Read Samo, Southern LWS 5 Bible Online

LWS 5 - Samo, Southern bible

LWS 5

¹Bɛ̀ min na á sii yɛ a yii ni, hinlaa a na á ma, bɛ kio, ǹ bɛ́ sii lɛ a kiri we, bɛ̀ a lɛ kɔ a ná a taãn pɛ wa, ǹ dɛnaa na á sii baraa zɛnaa. A din tá re n toɛ̃ ka a sii baraa a guĩ ni.

²Màn woo màn tá gɔgɔrɛ, bɛ̀ min nə́ n gɔn da bɛ ganaa a ná a dɔ̃ wa, ta don màn gɔgɔrɛ gere ne, ta tɔɔ màn hinlaa màn baaran gɔgɔrɛ gere ne, bɛa dɛnaa na á *gɔ̀ da a din ganaa, á dɔlɔ da a din mìi ni.

³Gɔ̀ mɛn tumaa bɛ́ n bɔyɛɛ min li, bɛ̀ bɛ tá minbuiin nɛ mɛn ganaa, bɛ̀ min nə́ n gɔn da bɛ ganaa a ná a dɔ̃ wa, bɛ̀ á daa á dɔ̃ ǹ mɛn pinaa, a dɔlɔ na a mìi ni.

⁴Bɛ̀ min lɛ sã á n liɛ a ná a n taasɛ wa, ta sii mɛn din ni, min a là ta a-n hinlaa a là ba a-n wa, bɛ̀ á daa á dɔ̃ ǹ mɛn pinaa, a dɔlɔ na a mìi ni.

⁵Bɛ̀ min mɛn zɛ̀rɛ n ka bɛa sii kɛ lɛ mɛn nɛ, a sii baraa mɛn zɛnaa, a doamaa nɛ a golee bɛ li.

⁶A sii baraa mɛn zɛnaa, a doamaa nɛ a sère hinlaa bòe dan bɔ bɛa lɛa, a kɔ Dɛnaa Lawa la, a sii baraa lɛ a sawaa ǹ *wúlu màn lɛa. Lawa a wúlu-bɔle lɛ doamaa nɛ, a bɛ lɛ dɛ a sii baraa lɛ a sawaa ǹ wúlu màn lɛa.

⁷Bɛ̀ min mɛn ba boe la, á n doe sère hinlaa bòe ganaa á n koe a sii baraa sawaa ǹ wúlu màn lɛ a wa, á boe la a da wuruun màn paa hinlaa zɛrɛkantoan màn paa kɔ Dɛnaa Lawa la. Goon na a sii baraa sawaa ǹ wúlu màn baa, goon kɛ wúlu màn tiɛ̃ baa.

⁸A wo ǹ kɔ wúlu-bɔle lɛ la. Ǹ mɛn bɛ́ sii baraa sawaa ǹ wúlu màn lɛa, wúlu-bɔle lɛ bɛ bɔ bɔrɔ, a na a wìi yiɛ, sɛnɛ, a baran a mìi na a bɔ a ganaa wa.

⁹A wúlu màn lɛ a mà kɔn pɛsɛ̃ *wúlu bɔ ǹ bǎã lɛ wàãn ganaa, a na a mà gialakun kɛ kaa tán wúlu bɔ ǹ bǎã lɛ genli. Sii baraa sawaa ǹ wúlu màn nɛ.

¹⁰Bàan lɛ a paabaa ǹ wɔ ke, a bɛ tã wúlu màn lɛa, a kɔnpɛ ka a zɛnaa ǹ gɔn nɛ. Lawa a wúlu-bɔle lɛ doamaa nɛ a bɛa dɛnaa lɛ a sii baraa sawaa ǹ wúlu bɔ miɛ̃, Lawa tɔn na a sii baraa lɛ toa nɛ.

¹¹Bɛ̀ min mɛn dɔ a boe la á doe wuruun màn paa hinlaa zɛrɛkantoan màn paa lɛ ganaa á n koe a sii baraa sawaa ǹ wúlu màn lɛa wa, á boe la dinin a da ka wùsu nɔnɔɔ kilo sii ni, a sii baraa sawaa ǹ wúlu màn lɛa. Sɛnɛ, a baran nyɔɔ kaa li wa, a baran da yon gìĩ kɔɔ̃n da la wa. A giala, sii baraa sawaa ǹ wúlu màn nɛ.

¹²A wo bɛa wùsu lɛ kɔ wúlu-bɔle la, bɛ nə n gɔn pã a nɛ, yiri gisĩ sii ni ǹ màn lɛa, a tã wúlu bɔ ǹ bǎã kɛ nɛ, kun ka wúlu màn gialakunun kɛn nɛ, ǹ nə́ ǹ tiɛ̃ Dɛnaa Lawa wɔn lɛa. Sii baraa sawaa ǹ wúlu màn nɛ.

¹³Wúlu-bɔle lɛ doamaa nɛ a sii baraa zɛnaali lɛ a sii baraa sawaa ǹ wúlu bɔ miɛ̃, Lawa dɔ á re a sii baraan toɛ nɛ. Wúlu-bɔle lɛ doamaa nɛ a bɛa wúlu lɛ a sii yɔrɔ bɔ ka a bɛ́ á Lawa gɔ ǹ wɔ kɛ a sii yɔrɔ bɔ lɔn[1].

¹⁴Dɛnaa Lawa wusoo á boo da ka Muizu ni, á pɛ nɛ:

¹⁵Bɛ̀ min mɛn sã á woo Dɛnaa Lawa gɔn màn wɔlɔ li, ǹ dɛnaa na á sii babaraa zɛnaa. Ǹ dɛnaa doamaa nɛ a sère gɔ̀lɔ̀ bɔ a tɔɔn bii, wɔ̀lɔ̀ ná a ba a ganaa wa, a da kɔ Dɛnaa Lawa la. Sère gɔ̀lɔ̀ lɛ giɔ̀mɔ doamaa nɛ a wɔrɔ giala garamu lɛ kɔn bɔ, a n kɔnpii ka kion sonbore kɛ a màn zɔɔ̃ ǹ wɔ nɛ. Bɛa sère gɔ̀lɔ̀ lɛ n zɛ̀rɛ si ǹ wúlu màn lɛa.

¹⁶A màn mɛn saa Lawa a kion lɛ nɛ, a doamaa nɛ a bɛ saraa, a wusoo a na a talakɔn sooro goon ti a ganaa, a kɔ Lawa a wúlu-bɔle la. Bɛ̀ Lawa a wúlu-bɔle lɛ ná a zɛ̀rɛ si Lawa la ǹ wúlu bɔ ka bɛa sère gɔ̀lɔ̀ lɛ nɛ, Lawa á die a sii baraa toɛ nɛ.

¹⁷Dɛnaa Lawa a gɔn waa ǹ boon bɛ́ pii mà ǹ baran sii mɛn tumaa zɛnaa wa, ta min na á bɛa goon toto dinsɔɔ̃ zɛnaa, ǹ dɛnaa na á sii baraa zɛnaa. Haalɛ ta a dɔ̃ wa, a zɛ̀rɛ nɛ, a sii baraa na a mìi ni.

¹⁸Ǹ dɛnaa doamaa nɛ, a sère gɔ̀lɔ̀ bɔ a tɔɔn bii, a giɔ̀mɔ n zɛ̀rɛ si ǹ wúlu màn kɛ wɔ boe, a da kɔ Lawa a wúlu-bɔle la. A sã á sii baraa mɛn lɛ zɛnaa a ná a dɔ̃ wa. Bɛ̀ wúlu-bɔle lɛ ná a sii baraa sawaa ǹ wúlu bɔ, Lawa á re a sii baraa toɛ nɛ.

¹⁹Zɛ̀rɛ si ǹ wúlu màn nɛ. A giala, ǹ dɛnaa lɛ na á sii la Dɛnaa Lawa la a giala yii li.

²⁰ Dɛnaa Lawa wusoo á boo da ka Muizu ni, á pɛ nɛ:

²¹Min bɛ́ sii baraa kɔsɔ mɛn zɛnɛɛ a wɔ Dɛnaa Lawa lon ne, bɛ n ka kɛ nɛ: n miã na á màn kɔ n la mà n koa. A laadoo bɛ́ á dɔ a ganaa, n soɛ bɔ, mà a màn koa nsɛ li wa; n wo màn dɔnbii min la, bɛ kio, n nə n piã, mà a màn kɔn ba nsɛ gɔn wa; n nə n miã a màn koã, hinlaa, n si la ka pàã nɛ, n wusoo n soɛ bɔ, mà a ba nsɛ gɔn wa;

²²n miã a màn papaã n saa, n nə́ n ba lɛ koe n tá nyɛɛ-n wa. Bɛa zɛnaa ǹ siin kɛn lɛn tumaa n sii baraa lɛa. Bɛ̀ min ná a goon zɛnaa á wusoo á n liɛ á da bɛ la, ǹ dɛnaa na á soɛ bɔ.

²³Bɛ̀ min bɛa sii baraa lɛ zɛnaa, ǹ dɛnaa zɛ̀rɛ nɛ. A màn mɛn koã, a ǹ mɛn si ǹ miã la ka pàã nɛ, ǹ nə ǹ mɛn kɔ la mà a koa a li, hinlaa màn mɛn papaã á yɛ á saa, a doamaa nɛ a saraa,

²⁴kun ka a bɛ́ á n liɛ soɛ la màn mɛn tumaa wɔ paǹ li. Bɛ̀ á ná a din zɛ̀rɛ dɔ̃ ǹ mɛn pinaa gɔrɔ[2], a doamaa nɛ a na a tumaa saraa, a na a giɔ̀mɔ a talakɔn sooro goon da la, a kɔ màn lɛ a dɛnaa taãn la.

²⁵A doamaa nɛ a sère gɔ̀lɔ̀ bɔ a tɔɔn bii, wɔ̀lɔ̀ ná a ba a ganaa wa, a giɔ̀mɔ n zɛ̀rɛ si ǹ wúlu màn kɛ wɔ boe, a da kɔ wúlu-bɔle la, a zɛ̀rɛ si Lawa la ǹ màn lɛa.

²⁶Ta a zɛ̀rɛ n ka sii woo sii ni, bɛ̀ Lawa a wúlu-bɔle lɛ ná a sii baraa sawaa ǹ wúlu bɔ Dɛnaa Lawa yɔrɔ-a, Lawa dɔ na a sii baraan toɛ nɛ.