Read Samo, Southern Zer 1 Bible Online

Zer 1 - Samo, Southern bible

Zer 1

¹Ilkia a nɛgiĩ Zeremii boo mɛn da, bɛn man kiɛ̃ nɛ sɛ́wɔ kɛ nɛ. Zeremii na á goã Lawa a wúlu-bɔlen kion min lɛa, ǹ nə́ giã nɛ Anaatɔti, Bɛnzamɛn a tanlɛ minin gána nɛ.

² Amɔn a nɛgiĩ Zoziasi a kiibaa lɛ̀ fulusɔɔbaa ǹ wɔ li Zudaa gána mìi la, Dɛnaa Lawa boo da Zeremii ni.

³ Á wusoo á boo da-n doo Zoziasi a nɛgiĩ Zoakimu a kiibaa biikoo li Zudaa mìi la. Á boo da-n miɛ̃ yǎa Zoziasi a nɛgiĩ Sedekiasi a kiibaa lɛ̀ fulugoonbaa ǹ wɔ a mui soorobaa ǹ wɔ giala nyɔmɔɔ waáraa. A din biikoo lɛ nɛ, ǹ nə́ Zeruzalɛmu minin goa ǹ nə́ woo ǹ ne bɛ̀rɛbaa ǹ bǎã nɛ.

⁴Dɛnaa Lawa boon mɛnɛn pɛ ma nɛ, ǹ nə́ ke:

⁵«Ma laan bɛ̀ ma n da n dan gɔ́ɔ̃ nɛ, bɛ̀ ma tá n doɛ̃. N laan bɛ̀ n yɛ, má n bɔ má n koa, máa n maa dí nya, n maa boo gii-dali baa tɔrɔn bii.»

⁶Má a lɛ si kɛnɛn: «Ebe, Dɛnaa Lawa, ma a boe boo diɛ la wa. Ma yii á kiɛɛrɛ á la yii ni.»

⁷Sɛnɛ, Dɛnaa Lawa pɛ ma nɛ: «N nyan pɛ mà n yii á kiɛɛrɛ á la yii-n wa.» Ma bɛ́ re n diɛ bǎã mɛn tumaa nɛ, n tá re woe. Ma bɛ́ re boo mɛn diɛ n nɛ, n tá re woe bɛ pii.

⁸N baran nyɛ́ɛ baa ǹ nɛ wa, ma á kunun n ni, ma n kirisibaa. Dɛnaa Lawa a da ǹ boo ne.

⁹Bɛ kio, Dɛnaa Lawa nə n gɔn saa á da ma lɛ ganaa, á pɛ: «Man maa boo we n lɛ-n.»

¹⁰A dɔ̃ mà pelo, mà man pàã koe n la, tɔrɔn laanka gánan mìi la: N tá re màn woɛ̃, n màn dɛ n kaa. N tá re ziziɛ̃, n wuru. N tá re doe, n zumu.

¹¹Dɛnaa Lawa boo da ma nɛ, á pɛ: «Zeremii, n yii n wàa ganaa?» Má a lɛ si: «Ma yii n amandie da gùrù ganaa, da mɛn lɛ yii bɛ́ fuu nɛ kɔ li.»

¹²Dɛnaa Lawa pɛ ma nɛ: «N yɛ parɛ! Bɛ n nyɛɛ mà ma á re maa da ǹ boo kɛ lɛ piɛ̃ fufuu.»

¹³Ka a paabaa ǹ wɔ nɛ, Dɛnaa Lawa boo da ma nɛ, á pɛ: «Kanna kəni, n yii n wàa ganaa?» Má a lɛ si kɛnɛn: «Ma yii n donkolon ganaa pipi, a lɛ n kanaa nɛ dia-n gɔsɛ a lɛ̀gɔn la.»

¹⁴Dɛnaa Lawa tɔn pɛ ma-n kəni: Sonbore ne, koe n die n toɛ gɔsɛ a lɛ gɔn la, a da n kɔ gána lɛa zaman tumaa lɛ.

¹⁵Man die lɛ diɛ gɔsɛ a lɛ̀gɔn la gána tɔrɔn kɛn tumaa la. Masɛ din Dɛnaa Lawa a da ǹ boo ne. Ǹ tá re die, ǹ kiin lɛn gogoomaa á re kii dankan koɛ tán Zeruzalɛmu a kiɛnlɛ yɔrɔ-a. Ǹ tá re a kungɔnɔn lɛnpɛnɛ, ǹ yoo Zudaa kiwin tumaa gialaa.

¹⁶Ka bɛa yɔrɔ kɛ nɛ, ma á re maa dɔlɔ boe gána lɛa minin tumaa ganaa. Sonbore, ǹ nə́ sii bɔbɔnɛɛ zɛnaa, ǹ nə́ n la bɔ ma ganaa, ǹ nə́ wúlu mànan kɔ lawa kɔsɔn la, ǹ mànan mɛnɛn zɛnaa ka ǹ dinin gɔn nɛ, ǹ nə́ bɛn guguru kɔ.

¹⁷Nsɛ Zeremii, n yɔrɔ bɔ kəni. Yoo! Ma bɛ́ re boo mɛn tumaa diɛ n nɛ, n wo ǹ pɛ. N nyan toa nyɛ́ɛ nə n gɔ̀nɔn bìn da ǹ yɔrɔ-a wa. Bɛ bie wa, masɛ din nə die n gɔ̀nɔn diɛ bìn diɛ ganaa ǹ yɔrɔ-a.

¹⁸Á ke, a saa pelo ganaa, man pàã koe n la ka kiwi tamaa wole sonbore bɛ́ lɔn. N tá re goɛ̃ ka fɔlɔ bìbì bɛ́ lɔn, ka zan kungɔn bɛ́ lɔn, gána lɛ tumaa yɔrɔ-a, Zudaa kiin yɔrɔ-a gána nyɛɛnaandɛnan nɛ, ka Lawa a wúlu-bɔlen ne, kɔnlɛ ka gána lɛ a minin ni.

¹⁹Ǹ tá re yui n gialaa, Sɛnɛ, ǹ ba re boe sii kɔn la ǹ zɛnaa n nɛ wa, a giala, ma tá kunun n ni, n kirisibiɛ. Masɛ din Dɛnaa Lawa a da ǹ boo ne.