Read Samo, Southern LWS 4 Bible Online

LWS 4 - Samo, Southern bible

LWS 4

¹Dɛnaa Lawa boo da ka Muizu ni á pɛ nɛ:

²A pɛ Izirayeli minin lɛn manɛ: Dɛnaa Lawa a gɔn waa ǹ boon bɛ́ pii mà ka baran sii mɛn tumaa zɛnaa wa, ta min na á sã á bɛa goon dinsɔɔ̃ zɛnaa, ǹ dɛnaa na á sii baraa zɛnaa. Bɛa yɔrɔ bɔ ǹ gɔn nə́ ke:

³Min mɛn bɛ́, ǹ nə́ bɔ ǹ nə́ koa wúlu-bɔlen kiã lɛa, bɛ̀ bɛ́ sii baraa zɛnaa, a na á zɛ̀rɛ saa á zaman lɛ tumaa gɔ nɛ. A sii baraa mɛn zɛnaa, a doamaa nɛ a dii gɔ̀lɔ̀ bɔ, wɔ̀lɔ̀ ná a ba a ganaa wa, a kɔ Dɛnaa Lawa la sii baraa lɛ a sawaa ǹ *wúlu màn lɛa.

⁴A wo ka dii gɔ̀lɔ̀ lɛ-n kɔn yɛ ǹ kion kɛa kiɛnlɛ-a bɔrɔ, Dɛnaa Lawa yɔrɔ-a. A n gɔn da dii gɔ̀lɔ̀ lɛ mìi ni, a tɔn na a bɔlɔ kuru walan Dɛnaa Lawa yɔrɔ-a.

⁵Bɛ kio, ǹ wúlu-bɔle mɛn lɛ bɔ ǹ nə́ koa, bɛ dii gɔ̀lɔ̀ mà lɛ kɔn si, a wo ne kɔn yɛ ǹ kion lɛ nɛ.

⁶A n gòon sã bɛa mà lɛ li, kion bii kuru kɔn-a ǹ mɔnaa kɛa paǹ mɛn bɛ́ dia-n kanaa la, bǎã sonbore kɛ nɛ, a pɛsɛ̃ bɛ ganaa gunyin sɔbaa Dɛnaa Lawa yɔrɔ-a.

⁷Da yon gìĩ kɔɔ̃n tã ǹ bǎã mɛn dɔ bɛ́ kɔn yɛ ǹ kion kɛ nɛ, Dɛnaa Lawa yɔrɔ-a, a mà lɛ kɔn lɔ bɛ dɔ a karan ganaa. Dii mà lɛ a gialakun kɛ tumaa, a wo bɛ kaa tán wúlu màn tã ǹ bǎã kɛ genli, ǹ mɛn lɛ bɛ́ kɔn yɛ ka Lawa nɛ ǹ kion lɛ a kiɛnlɛ-a.

⁸A dii gɔ̀lɔ̀ mɛn dɛ a sii baraa lɛ taman yii, a na a gɔ́ɔ̃gɔ́ɔ̃ ǹ nyɔɔ tumaa waa, ǹ mɛn tumaa bɛ́ pɛnɛɛ nɛ a nàn ganaa,

⁹a dɔ̀ɔ̃ koron màn paa kɛ laanka nyɔɔ mɛn bɛ́ doa-n kɔn nɛ, nyɔɔ mɛn dɔ bɛ́ a kolon li, ka a foo lɛwɔn nɛ, ka bɛ bɔ kun ka a dɔ̀ɔ̃ koronən lɛn nɛ.

¹⁰Bɛ̀ ǹ nə́ dii gɔ̀lɔ̀ baa barka da Lawa nɛ ǹ wúlu màn lɛa, ǹ bɛ́ màn mɛn tumaa boe bɛ nɛ, wúlu-bɔlen kiã lɛ bɛ lɛ miã bɔ a sii baraa sawaa ǹ wúlu màn lɛ dɔ nɛ, a tã *wúlu bɔ ǹ bǎã kɛ nɛ.

¹¹Bɛ kio, dii gɔ̀lɔ̀ lɛ a siĩ mɛn tumaa goã, a ki ni, a mìi ni, a gòãn nɛ, a nàn laanka a gɔ́ɔ̃gɔ́ɔ̃ ǹ mànan nɛ, a wo ka bɛn nɛ bǎã *yoreen kɛ nɛ, giã ǹ bǎã lɛ kio, ǹ bɛ́ wúlu bɔ ǹ bǎã lɛ a ton kiɛ bǎã mɛn nɛ. Ǹ nə ǹ zũ gɔn tɛ nɛ walan. Ǹ doamaa nɛ, ǹ nə ǹ tã bɛa bǎã lɛ nɛ.

¹³Bɛ̀ Izirayeli zaman lɛ tumaa na á sã á sii baraa zɛnaa, Dɛnaa Lawa a gɔn waa ǹ boon bɛ́ pii mà ǹ baran sii mɛn tumaa zɛnaa wa, bɛ̀ ǹ nə́ bɛa goon dinsɔɔ̃ zɛnaa, haalɛ ta ǹ dɔ̃ wa, ǹ zɛ̀rɛ nɛ.

¹⁴Bɛ̀ zaman lɛ daa á bɔ a siére-a, mà asɛ na á sii baraa zɛnaa, ǹ dii gɔ̀lɔ̀ goon bɔ sii baraa sawaa ǹ wúlu màn lɛa. Ǹ wo ka dii gɔ̀lɔ̀ lɛ nɛ kɔn yɛ ǹ kion kɛ yɔrɔ-a,

¹⁵zaman lɛ a min golen nə ǹ gɔn dada a mìi-n walan, min goon tɔn na a bɔlɔ kuru Dɛnaa Lawa yɔrɔ-a.

¹⁶Bɛ kio, ǹ wúlu-bɔle mɛn lɛ bɔ ǹ nə́ koa, bɛ dii gɔ̀lɔ̀ mà lɛ kɔn bɔ, a wo ne kɔn yɛ ǹ kion lɛ nɛ.

¹⁷A n gòon sã bɛa mà lɛ li, Dɛnaa Lawa yɔrɔ-a, kion bii kuru kɔn-a ǹ mɔnaa kɛa paǹ mɛn bɛ́ dia-n kanaa la, a pɛsɛ̃ bɛ ganaa gunyin sɔbaa Dɛnaa Lawa yɔrɔ-a.

¹⁸Wúlu bɔ ǹ bǎã mɛn bɛ́ kɔn yɛ ǹ kion lɛ nɛ, Dɛnaa Lawa yɔrɔ-a, a mà lɛ kɔn lɔ bɛ dɔ a bìbìn ganaa. Dii mà lɛ a gialakun kɛ tumaa, a wo bɛ kaa tán wúlu bɔ ǹ bǎã lɛ genli, ǹ mɛn lɛ bɛ́ kɔn yɛ ka Lawa nɛ ǹ kion lɛ a kiɛnlɛ-a.

¹⁹A dii gɔ̀lɔ̀ lɛ a nyɔɔ tumaa waa, a tã wúlu bɔ ǹ bǎã kɛ lalan.

²⁰A dii gɔ̀lɔ̀ mɛn dɛ a din a sii baraa taman yii, a bɛ́ á bɛ baa lɔn, a kɛ lɛ dɔ baa miɛ̃. Wúlu-bɔle lɛ doamaa nɛ, a ǹ sii baraa sawaa ǹ wúlu bɔ miɛ̃, Lawa á die ǹ sii baraan toɛ ǹ nɛ.

²¹Dii gɔ̀lɔ̀ lɛ a siĩ mɛn goã, a wo ka bɛ nɛ giã ǹ bǎã kɛ kio, a tã ka a bɛ́ á bibinaa wɔ lɛ tã lɔn. Zaman lɛ a sii baraa sawaa ǹ wúlu màn nə ka bɛ nɛ.

²²Bɛ̀ goledɛnaa na á sii baraa zɛnaa, Dɛnaa Lawa mɛn bɛ́ a Lawa lɛa, bɛa gɔn waa ǹ boon lɛn bɛ́ pii mà ǹ baran sii mɛn tumaa zɛnaa wa, ta a na á sã á bɛn goon dinsɔɔ̃ zɛnaa, a zɛ̀rɛ nɛ.

²³A sii baraa mɛn zɛnaa, bɛ̀ min yɛ á pɛ nɛ, goledɛnaa lɛ doamaa nɛ a butumu bɔ, wɔ̀lɔ̀ ná a ba a ganaa wa.

²⁴A n gɔn da butumu lɛ mìi ni, a tɔn na a bɔlɔ kuru wúlu màn tiɛ̃ kɛa tɔɔ dɛ ǹ bǎã nɛ, Dɛnaa Lawa yɔrɔ-a. Sii baraa sawaa ǹ wúlu màn nɛ.

²⁵Wúlu-bɔle lɛ goon nə n gòon sã bɛa tɔɔ lɛ a mà li, á lɔ wúlu bɔ ǹ bǎã kɛ karan ganaa. Bɛ kio, a tɔn mà lɛ a gialakun kɛ kaa tán wúlu bɔ ǹ bǎã lɛ genli.

²⁶Tɔɔ lɛ a nyɔɔ tumaa, a bɛ tã wúlu bɔ ǹ bǎã kɛ lalan, ka a bɛ́ á barka da Lawa nɛ ǹ wúlu màn lɛ wɔ baa lɔn. Wúlu-bɔle lɛ doamaa nɛ, a goledɛnaa lɛ a sii baraa sawaa ǹ wúlu bɔ miɛ̃, Lawa á die a sii baraa lɛ toɛ nɛ.

²⁷ Bɛ̀ gána lɛ a min kɔsɔ mɛn na á sã á sii baraa zɛnaa, Dɛnaa Lawa a gɔn waa ǹ boon lɛn bɛ́ pii mà ǹ baran sii mɛn tumaa zɛnaa wa, bɛ̀ a na á sã á bɛn goon dinsɔɔ̃ zɛnaa, a zɛ̀rɛ nɛ.

²⁸A sii baraa mɛn zɛnaa, bɛ̀ min yɛ á pɛ nɛ, a doamaa nɛ a bòe dan bɔ a sii baraa lɛ taman yii, sɛnɛ, wɔ̀lɔ̀ nyan goã a ganaa wa.

²⁹A n gɔn da bɛa tɔɔ lɛ mìi ni, a tɔn na a bɔlɔ kuru wúlu màn tiɛ̃ kɛ a tɔɔn dɛ ǹ bǎã nɛ.

³⁰Wúlu-bɔle lɛ goon nə n gòon sã a mà li, a lɔ wúlu bɔ ǹ bǎã lɛ karan ganaa. Bɛ kio, a tɔn mà lɛ a gialakun kɛ tumaa kaa tán wúlu bɔ ǹ bǎã lɛ genli.

³¹A tɔɔ lɛ a nyɔɔ tumaa waa, ka a bɛ́ á barka da Lawa nɛ ǹ wúlu màn lɛ wɔ waa lɔn. Wúlu-bɔle lɛ bɛ tã wúlu bɔ ǹ bǎã lɛ nɛ, wúlu màn lɛa, a tɛmaa gìĩ n kɔɔ̃n Dɛnaa Lawa ganaa. Wúlu-bɔle lɛ sii baraa zɛnaali lɛ a sii baraa sawaa ǹ wúlu bɔ miɛ̃, Lawa á die a sii baraa toɛ nɛ.

³²Bɛ̀ ǹ dɛnaa n li a da ka sère ne, a sii baraa lɛ a sawaa ǹ wúlu màn lɛa, a doamaa nɛ a da ka sère dan nɛ, wɔ̀lɔ̀ ná a ba a ganaa wa.

³³A n gɔn da bɛa tɔɔ lɛ mìi ni, a tɔn na a bɔlɔ kuru a sii baraa a lɛa, wúlu màn tiɛ̃ kɛ a tɔɔn dɛ ǹ bǎã nɛ.

³⁴Wúlu-bɔle lɛ goon nə n gòon sã tɔɔ lɛ a mà li, a lɔ wúlu bɔ ǹ bǎã kɛ karan ganaa. Bɛ kio, a tɔn mà lɛ a gialakun kɛ tumaa kaa tán wúlu bɔ ǹ bǎã lɛ genli.

³⁵Á tɔɔ lɛ a nyɔɔ tumaa waa, ka ǹ bɛ́ ǹ nə́ barka da Lawa nɛ ǹ sère nɛ lɛ wɔ waa lɔn. Wúlu-bɔle lɛ bɛ tã wúlu bɔ ǹ bǎã lɛ nɛ, kun ka Dɛnaa Lawa gɔ ǹ wɔ kɛ nɛ, bɛ̀ ǹ tã. Wúlu-bɔle lɛ doamaa nɛ a sii baraa zɛnaali a sii baraa sawaa ǹ wúlu bɔ miɛ̃, Lawa á die a sii baraa lɛ toɛ nɛ.