Read Samo, Southern Zer 3 Bible Online

Zer 3 - Samo, Southern bible

Zer 3

¹Dɛnaa Lawa pɛ: «Bɛ̀ giĩ ná a lɔ loo, lɔ lɛ soo li, yǎa giĩ kɔsɔ saa lɔ lɛa, ǹ zuũ zizi lɛ á boe la a wusoo a saa lɔ lɛa? Haayii, a giala, *gɔ̀ n die gána lɛ kuĩ bɛ lɛ taman yii. Sɛnɛ nsɛ Izirayeli, ń kɔrɔbaa zɛnaa ka giĩ gigiã nɛ. Ma n giɛ li n wusoo n da masɛ li?» Dɛnaa Lawa a da ǹ boo ne.

²N yii saa lon, n nə n yɔrɔ dia tentenen kɛn la n ga. Tenten goon din tá yii ǹ bii mà n nə n naarɛbaa zɛnaa la wa? Ka diə gole a mu gòo-kɔlin bɛ́ lɔn, N nə́ n goã giã-n tán zii lɛkoro-a, n yii diɛ n sanan la. Ń gána lɛ gɔgɔrɛ kɔ ka n kɔrɔbaa kɛ nɛ, ka n giã ǹ gɔn baraa nɛ.

³Bɛ lɛ nɛ, la kaa wa, la nyɔɔbaa kaa wa. Sɛnɛ n nə n too kaka kɔ, n kɔrɔbaa zɛnaa n woo ne. N nə́ n piã ka n sã nɛ.

⁴Kanna kəni, ma nə n lɛ dii masɛ ganaa n nə́ pii: «Maa díi, maa tenmaa waáraa a giaára!»

⁵Man nɔ̀n diɛ n din la: «A foo n tɔn yoo-n ma li duduu? A ba re a foo-yoo kɛ kurii masɛ ganaa wa?» N da ǹ boo n ka bɛ nɛ, sɛnɛ, n nə n tɔn woe nyɛɛnɛ sii baraa zɛnɛɛ.

⁶ Kii Zoziasi a biikoo li, Dɛnaa Lawa pɛ ma nɛ: «Izirayeli bɔyaa wole lɛ sii mɛn zɛnaa, ń yɛ? Á woo kele mìi tumaa la, dan giulun, ǹ mɛn tumaa luu bɛ́ tì, á kɔrɔbaa zɛnaa walan.

⁷Man taasɛ máa bɛ tumaa kio, máa á re wusii a da ma li. Sɛnɛ, haayii, a wusoo á daa wa. Ǹ miãnɛn Zudaa bɔlɔgoonbaãdɛnaa lɛ yɛ taãnɛ.

⁸Má Izirayeli bɔyaa wole lɛ loo. A giala, á naarɛbaa zɛnaa. Má kɔn-wɔ toɛ̃ ǹ sɛ́wɔ kɔ la. Sɛnɛ, má yɛ máa ǹ miãnɛn Zudaa bɔlɔgoonbaãdɛnaa lɛ sɛ nyɛ́ɛ baa wa. A dɔ wusoo á woo naarɛbaa zɛnaa.

⁹A na á naarɛbaa lɛ zɛnaa kun ka dìn mɛnɛn bɛ́ kɔlɔ hinlaa gɔn lɛa. A naarɛbaa baraa lɛ taman yii, á gána lɛ gɔgɔrɛ kɔ.

¹⁰Ka bɛ din tumaa nɛ, ǹ miãnɛn Zudaa bɔlɔgoonbaãdɛnaa kɛ wusoo á n bɔyaa á daa masɛ li ka a foo tumaa-n wa. A parsii bie wa.» Dɛnaa Lawa a da ǹ boo ne.

¹¹Dɛnaa Lawa pɛ doo: Izirayeli bɔyaa wole lɛ zɛ̀rɛ á kiɛɛrɛ á la Zudaa bɔlɔgoonbaãdɛnaa kɛ nɛ.

¹²Wo n lɛ dɛ ka boon kɛn nɛ gɔsɛ a lɛ̀gɔn la: «Wusoo n daa Izirayeli bɔyaa wole! Dɛnaa Lawa a da ǹ boo ne. Ma a re n yɔrɔ baraa diɛ n la doo wa. A giala, maa makara-doɛ̃ á gole. Ma foo á re goɛ̃ yoo ne n li duduu wa. Ma din Dɛnaa Lawa a da ǹ boo ne.

¹³Sɛnɛ, n zɛ̀rɛ si. N nə́ n gòãn dii masɛ ganaa, Dɛnaa Lawa, n Lawa ganaa, ń baa si paǹ tumaa li, dìn kio, da tìtìn giulun, n nə n too kɔ ma lon wa.» Dɛnaa Lawa a da ǹ boo ne.

¹⁴«Ka wusoo ka daa nɛnyaan bɔyaa wolen! Dɛnaa Lawa a da ǹ boo ne. Kaa Dɛnaa n ka masɛ nɛ. Ma á re ka kuĩ gogoon kiwi kɛ nɛ, papaa tɔrɔn kɛn bii, ma da ka nɛ *Siɔn kiwi.

¹⁵Lɛduə̃lin mɛnɛn bɛ́ ma dùũ lɛa, ma á re bɛn koe ka la. Ǹ tá re ka nyɛɛnaan boe ka yiridɛnaabaa laanka sii-doɛ̃ nɛ.»

¹⁶Bɛa biikoo li kəni, ka á re nɛnyaanan yii gigiã, Dɛnaa Lawa a da ǹ boo ne. Ka á re mɔnɛɛ gána lɛ nɛ. Min kɔn ba re Dɛnaa Lawa a *lɛ kɔ kɔn la ǹ goo kɛ boo diɛ wa, min kɔn ba re n yiri koɛ li wa. Yiri a re gisĩ a-n doo wa, min kɔn ba re a tanbaã doɛ̃ wa, min kɔn dɔ á re a kɔnboe zɛnɛɛ wa.

¹⁷Bɛa waáraa kəni, maǹ die Zeruzalɛmu bíi, «Dɛnaa Lawa a kii dankan.» Tɔrɔn tumaa n die n soekɔn ka Dɛnaa Lawa tɔ nɛ Zeruzalɛmu. Ǹ ba re koe ǹ foo kakabaa kɛ laanka ǹ taasiɛ baraan kɛn lɛ wa.

¹⁸Bɛ lɛ nɛ, Zudaa minin lɛn, ka á re n kiɛ kun ka Izirayeli minin ni. Ka á re boe gɔsɛ a lɛ̀gɔn la gána kɛ nɛ kun, ka wo gána kɛ nɛ ma kɔ ka digolon la, máa ǹ baa ǹ wɔ lɛa.

¹⁹Man má goã pii: Man zoɛ̃ li ma n baa maa nɛnyaanan kɛn goon lɛa. Man zoɛ̃ li ma gána sonbore kɔ n la, a n liɛ nɛ kanaa a bǎã sonbore tumaa nɛ. Man má goã pii máa n tá re ma bíi: "Maa díi", n nə n ba n dɔ̀ɔ̃ we ma-n doo wa.

²⁰Sɛnɛ, ka lɔ bɔlɔgoonbaãdɛnaa bɛ́ lɔn, ká bɔlɔgoonbaãdɛnan baa ma ganaa Izirayeli minin lɛn. Masɛ Dɛnaa Lawa a da ǹ boo ne.

²¹Lɛ-dɛ n boe kele mìi ni, Izirayeli minin manɛ. Maǹ wuu pii ǹ nə́ gú diɛ. A giala, maǹ nə́ zii baraa saa, ǹ yiri bɔ ka Dɛnaa Lawa, ǹ Lawa nɛ.

²²Ka wusoo ka da ma li, nɛnyaan bɔyaa wolen lɛn, ma á re kaa bɔlɔgoonbaãdɛnaabaa kɛ nyɛɛ ka ganaa! Wɔ á ke, wɔ ǹ die n din li, a giala, Dɛnaa Lawa, n din ni wɔa Lawa lɛa.

²³Sonbore, màn mɛn tumaa bɛ boe kelen mìi ni, soɛ nɛ, zùũzùũ mɛn tumaa bɛ́ boe tentenen la, bɛn tumaa n minin siɛ̃. Sonbore, Dɛnaa Lawa, wɔa Lawa n Izirayeli kirisibiɛ.

²⁴A kũ wɔa tenmaa waáraa ganaa, wɔa dín nɔmaa a là na á yɛ sìi da ǹ dìn[1] ganaa. N nə́ ǹ sèren si, ǹ bòen ne, ǹ diin ni, ǹ nɛgiĩn laanka ǹ nɛlɔn nɛ.

²⁵Ka waa tán sìi li. Wɔa yii gugurubaa papaã. A giala, wɔ laanka wɔ digolon man wɔ sii baraa zɛnaa, Dɛnaa Lawa wɔa Lawa ganaa, a kũ wɔa tenmaa waáraa ganaa a da pelo yaa. Wɔ n too kɔ Dɛnaa Lawa wɔa Lawa a da ǹ boon li wa.