Read Samo, Southern Zer 33 Bible Online

Zer 33 - Samo, Southern bible

Zer 33

¹A Zeremii toa wɔlɔ-lɛduə̃lin sumu-n, Dɛnaa Lawa boo da-n doo á pɛ:

²«Dɛnaa Lawa n kɛ pii asɛ mɛn bɛ́ màn tumaa a zɛnaali lɛa, á ǹ yɔrɔ boe, á ǹ koɛ. A tɔ n Dɛnaa Lawa.

³Ma bíi wɔ, ma á re n lɛ sii. Ma á re sii duriin nyɛɛ n nɛ, sii dadaran lɛa n bɛ́ n tɔ nə ǹ mɛnɛn dɔ̃ wa.

⁴Masɛ Dɛnaa Lawa, Izirayeli a Lawa n kɛ pii Zeruzalɛmu a kionən laanka Zudaa a kii kionən wɔ paǹ li. Ǹ wuriimaa nɛ. Là ba a ganaa ka zia baa *Baabilonii minin sɔraasin ganaa wa. Bɛ̀ ka bɛ zɛnaa, kiwi lɛ n die piɛ̃ ka geren ne, maa foo yoo gole kɛ taman yii. Zeruzalɛmu minin sii baraa la yii ni, bɛ lɛ nɛ má n dɔ̀ɔ̃ wɔ ǹ nɛ.

⁶Sɛnɛ, ma á re dagòã diɛ ǹ ganaa, ma ǹ kaka kɔ, ma á re là nyantoro taãn-taãn koe ǹ la ka bɔlɔ goondɛnaabaa nɛ.

⁷Ma á re die Zudaa laanka Zeruzalɛmu a wo bɛ̀rɛbaa ǹ bǎã-n wolen ne piɛ, ma ǹ lɛlɛ ǹ giã ǹ gɔn kɛ kɔ ǹ la.

⁸Ǹ sii baraa mɛn tumaa zɛnaa masɛ nɛ, ma á re ǹ *yoreen koe, ma ǹ sii baraan toa ǹ nɛ ka ǹ gòãn dii ǹ siin kɛn nɛ masɛ ganaa.

⁹Ka bɛ-n kəni, man die Zeruzalɛmu tɔ pii ka foo kɔɔ̃n nɛ. Á re ma tɔ boe, a ma foo kɔɔ̃n kɔ tán a tɔrɔn tumaa yɔrɔ-a. Ma bɛ́ re bǐɛ̃ mɛn zɛnɛɛ maa zaman lɛ nɛ, ǹ tá re bɛ miɛ. Nyɛ́ɛ á re ǹ kuĩ, ǹ gɔ̀nɔn bìn da yii-nyɛɛ laanka gɔn mànan kɛn taman yii ma á re koe maa zaman la.»

¹⁰Dɛnaa Lawa n kɛ pii: — Kasɛn Zudaa minin, ka ǹ pii: «Gána lɛ n diə lɛa, minbuiin nɛn ba a-n wa, tɔɔn ba a-n wa. Sonbore ne, Zudaa laanka Zeruzalɛmu, kaa kiwin lɛn kooromaa nɛ. Min goon din ba kaa ziin la wa. Haalɛ tɔɔ din.

¹¹ Bɛa kiwin kɛn lɛn nɛ, zɔ́n bìndiɛn tá re boe, foo kɔɔ̃n lɛ-dɛ nɛ, ka kɔn-wɔle tenən loen ne. Min mɛnɛn bɛ́ die Lawa a kion ka barka da ǹ loen ne, wɔ á re bɛn dɔn lɛ miɛ pii: Ka barka da Dɛnaa Lawa Pàãyiidɛnaa nɛ, a giala á siĩni, a minin narɛɛ a nyɛɛ duduu wa. Hiĩ, ma á re gána lɛ a lɛlɛ ǹ giã ǹ gɔn koe la.» Dɛnaa Lawa na á pɛ.

¹²Dɛnaa Lawa Pàãyiidɛnaa n kɛ pii doo: «Kɛa gána ziziɛ̃ kɛ lɛ nɛ, muibuiin laanka tɔɔ din ná a ba a-n wa, bǎãn tá re yii, kiwin tumaa nɛ, tɔɔn-lɛduə̃lin nə ǹ sèren laanka ǹ bòen lɛduə̃ ǹ nɛ.

¹³Kele yii kiwin kɛn nɛ ka *Sefelaa wɔn nɛ, Negɛvu kiwin ni, Bɛnzamɛn kiwin ni Zeruzalɛmu lɛkoro-a kiwin ni ka Zudaa kiwin ni, sèren laanka bòen tá re wusii ǹ kiɛ̃ ǹ nimii wole yɔrɔ-a.» Dɛnaa Lawa na á pɛ.

¹⁴ Á ke, lɛawaa á die, Dɛnaa Lawa a da ǹ boo ne, man lɛ kɔ ka sii mɛn nɛ Izirayeli zaman la ka Zudaa minin ni, ma á re bɛ zɛnɛɛ.

¹⁵Bɛa waáraa, bɛ̀ a biikoo dɔ, ma á re toɛ Davida tɔrɔ taãn goon yɛ. Bɛ n die peperebaa laanka sonborebaa zɛnɛɛ gána lɛ nɛ.

¹⁶Bɛa waáraa, Zudaa gána á re goɛ̃ a din gɔn wìi a lɛa, Zeruzalɛmu minin yiri á re goɛ̃ bǎã goon ne. Zeruzalɛmu tɔ n die goɛ̃: "Dɛnaa Lawa n wɔ kirisibaali lɛa".

¹⁷ Dɛnaa Lawa n kɛ pii doo: «Davida tɔrɔ á re nyaabiɛ Izirayeli gána a kii dankan kɛ la wa.

¹⁸ *Levii tɔrɔn tá re yii biikoo yii li ǹ Lawa a wúlu-bɔle baa ǹ dí nya masɛ nɛ. Ǹ tá re *wúlu màn tiɛ̃n boe, ǹ Lawa gɔ ǹ mànan gìĩ kaa ma nyin ni, ǹ wúlu mànan kɔ ma la baraabaraa.»

¹⁹Dɛnaa Lawa boo da Zeremii-n kɛnɛn:

²⁰— Masɛ Dɛnaa Lawa bɛ́ boo mɛn diɛ, á ke: «Ka á boe la ka maa lɛ-kɔ kɛ sàabaa lɛawaa laanka tèlò bii? Ka á boe la ka lɛawaa sàabaa a kɔ tèlò lɛ, hinlaa ka tèlò sàabaa a kɔ lɛawaa lɛ? Haayii!

²¹Bɛa yɔrɔ lɛ la, ma lɛkɔ mɛn wɔ maa dí-nyali Davida nɛ, bɛ dɔ a sàabiɛ doɛ̃ wa. Bɛ lɛ nɛ, duduu, min tá re yii Davida tɔrɔ lɛa a giã a kii dankan la. Duduu, Levii tɔrɔn tá re yii Lawa a wúlu-bɔlen lɛa ǹ dí nya ma nɛ.

²²Min bɛ́ a boe la a lon a leeren nimi lɔn wa, min bɛ́ a boe la a yìsi mu gole lɛ-a ǹ nyɔɔsɔ̃ dɔ nimi lɔn wa ǹ mɔnaabaa taman yii, ma dɔ n die Davida a sumu lɛ minin mɔnɛɛ miɛ̃ ka Levii a sumu lɛ minin ni dí nyɛɛ ma nɛ.»

²³Dɛnaa Lawa wusoo á boo da Zeremii-n kɛnɛn:

²⁴«Minin bɛ́ boo mɛn diɛ n ma wa? Maǹ pii mà má n la bɔ Izirayeli laanka Zudaa ganaa, bɛa tɔrɔ màn paa kɛ lɛ ma ǹ yii gɔgɔɔ̃. Bɛa yɔrɔ lɛ la, maǹ maa zaman lɛ yii puusə koe. Maǹ taasɛ mà ǹ ba gána lɛa doo wa.»

²⁵Masɛ Dɛnaa Lawa n kɛ pii: «Má lɛ-kɔ wɔ lɛawaa laanka tèlò bii. Má landa siin koa lon laanka tán wɔ lɛa.

²⁶Bɛa yɔrɔ lɛ la ma á boe la ma Zakɔba a sumu kɛ toa walan ka maa dí-nyali Davida wɔ kɛ nɛ? Ma á boe la man piã máa maa kiãn boe ǹ bii, ǹ mɛnɛn lɛn bɛ́ re Abrahamu laanka Izaaki ka Zakɔba a nɛnyaanan nyɛɛnaan boe wa? Haayii! Ǹ makara n boe ma ganaa, man die ǹ lɛlɛ ǹ giã ǹ gɔn koe ǹ la.»