Read Samo, Southern LWS 7 Bible Online

LWS 7 - Samo, Southern bible

LWS 7

¹Zɛ̀rɛ si Lawa la ǹ wúlu lɛ a bɔ ǹ gɔn nə́ ke: Dɛnaa Lawa dinsɔɔ̃ a màn nɛ.

²Ǹ bɛ́ *wúlu màn tiɛ̃ kɛ a tɔɔ dii bǎã mɛn nɛ, ǹ doamaa nɛ, ǹ zɛ̀rɛ si Lawa la ǹ wɔ lɛ dɔ a tɔɔ dɛ walan, ǹ na a mà pɛpɛsɛ̃ *wúlu bɔ ǹ bǎã lɛ wàãn tumaa ganaa.

³A nyɔɔ bǎã kɛ tumaa, Lawa a wúlu-bɔle lɛ doamaa nɛ, a da ka bɛ nɛ Dɛnaa Lawa yɔrɔ-a bɔrɔ: a muigoã nɛ, a nyɔɔ mɛn tumaa bɛ́ pɛnɛɛ nɛ a nàn ganaa,

⁴a dɔ̀ɔ̃ koron màn paa kɛ laanka nyɔɔ mɛn bɛ́ doa-n kɔn, nyɔɔ mɛn dɔ bɛ́ a kolon li, a foo lɛwɔn nɛ, ǹ bɛ bɔ kun ka a dɔ̀ɔ̃ koronən lɛn nɛ.

⁵Bɛ kio, Lawa a wúlu-bɔle bɛa mànan lɛn tã wúlu bɔ ǹ bǎã nɛ. Zɛ̀rɛ si Dɛnaa Lawa la ǹ wúlu màn nɛ, ǹ nə́ tã Dɛnaa Lawa wɔ lɛa.

⁶Giĩ mɛn tumaa bɛ́ Lawa a wúlu-bɔlen kion min lɛa, bɛn tá boe la, ǹ na a siĩ sɔ̃. Sɛnɛ, ǹ bǎã mɛn bɔ ǹ nə́ koa Lawa wɔ lɛa, a doamaa nɛ a n sɔ̃ walan, a giala, Lawa dinsɔɔ̃ a màn nɛ.

⁷Sii baraa sawaa ǹ wúlu bɛ́ n boe lɔn, zɛ̀rɛ si Lawa la ǹ wɔ lɛ dɔ nə n boe miɛ̃. Ǹ dinin paanan a zɛnaa ǹ gɔn nə goon. Wúlu-bɔle mɛn sii baraa sawaa ǹ wúlu lɛ bɔ, tɔɔ lɛ a siĩ n doe bɛ ganaa.

⁸Wúlu-bɔle mɛn dɔ bɛ́ min a wúlu màn tiɛ̃, tɔɔ lɛ a ki n doe wúlu-bɔle lɛ ganaa a wɔ lɛa.

⁹Lawa gɔ ǹ màn mɛn tumaa bɛ́ ǹ nə́ kɔrɛ kùsì la, hinlaa fɔlɔ donkolon ne, hinlaa màn kɔrɛ ǹ fɔlɔ kɛ la, bɛ tumaa n doe wúlu-bɔle ganaa, ǹ mɛn bɛa wúlu lɛ bɔ.

¹⁰Lawa gɔ ǹ màn mɛn bɛ́ ǹ nə́ yia ka nyɔɔ nɛ, hinlaa ta a geremaa nɛ, bɛ nə n gii Aarɔn a nɛgiĩn lɛn bii, ǹ tumaa wɔ gii goã goon.

¹¹Barka da ǹ wúlu màn mɛn bɛ́ ǹ tá koe Dɛnaa Lawa la, bɛa bɔ ǹ gɔn nə́ ke:

¹²Bɛ̀ barka da Lawa nɛ ǹ wúlu ni ǹ tá boe, ka buuru da ka nyɔɔ nɛ, yɔ bù ná a ba li wa, ka mɔ̀mɔ dɔ zɛnaa yɔ bù ná a ba li wa, sɛnɛ, ka nyɔɔ kaa a ganaa a bɔ, ka *wùsu sonbore dɔ yia, ka paparɛ nyɔɔ li.

¹³Buuru mɛn dɔ bɛ́ yɔ bù n li, ka da ka bɛ nɛ, ka ǹ kaa kun ka barka da Lawa nɛ ǹ wúlu màn lɛ nɛ.

¹⁴Ka n bɛa buuru tɔrɔn lɛn gogoonmaa boe Dɛnaa Lawa wɔ lɛa. Wúlu-bɔle mɛn barka da Lawa nɛ ǹ wúlu màn lɛ a mà pɛsɛ̃ wúlu bɔ ǹ bǎã lɛ wàãn ganaa, buuru lɛ n doe bɛ ganaa.

¹⁵Ǹ barka da Lawa nɛ ka tɔɔ màn mɛn lɛ nɛ, a siĩ nə n soɛ̃ a din pinaa. Ǹ doamaa bie ǹ na a pàn kɔn koa, lɛ̀ wo waa a ganaa wa.

¹⁶Bɛ̀ min na a lɛ kɔ Lawa la lɛ piɛ̃ ka wúlu màn mɛn nɛ, hinlaa ta a din dùũ wɔ nɛ, a siĩ nə n soɛ̃ a din pinaa. Sɛnɛ bɛ̀ a gialakun goã, ǹ tá boe la, ǹ bɛ sɔ̃ a lɛawaa.

¹⁷Sɛnɛ, bɛ̀ wúlu siĩ lɛ a kɔsɔ wusoo á n si á goã bɛ kio, a lɛawaa sɔɔbaa ǹ wɔ pinaa, ǹ da tɛ-n, ǹ tã lenlen.

¹⁸A lɛawaa sɔɔbaa ǹ wɔ pinaa, bɛ̀ ǹ dɛnaa nə́ n tã la, á ná a barka da Lawa nɛ ǹ wúlu màn lɛ a siĩ sɔ̃, Lawa ba a lɛ sii doo wa. Bɛa dɛnaa a wúlu màn na á ziziɛ̃. Bɛ̀ min mɛn dɔ́ bɛa siĩ lɛ sɔ̃, bɛa dɛnaa a sii baraa a dɔlɔ na a din mìi ni.

¹⁹*Gɔ̀ bɛ́ màn mɛn ganaa, bɛ̀ siĩ lɛ nə́ n lɔ bɛ ganaa, ǹ doamaa bie ǹ sɔ̃ doo wa. Sɛnɛ, ǹ doamaa nɛ, ǹ da tɛ-n ǹ tã lenlen. Yǎa ǹ goɛ̃ yoreene landa wɔ paǹ li, ǹ tɔn wúlu bɔ ǹ siĩ lɛ soɛ̃.

²⁰Sɛnɛ, bɛ̀ min gɔ̀ toa a din ganaa, á barka da Lawa nɛ ǹ wúlu màn lɛ a siĩ sɔ̃, bɛ mɛn bɛ́ Dɛnaa Lawa wɔ lɛa, ǹ bɛa dɛnaa bɔ ǹ bɔ Izirayeli tɔrɔbaa nɛ.

²¹Màn woo màn, gɔ̀ ná a ganaa, ta minbuiin nɛ nɛ, ta tɔɔ nɛ gɔ̀ ná a ganaa, hinlaa ta màn gɔgɔrɛ mɛn tɔrɔ nɛ, bɛ̀ min nə́ n gɔn da bɛ ganaa, á wusoo á barka da Lawa nɛ ǹ wúlu màn kɛ a siĩ sɔ̃, bɛ mɛn bɛ́ Dɛnaa Lawa wɔ lɛa, ǹ bɛa dɛnaa bɔ ǹ bɔ Izirayeli tɔrɔbaa nɛ.

²²Dɛnaa Lawa wusoo á boo da ka Muizu ni á pɛ nɛ:

²³A pɛ Izirayeli minin lɛn manɛ: Ka nyan toa ka màn nyɔɔ kɔn wɔ ka lɛ-n wa. Ta dii wɔ nɛ, ta sère wɔ nɛ, ta bòe wɔ nɛ.

²⁴Tɔɔ mɛn gã a din li, bɛ laanka don mànan bɛ́ ǹ nə́ ǹ mɛn dɛ, ka nyan toa, ka bɛa nyɔɔ wɔ ka lɛ-n wa. Sɛnɛ, ka á boe la, ka dí kɔsɔ tɔrɔ tumaa nya ka a nyɔɔ lɛ nɛ.

²⁵Bɛ̀ min wúlu bɔ ka tɔɔ mɛn nɛ, á ná a siĩ kɔn tã Dɛnaa Lawa wɔ lɛa, bɛ̀ min mɛn bɛa nyɔɔ wɔ a lɛ-n sɛn, ka bɛa dɛnaa bɔ ka bɔ Izirayeli tɔrɔbaa nɛ.

²⁶ Màn mà tumaa, ta bàan mà nɛ, ta tɔɔ mà nɛ, ta ka n giã-n bǎã mɛn nɛ, ka nyan toa bɛ kɔn a mà wɔ ka lɛ-n wa.

²⁷Màn mà woo màn mà, bɛ̀ min mɛn wɔ a lɛ-n, ka bɛa dɛnaa bɔ ka bɔ Izirayeli tɔrɔbaa nɛ.

²⁸Dɛnaa Lawa wusoo á boo da ka Muizu ni á pɛ nɛ:

²⁹A pɛ Izirayeli minin lɛn manɛ: Bɛ̀ min mɛn tá die barka da ǹ wúlu màn koe Dɛnaa Lawa la, a paǹ mɛn bɛ́ doe Dɛnaa Lawa lɛ ganaa, a da bɛ kɔ la.

³⁰Ka bɛ́ re wúlu màn lɛ a paǹan mɛnɛn tiɛ̃ Dɛnaa Lawa wɔ lɛa, a nyɔɔ bǎãn kɛn lɛn, yǎa ǹ dɛnaa dinmaa gɔn die ka bɛn nɛ. A da ka a tìãbii bǎã kɛ dɔ nɛ. Ka doamaa nɛ, ka bɛa kɔ Lawa la ǹ sii zɛnaa Dɛnaa Lawa yɔrɔ-a.

³¹Lawa a wúlu-bɔle bɛa nyɔɔ bǎãn lɛn tã wúlu bɔ ǹ bǎã lɛ lalan. Sɛnɛ, a tìãbii kɛ n Aarɔn laanka a nɛgiĩn wɔ lɛa.

³²Ǹ nə ǹ barka da Lawa nɛ ǹ wúlu màn lɛ a gusin a gisi bɔ ǹ kɔ Lawa a wúlu-bɔle lɛ dɔ la.

³³Aarɔn a nɛgiĩn lɛn mɛn bɛ́ re barka da ǹ wúlu lɛ boe ka tɔɔ lɛ a mà laanka a nyɔɔ nɛ, tɔɔ lɛ a gisi lɛ n doe bɛ ganaa.

³⁴A giala, tɔɔ lɛ a tìãbii kɛ laanka a gisi ke, ǹ nə́ barka da Lawa nɛ ǹ wúlu bɔ nɛ, masɛ bɛn si Izirayeli minin lɛn la, má ǹ kɔ Aarɔn laanka a nɛgiĩn la, ǹ wɔ gii lɛa yǎa duduu.

³⁵Aarɔn laanka a nɛgiĩn lɛn wɔ gii n ka bɛ nɛ, Dɛnaa Lawa a wúlu mànan lɛn gɔ́ɔ̃ nɛ. Bɛ̀ ka ǹ koa Dɛnaa Lawa a wúlu-bɔlen lɛa ǹ mɛn pinaa gɔrɔ, bɛ lɛ n doe ǹ ganaa.

³⁶Dɛnaa Lawa na á pɛ Izirayeli minin lɛn manɛ, bɛ̀ Aarɔn a nɛgiĩn lɛn nə́ wúlu-bɔlen baa ǹ mɛn pinaa gɔrɔ, ka bɛ lɛ kɔ ǹ la ǹ wɔ gii lɛa. Bɛ n landa lɛa ka mìi ni miɛ̃ duduu, kaa tɔrɔn tumaa wɔ lɛa, a ná a ba n bɔyɛɛ wa.

³⁷Wúlu màn tiɛ̃ nɛ, Lawa gɔ ǹ màn nɛ, sii baraa sawaa ǹ wúlu ni, zɛ̀rɛ si Lawa la ǹ wɔ nɛ, wúlu-bɔlen koa ǹ wɔ nɛ, ka barka da Lawa nɛ ǹ wɔ nɛ, ǹ bɔ ǹ gɔn lɛ n ka bɛ nɛ.

³⁸Dɛnaa Lawa bɛ́ á pɛ Izirayeli minin lɛn manɛ ǹ mɛn pinaa Sinayii kele la, mà ǹ da wúlu mànan kɔ asɛ la, a na á bɛa wúlun kɛn lɛn dɔn bɔ ǹ gɔn nyaa Muizu-n bɛ lɛ a pinaa, Sinayii kele la.