Read Samo, Southern Zer 50 Bible Online

Zer 50 - Samo, Southern bible

Zer 50

¹ Dɛnaa Lawa boo mɛn da Lawa a boo gii-dali Zeremii ni *Baabilonii kiwi a paǹ li ka Baabilonii gána nɛ:

²Ka boo kɛ pɛ tɔrɔn tumaa nɛ, ka a boo da ka sii a kɔnboen ne, ka a boo da, ka nyan màn kɔn duru wa. Ka pɛ: Ǹ nə́ Baabilonii kũ! A dìn kɛn wɔ n ka sìi ni, a dì kooron kɛn wɔ n ka foo ziziɛ̃ gole ne. Sìi nə́ n kɔ Bɛɛli lɛ, Marduku foo ziziɛ̃ duduu.

³Tɔrɔ goon nə boe gɔsɛ a lɛ̀gɔn li die Baabilonii gialaa. A n die Baabilonii gána biɛ kɛbɔlɔ lɛa. Min goo din ba re goɛ̃ a-n wa. Minbuiinin ni, tɔɔn nɛ, ǹ tumaa n die baa sii, ǹ tumaa á re papaɛ̃.

⁴Dɛnaa Lawa a da ǹ boo á ke: Bɛa biikoo li, bɛa pinaa kəni Izirayeli minin laanka Zudaa minin tá re die kun. Ǹ tá re tɔ we, ǹ wuu pɛ, ǹ tá re giɛ masɛ Dɛnaa Lawa, ǹ Lawa li.

⁵Zii mɛn bɛ́ woe *Siɔn, ǹ tá re nɔ̀n diɛ bɛ li, ǹ nə n yɔrɔ bɔyaa ǹ dia kiwi lɛ la. Ǹ tá re die, ǹ lɛ kɔ kɔn la wɔ ka masɛ nɛ, yǎa duduu, ǹ yiri ná a boe-n duduu dɔn wa.

⁶Maa zaman lɛ a minin man nə́ goã ka sère papaã wolen bɛ́ lɔn. Ǹ lɛduə̃lin man nə́ goã ǹ yiri siɛ̃. Maǹ nə n toɛ walan bɛ̀ ǹ wo kelen la, ǹ dinin gɔn wìi a lɛa. Ǹ nə́ woo kelen la ka tentenen ne, ǹ yiri bɔ ǹ zìãn ganaa.

⁷Bɛ̀ min woo min kaa ǹ lɛ, a n basaã koe ǹ bii. Ǹ zɔ́ɔn man nə́ goã pii: Wɔ sii kɔn la ǹ la baraa wa! Ǹ dinin maǹ nə́ wɔ Dɛnaa Lawa lon, ke, ǹ kiri pepere-wɔle lɛa, ǹ digolon nə goã n foo doɛ ǹ mɛn lɛ ganaa.

⁸ Ka baa si ka n bɔ Baabilonii, ka soo ka n bɔ Baabilonii minin gána kɛ nɛ! Ka n baa ka butumu bɛ́ lɔn tɔɔ kuru mìi la.

⁹Taãn nɛ, man die bìn diɛ gána dadara gigiã ganaa, ma ǹ dia ǹ wo Baabilonii kũ. Bɛa tɔrɔn lɛn man die boe gɔsɛ a lɛ̀gɔn la. Maǹ nə n tele kɔn li, ǹ yoo gána lɛ gialaa, ǹ kũ. Ǹ kiɛn lɛn man ka zia-baali zanbia a kiɛn bɛ́ lɔn, a ba n bɔyɛɛ ka a gɔn kooro-n wa.

¹⁰Ǹ tá re Baabilonii gána kokoe. Ǹ tá re a gɔn mànan goɛ ka ǹ bɛ́ li lɔn. Dɛnaa Lawa a da ǹ boo ne.

¹¹Ka n nyɛnyɛɛ ka bɛ̀ baa ka foo kɔɔ̃n nɛ, kasɛn mɛnɛn nə maa kíɛ̃ lɛ ziziɛ̃. Ka paparɛ ka dii nɛ ten bɛ́ lɔn, buu sɔ̃ ǹ bǎã nɛ. Ka lɛ baa ka sùin wɔ bɛ́ lɔn!

¹²Sìi nə n kɔ kaa náa [11] lɛ, min mɛn ka yɛ á ka da kanaa, a gugurubaa nya. Sisia, kaa gána lɛ n gána tumaa a giala nyɔmɔɔ lɛa. Diə gole ne, tán gere ne.

¹³Dɛnaa Lawa a foo-yoo gole kɛ taman yii, kaa gána lɛ n goɛ̃ minbuiin nɛ baã. Kɛbɔlɔ nɛ. Min mɛn tumaa bɛ́ kiɛ̃ kunu Baabilonii li, ǹ tumaa yiri a die n lɔlɛkɔn. Ǹ tá re n lɛ dii basaã kɛ tumaa taman yii.

¹⁴Kasɛn, sa-zũlin lɛn, ka Baabilonii lɛnpɛnɛ, ka yoo a gialaa! Ka pã! Ka nyan ga kaa kiɛn ganaa wa! A giala, á wɔ Dɛnaa Lawa lon.

¹⁵Ka ziabaa ǹ lɛ dɛ wɔ a ganaa! Á n gɔnɔn goa lon, á re n din we wɔ gɔn. A sanabolon man kiɛ, a kungɔnɔn kɛn a kiwin tamaɛ, bɛn man kiɛ. Dɛnaa Lawa a gɛ̀ dòo boe ne. Ka kaa gɛ̀ dòo bɔ Baabilonii ganaa. A sii mɛn zɛnaa ǹ miãn manɛ, ka bɛ lɛ zɛnaa a dɔ nɛ.

¹⁶Min mɛn tumaa bɛ́ màn diɛ, ka min mɛn tumaa bɛ́ màn kuri kaa piɛ waáraa, ka ǹ tumaa dɛ. Didie baa si zia baraa kɛ nyɛɛnɛ, a wo piɛ, a wo a gána nɛ.

¹⁷Izirayeli na á goã ka sère papaã wole bɛ́ lɔn, yàran ná a kio. Min mɛn sɔ̃ bibinaa nɛ, Asiiriin kii ni. Bɛ kio, Baabiloniin kii Nebukadenezɔɔrɔ daa, á kũ a ná a wen yiyiɛ.

¹⁸Bɛ lɛ nɛ, Dɛnaa Lawa Pàãyiidɛnaa Izirayeli a Lawa á kɛ pii: «Man die yui Baabiloniin kii gialaa, ka a gána nɛ, ka ma bɛ́ má yoo Asiirii gána a kii gialaa lɔn.»

¹⁹Man die wusii ma wo ka Izirayeli ni a lɛduə̃ ǹ bǎã nɛ. Karmɛli kele la, Basan a wuru bǎãn nɛ, Efrayimu a kele yiin ni, ka Galaati gána nɛ, á re màn-bii yii a bii, a kã.

²⁰Bɛa biikoo li, bɛa pinaa kəni, ǹ tá re giɛ Izirayeli a sãn li, sɛnɛ ǹ ba re màn kɔn yii wa. Ǹ tá re giɛ Zudaa a sãn li, sɛnɛ ǹ ba re màn kɔn yii wa. A giala, min mɛnɛn yii bɛ́ re goɛ̃ koo, ma á re bɛn sãn toɛ ǹ nɛ. Dɛnaa Lawa a da ǹ boo ne.

²¹Yoo ka zia nɛ Meratayimu gána kɛ ganaa. Yoo a gialaa, n yoo Pekɔti minin gialaa. Ǹ dɛ, n nə ǹ bɔ̀n baa lenlen. Ma pɛ lɔn, a zɛnaa a kɔnpɛ ka bɛ lɛ nɛ. Dɛnaa Lawa a da ǹ boo ne.

²²Gána lɛ gɔ́ɔ̃ nɛ, zia wuu n boe. Wàa koe babaraa n ka bɛ nɛ!

²³Baabilonii na á goã yele lɛa, kanaa tumaa yɔyɔrɛ. Á ke, á yɔyɔrɛ, á pɔpɔsɛ. Bɛ na á saa lɔn kəni? A na á saa lɔn, Baabilonii kɛbɔlɔ baa tɔrɔn bii?

²⁴Baabilonii, má kan kɔ n nɛ, á n kũ n bɔ a siére-a wa. N giala mɛ kanaa, ǹ nə́ n kũ. A giala, man nə́ n gòãn dii masɛ Dɛnaa Lawa ganaa.

²⁵Dɛnaa Lawa n soe ka a ziabaa ǹ mànan nɛ, a n die a foo-yoo nyɛɛ. Baabilonii gána nɛ, dí n Dɛnaa Lawa Pàãyiidɛnaa gɔn.

²⁶Ka bɔ paǹ yii li ka daa, ka a dɔǹɔn lɛ bũ, ka a naforon sɔkɔn, ka tɛ da ǹ ganaa! Ka nyan màn kɔn toa walan wa!

²⁷Ka a sɔraasi sonboren tumaa dɛ, ka wo ǹ ne ǹ bɔlɔ kuru ǹ bǎã nɛ! Ǹ wɔ n ka bɔ̀n nɛ, a giala ǹ dɔlɔ bɔ biikoo na á dɔ.

²⁸Ka n too kɔ! Min mɛnɛn bɛ́ baa sii soe Baabilonii, ka min mɛnɛn yii bɛ́ tɔn koo, bɛn man pii Siɔn nɛ: Dɛnaa Lawa, wɔa Lawa ná a gɛ̀ dòo bɔ. A ná a kion sonbore kɛa gɛ̀ dòo bɔ.

²⁹ Ka sa-zũlin tumaa sɔkɔn, ka ǹ kaa Baabilonii kiwi ganaa. Ka a lɛnpɛnɛ a paǹ tumaa li! Ka nyan toa min kɔn la wa! Ka a saraa kɔ la a kɔnpɛ ka a zɛnaa ǹ siin ni. A siin mɛnɛn zɛnaa ǹ miãn manɛ, ka zɛnaa a dɔ-n miɛ̃. A giala, á n din koa Dɛnaa Lawa, Izirayeli a Lawa sonbore kɛ ganaa.

³⁰Bɛ lɛ nɛ, bɛa pinaa lɛ nɛ, a nɛ tenən tá re mɛnɛɛ bǎã dadaran nɛ, a sɔraasin tumaa gã. Dɛnaa Lawa a da ǹ boo ne.

³¹Taãn nɛ, Din koa wole Baabilonii, ma lɛ nə n li. Dɛnaa Lawa Pàãyiidɛnaa a da ǹ boo ne. Kanna kəni, maa yoo n gialaa ǹ lɛawaa n ka kɛ nɛ.

³²Din koa wole nə n gòã niɛ a mɛnaa. Min kɔn ba yii a saa a da lon wa. Man tɛ diɛ a kiwin gana. Màn mɛn tumaa bɛ́ ǹ lɛnpɛnɛ, man tɛ diɛ a tumaa ganaa.

³³Dɛnaa Lawa Pàãyiidɛnaa n kɛ pii: Maǹ nə́ Izirayeli laanka Zudaa minin yɔyɔrɛ ka kakaarɛbaa nɛ. Ǹ goa wolen manə n gɔn parɛɛ ǹ ganaa, maǹ nə n piɛ̃ mà ǹ ba n gɔn boe ǹ ganaa wa.

³⁴Sɛnɛ pàã tá ǹ si sii la wole lon. A tɔ n "Dɛnaa Lawa Pàãyiidɛnaa". A n die ǹ zia gii diɛ ka pàã nɛ. Màn mɛn bɛ́ toɛ, a nyɛ́ɛ da Baabilonii ganaa, a yii-nyɛɛ kɔ tán tumaa la.

³⁵Dɛnaa Lawa a da ǹ boo á ke: Ka zia baa Baabilonii minin ganaa, Baabilonii a zaman nɛ, a kiãn nɛ ka a sii-dɔ̃len ne!

³⁶Ka zia baa a wɔ-kũlin ganaa, kɛn baãnaan lɛa. Ka zia baa a sɔraasin ganaa, ka ǹ foo ziziɛ̃!

³⁷Ka zia baa a sùin laanka a ziabaa ǹ wotoron ganaa, ka tiin kɛn nɛ zia biɛ a lɛa. Ǹ die ǹ nə n baa ka lɔ pàãwɛɛnaan bɛ́ lɔn! Ka zia baa a naforon ganaa, ka ǹ tumaa kokoo!

³⁸Ka zia baa a tà mun ganaa, ǹ gɔ́ɔ̃ laa kakaka. A giala, dìn gána nɛ. Maǹ nə n dinin gole koe bɛa dì nyín bɔbɔnɛɛn kɛn lɛn taman yii.

³⁹ Bɛ lɛ nɛ, don nɔ̀ɔnɔn laanka kuruun tá re giɛ̃ Baabilonii kiwi-n kun. Á re bɛndan dɔn bǎã biɛ. Min kɔn ba re giɛ̃ a-n duduu doo wa, a n die goɛ̃ kɛbɔlɔ lɛa miɛ̃ duduu.

⁴⁰ Dɛnaa Lawa a da ǹ boo á ke: Basaã mɛn Sodɔmu laanka Gomɔɔrɔ yɛ, ka ǹ lɛkoro-a kiwin ni, a din lɛ miã n die a dɔ yii. Min goon din ba re goɛ̃ a kiwin ni wa, minbuiin nɛ goon ba re goɛ̃ ǹ nɛ wa.

⁴¹Á ke, Tɔrɔ goon nə boe gɔsɛ a lɛ̀gɔn li die. Zaman gole nə n toɛ kanaa lɛ dan ganaa die.

⁴²Sa laanka ziabaa ǹ màn lɛ pɛpɛnɛn man a sɔraasin gɔn. Maǹ baraa, ǹ ba makara doɛ̃ wa. Ǹ bìn diɛ wuu n boe ka yìsi mu gole a ginii bɛ́ lɔn. Maǹ sùin la, telee-n kɔn li sɔnbɔraa nɛ, ǹ nə́ die zia biɛ n ganaa Baabilonii kiwi.

⁴³Baabiloniin kii bɛ́ á bɛa kibərə lɛ ma, a foo ziziɛ̃, nyɛ́ɛ kũ. A nɔmaamaa nɛ ka lɔ bɛ́ lɔn a nɛ yɛ biikoo li.

⁴⁴Dɛnaa Lawa pɛ: Man die goɛ̃ ka yàra bɛ́ lɔn, á soo da yii ni Zurdɛ̃ tà lɛ-a, woe tɔɔn buu sɔ̃ ǹ bǎã nɛ. Man die min tumaa goɛ bǎã goon ne ma wo ǹ ne. Bɛ kio, ma á re giĩ goon boe ma koa Baabilonii gána mìi la. Die n ka ma bɛ́ lɔn? Die n boe la a maa sii zɛnaa a nɔ̀n da ma la? Kiã mɛn nə boe la a n gòãn dii ma ganaa?

⁴⁵Dɛnaa Lawa sii mɛn yɔrɔ bɔ Baabilonii gána wɔ lɛa, a sii mɛn yɔrɔ bɔ Baabilonii minin wɔ paǹ li, ka n too kɔ bɛ li kəni. Sàabaa ba la wa, maǹ die ǹ giɛrɛɛ tán ka pàã nɛ, kɔnlɛ ka ǹ nɛnyaanan tumaa nɛ, ka tɔɔn wɔ bɛ́ lɔn. Sàabaa ba la wa ǹ dinin taman yii, ǹ tá re ǹ zìãn wurii.

⁴⁶Ǹ mɛn waáraa bɛ̀ ǹ tá pii: «Ǹ nə́ Baabilonii kũ!», tán nə bìn diɛ, lɛ dɛ gole n boe gána tumaa nɛ.