Read Samo, Southern Zer 29 Bible Online

Zer 29 - Samo, Southern bible

Zer 29

¹ Lawa a boo gii-dali Zeremii nə́ n toa Zeruzalɛmu, á sɛ́wɔ dia min golen la, Lawa a wúlu-bɔlen ne, Lawa a boo gii-dalin ni, ka min mɛn tumaa bɛ́ Nebukadenezɔɔrɔ nə́ ǹ goa Zeruzalɛmu á woo ǹ ne *Baabilonii.

²Bɛ giala mà kii Yekonia nɛ, kii ǹ dan nɛ, kii a dí-nyali dadaran nɛ, Zudaa laanka Zeruzalɛmu a kiãn nɛ, fuũn ni ka gɔn dí-nyalin ni.

³Zeremii na á bɛa sɛ́wɔ lɛ kɔ Safan a nɛgiĩ Elaasaa la ka Ilkia a nɛgiĩ Gemaria nɛ. Zudaan kii Sedekiasi na á ǹ dia Baabiloniin kii Nebukadenezɔɔrɔ li. A na á goã kiɛ̃-n sɛ́wɔ lɛ-n kɛnɛn:

⁴— Dɛnaa Lawa Pàãyiidɛnaa, Izirayeli a Lawa n kɛ pii goa wolen kɛn wɔ paǹ li, á ǹ goa Zeruzalɛmu á woo ǹ ne Baabilonii gána nɛ:

⁵«Ka kionən dɔ, ka giã ǹ nɛ. Ka dù gɔrɔn bɔ ka ǹ dù bii.

⁶Ka kɔn wɔ, ka nɛgiĩn laanka nɛlɔn yɛ. Ka lɔ kɔ kaa nɛgiĩn la ka kaa nɛlɔn kɔ zuũn ganaa màn mɛn bɛ́ toɛ ǹ dɔn nə nɛnyaanan yɛ. Ka mɔnaa parsiini, màn kɔn baran n bɔ ka lɛ wa.

⁷Ka dí nya kaa gùli kɔ ǹ kiwi lɛ nɛ màn mɛn bɛ́ toɛ a wo nyɛɛnɛ. Ka Dɛnaa Lawa nyankɔ a lɛa a giala kaa yii-nyɛɛ n boe bɛa kiwi kɛ lɛ a là nyantoro li.»

⁸Dɛnaa Lawa Pàãyiidɛnaa, Izirayeli a Lawa n kɛ pii: «Lawa a boo gii-dalin kɛn ka bii ka biɛ̃ ǹ pɛlen kɛn nɛ, ka nyan toa ǹ ka sã wa. Ka bɛ narɛɛn mɛnɛn we, ka nyan nə n saa bɛn li wa.

⁹Maǹ pii mà ǹsɛn man boo diɛ ka masɛ tɔ nɛ, sɛnɛ soɛ nɛ. Ma ǹ dia wa.» Dɛnaa Lawa a da ǹ boo ne.

¹⁰ Dɛnaa Lawa n kɛ pii: — Bɛ̀ Baabiloniin kii a pàã kɛ dɔ lɛ̀ pɔsɔbaa, ma á re die kaa gú ganaa. Ma á re maa lɛ kɔ kɛ lɛ piɛ̃: Ma á re soe ka-n kànaa ma wo ka nɛ Zeruzalɛmu.

¹¹Hiĩ, masɛ Dɛnaa Lawa, ma sii mɛn yɔrɔ bɔ kaa wɔ lɛa, ma á bɛ doɛ̃: «Baraa bie wa, bǐɛ̃ lɛ piɛ̃ nɛ. Ma á re toɛ kaa biɛ̃ ǹ n biɛ̃ kɔ.» Dɛnaa Lawa a da ǹ boo ne.

¹²Bɛ̀ kaa ma bíi we, bɛ̀ ka daa ma nyankɔ, ma á re n too koe ka lon.

¹³ Bɛ̀ ka ga ma li, ka á re ma yii. Bɛ̀ ka ga ma li ka ka foo din tumaa nɛ, ka á re ma yii.

¹⁴Ma á re toɛ ka ma yɛ. Dɛnaa Lawa a da ǹ boo ne. Ma ka loo gánan mɛnɛn tumaa nɛ, ma á re wusii ma ka sɔkɔn walan. Ǹ ka goa bǎã mɛn nɛ, ma á re wusii ma da ka-n walan. Dɛnaa Lawa a da ǹ boo ne.

¹⁵A da yaa ka ǹ pii mà Dɛnaa Lawa na á boo gii-dalin kɔ ka la Baabilonii gána nɛ!

¹⁶Kanna kəni, Dɛnaa Lawa n kɛ pii kii kɛa paǹ li giã-n Davida a kii dankan la. A din boo goon lɛ nɛ á pii ka dɔɔ̃nɔn kɛn wɔ paǹ li, ǹ mɛnɛn bɛ́ ǹ wo gùli kɔ ǹ bǎã-n wa, giã-n Zeruzalɛmu.

¹⁷Dɛnaa Lawa Pàãyiidɛnaa n kɛ pii: «Man die yui ǹ gialaa ka zia nɛ, bòo ne ka piɛ̃ busu ni. Man die ǹ biɛ ka gɔ́rɔ bɔnɛɛ bɛ́ lɔn, bɔnɛɛ, min ná a boe la á bii wa.

¹⁸Man die ǹ kio lui ka zia nɛ, bòo ne ka piɛ̃ busu ni. Bɛ̀ gánan mɛnɛn nə́ ǹ yɛ, nyɛ́ɛ á re bɛn tumaa kuĩ. Ma bɛ́ re ǹ lui ma ǹ kaa gánan mɛnɛn nɛ, ǹ tá re sii a kɔnboe biɛ bɛn li, bɛ̀ ǹ tá re lɛn baraa bíi, bɛ̀ ǹ tá sii bɔbɔnɛɛ boo diɛ, nyɛ́ɛ da ǹ sii ni ka sìi boo ni.

¹⁹Man bɛ zɛnɛɛ a giala, ǹ nə n too kɔ maa boon ganaa wa. Masɛ Dɛnaa Lawa a da ǹ boo ne. A da yaa, má maa dí-nyalin, maa boo gii-dalin dia ǹ la gunyin damata, sɛnɛ ǹ nə n too kɔ ǹ lon wa. Masɛ Dɛnaa Lawa a da ǹ boo ne.»

²⁰Kasɛn wo bɛ̀rɛbaa ǹ bǎã n wolen lɛn Dɛnaa Lawa ka goa Zeruzalɛmu á woo ka nɛ Baabilonii, ka n too kɔ a da ǹ boo li!

²¹Dɛnaa Lawa Pàãyiidɛnaa Izirayeli a Lawa n kɛ pii, Kolaya a nɛgiĩ Akaabu a paǹ li ka Maseya a nɛgiĩ Sedekiasi ni. Ǹ dinin min paa mà ǹsɛn man Dɛnaa Lawa a boo gii diɛ, sɛnɛ soɛ nɛ. Á bǐɛ̃ kɔ, man die ǹ we Baabiloniin kii Nebukadenezɔɔrɔ gɔn, a ǹ dɛ ka yii giulun.

²²Ǹ Zudaa min mɛn tumaa goa ǹ nə́ woo ne Baabilonii gána nɛ, ǹsɛn min paa tɔ á re sii a kɔnboe biɛ bɛ̀ ǹ tá lɛn baraa bíi. A giala maǹ die pii: «Dɛnaa Lawa die a n baa ka Sedekiasi bɛ́ lɔn hinlaa ka Akaabu bɛ́ lɔn Baabiloniin kii nə́ ǹ kaa tɛ-n!»

²³Kɛa sii kɛ n die ǹ yii, a giala, maǹ nə́ sii bɔbɔnɛɛ zɛnaa Izirayeli gána nɛ, maǹ nə́ naarɛbaa zɛnaa ka ǹ miãn lɔn nɛ. Maǹ nə́ goã mà maǹ boo diɛ ka masɛ tɔ nɛ, sɛnɛ soɛ nɛ. A da yaa, ma màn kɔn pɛ ǹ nɛ wa. Ma tá a tumaa doɛ̃ ma tá a siére-a dɔn. Dɛnaa Lawa a da ǹ boo ne.

²⁴N die n kɛ pɛ Nehelamu min Semayia nɛ:

²⁵— Dɛnaa Lawa Izirayeli a Lawa n kɛ pii: «Ń goã ń sɛ́wɔ dia ka n din tɔ nɛ minin kɛn la giã-n Zeruzalɛmu, Maseya a nɛgiĩ Lawa a wúlu-bɔle Sefania nɛ ka Lawa a wúlu-bɔle gialakunun kɛn nɛ. A n kiɛ̃-n bɛa sɛ́wɔ lɛ-n kɛnɛn:

²⁶Dɛnaa Lawa na á n koa Lawa a wúlu-bɔle lɛa Lawa a wúlu-bɔle Zozadaa bǎã nɛ. N doamaa nɛ n ga gàãnaan kɛn walan n dinin biɛ Lawa a boo gii-dalin lɛa Lawa a kion. N doamaa nɛ n nə ǹ tumaa kaa zɔrɔka nɛ, n fɔlɔ guguru da ǹ bɔlɔ-a.

²⁷Sɛnɛ, n boo da ka Anaatɔti min Zeremii-n wa, asɛ mɛn nə goã n din biɛ Lawa a boo gii-dali lɛa wɔ yɔrɔ-a. Bɛ n siɛ lɔn?

²⁸Á ke, á sɛ́wɔ din kiɛ̃ á dia wɔ la Baabilonii a n pii: Ka á re beleboe walan. Ka kionən dɔ ka giã ǹ nɛ. Ka dù gɔrɔn bɔ ka ǹ dù bii!»

²⁹Sɛnɛ, Lawa a wúlu-bɔle Sefania bɛa sɛ́wɔ lɛ pɛ Lawa a wúlu-bɔle Zeremii ni.

³⁰Dɛnaa Lawa tɔ́n boo da ka Zeremii ni á pɛ nɛ:

³¹— Boo kɛ dia wo bɛ̀rɛbaa ǹ bǎã-n wolen kɛn tumaa la: «Dɛnaa Lawa n kɛ pii Nehelamu min Semayia a paǹ li: Semayia boo da ka nɛ ka ma tɔ nɛ, sɛnɛ masɛ dia wa. Á soɛ boon da ka nɛ.

³²Kanna, masɛ Dɛnaa Lawa n kɛ pii: Man die yui Nehelamu min Semayia gialaa, a nɛnyaanan nɛ ka a nɔ̀ɔnɔn nɛ. A sumu min kɔ́n ba re goɛ̃ maa zaman lɛ bii wa. Ma bɛ́ re bǐɛ̃ mɛn zɛnɛɛ maa zaman nɛ, Semayia a sɔmɔ min kɔn ba re bɛ yii wa. A giala, Semayia na á maa zaman sɔsɔmɔ ǹ nə́ n gòãn dii ma ganaa.» Dɛnaa Lawa a da ǹ boo ne.