n doo: Lɛ̀ sɔsɔbaa wɔlɔ sɔbaa nimi, n toa bɛ kiɛ̃. Bɛa lɛ̀ sɔsɔbaa wɔlɔ sɔbaa lɛ a kaa kun nə goɛ̃ lɛ̀ pusiwenmanangɔrɔ.

⁹Mui sɔbaabaa ǹ wɔ a lɛawaa fùbaa ǹ wɔ pinaa, sii baraa sawaa ǹ lɛawaa gole kɛ a pinaa, ka bɛn pɛ gole gána lɛ din tumaa nɛ.

¹⁰Lɛ̀ posoorobaa ǹ wɔ ke, ka bɛ bɔ ka koa a gɔrɔn masɛ Lawa a lɛa, ka pɛ gána lɛ a minin tumaa nɛ, mà didie tá a din gɔn wìi a lɛa. Lɛ̀ posooro zɔ́n nɛ. Bɛ̀ á dɔ, didie wusoo a wo giã a tán lɛ nɛ, didie wusoo a wo piɛ.

¹¹Lɛ̀ posoorobaa ǹ wɔ lɛ dɔ, ka n nyɛnyɛɛ, ka bɛnɛn pɛpɛ. Bɛa lɛ̀ lɛ-a, ka baran màn da wa, màn mɛn dɔ bɔ wuru-n a din li, ka baran bɛ dɔ kuru wa. Rezɛ̃ dan kɛn lɛn, ka n ka ǹ gùrùn bɔbɔ wa, ka baran bɛn nɛ na wa.

¹²Ka bɛa lɛ̀ lɛ koa a gɔrɔn Lawa wɔ lɛa, ka n nyɛnyɛɛ, ka bɛnɛn pɛpɛ. Màn mɛn bɛ́ re boe wuru-n a din li, ka á boe la ka bɛ bii.

¹³Bɛ̀ bɛa lɛ̀ lɛ dɔ, ka wusoo ka didie a tán kɔ la.

¹⁴Ta min mɛn nə màn siɛ̃ ǹ miã la hinlaa á pii a lon, min kɔn nyan toa a mɛnaa ǹ miã la wa.

¹⁵Bɛ̀ ǹ tá tán siɛ̃ hinlaa ǹ nə́ pii kɔn lon, ǹ dɛnaa lɛ̀ lɛ mɛn zɛnaa a nɛ, a kũ lɛ̀posooro zɔ́n lɛ ganaa, lɛ̀ lɛ mɛn dɔ bɛ́ goɛ̃ lɛ̀ posooro zɔ́n kɔsɔ tɔn dɔ, ka n yiri koa bɛ li.

¹⁶Bɛ̀ lɛ̀ gigiã á tɔn kanaa, a giɔ̀mɔ dɔ n goɛ̃ kaka. Bɛ̀ lɛ̀ gigiã a kanaa wa, a giɔ̀mɔ dɔ n basɛ̃. A giala, lɛ̀ lɛ mɛn nə n zɛnaa wuru lɛ nɛ, bɛa lɛ̀ lɛ lɛ nɛ, ǹ tá siɛ̃ kɔn la.

¹⁷Min kɔn nyan toa a mɛnaa ǹ miã la wa. Bɛ lɛ n nyɛɛ, mà ka tá nyɛ́ɛbiɛ kaa Lawa nɛ. A giala, ma din Dɛnaa Lawa n kaa Lawa lɛa.

¹⁸Maa landa boon kɛn bɛ́ màn mɛn pii, ka bɛ zɛnaa, ka masɛ a sii yɔrɔ bɔ ǹ boo kɛn tamaa, ka ǹ sii zɛnaa. Bɛ̀ ka zɛnaa miɛ̃, ka á re boe la ka giã gána lɛ nɛ, ka yiri n bǎã goon ne.

¹⁹Kaa tán-kɔsiɛ á die bǐɛ̃ koe, ka màn bii ka kã, ka n giã-n gána lɛ nɛ, ka yiri n bǎã goon ne.

²⁰Kɔntan ka á re taasɛ, mà kasɛn doamaa bɛ́ a bie ka wuru dí nya wa, mà kasɛn bɛ́ ka bie re boe ka màn nɛ don ka da-n wa, mà kasɛn man die wàa bii lɛ̀ sɔsɔbaa gogoonmaa a sɔbaabaa ǹ wɔ gɔ́ɔ̃ nɛ?

²¹Bɛ̀ bɛ nɛ, lɛ̀ sɔrɔbaa ǹ wɔ lɛ gɔ́ɔ̃ nɛ, ma á die maa bǐɛ̃ gisĩ ka la. Bɛ lɛ á re toɛ, ka màn-bii yɛ lɛ̀ sɔɔ wɔ lɛa.

²²A lɛ̀ kiwisibaa ǹ wɔ, ka á boe la, ka kaa wurun dí nya. Sɛnɛ, màn-bii zizi kɛ lɛ nɛ, ka á re bii bɔrɔ, yǎa a woe doe lɛ̀ manangɔrɔ baa ǹ wɔ a kaa piɛ ganaa.

²³Gána lɛ a bǎã doamaa bie a n sã min la, a n bɛ gɔn duduu wa. A giala, gána lɛ n masɛ din Lawa wɔ lɛa. Kasɛn kɛn, ka gùlin laanka tiin lɛa masɛ a gána nɛ.

²⁴Bɛ lɛ nɛ, gána kɛ lɛ tumaa má n die koe ka la, bɛ̀ min ná a tán sã, ka doamaa nɛ ka zii kɔ la, a wusoo a na a mìi bɔ.

²⁵Bɛ̀ doobaabaa min mɛn da a bǎã sã ganaa, bɛa dɛnaa lɛ a mìi gɔ́ɔ̃ ǹ sii bɛ́ doe ǹ dɔɔ̃n mɛn ganaa, bɛ doamaa nɛ a da bǎã lɛ mìi bɔ.

²⁶Sɛnɛ, bɛ̀ min mɛn a min banban a mìi gɔ́ɔ̃ ǹ sii n doe a ganaa wa, bɛ̀ màn mɛn yɛ a din gɔn, á n boe la a tá a wuru lɛ mìi boe ne,

²⁷a wuru lɛ a piili lɛ̀ lɛ mɛn zɛnaa a nɛ, a bɛa wɔrɔ na, a bɔ a nɛ. Lɛ̀ gialakun mɛn bɛ́ goɛ̃ kanaa, lɛ̀ posooro zɔ́n tɔn dɔ, a bɛa wɔrɔ nimi a kɔ a wuru-piili lɛ la, a tɔn nə n bɔyaa, a da giã a nɛ.

²⁸Sɛnɛ, bɛ̀ màn yɛ a dinmaa dɔ gɔn a tá a wuru lɛ mìi boe-n wa, wuru lɛ n goɛ̃ a piili gɔn, yǎa lɛ̀ posooro zɔ́n nə doe, a tɔn yui a n boe a nɛ. Bɛa biikoo li, wuru lɛ a dɛnaa bibinaa lɛ á boe la a n bɔyaa, a da giã a wuru-n.

²⁹Kiwi mɛn bɛ́ ǹ ná a lɛnpɛnɛ ka kungɔn nɛ, bɛ̀ min mɛn waa ǹ kion sã walan, a mìi bɔ ǹ biikoo n lɛ̀ goon. Bɛ̀ a tá li a na a mìi bɔ, a nyan toa a kiɛ̃ lɛ̀ goon la bɛ kio wa.

³⁰Sɛnɛ, bɛ̀ ǹ dɛnaa boo la, á kion lɛ mìi bɔ lɛ̀ goon a pii lɛ kio wa, min mɛn kion lɛ pii, a n goɛ̃ bɛa dɛnaa wɔ lɛa yǎa duduu. Ta lɛ̀ posooro zɔ́n na á dɔ, a soe a n bɔ a-n wa.

³¹Kiwin mɛnɛn bɛ́ kungɔn ná a ba ǹ lɛnpɛnɛ wa, kionən mɛnɛn bɛ́ walan sɛn, bɛn sii yɔrɔ nə n boe ka gána lɛ a wurun wɔ bɛ́ lɔn. Bɛa kionən lɛn mìi á boe la a n bɔ biikoo tumaa li. Bɛ̀ lɛ̀ posooro zɔ́n dɔ din dɔ, a piili doamaa nɛ a soo a n bɔ a nɛ.

³²*Levii tɔrɔn kɛn, kiwin mɛnɛn nə dɔ ǹ ganaa, kionən mɛnɛn bɛ́ bɛa kiwin lɛn nɛ, ǹ tá boe la ǹ bɛn mìi bɔ biikoo tumaa li.

³³Bɛ̀ min mɛn Levii tɔrɔn kɛn mɛn a kion pii, bɛ̀ lɛ̀ posooro zɔ́n dɔ, yǎa ǹ dɛnaa soe a n boe a nɛ. A giala, bɛa kionən kɛn lɛn dininsɔɔ̃nɔn man Levii tɔrɔn lɛn gɔn màn lɛa Izirayeli minin lɛn bii.

³⁴Sɛnɛ, wurun mɛnɛn bɛ́ ǹ kiwin lɛn lɛkoro-a, bɛn doamaa bie ǹ nə n sã wa. A giala, Levii tɔrɔn lɛn bǎãn man ka bɛn nɛ yǎa duduu.

³⁵ Bɛ̀ n mɛn a giɔ̀mɔ tá ǹ miã ganaa, bɛ̀ a gɔn nya a ná a boe la á sarɛɛ wa, n dɔ lɛ, màn mɛn bɛ́ toɛ, a dɔ la n li. Ta gùli n ka ǹ dɛnaa nɛ, hinlaa tii ni, ka zɛnaa miɛ̃ a wɔ paǹ li.

³⁶Ka baran là si bɛa dɛnaa lɛ la wa, ka baran n là bɔ la wa, màn mɛn bɛ́ toɛ, a dɔ la ka li. Ka zɛnaa miɛ̃ ka nyaa, mà ka tá nyɛ́ɛbiɛ masɛ Lawa nɛ.

³⁷ Bɛ̀ ka wɔrɔ giɔ̀mɔ da min ganaa, ka baran pɛ mà yǎa a na a là diɛ wa. Bɛ̀ ka màn-bii giɔ̀mɔ da min ganaa, ka baran pɛ mà yǎa kasɛn nə là boe ǹ dɛnaa la wa.

³⁸Ma din Dɛnaa Lawa n kaa Lawa lɛa. Ma din ni má ka waa, má ka bɔ Ezipti gána nɛ, má n die Kanaan gána kɛ koe ka la, màn mɛn bɛ́ toɛ, ka masɛ baa kaa Lawa lɛa.

³⁹ Bɛ̀ n mɛn a giɔ̀mɔ tá n miã ganaa, bɛ̀ a boe la á sarɛɛ wa yǎa a n din sã n la, n nyan toa n da bɛ̀rɛbaa ǹ dí ganaa wa.

⁴⁰A kũ ka min bɛ́ lɔn, dí nyɛɛ giɛ a saraa li, hinlaa ka ǹ bɛ́ tii kuĩ lɔn. A n dí nyɛɛ a giɔ̀mɔ dama-a wole lɛ nɛ, yǎa lɛ̀ posooro zɔ́n doe.

⁴¹Bɛa biikoo li, a soo a n bɔ a li, a din laanka a nɛnyaanan nɛ, a wusoo a wo a tanlɛ nɛ, ǹ digolon bǎã nɛ.

⁴²A giala, Izirayeli minin kɛn lɛn, masɛ nə́ ǹ waa má ǹ bɔ Ezipti gána nɛ, maǹ masɛ a dí-nyalin lɛa sisia. Bɛ lɛ n ke, min doamaa bie a n sã ka ǹ bɛ́ bɛ̀rɛ siɛ̃ lɔn wa.

⁴³Min doamaa bie a pàã nyaa ǹ nɛ, a kakaarɛ kɔ ǹ ganaa wa. Ka zɛnaa miɛ̃ ka nyaa, mà ka tá nyɛ́ɛbiɛ kaa Lawa nɛ.

⁴⁴Bɛ̀ ka tá li ka bɛ̀rɛ pii, tɔrɔ kɔsɔn mɛnɛn bɛ́ ka lɛnpɛnɛ, ka pii bɛn li.

⁴⁵Tiin mɛnɛn nə da giã ka bii, ka tá boe la ka bɛn dɔn nɛnyaanan pii bɛ̀rɛn lɛa. Ǹ mɛnɛn dɔn bɛ́ ǹ nə́ yɛ kaa gána lɛ nɛ, ka á boe la ka bɛ̀rɛn pii bɛn dɔn tanlɛ minin bii. Bɛa bɛ̀rɛn lɛn tá re kaa wɔn biɛ.

⁴⁶Bɛ kio, ka á re ǹ toɛ kaa nɛnyaanan manɛ kíɛ̃ lɛa, màn mɛn bɛ́ toɛ, ǹ nə ǹ dɔn wɔ baa. Ǹ tá boe la ǹ goã ǹ bɛ̀rɛn lɛa yǎa duduu. Sɛnɛ, ka dinin Izirayeli minin kɛn, ka baran pàã nyaa kɔn nɛ wa, ka baran kakaarɛ kɔ kɔn ganaa wa.

⁴⁷Gùlin hinlaa tiin mɛnɛn bɛ́ kaa gána lɛ nɛ, bɛ̀ ǹ mɛn pàãma baa, ka dinin Izirayeli min lɛ kɔn tá boe la a giɔ̀mɔ saa a lon. Sɛnɛ, bɛ̀ a yii á sarɛɛ wa, yǎa a n din sã gùli hinlaa tii lɛ la, hinlaa ǹ tanlɛ min kɔn la,

⁴⁸zii tan, haalɛ a din sã lɛ kio, min na a mìi si: ǹ dɔɔ̃n kɔn tá boe la, a na a mìi si.

⁴⁹Bɛ̀ a din dan nɛ banban, ta ǹ di ǹ dɔɔ̃n nɛ, hinlaa ta ǹ di ǹ dɔɔ̃n a nɛ nɛ, hinlaa a minbaa bɛ́ doe min mɛn ganaa a tanlɛ minin bii, bɛ á boe la a na a mìi si. Ta a miɛ̃ wa, bɛ̀ màn tá a dinmaa dɔ gɔn, á boe la, a n din mìi si ka bɛ lɛ nɛ.

⁵⁰Bɛ̀ á miɛ̃, a n din sã lɛ̀ mɛn-a, lɛ̀ lɛ mɛn bɛ́ bɛ laanka lɛ̀ posooro zɔ́n biin ni, a bɛ nimi kun ka a piili lɛ nɛ. Ǹ pii lɛ mɛn-a, a bɛ zɔɔ̃ kɔn li ka bɛa lɛ̀ lɛ lɛ nɛ. A dí mɛn dɔ nya a piili lɛ lon, a bɛa wɔrɔ nimi pinin goon dí nya ǹ giɔ̀mɔ lɛ yii li.

⁵¹Lɛ̀ lɛ mɛn bɛ́ goɛ̃ kanaa lɛ̀ posooro zɔ́n tɔn dɔ, bɛ̀ bɛ á tɔn gigiã, a dí nya ǹ giɔ̀mɔ lɛ ná a doe a ganaa wa, ǹ pii ka wɔrɔ mɛn nɛ, yǎa a wusii a bɛ lɛ a gigiã sarɛɛ, a n din mìi sii ni.

⁵²Sɛnɛ, lɛ̀ lɛ mɛn bɛ́ goɛ̃ kanaa, lɛ̀ posooro zɔ́n tɔn dɔ, bɛ̀ á nimi á woo yaa, a ná a tɛ wa, a n din mìi si ǹ giɔ̀mɔ lɛ saraa a kɔnpɛ ka bɛa lɛ̀ lɛ lɛ nɛ.

⁵³Bɛ̀ tii Izirayeli min mɛn pii ka bɛa yɔrɔ lɛ nɛ, a doamaa nɛ a saraa lɛ̀ woo lɛ̀. Ka dinin Izirayeli minin lɛn dɔn baran toa, bɛa tii lɛ pàã nyaa ka dinin Izirayeli min ni, a kakaarɛ kɔ a ganaa wa.

⁵⁴Bɛ̀ Izirayeli min lɛ boo la á n din nyin si ka bɛa yɔrɔ kɛ lɛ kɔn nɛ wa, bɛ̀ lɛ̀ posooro zɔ́n dɔ, tii lɛ doamaa nɛ a n gɔn bɔ a ganaa a woo, a din laanka a nɛnyaanan nɛ.

⁵⁵A giala, Izirayeli minin lɛn man masɛ din a dí-nyalin lɛa. Maǹ masɛ din a dí-nyalin lɛa, a giala, ma din ni má ǹ waa, má ǹ bɔ Ezipti gána nɛ. Masɛ din Dɛnaa Lawa n kaa Lawa lɛa.