Read Samo, Southern Zer 14 Bible Online

Zer 14 - Samo, Southern bible

Zer 14

¹Dɛnaa Lawa boon mɛnɛn da Zeremii ni tán gere a paǹ li, ǹ nə́ ke:

²Zudaa zaman nə gɛ̀ koɛ, ǹ kiwin pàã nya. Min tumaa foo n zizɛ̃ nɛ. Zeruzalɛmu a lɛ-dɛ n dii lon.

³Kiãn manə ǹ dí-nyalin diɛ woe giɛ mu li. Ǹ nə́ dɔ tùn lɛ-a, sɛnɛ, mu banban. Maǹ nə n bɔyɛɛ ǹ lon kooromaa. Ǹ foo ziziɛ̃, ǹ yɔrɔ kɔsɛ, ǹ nə́ n mìi kuməə.

⁴Bǎã tumaa nɛ, tán nə́ n dɛ, a giala, la kaa wa. Bɛ lɛ nɛ, buu-kɔsɔlin foo ziziɛ̃, ǹ nə́ n mìi kuməə.

⁵Yuùn nə nɛ mɛn yɛ don sisia, a nə n la boe bɛ ganaa. A giala buu banban doo wa.

⁶Don dundunun man golee kele mìi kooro-an la. Maǹ piɛ̃ yoe ka tolokan bɛ́ lɔn. Ǹ nə́ ga buu li ǹ nə́ nɔmaa, sɛnɛ buu banban wa.

⁷Bɛ̀ wɔa sii baraan tá zɛ̀rɛ diɛ wɔ la, Dɛnaa Lawa n din tɔ taman yii, sii zɛnaa. Sonbore, wɔa sãn nə́ mɔnaa. Wɔ n zɛ̀rɛdɛnan lɛa n wɔ paǹ li.

⁸Nsɛ, Izirayeli a foo doa ǹ bǎã, nsɛ mɛn bɛ́ a kirisibiɛ koe biikoo li, kanna kəni, a n siɛ lɔn, n tá n din biɛ ká tii bɛ́ lɔn gána lɛ nɛ, ká kiɛ̃ wole bɛ́ lɔn tèlò zii goon gɔ́ɔ̃ nɛ.

⁹Ma nə n kɔnbɔ ka giĩ pàãwɛɛnaa nɛ, ka zia-baali mɛn bɛ́ a boe la a min kirisibaa wa. Bɛ n siɛ lɔn kəni? A da yaa Dɛnaa Lawa, n tá kun ka wɔ nɛ. N din tɔ n wɔ la, n nyan nə n la bɔ wɔ ganaa wa!

¹⁰Dɛnaa Lawa bɛ́ boo mɛn diɛ zaman lɛ nɛ, á ke: «Hiĩ, minin kɛn man baa sii paǹ yii li ǹ dinin gɔn wìi á lɛ-a. Bɛ lɛ n kɔɔ̃nɛ ǹ dinin ganaa.» Sɛnɛ, bɛa Dɛnaa Lawa foo sii lɛa wa. Kanna kəni, a yiri á re gisĩ ǹ siɛ̃n nɛ, á re ǹ sii baraa a dɔlɔ boe ǹ ganaa.

¹¹Dɛnaa Lawa pɛ ma nɛ: «N nyan màn kɔn nyankɔ ma la zaman kɛa yii-nyɛɛ taman yii wa!

¹²Ta ǹ nə́ n lɛ sɔɔ, ma a re n too koe ǹ nyankɔ li wa. Ta ǹ nə́ *wúlu màn tiɛ̃ laanka wúlu màn gìĩ kɔɔ̃n kɔ ma la, ma a re lɛ koe ǹ ganaa wa. Sɛnɛ, man die ǹ bɔ̀n biɛ ka zia nɛ, bòo ne ka piɛ̃ busu ni.»

¹³Má a lɛ si: «Sɛnɛ, Dɛnaa Lawa, á ke, n boo gii-dalin man pii zaman lɛ nɛ, mà zia hinlaa bòo ba re n koe ǹ lɛ doo wa. Sɛnɛ, mà Lawa n die là nyantoro taãn-taãn koe ǹ la kànaa.»

¹⁴Dɛnaa Lawa ma lɛ si á pɛ: — Lawa a boo gii-dalin kɛn bɛ́ boo mɛn diɛ ka ma tɔ nɛ, soɛ nɛ. Ma ǹ dia wa. Ma boo goon din da ǹ nɛ wa. Ǹ sii yɛn lɛn man soɛ lɛa. Ǹ bɛ́ boo mɛn diɛ, boo kooron manɛ. Ǹ dinin taasiɛ boon manɛ.

¹⁵Bɛ lɛ nɛ, masɛ Dɛnaa Lawa n kɛ pii Lawa a boo gii-dalin kɛn wɔ paǹ li: «Bɛa minin kɛn lɛn mà ǹsɛn man boo diɛ ka masɛ tɔ nɛ, a da yaa ma ǹ dia wa. Maǹ pii mà zia laanka bòo á re yii gána kɛ-n wa. A da yaa, zia laanka bòo n die ǹ tumaa papaɛ̃ lenlen!

¹⁶Ǹ boon kɛn pɛ min mɛnɛn manɛ, zia laanka bòo n die ǹ dɛnan dii. Ǹ dinin ni, ǹ lɔn nɛ, ǹ nɛgiĩn ni, ǹ nɛlɔn nɛ, ǹ gere n die goɛ̃ tán bǎã tumaa nɛ Zeruzalɛmu a zii mìin ni. Min kɔn ba re yii a ǹ bĩ wa. Ǹ baraan mɛnɛn zɛnaa, man die bɛ lɛ diɛ ǹ mìi ni.»

¹⁷N bɛ́ re boo mɛn diɛ ǹ nɛ, á ke: Penleen ka tèlò, ma yii mu pã á kaa suuu! Koe gole na á maa zaman yɛ, busulɛ gole ne.

¹⁸Bɛ̀ má soo wurun ni lɔn, á ke, geren man tán bǎã yii ni. Bɛ̀ ma wɔ kiwi lɔn, á ke, ma yii n minin ganaa nɔmaa-n bòo gɔn. Lawa a boo gii-dalin laanka Lawa a wúlu-bɔlen manə n bibiĩ gána lɛ nɛ, ǹ ba màn goon a woo ǹ bǎã doɛ̃ wa.

¹⁹Dɛnaa Lawa, ń Zudaa daa sonbore? *Siɔn tìĩ bɔ n nyin ni? Fuu mɛn bɛ́ a nyɛɛ wa, a n siɛ lɔn n tá bɛ diɛ wɔ mìi ni? Wɔ nə n yii diɛ là nyantoro la, sɛnɛ màn kɔn banban bǐɛ̃ lɛa wa. Wɔ nə n yii diɛ wɔa busu á nya la, sɛnɛ, nyɛ́ɛ n die!

²⁰Dɛnaa Lawa, wɔ á doɛ̃ wáa wɔ́ sii baraa zɛnaa. Wɔ á wɔ digolon siɛ̃n doɛ̃. Wɔ́ sii baraa zɛnaa n nɛ.

²¹N tɔ taman yii, n giã ǹ bǎã ke piɛ̃ nɛ ka n gugurubaa kɛ nɛ, n nyan nə n la bɔ bɛ ganaa wa. N nyan nə n la bɔ a ganaa wa. N lɛ kɔ kɔn la mɛn wɔ ka wɔ nɛ, n yiri kɔ ka bɛ nɛ, n nyan a sàabaa wa.

²²Tɔrɔ kɔsɔn lawa kooron kɛn bii, màn tá ǹ bii a n boe la a n die ka la nɛ? Mu lɛ n boe lon kiɛ a din li? N din Dɛnaa Lawa, wɔa Lawa a nya ǹ dí bie wa? Wɔ foo n doa nɛ n din ganaa. A giala, n din ni bɛa siin kɛn lɛn tumaa zɛnɛɛ.