Read Samo, Southern Zer 34 Bible Online

Zer 34 - Samo, Southern bible

Zer 34

¹ Nebukadenezɔɔrɔ na á goã *Baabilonii gána a kii lɛa. Á yoo zia-n Zeruzalɛmu laanka Zudaa a kiwin gialaa, kun ka a zia kurun ni ka kanaa tumaa a sɔraasin ni ka gánan mɛnɛn bɛ́ a pàã giulun. Bɛa waáraa lɛ nɛ, Dɛnaa Lawa boo da Zeremii ni á pɛ-n kɛnɛn:

²— Dɛnaa Lawa, Izirayeli a Lawa n kɛ pii: «Wo pɛ Zudaan kii Sedekiasi ni, mà masɛ n kɛ pii: Man die kiwi kɛ we Baabiloniin kii gɔn, a tɛ da a ganaa.

³Nsɛ kɔn ba re liɛ la wa. Ǹ tá re n kuĩ ǹ nə n baa a kòso nɛ lɛa. N tá re golee a yɔrɔ-a, n na a lɛ si, bɛ kio, n tɔn wo Baabilonii.

⁴Sɛnɛ, Zudaan kii Sedekiasi, ma bɛ́ boo mɛn diɛ n nɛ, bɛ̀ n nə n too kɔ li, n ba re gɛ̀ kaka we wa, ma din Dɛnaa Lawa n má pɛ.

⁵N tá re giɛ̃ yii-nyɛɛ gɔ́ɔ̃ nɛ. Ǹ tá re n gɛ̀ zɛnɛɛ ka n digolo kiin kɛn wɔ goã lɔn. Ǹ tá re da yon gìĩ kɔɔ̃n tiɛ̃ n wɔ lɛa, ǹ gɛ̀ loe kɛ lɔ: Koe woo koe, kii lɛ gã. Hiĩ, má n lɛ kɔ, ma din Dɛnaa Lawa n má pɛ.»

⁶Lawa a boo gii-dali Zeremii woo boo lɛ pɛ Zudaan kii Sedekiasi ni, Zeruzalɛmu.

⁷Bɛa waáraa lɛ nɛ, bɛ̀ Baabiloniin kii a sɔraasin tá Zeruzalɛmu gialaa ka Zudaa kiwin kɛn nɛ tɔn doaboe, bɛn man ka Lakiisi laanka Azekaa nɛ tamaa nɛ.

⁸Dɛnaa Lawa wusoo á boo da Zeremii ni kii Sedekiasi a lɛ-kɔ kɛ kio Zeruzalɛmu a zaman tumaa nɛ, màn mɛn bɛ́ toɛ, a ǹ bɛ̀rɛn kaa.

⁹Didie doamaa nɛ, a na a *Ebrəə bɛ̀rɛn kaa, ta giĩ ni hinlaa lɔ nɛ. Min kɔn doamaa bie a ǹ dɔɔ̃n Zudaa min da dí ganaa ka bɛ̀rɛ bɛ́ lɔn wa.

¹⁰Bɛa yɔrɔ lɛ la, nyɛɛnaandɛnan laanka zaman tumaa bɛa lɛ-kɔ lɛ wɔ ǹ nə́ lɛ kɔ ǹ bɛ̀rɛn kaa ganaa, ta a n giĩ hinlaa lɔ lɛa, ǹ nə́ ǹ ba re ǹ kiɛ dí kaka ganaa doo wa. Didie bɛa lɛ-kɔ lɛ si, ǹ nə́ ǹ bɛ̀rɛn lɛn kaa.

¹¹Sɛnɛ bɛ kio, ǹ taasiɛn nə́ n bɔyaa. Ǹ giĩn laanka lɔn mɛnɛn lɛn kaa, ǹ nə́ wusoo ǹ nə́ ǹ kũ doo ǹ nə́ ǹ kaa dí ganaa ka bɛ̀rɛn bɛ́ lɔn.

¹²Dɛnaa Lawa tɔn boo da Zeremii ni á pɛ nɛ:

¹³— Dɛnaa Lawa, Izirayeli a Lawa n kɛ pii: «Ma dɔ goã má lɛ-kɔ wɔ ka ka digolon ne, bɛ̀ ma bɛ́ má ǹ waa bɛ̀rɛbaa ǹ bǎã nɛ Ezipti gána nɛ má soo ǹ ne.

¹⁴ Man má pɛ ǹ nɛ: Kànaa ka lɛ̀ sɔbaa, didie doamaa nɛ a ǹ dɔɔ̃n Ebrəə min toa walan, ǹ mɛn lɛ nə n din sã ka la. Lɛ̀ sɔrɔ gɔ́ɔ̃ nɛ, a n die goɛ̃ kaa bɛ̀rɛ lɛa, sɛnɛ, a lɛ̀ sɔbaabaa ǹ wɔ li ka ǹ dɛnaa toa walan.» Sɛnɛ, ka digolon nə n too kɔ ma lon wa, ǹ nə n yiri kɔ maa boon li wa.

¹⁵Sɛnɛ, kasɛn nə́ goã ka kaa giã ǹ gɔn bɔyaa. Sii mɛn bɛ́ pepere ma yii li, ká bɛ zɛnaa. Didie pɛ ǹ miã nɛ, mà a bɛ̀rɛbaa nya. Ká lɛ-kɔ din wɔ ka ma nɛ maa kion kɛ nɛ ma tɔ n la.

¹⁶Sɛnɛ, ká kaa taasiɛn bɔyaa, ká ma yii puusə kɔ. Didie wusoo a ná a bɛ̀rɛgiĩ hinlaa a bɛ̀rɛlɔ kũ, ka goã ká ǹ mɛnɛn lɛn kaa, ká n wusii ǹ kiɛ bɛ̀rɛbaa ǹ dí ganaa.

¹⁷Bɛ lɛ nɛ Dɛnaa Lawa á kɛ pii: — Ka ma lɛ si wa, min kɔn nə ǹ dɔɔ̃n da á bɔ bɛ̀rɛbaa-n wa. Masɛ Dɛnaa Lawa n kɛ pii: «Man die yui zia-n ka ganaa, piɛ̃ busu ni ka bòo ne. Bɛa waáraa kəni, tán a tɔrɔn tumaa gɔ̀nɔn tá re bìn diɛ ka nyɛɛnɛ.

¹⁸Zudaa laanka Zeruzalɛmu a nyɛɛnaandɛnan nɛ, ǹ dí-nyali dadaran nɛ, ǹ Lawa a wúlu-bɔlen ne, ka min mɛnɛn tumaa bɛ́ tándɛnan lɛa, bɛn tumaa lɛ-kɔ wɔ ka masɛ nɛ. Maǹ nə́ wúlu bɔ ǹ dii nɛ lɛ na kɔn paa, ǹ nə́ bɔ a bii ni. Sɛnɛ, bɛa minin lɛn nə kɔ ǹ lɛ-kɔ lɛ wa, ǹ tamaa wa. Ma dɔ n die ǹ dɔn biɛ ka dii nɛ lɛ bɛ́ lɔn ǹ nə́ na kɔn paa.

²⁰Man die ǹ we ǹ zɔ́ɔn gɔn, ka min mɛnɛn bɛ́ zoɛ̃ ǹ gɛ̀ li. Ǹ siĩ á re zèwon laanka tolokan màn-bii biɛ.

²¹A din goon ne, man die Zudaan kii Sedekiasi laanka a gána nyɛɛnaandɛnan kiɛ ǹ zɔ́ɔn pàã giulun ka min mɛnɛn bɛ́ zoɛ̃ ǹ gɛ̀ li. Man die ǹ we Baabiloniin kii a sɔraasin gɔn. Bɛa sɔraasin lɛn dinin wɔlɔ n lui ni ǹ gana.

²²Sɛnɛ, man die wusii ma da ǹ nɛ Zeruzalɛmu, ǹ yoo a gialaa, ǹ kũ, ǹ tɛ da a ganaa. Zudaa kiwin tá re diə gole biɛ, min ná a ba ǹ nɛ wa.» Dɛnaa Lawa a da ǹ boo ne.