Read Samo, Southern Zer 44 Bible Online

Zer 44 - Samo, Southern bible

Zer 44

¹Dɛnaa Lawa boo da Zeremii ni. Zudaa minin mɛnɛn nə goã giã-n Ezipti gána nɛ, a n boo diɛ bɛn wɔ paǹ li, Migdɔli minin ni, Tapanɛsi wɔn nɛ, Mɛmifisi wɔn nɛ ka Patɔrɔsi gána minin ni. Zeremii tɔn pɛ ǹ nɛ:

²— Dɛnaa Lawa Pàãyiidɛnaa, Izirayeli a Lawa n kɛ pii: «Ma koen mɛnɛn da Zeruzalɛmu laanka Zudaa kiwin tɛnɛn mìi ni, táa ka bɛn yɛ. Pelo, ǹ tumaa kɛbɔlɔ baa, min goon din ba ǹ nɛ wa.

³Ǹ sii baraan mɛnɛn zɛnaa ǹ nə́ ma foo yoo ne, bɛ lɛ na á toa sii kɛ nə ǹ yɛ. A giala, maǹ nə́ da yon gìĩ kɔɔ̃n tã dì soreen manɛ, ǹ nə́ ǹ guguru kɔ, a da yaa, ǹ ba bɛa dìn lɛn dɔn dinin doɛ̃ wa, ka dɔn dinin ni ka ka dogolon dɔn ba ǹ doɛ̃ wa.

⁴A da yaa, biikoo tumaa li, má maa dí-nyalin, Lawa a boo gii-dalin dia ka la. Ǹ nə́ pɛ ka nɛ kɔn kio mà ka sabara baa, mà kaa sii bɔbɔnɛɛn kɛn tìĩ a boe-n ma nɛ, mà ka nyan bɛ zɛnaa wa.

⁵Sɛnɛ, ka n too kɔ wa, ka n too da wa. Ka goã sii baraa mɛn tumaa zɛnɛɛ, ka ǹ kɔn toa walan wa. Ka nə n tiɛ̃ tɔn da yon gìĩ kɔɔ̃n tiɛ̃ dì soreen manɛ.

⁶Bɛ lɛ nɛ má maa foo-yoo baraa kaa Zudaa kiwin laanka Zeruzalɛmu a ziin la. Ǹ nə́ kɛbɔlɔn baa, diə bǎã lɛa ka ka yii bɛ́ a ganaa lɔn pelo.»

⁷Kanna kəni, Dɛnaa Lawa Pàãyiidɛnaa, Izirayeli a Lawa n kɛ pii: «Wàa na á baa ka á baraa kɛ tumaa zɛnɛɛ ka dinin manɛ? Ka ǹ zoɛ̃ li mà ka Zudaa a giĩn dɛ, a lɔn nɛ, a nɛ tenən ne ka a nɛnyaan bɔnboɛɛnɛn nɛ? Ka ǹ li ka bɔ̀nbaa lenlen?

⁸Ka ǹ ma foo yui ká kaa zɛnaa ǹ siin ni. A giala, ka ǹ da yon gìĩ kɔɔ̃n tiɛ̃ dì soreen manɛ Ezipti gána nɛ. Ka ǹ li ka papaã lenlen ka n bɔ gána lɛ nɛ, ka sii a kɔnboe baa kanaa a gánan tumaa yɔrɔ-a lɛn baraa bíi laanka sìi a paǹ li?

⁹Ka yiri na á bɔ sii baraan kɛn nɛ ka ǹ zɛnaa Zudaa gána nɛ ka Zeruzalɛmu a ziin la ǹ nɛ? Kaa díin zɛnaa ǹ sii bɔbɔnɛɛn kɛn manɛ, Zudaa kiin wɔn nɛ, ǹ lɔn wɔn nɛ, ka dinin wɔn nɛ ka kaa lɔn wɔn nɛ.

¹⁰A da kaa pelo ǹ lɛ, min kɔn tɔn nə n din boɛɛn kɔ, á ma guguru kɔ wa. Min kɔn tɔn kɔ maa daraan laanka maa dí-pɛn kɛn lɛ wa, kɛn má ǹ kɔ ka la kɔnlɛ ka ka digolon ne.»

¹¹Zeremii pɛ doo: — Bɛ lɛ nɛ, Dɛnaa Lawa Pàãyiidɛnaa, Izirayeli a Lawa á kɛ pii: «Man die yui ka gialaa, ma koe bɔ ka ganaa, ma Zudaa gána a zaman tumaa dɛ.

¹²Zudaa minin mɛnɛn yii goã koo ǹ nə́ daa gùli kɔ Ezipti gána nɛ, ma á re ǹ tumaa dii lenlen. Ǹ tumaa n die giɛ̃ bɛa gána lɛ nɛ, zia laanka bòo gɔn, ǹ tumaa, nɛnyaanan nɛ ka min zizin ni. Hiĩ, ǹ tumaa n die giɛ̃ bɛa yɔrɔ kɛ lɛ la. Maǹ die ǹ biɛ sii a kɔnboe lɛa, bɛ̀ ǹ tá re lɛn baraa bíi, ǹ sii bɔbɔnɛɛ boo da, ǹ nyɛ́ɛ da min ganaa ka sìi da ǹ sii ni.

¹³Ma yoo Zeruzalɛmu minin gialaa lɔn, man die yui minin kɛn gialaa giã-n Ezipti gána nɛ ka zia nɛ, bòo ne ka piɛ̃ busu ni.

¹⁴Min mɛnɛn yii goã koo Zudaa gána nɛ, ǹ nə́ woo gùli kɔ Ezipti gána nɛ, ǹ kɔn ba re boe la a baa si a la wa. Ǹ kɔn ba re n sii gɛ̀ la wa. Min mɛnɛn tumaa bɛ́ li ǹ wusoo ǹ wo Zudaa gána nɛ, ǹ ba re boe la ǹ wusoo ǹ woo wa, yǎa min gogoon mɛn bɛ́ re n sii gɛ̀ la.»

¹⁵Min mɛn tumaa goã giã-n Ezipti gána nɛ Patɔrɔsi kiwi, giĩn mɛnɛn tumaa goã doɛ̃ mà ǹsɛn lɔn tá da yon gìĩ kɔɔ̃n tiɛ̃ dì soreen wɔ lɛa, bɛn tumaa goã ǹ tan, ka lɔ damata nɛ. Ǹ nə́ pɛ Zeremii ni:

¹⁶«Ń bɛ́ mà n man boo diɛ wɔ nɛ ka Dɛnaa Lawa tɔ nɛ, wɔsɛn ba re n too koe n lon wa.

¹⁷Wɔ sii mɛn tumaa koa wɔ yɔrɔ-a, wɔ ǹ bɛ zɛnɛɛ. Wɔ ǹ da yon gìĩ kɔɔ̃n laanka duvɛ̃ zumii lon a kii lɔ wɔ lɛa. Bɛ ǹ wɔa zɛnaa ǹ sii lɛa haalɛ bibi, wɔ dinin ni, wɔ din ni, wɔa kiin ni ka wɔa gána nyɛɛnaandɛnan nɛ Zudaa kiwin ni ka Zeruzalɛmu ziin la ǹ nɛ. Bɛa biikoo li, màn-bii goã wɔ lon, là nyantoro ne, wɔ a koe doɛ̃ wa.

¹⁸Sɛnɛ, ǹ mɛn pinaa, wɔ bɛ́ wɔ́ da yon gìĩ kɔɔ̃n laanka duvɛ̃ zumii lon a kii lɔ la toa walan, a kũ bɛ ganaa, màn tumaa n nyaabiɛ wɔ ganaa, wɔ n giɛ̃ zia laanka bòo gɔn.»

¹⁹Lɔn nə́ pɛ doo: «Bɛ̀ wɔ á da yon gìĩ kɔɔ̃n tiɛ̃ lon a kii lɔ lɛ wɔ lɛa, wɔ n duvɛ̃ zumii a wɔ lɛa, táa wɔ zuũn tá a siére-a? Wɔ bɛ́ mɔ̀mɔn mɛnɛn zɛnɛɛ lon a kii lɔ a kɔnboe lɛa, ka duvɛ̃ kɛ nɛ wɔ n zumii la, táa ǹ tá bɛ dɔ siére-a.»

²⁰Sɛnɛ, min mɛn tumaa Zeremii lɛ si ka kɛa yɔrɔ kɛ lɛ nɛ, zaman tumaa nɛ, giĩn ni ka lɔn nɛ Zeremii pɛ ǹ nɛ:

²¹«Taãn nɛ, ká goã *wúlu màn gìĩ kɔɔ̃n tiɛ̃ Zudaa kiwin ni ka Zeruzalɛmu a zii la ǹ nɛ: Ka dinin ni, kaa díin ni, kaa kiin ni, kaa gána nyɛɛnaandɛnan nɛ, ka Zudaa min kɔsɔn nɛ. Dɛnaa Lawa yiri tá a-n parsiini, a yiri bɔ-n wa.

²²Sɛnɛ, Dɛnaa Lawa boo la á kaa giã ǹ gɔn babaraan laanka kaa sii bɔbɔnɛɛn kɛn si a din ganaa wa. Bɛ lɛ nɛ kaa gána lɛ kɛbɔlɔ baa, bǎã bɔbɔnɛɛ lɛa, min goon din ná a ba a-n wa. A n sii a kɔnboe lɛa lɛn baraa bíi a paǹ li ka min tumaa yii bɛa ganaa lɔn pelo.

²³Koe na á ka yɛ bɛ lɛ taman yii: Ka n ka da yon gìĩ kɔɔ̃n tã dì soreen wɔ lɛa, ka sii baraa zɛnaa ka wɔ Dɛnaa Lawa lon ne. Ka n too kɔ a lon wa, ka n too kɔ a daraan li wa, a dí-pɛn nɛ ka a doroon ne ka min tumaa yii bɛ́ a ganaa lɔn pelo.»

²⁴Zeremii pɛ zaman lɛ tumaa nɛ, ka lɔn nɛ: — Kasɛn Zudaa minin kɛn giã-n Ezipti gána nɛ, ka n too kɔ Dɛnaa Lawa a boo li.

²⁵Dɛnaa Lawa Pàãyiidɛnaa Izirayeli a Lawa n kɛ pii: «Ka laanka kaa lɔn man ka pɛ kɛnɛn: Wɔ n lɛ kɔ wáa wɔ á re da yon gìĩ kɔɔ̃n laanka duvɛ̃ zumii lon a kii lɔ la. Wɔ ǹ li wɔ wɔa lɛ-kɔ lɛ pã.» Ka bɛ́ li lɔn ka zɛnaa miɛ̃, ka kaa lɛ-kɔn lɛ pã!

²⁶Sɛnɛ, kasɛn Zudaa minin kɛn giã-n Ezipti gána nɛ, ka n too kɔ Dɛnaa Lawa a boo kɛ li! Á ke, masɛ Dɛnaa Lawa, ma nə n liɛ ka ma tɔ gole kɛ nɛ: Ezipti gána tumaa nɛ, Zudaa min kɔn ba re masɛ tɔ pii wa. Min kɔn ba re pii doo: "Ka Dɛnaa Lawa, Lawa yiikoonaa tɔ nɛ wa".

²⁷Man die n yii soe ǹ ganaa ǹ koe yɛ a lɛa. Zudaa minin mɛnɛn bɛ́ giã-n Ezipti gána nɛ, zia laanka bòo á re ǹ dii. Ǹ goon din ba re goɛ̃ wa.

²⁸Ǹ gogoon dinsɔɔ̃ n die liɛ zia la, ǹ bɔ Ezipti ǹ da Zudaa gána nɛ. Bɛa waáraa kəni, Zudaa min gialakunun kɛn tɔn Ezipti gána nɛ, bɛn tá re doɛ̃ bɛ̀ ǹsɛn boo hinlaa bɛ̀ masɛ a boo n yɔrɔ yii.

²⁹Dɛnaa Lawa a da ǹ boo á ke: Man die yui ka gialaa kànaa Ezipti gána nɛ. Man die sii a kɔnboe nyɛɛ ka nɛ, ka dɔ̃ mà ma din a da ǹ boon man yɔrɔ yii, kaa koe yɛ a lɛa. Bɛa sii a kɔnboe lɛ á ke:

³⁰Má Zudaan kii Sedekiasi wɔ Baabiloniin kii Nebukadenezɔɔrɔ gɔn, a zɔ́ɔ kɛ lɛ giɛ a gɛ̀ li. A din yɔrɔ goon la, man die Eziptin kii *Faarahɔn Ofra we a zɔ́ɔn gɔn ǹ mɛnɛn lɛn bɛ́ giɛ a gɛ̀ li. Masɛ Dɛnaa Lawa n má pɛ.