Read Samo, Southern Zer 21 Bible Online

Zer 21 - Samo, Southern bible

Zer 21

¹Dɛnaa Lawa boon mɛnɛn da Zeremii ni kii Sedekiasi a paǹ li, ǹ nə́ ke. Kii lɛ na á goã á Malkia a nɛgiĩ Pasewuru laanka Maseya a nɛgiĩ Lawa a wúlu-bɔle Sefania dia Zeremii li mà ǹ wo pɛ-n kɛnɛn:

² «Bǐɛ̃ kɔ n nɔ̀n da Dɛnaa Lawa la wɔa lɛa. A giala, *Baabiloniin kii Nebukadenezɔɔrɔ yoo ka zia-n wɔ gialaa. Kɔntan, Dɛnaa Lawa á re kaãbaa sii zɛnɛɛ a na a wɔlɔ lui wɔ ganaa.»

³Zeremii nə́ ǹ lɛ si kɛnɛn: — Ka wo pɛ Sedekiasi ni:

⁴Dɛnaa Lawa, Izirayeli a Lawa n pii kɛnɛn: «Á ke, ziabaa ǹ mànan mɛnɛn bɛ́ ka gɔn ka n zia biɛ ǹ nɛ kaa zɔ́ɔ Baabiloniin kii laanka a sɔraasin ganaa, man die boe ǹ ne ziabaa ǹ kungɔn lɛ kio, ma da ǹ nɛ kiwi lɛ gɔ́ɔ̃ nɛ.

⁵Ma dinmaa n die zia biɛ ka ganaa ka maa foo-yoo baraa kɛ nɛ. Ma á re ma pàã laanka maa boo sii la nyɛɛ ka nɛ.

⁶Màn yiikoonaa mɛn tumaa bɛ́ kiwi lɛ nɛ, ma á re ǹ tumaa dii: Minbuiinin laanka tɔɔn. Piɛ̃ busu baraa á re ǹ tumaa dii.

⁷Bɛ kio, ma á re Zudaan kii Sedekiasi we Baabiloniin kii gɔn, ka a gána nyɛɛnaandɛnan nɛ. Kiwi lɛ a minin mɛnɛn yii goã koo piɛ̃ busu laanka zia ka bòo kɛ kio, ma á re bɛn dɔn we a gɔn. Ma á re ǹ kiɛ ǹ zɔ́ɔn pàã giulun, ǹ mɛnɛn lɛn bɛ́ zoɛ̃ ǹ gɛ̀ li. Nebukadenezɔɔrɔ á re ǹ dii ǹ gã. A re ǹ makara doɛ̃ wa, a re sabara biɛ wa, a re min kɔn toɛ a yii n koo wa.» Dɛnaa Lawa a da ǹ boo ne.

⁸Ǹ tá re pii zaman lɛ-n kɛnɛn: — Dɛnaa Lawa n kɛ pii: «Á ke, man yiikoonaabaa laanka gɛ̀ diɛ ka nyɛɛnɛ.

⁹Min mɛn tumaa bɛ́ re goɛ̃ Zeruzalɛmu, zia laanka bòo ka piɛ̃ busu n die bɛn dii. Sɛnɛ, min mɛnɛn bɛ́ re n dinin we *Baabilonii minin kɛn gɔn, kɛn zia diɛ ka-a, bɛn yii á re goɛ̃ koo. Ǹ tá re yiikoonaabaa sɛ kɔn yii.

¹⁰Dɛnaa Lawa a da ǹ boo á ke: Hiĩ, man die yui Zeruzalɛmu gialaa, ma baraa zɛnaa nɛ, bǐɛ̃ boo bie wa. Man die we Baabiloniin kii gɔn, a tɛ da a ganaa.»

¹¹Zudaan kii a sumu, n too kɔ Dɛnaa Lawa a da ǹ boo li.

¹²Davida a sumu minin lɛn, Dɛnaa Lawa a boo á ke: Baayɛlɛ woo baayɛlɛ, ka kiri pepere wɔ. Ǹ bɛ́ mɛnɛɛ min mɛnɛn la, ka ǹ gɔsɛ ka ǹ bɔ mɛnaa ma la wolen gɔn. Bɛ bie wa, maa foo-yoo baraa kɛ n die yui ka gialaa ka tɛ bɛ́ lɔn. A n die màn tumaa kuĩ, min kɔn ba re boe la a nimi wa kaa zɛnaa ǹ sii baraan kɛn lɛa.

¹³Kasɛn mɛnɛn bɛ́ giã-n nyankɔrɔ basa nɛ ka gɛ̀fu la ǹ dɛnan nɛ, Dɛnaa Lawa a da ǹ boo ne, man die ka gialaa. A giala, ka ǹ pii: «Min kɔn ba boe la a dii a da wɔ gialaa hinlaa a wɔ wɔa kion wa.»

¹⁴Man die yui ka gialaa a kɔnpɛ ka kaa zɛnaa ǹ siin ni, Dɛnaa Lawa a da ǹ boo ne. Ma á re tɛ diɛ kaa *Sɛdrə daã[5] kɛ ganaa, màn mɛn tumaa bɛ́ a lɛnpɛnɛ, a na a tumaa kũ lenlen.