Read Samo, Southern Zer 17 Bible Online

Zer 17 - Samo, Southern bible

Zer 17

¹Zudaa minin siɛ̃n man ka sɛ́wɔ kiɛ̃ bɛ́ lɔn, ǹ nə́ kiɛ̃ ka fɔlɔ lɛ pɛpɛnaa nɛ hinlaa ka lunluun ni. Maǹ kiɛ̃ nɛ ǹ foo la ka ǹ *wúlu bɔ ǹ bǎã karan nɛ.

²Ǹ bɛ́ n taasɛ ǹ nɛnyaanan nɛ lɔn, maǹ nə n taasɛ ǹ wúlu bɔ ǹ bǎãn laanka ǹ dì bìbĩn kɛn nɛ miɛ̃, ka da luu tìtìn kɛn nɛ tentenen mìi ni,

³ka ǹ kele mìin kɛn nɛ don. Nsɛ Zudaa, ma á re n naforon laanka n gɔn màn giɔ̀mɔ kakan kɛn kokoe, kɔnlɛ ka n wúlu bɔ ǹ bǎãn nɛ. Man die bɛ zɛnɛɛ n siɛ̃n kɛn tumaa a lɛa ń zɛnaa gána lɛ paǹ tumaa nɛ.

⁴Ma goã má gána mɛn lɛ kɔ n la kíɛ̃ lɛa, n doamaa nɛ n bɛ toa walan. N tá re n zɔ́ɔn bɛ̀rɛ biɛ gána nɛ, ń bɛ́ n ba gána mɛn din doɛ̃ wa. Hiĩ, ka ǹ ka maa foo yoo tɛ bũ, a n die kuĩ miɛ̃ yǎa duduu.

⁵Dɛnaa Lawa n kɛ pii: Min mɛn bɛ́ n foo wɔlɔ lui ma ganaa, a nə́ n foo doɛ minbuiin nɛ ganaa, a dɔmalɛ n boe minbuiin nɛ nɛ, lɛn baraa bíi bɛa dɛnaa kũ!

⁶Ǹ dɛnaa na á kɔnbɔ ka da kùsì ni tán gere la. A re yii-nyɛɛ yii wa. A n die goɛ̃ diə gole a kɔlɔn kɛn bii n ni, tán yìsidɛnaa kɛ la, min ná a boe la a giã-n wa.

⁷Sɛnɛ, min mɛn bɛ́ golee Dɛnaa Lawa li, a nə́ n foo doɛ Dɛnaa Lawa ganaa, Barka á re n diɛ bɛa Dɛnaa ganaa.

⁸ Bɛa dɛnaa n goon ka da nɛ zumii-n tà lɛ-a, á gòonən bɔ á woo mu lɛ ganaa. Tɛ̀fuu biikoo li, a nyɛ́ɛ biɛ màn kɔn nɛ wa. A luu n goɛ̃ tì. Lɛ̀ goon lɛ̀ gere a màn kɔn pii-n wa. A n nɛ koe biikoo tumaa li.

⁹Màn kɔn ba baraa á dɔ minbuiin nɛ foo li wa. Min kɔn ba boe la a na a kaka kɔ wa, min kɔn ba doɛ̃ a nya wa.

¹⁰ Masɛ Dɛnaa Lawa, man giɛ minbuiin nɛ tumaa a taasiɛn laanka a gɔ́ɔ̃gɔ́ɔ̃ ǹ siin ganaa. Bɛa yɔrɔ lɛ la, man didie tumaa kuĩ a kɔnpɛ ka a giã ǹ gɔn laanka a zɛnaa ǹ siin ni.

¹¹Min mɛn bɛ́ pàãma biɛ yɔrɔ baraa la, bɛa dɛnaa na á kɔnbɔ ka koo dan nɛ, á waa gìi la, a ná a gìi dɔ da wa. A toa a yii n koo foo kɔɔ̃n la, naforo lɛ nə n gɔn boe a ganaa. A nə n gɔn nyɔmiɛ̃ baãnaa lɛa.

¹²A kũ kanaa giala kɔ waáraa ganaa kii dankan mɛn bɛ́ piɛ̃-n ka gugurubaa nɛ, a n lon, wɔa Lawa a kion sonbore kɛ nɛ.

¹³Dɛnaa Lawa, Izirayeli foo n doa nɛ n din ganaa. Min mɛn tumaa bɛ́ n la boe n ganaa, sìi á re n koe ǹ lɛ. Ǹ mɛnɛn bɛ́ n dɔ̀ɔ̃ we n ne, bɛn man die goɛ̃ ka tɔ mɛn nə́ ke ǹ nə́ kiɛ̃ gusuũ li! A giala, maǹ nə́ n la bɔ nsɛ Dɛnaa Lawa ganaa, nsɛ mu yala nyantoto ke, nyin koe.

¹⁴Dɛnaa Lawa, ma kaka kɔ, man die kaka koe dɔn. Ma kirisibaa, man die kirisibiɛ dɔn. Hiĩ, n din tɔ laakalaa ǹ loe ne ma á loe.

¹⁵Á ke, minin man pii: «Dɛnaa Lawa a dɔlɔ lɛ dɔ? Á maa ke? A zɛnaa wɔ ga a ganaa!»

¹⁶Dɛnaa Lawa, masɛ bie má n laa n ganaa máa n dɔlɔ da ǹ mìi-n wa. N din tá doɛ̃, ma koe taasɛ ǹ paǹ li wa. Ma boo mɛn da, man má da n din yɔrɔ-a.

¹⁷N nyan nyɛ́ɛ da ma-a wa, koe biikoo li, n din ni maa duru ǹ bǎã lɛa.

¹⁸Min mɛnɛn bɛ́ boe ma yii ni, sìi nə ǹ kũ, sɛnɛ, a baran masɛ baa wa! Nyɛ́ɛ nə ǹ kũ, sɛnɛ, a baran masɛ baa wa! Dɔlɔ bɔ ǹ ganaa, n nə ǹ ziziɛ̃ lenlen!

¹⁹Dɛnaa Lawa boo da ma nɛ: — Á ke, wo gole "Zaman a Kiɛnlɛ" kɛ lɛ-a. Bɛa kiɛnlɛ lɛ nɛ Zudaa kiin tá we hinlaa ǹ soo Zeruzalɛmu. Bɛ kio, n gole kiwi lɛ a kiɛnlɛ gialakunun kɛn dɔn lɛ-a.

²⁰N die n pɛ ǹ nɛ: «Ka n too kɔ Dɛnaa Lawa a boon kɛn li kasɛn Zudaa kiin kɔnlɛ ka Zudaa zaman ka Zeruzalɛmu minin kɛn nɛ boe ka bɛa kiɛnlɛn lɛn nɛ.»

²¹ Dɛnaa Lawa n kɛ pii: «*Susu ǹ pii pinaa, ka yiri bɔ ka dinin li. Ka nyan guĩ saa bɛa pinaa, ka bɔ ka Zeruzalɛmu kiɛnlɛn lɛn nɛ wa.

²² Bɛa pinaa, ka nyan soo ka guĩ-n kaa kion wa, ka nyan dí kɔn nya wa. Sɛnɛ, ka bɛa lɛawaa lɛ koa masɛ wɔ lɛa, ka ma pɛ ka digolon man lɔn.

²³Ǹsɛn nə n too kɔ wa, ǹ nə n too da wa. Ǹ nə́ n mìi laa, ǹ nə́ n piã ka maa gɔn waa nɛ, ǹ lɛ kɔ a ganaa wa.»

²⁴Dɛnaa Lawa a da ǹ boo á ke: «Sɛnɛ kasɛn, ka n too kɔ ma lon taãn nɛ. *Susu ǹ pii pinaa, ka nyan bɔ ka guĩ kɔ́n nɛ kiwi lɛ a kiɛnlɛn nɛ wa. Ka bɛa lɛawaa lɛ koa masɛ wɔ lɛa, ka nyan dí kɔ́n nya wa.

²⁵Ka bɛ nɛ, kiin laanka ǹ gána mìilandɛnan mɛnɛn bɛ́ giã-n Davida a kii dankan la, ǹ nə́ dii sùi hinlaa ziabaa ǹ wotoro la, bɛn tá re boe ka bɛa kiɛnlɛn lɛn nɛ duduu. Ǹ gána nyɛɛnaandɛnan nɛ, Zudaa minin ni, ka Zeruzalɛmu minin ni, bɛn man die boe ka walan nɛ. Minin man die goɛ̃ bɛa kiwi lɛ nɛ yǎa duduu.

²⁶Minin tá re boe Zudaa kiwin ni ǹ daa, Zeruzalɛmu lɛkoro-a kiwin ni, Bɛnzamɛn gána nɛ, *Sefelaa nɛ, kelen la nɛ, ka Negɛvu ni. Ǹ tá re die Lawa a kion ka *wúlu màn tiɛ̃n nɛ ka wúlu màn tɔrɔ kɔsɔn nɛ, Lawa gɔ ǹ màn nɛ, nyɔɔ gìĩ kɔɔ̃n nɛ, ka barka da ǹ wúlu màn nɛ.

²⁷Sɛnɛ, bɛ̀ ka n too kɔ ma lon wa, bɛ̀ ka susu ǹ pii koa maa wɔ lɛa wa, bɛ̀ ka guĩ da ka mìi ni, bɛ̀ ka bɔ ka Zeruzalɛmu a kiɛnlɛn nɛ, bɛ̀ á n baa miɛ̃, man die tɛ diɛ kiwi lɛ ganaa. Á re Zeruzalɛmu a kion sonboren kɛn kuĩ, a ná a nimi wa.»