Read Samo, Southern Zer 25 Bible Online

Zer 25 - Samo, Southern bible

Zer 25

¹ Zoziasi a nɛgiĩ Zoakimu a kiibaa lɛ̀ siibaa ǹ wɔ li Zudaa gána mìi la, Dɛnaa Lawa boo da Zeremii ni Zudaa zaman tumaa a paǹ li, bɛ̀ *Baabiloniin kii Nebukadenezɔɔrɔ a kiibaa lɛ̀ bibinaa nɛ.

²Lawa a boo gii-dali Zeremii pɛ Zeruzalɛmu minin manɛ ka Zudaa min gialakunun kɛn nɛ:

³— A kũ Amɔn a nɛgiĩ Zoziasi a kiibaa lɛ̀ fulusɔɔbaa ǹ wɔ ganaa Zudaa gána mìi la a da pelo yaa, man má goã timii la ma á Dɛnaa Lawa a boo diɛ ka nɛ. A lɛ̀ fuəwensɔɔ n ka kɛ nɛ ma á boo diɛ ka nɛ, sɛnɛ, ka n too kɔ ma lon wa.

⁴Gunyin gigiã, Dɛnaa Lawa ná a dí-nyalin, Lawa a boo gii-dalin dia ka la, sɛnɛ, ka n too kɔ ǹ lon wa.

⁵Maǹ nə́ pɛ ka nɛ: «Didie doamaa nɛ a na a giã ǹ gɔn baraa laanka a sii baraan kaa. Ka bɛ nɛ, ka á re boe la ka giã gána kɛ nɛ má kɔ ka laanka ka digolon la, duduu, yǎa duduu.

⁶Ka nyan kɔ dìn lɛ ka ǹ guguru kɔ, ka n musin doa tán-a ǹ yɔrɔ-a wa. Ka nyan ma foo yoo ka dì nyín zɛnaa-n wa. Bɛa yɔrɔ lɛ la, ma a re baraa kɔn zɛnɛɛ ka-n wa.

⁷Sɛnɛ, ka n too kɔ ma lon wa. Dɛnaa Lawa a da ǹ boo ne. Ka ǹ ká sii làfu zɛnaa, ká ma foo yoo ka kaa dì nyín zɛnaan kɛn nɛ, kɛn lɛn koe boe ka ganaa.»

⁸Á bǐɛ̃ kɔ! Dɛnaa Lawa Pàãyiidɛnaa n kɛ pii: «Ka bɛ ka n too kɔ maa da ǹ boon li wa,

⁹man die gɔsɛ a lɛ̀gɔn la tɔrɔn kɛn tumaa bíi, ma maa dí-nyali Baabiloniin kii Nebukadenezɔɔrɔ bíi. Ma ǹ die yui gána kɛ gialaa, a zaman nɛ, ka ǹ miãkɛnɛn nɛ. Man die ǹ tumaa ziziɛ̃. Man die gána kɛ biɛ bǎã bɔbɔnɛɛ lɛa, kɛbɔlɔ lɛa biikoo yii li. Minin tá re foo ziziɛ̃ ǹ lɛ-dɛ we a ganaa. Masɛ Dɛnaa Lawa a da ǹ boo ne.

¹⁰ Ma á re zɔ́n bìn-diɛn sàabiɛ, foo kɔɔ̃n lɛ-dɛn nɛ, ka kɔn-wɔle tenən loen ne. Wii lɔ ǹ gii wuu a re boe doo wa, bolonən ba re fúlu kiɛ doo wa.

¹¹ Gána lɛ din kuturu á re kɛbɔlɔ biɛ, bǎã bɔbɔnɛɛ lɛa. Tɔrɔn kɛn tumaa n die goɛ̃ Baabiloniin kii a pàã giulun yǎa lɛ̀ pɔsɔbaa.»

¹²Dɛnaa Lawa a da ǹ boo á ke: «Bɛ̀ bɛa lɛ̀ pɔsɔbaa lɛ lɛ pã, man die yui Baabiloniin kii gialaa, ǹ gɛ̀-dɛ kɛa lɛa. Man die yui *Baabilonii minin gána gialaa, ma baa diə gole lɛa yǎa duduu.

¹³Ma koen mɛnɛn tumaa boo da, kɛn kiɛ̃ nɛ sɛ́wɔ kɛ nɛ, man die bɛn diɛ gána lɛ mìi ni. Ma din a boo gii ni Lawa a boo gii-dali Zeremii pɛ tɔrɔn tumaa wɔ lɛa.

¹⁴Baabilonii minin sɛn tá re goɛ̃ gána pàãdɛnan giulun, ka kii dadaran nɛ. Ǹ sii mɛn tumaa zɛnaa, ka ǹ sii baraan nɛ, ǹ tá re bɛ tumaa sarɛɛ.»

¹⁵Dɛnaa Lawa, Izirayeli a Lawa boo mɛn da ma nɛ, á ke: «Paan kɛ si ma gɔn, piɛ̃-n ka maa foo-yoo ne. Ma bɛ n diɛ tɔrɔn mɛnɛn tumaa li, n kɔ ǹ la ǹ mi.

¹⁶Ǹ tá re mii, ǹ bɔ ǹ mɛnaa. Ma bɛ́ re basaã mɛn koe ǹ bii, bɛ̀ ǹ yii bɛ yɛ, gàãn tá re yui ǹ li.»

¹⁷Má tɔn paan lɛ si Dɛnaa Lawa gɔn. A ma dia tɔrɔn mɛnɛn tumaa li, má kɔ ǹ la, ǹ nə́ mi.

¹⁸A na á n giala kɔ Zeruzalɛmu ganaa, ka Zudaa kiwi kɔsɔn nɛ, ǹ kiin laanka ǹ nyɛɛnaandɛnan nɛ. Bɛa kiwin lɛn nə́ kɛbɔlɔn baa, bǎã bɔbɔnɛɛn lɛa. Kɛ doamaa nɛ a ǹ kaa nyɛ́ɛbaa ǹ lɛ-dɛ gole ganaa, a sii a kɔnboe baa lɛ ǹ baraa bíi a paǹ li. Bɛ lɛ n ke n zɛnɛɛ pelo.

¹⁹Bɛ kio, á dɔ tɔrɔ kɔsɔn kɛn dɔn ganaa: Eziptin kii *Faarahɔn laanka a sɔraasin nyɛɛnaandɛnan nɛ, a gána nyɛɛnaandɛnan nɛ ka a zaman tumaa nɛ,

²⁰kɔnlɛ ka tɔrɔn kɛn tumaa nɛ giã-n Ezipti gána nɛ. Usu gána a kii ni, Filisiti minin kiin ni: Asikalɔn wɔ nɛ, Gaazaa wɔ nɛ, Ekrɔn wɔ nɛ, ka Asidɔdi min lɛkun mɛn goã.

²¹Edɔmu minin ni, Moabu minin ni ka Amɔn tɔrɔn nɛ.

²²Tiiri minin kiin tumaa nɛ, Sidɔn wɔ nɛ, gánan kɛn tumaa Yìsi mu gole kio, ka bɛn wɔn nɛ.

²³Dedan minin ni, Temaa wɔn nɛ, Buuzu wɔn nɛ ka tɔrɔn kɛn nɛ n karazɔɔ ka koɛ̃.

²⁴Larabu gána kiin tumaa nɛ, ka tɔrɔn kɛn nɛ giã-n diə gole ne.

²⁵Zimri kiin tumaa nɛ, Elamu laanka Mɛdi gána minin kiin ni.

²⁶Gɔsɛ a lɛ̀gɔn la kiin tumaa, ǹ mɛnɛn wɔlɔ bɛ́ sɔsɔɔ hinlaa ǹ wɔlɔ n kunu. Kanaa a tɔrɔn tumaa doamaa nɛ ǹ kɛa paan gɔ́ɔ̃gɔ́ɔ̃ ǹ mu kɛ mi. Sekakin[6] kii sɛ doamaa nɛ a mi ǹ tumaa kio.

²⁷Dɛnaa Lawa mà ma pɛ ǹ nɛ: «Dɛnaa Lawa Pàãyiidɛnaa Izirayeli a Lawa a da ǹ boo á ke: Ka mi, a ka yii kũ, ka pisəə! Ma bɛ́ re sii mɛn tumaa zɛnɛɛ ka bii, bɛ̀ ká bɛ yɛ, ka á re mɛnɛɛ ka goã tán goon lɛa.»

²⁸Á pɛ doo: — Kɔntan, min tɛnɛn tá re n piɛ̃ mà ǹ ba re paan lɛ a mu sii n gɔn ǹ mi wa. N die n pɛ ǹ nɛ kɛnɛn: «Yǎa ka mii, Dɛnaa Lawa Pàãyiidɛnaa a da ǹ boo ne.»

²⁹Á ke, man dɔlɔ boe kiwi kɛ ganaa má bɔ má koa maa wɔ lɛa. Man die kasɛn toɛ walan dɔlɔ baã? Haayii! Ka a re goɛ̃ dɔlɔ baã wa. Man yui zia-n ka ganaa, masɛ Dɛnaa Lawa Pàãyiidɛnaa a da ǹ boo ne.

³⁰Dɛnaa Lawa pɛ ma-n doo: Maa boo kɛ da ǹ nɛ, n pɛ kɛnɛn: Dɛnaa Lawa nə n toɛ lon wɔɔsaa we. A kion mɛn bɔ á koa a wɔ lɛa, a nə n toɛ walan n lɛn siɛ lon. A din a bǎã ke, a n paraa we bɛ li. A n paraa we gána lɛ a min tumaa li, ka rezɛ̃ tɔrɛɛ wolen bɛ́ n lɛ dii lɔn.

³¹A bɛ́ bìn diɛ mɛn we, bɛ n doe kanaa lɛdan ganaa. Dɛnaa Lawa n kiri we tɔrɔn ganaa. A n minbuiin nɛ tumaa bíi we kiri wɔ ǹ bǎã nɛ. Min baraan kɛn, bɛn man die gɔya sa gɛ̀ we. Dɛnaa Lawa a da ǹ boo ne.

³²Dɛnaa Lawa Pàãyiidɛnaa a da ǹ boo á ke: «Koe gole nə n koe gánan lɛ, la piɛ̃ gole n boe tán lɛ dan ganaa die.»

³³Bɛa pinaa lɛ nɛ, Dɛnaa Lawa taman yii, geren tá re goɛ̃ kanaa paǹ tumaa nɛ, a kũ a paǹ goon kɛ ganaa a wo a paǹ goon kɛ dɔ yaa. Bɛ̀ bɛ nə́ n zɛnaa, min kɔn ba re wuu pii a geren la wa, min kɔn ba re a geren goɛ, a ǹ bĩ wa. Maǹ die n biɛ ka yisi bɛ́ lɔn.

³⁴Kasɛn kɛn maa zaman-lɛduə̃lin lɛa, ka n lɛ dɛ, ka n duduwə. Ka n birikəə̃ tán, kasɛn mɛnɛn bɛ́ maa tɔɔn lɛduĩ. Hiĩ ka dɔn gɛ̀ wɔ na á dɔ. Ka n die mɛnɛɛ, ka yɔyɔrɛ ka tasa giɔ̀mɔ kaka bɛ́ lɔn.

³⁵Mìi duru ǹ bǎã ba maa zaman-lɛduə̃lin kɛn la wa. Baa si á woo ǹ bǎã ba tɔɔn-lɛduə̃lin kɛn la wa.

³⁶Máa ǹ lɛ-dɛ miɛ, máa ǹ ginii miɛ. A giala, Dɛnaa Lawa nə́ ǹ tɔɔn buu sɔ̃ ǹ bǎã ziziɛ̃.

³⁷Dɛnaa Lawa a foo-yoo gole kɛ taman yii, bǎã sonboren kɛn tumaa nyɛɛ kiĩni.

³⁸Lawa n soe n boe a bǎã nɛ ka yàra bɛ́ soe n boe daã-n lɔn. Zia baraa kɛ taman yii ka Dɛnaa Lawa a foo-yoo gole kɛ nɛ, gána lɛ diə gole baa.