Read Samo, Southern Zer 39 Bible Online

Zer 39 - Samo, Southern bible

Zer 39

¹Zudaan kii Sedekiasi a kiibaa lɛ̀ manangɔrɔbaa ǹ wɔ a mui fùbaa ǹ wɔ li, *Baabiloniin kii Nebukadenezɔɔrɔ laanka a sɔraasin tumaa daa Zeruzalɛmu lɛnpɛnɛ.

²Sedekiasi a kiibaa lɛ̀ fulugoonbaa ǹ wɔ a mui siibaa ǹ wɔ a lɛawaa manangɔrɔbaa ǹ wɔ li, Baabilonii minin nə́ Zeruzalɛmu lɛnpɛnɛ ǹ kungɔn kolo fɔ̃.

³Baabiloniin kii a gána nyɛɛnaandɛnan tumaa wɔ, ǹ nə́ giã kiwi lɛ a kiɛnlɛ kɛ lɛ-a bii. Min mɛnɛn nə goã ǹ tan, ǹ nə́ ke: Negali-Saresɛɛrɛ nɛ, Sangaara-Neboo ne, kii a dí-nyalin goledɛnaa Saaraa-Sekimu ni, sɔraasin goledɛnaa Negali-Saresɛɛrɛ nɛ ka Baabiloniin kii a sɔraasin nyɛɛnaandɛnan kɔsɔn dɔn nɛ.

⁴Zudaan kii Sedekiasi laanka a sɔraasin bɛ́ ǹ nə́ ǹ yɛ lɔn, ǹ nə́ baa si tèlò basa li ǹ nə́ soo kiwi lɛ nɛ, ǹ nə́ bɔ kii a dù gɔrɔ kɛ nɛ, ǹ nə́ woo soo kiɛnlɛ kɛ nɛ kungɔn màn paa bii n ni. Ǹ nə́ Arabaa zii saa.

⁵Sɛnɛ, Baabilonii sɔraasin nə́ ǹ kio loo, ǹ nə́ dɔ Sedekiasi ganaa Zerikoo nyankɔrɔ lɛ nɛ. Ǹ nə́ kũ, ǹ nə́ baa kòso nɛ lɛa, ǹ nə́ woo ne Ribla kiwi, Amaati gána nɛ, Baabiloniin kii Nebukadenezɔɔrɔ yɔrɔ-a. Nebukadenezɔɔrɔ kiri wɔ Sedekiasi ganaa walan.

⁶Ka bɛ-n doo Baabiloniin kii Sedekiasi a nɛgiĩn dɛ a dinmaa yii ni ka Zudaa gána a kiãn tumaa nɛ.

⁷Bɛ kio, ǹ nə́ Sedekiasi yii nanan fɔ̃fɔ̃, ǹ nə́ yii ka zan zɔrɔka màn paa nɛ, ǹ nə́ woo-n Baabilonii.

⁸Baabilonii minin nə́ tɛ da kii a kion gana Zeruzalɛmu ka Zeruzalɛmu minin kionən ne. Kungɔn mɛn bɛ́ Zeruzalɛmu kiwi tamaɛ, ǹ nə́ bɛ wuru.

⁹Min mɛnɛn nə goã kiwi lɛ nɛ, bǎã-lɛduə̃lin goledɛnaa Nebuzaradan bɛn goa á woo ǹ ne Baabilonii. Min mɛnɛn nə n dinin wɔ Baabiloniin kii gɔn ka gɔn dí-nyali gialakunun kɛn nɛ, á bɛn dɔn goa á woo ǹ ne Baabilonii.

¹⁰Sɛnɛ, min mɛnɛn bɛ́ doobaan lɛa màn kɔn ba ǹ lon wa, Nebuzaradan bɛn tɛnɛn toa Zudaa gána nɛ, á wurun gii ǹ ni ka rezɛ̃ wurun ni.

¹¹Baabiloniin kii Nebukadenezɔɔrɔ dí-pɛ kɔ bǎã-lɛduə̃lin goledɛnaa Nebuzaradan la Zeremii a paǹ li, á pɛ:

¹²«Wo kũ n da nɛ, n ga a walan, min kɔn nyan baraa zɛnaa-n wa, n tamaa ka a bɛ li lɔn.»

¹³Bǎã-lɛduə̃lin goledɛnaa Nebuzaradan kɔn ma ka kii a dí-nyali goledɛnaa Nebukaziban nɛ, sɔraasin goledɛnaa Negali-Saresɛɛrɛ nɛ ka Baabiloniin kii a gána nyɛɛnaandɛnan tumaa nɛ.

¹⁴Ǹ nə́ minin dia maǹ wo Zeremii bɔ bǎã-lɛduə̃lin sumu kɛ nɛ, ǹ da kɔ Safan a nɔ̀ɔn, Ayikaamu a nɛgiĩ Gedalia la. Gedalia zii kɔ Zeremii la mà a wo piɛ. Bɛ na á n baa Zeremii a da kiwi minin bii lɛa kɛnɛn.

¹⁵A Zeremii toa tɔn kòso-n bǎã-lɛduə̃lin sumu lɛ nɛ, Dɛnaa Lawa boo da nɛ á pɛ:

¹⁶«Wo pɛ Etiopii min Ebɛdi-Melɛki ni mà Dɛnaa Lawa Pàãyiidɛnaa Izirayeli a Lawa n kɛ pii: Ma bie má goã má bǐɛ̃ boo da Zeruzalɛmu minin man wa, sɛnɛ koe ne. Taãn nɛ, ma boo mɛn da, a n die yɔrɔ yii. Kànaa ka boɛɛn, n tá re yii.

¹⁷Sɛnɛ, bɛa biikoo lɛ li, ma á re n kanbiɛ, ma din Dɛnaa Lawa a da ǹ boo ne. N bɛ́ nyɛ́ɛ biɛ min mɛnɛn manɛ, ma a re n we ǹ gɔn wa.

¹⁸Sonbore, sàabaa ba la wa, ma á re n kirisibiɛ. N ba re gɔya sa gɛ̀ we wa, n yii á re goɛ̃ koo. N là á re goɛ̃ ka bɛ sɛ kɔn nɛ, a giala, n nə́ n foo doa masɛ ganaa. Dɛnaa Lawa a da ǹ boo ne.»