Read Samo, Southern Zer 19 Bible Online

Zer 19 - Samo, Southern bible

Zer 19

¹Dɛnaa Lawa a da ǹ boo á ke á pɛ Zeremii ni: — Wo dɔn-bɔlin piɛ, n donkolon pii. Bɛ kio, n minin bɔ min golen laanka Lawa a wúlu-bɔlen bii.

² Bɔ kiɛnlɛ kɛ nɛ ǹ nə́ bíi "dɔnɔn kiɛnlɛ", n wo Inɔn nyankɔrɔ lɛ kɛ nɛ. Ma bɛ́ re boon mɛnɛn pii n ni, n lɛ dɛ ǹ nɛ walan.

³A pɛ kɛnɛn: «Zudaan kii laanka Zeruzalɛmu minin, ka n too kɔ Dɛnaa Lawa a boon li. Dɛnaa Lawa Pàãyiidɛnaa, Izirayeli a Lawa a boo á ke: Man die koe gole boe bǎã kɛ ganaa. Min mɛnɛn bɛ́ re a boo miɛ, nyɛ́ɛ gole á re bɛn kuĩ.

⁴A giala, Zudaa minin nə́ n la bɔ ma ganaa. Ǹ dinin lɛa nɛ, bǎã kɛ ba n doɛ̃ doo wa. Bɛa lawa tiin kɛn, ǹ nə́ ǹ ba ǹ doɛ̃ wa, ǹ dinin ni, ǹ digolon ne ka Zudaa kiin ni, maǹ nə́ *wúlu mànan kɔ bɛn la walan. Ǹ nə́ yii tì-an mà kaa walan.

⁵ Ǹ nə́ *wúlu bɔ ǹ bǎã dɔ dì *Baali wɔ lɛa. Maǹ nə ǹ nɛnyaanan tiɛ̃ wúlu màn lɛa walan. A da yaa, ma bɛa zii kɔ ǹ la wa, a taasiɛ dɔ bin da ma yiri-n wa.»

⁶Bɛ lɛ nɛ, ǹ kɔn pinaa, ǹ ba re bǎã kɛ bíi doo "Tofɛti hinlaa Inɔn" wa. Sɛnɛ maǹ die bíi "dɔlɔ bɔ ǹ nyankɔrɔ basa". Dɛnaa Lawa a da ǹ boo ne.

⁷Man die Zudaa laanka Zeruzalɛmu a sii yɔrɔ bɔn ziziɛ̃ bɛa nyankɔrɔ basa lɛ nɛ. Man die toɛ ǹ zɔ́ɔn nə ǹ minin dɛ zia la. Min mɛnɛn bɛ́ zoɛ̃ ǹ gɛ̀ li, man die yui ǹ gialaa ka bɛn lɛn nɛ. Man die ǹ geren koe Zèwon laanka tolokan la màn-bii lɛa.

⁸Man die Zeruzalɛmu biɛ nyɛ́ɛ da ǹ kiwi lɛa, yaa da ǹ màn lɛa. A ziziɛ̃ a la yii-n kɛ á die tɔwaa biɛ kiɛ̃ wolen tumaa ganaa.

⁹Zɔ́ɔn mɛnɛn bɛ́ zoɛ̃ ǹ gɛ̀ li, bɛn tá re kiwi lɛ lɛnpɛnɛ, ǹ yoo ǹ gialaa. Nɔmaa baraa taman yii, ǹ tá re ǹ nɛgiĩn laanka ǹ nɛlɔn siĩ soɛ̃, ǹ dinin dɔn nə kɔn siĩ sɔ̃.

¹⁰Bɛ kio, min mɛnɛn bɛ́ kunun n ni, n donkolon lɛ yu bɛn yɔrɔ-a.

¹¹N pɛ ǹ nɛ: «Dɛnaa Lawa Pàãyiidɛnaa a da ǹ boo á ke: Man die zaman kɛ laanka kiwi kɛ yui ka ǹ bɛ́ gì-bɔle a donkolon yui lɔn, a ná a ba n zɛnɛɛ doɛ̃ doo wa. Maǹ die ǹ geren biĩ Tofɛti dinin, a giala, bǎã ba re yii wɔlɔ kɔsɔ-n wa.

¹²Man die kiwi kɛ laanka a minin biɛ Tofɛti[4] a kɔnboe lɛa, Dɛnaa Lawa a da ǹ boo ne.

¹³Ǹ tá re *gɔ̀ diɛ Zeruzalɛmu a kionən ganaa ka Zudaa a kii kionən ne ka Tofɛti bɛ́ lɔn. Sonbore, bɛa kionən lɛn kalan la, maǹ nə́ da yon gìĩ kɔɔ̃n tã lon a leere kurun wɔ lɛa, ǹ nə́ duvɛ̃ zumii wúlu màn lɛa lawa tiin la.»

¹⁴Bɛ kio, Zeremii nə́ n bɔyaa á daa Tofɛti, a goã á Dɛnaa Lawa a boo gii da bǎã mɛn lɛ nɛ. Á woo Lawa a kion a sumu-n, á boo da zaman lɛ nɛ á pɛ:

¹⁵— Dɛnaa Lawa Pàãyiidɛnaa, Izirayeli a Lawa a da ǹ boo á ke: «Ma dɔlɔn mɛnɛn boo da kiwi kɛ wɔ paǹ li ka a lɛkoro-a kiwin ni, man die yui ǹ gialaa ka bɛn nɛ. A giala, kiwi minin lɛn mìi n laa nɛ. Maǹ nə n piɛ̃ ǹ ba n too koe maa da ǹ boon li wa.»