Read Samo, Southern BPS 4 Bible Online

BPS 4 - Samo, Southern bible

BPS 4

¹Wui! Sana lɛ a tɛ pii doo wa. Sana sonbore lɛ tɛ pɛ lɛ da. Lawa a kion a kɔlɔn kɛn, a n siɛ lɔn bɛn tá pɛsiɛ̃-n bǎã tumaa nɛ zii gialaa.

²A n siɛ lɔn, *Siɔn minin kɛn, yii n boe ǹ li ka sana yoreen bɛ́ lɔn, ǹ nə́ ǹ biɛ ka donkolon kooro bɛ́ lɔn fuũn nə́ bɔ.

³Ka ga, tolokan dinin tá nyɔ koe ǹ nɛnyaanan la. Sɛnɛ, maa zaman lɛ n ka nɛ ǹ dan baraa bɛ́ lɔn, ka diə gɔ́ɔ̃ nɛ ǹ bɛnda[3] bɛ́ lɔn.

⁴Nɛnyaan tiɛɛ̃n lɛwɔn nə́ damɛ a lɛ-n mu boro gɔn. Nɛnyaan bɔnboɛɛnən man màn-bii liɛ, sɛnɛ min kɔn ba màn koe ǹ la wa.

⁵Min mɛnɛn nə goã màn kɔɔ̃n bii, bɛn man giɛ̃ tán zii mìi ni. Min mɛnɛn nə too naforo gɔ́ɔ̃ nɛ, bɛn man yisi gugusi ka ǹ gɔn nɛ.

⁶ Maa zaman lɛ a sii baraa gole kɔ á la Sodɔmu kiwi kɛ wɔ nɛ. A na á n yu bǎã goon, min kɔn boo la á sii kɔn zɛnaa wa.

⁷Gána lɛ a nyɛɛnaandɛnan nə́ goã kakabaa la. Ǹ gɔ̀nɔn nə siĩni, a n tɛ pii. Ǹ kakabaa lɛ piɛ̃maa nɛ[4].

⁸Sisia kəni, ǹ nə́ tì kɔ ka dɔn tirikə bɛ́ lɔn. Min ba ǹ doɛ̃ zii gialaa doo wa. Ǹ ki dinsɔɔ̃ nə n we ganaa, á laa ka gɔn gere bɛ́ lɔn.

⁹Bɛ̀ gɔya sa nə n mɛn dɛ, á soɛ bòo a dɛ nɛ. Gã ka piũn tá soɛ nɔmaa bòo gɔn nɛ.

¹⁰ Maa zaman lɛ a koe biikoo li, náa sonboren dinin nə́ ǹ nɛnyaanan kɔrɛ, ǹ nə́ sɔ̃ màn-bii lɛa.

¹¹Dɛnaa Lawa foo yoo á la yii ni, ǹ miã din da yɛ. A na á n yii taã Siɔn kiwi li. Á tɛ da a ganaa, á kiwi lɛ kũ, yǎa a gòã daa ganaa.

¹²Tán a kiin laanka kanaa min kɔn ba boe la a golee li, mà zɔ́ɔ a re we Zeruzalɛmu a kiɛnlɛ-n wa.

¹³Bɛ na á giala yɛ miɛ̃, Lawa a boo gii-dalin laanka Lawa a wúlu-bɔlen sii baraan taman yii. A giala, ǹ dinin maǹ nə́ toa Lawa bɔlɔ-sili sonboren mà kaa kiwi lɛ nɛ.

¹⁴Kanna kəni, maǹ nə n binbirin boe ka yii tere-a bɛ́ lɔn ziin la. Ǹ mɔnaan man mà lɛa, min kɔn doamaa bie a n gɔn da ǹ ganaa wa.

¹⁵Bɛ̀ ǹ tá die, maǹ parɛɛ ǹ li: «Ka n tá ka n bɔ kànaa, *gɔ̀ tá ka ganaa! Ka n tá ka n bɔ kànaa! Ka nyan nə n gɔn da wɔ ganaa wa!» Maǹ baa sii, woo ǹ bǎã ná a ba ǹ la wa. Sɛnɛ, tɔrɔ kɔsɔn man pii: «Ǹ ba boe la ǹ giã wɔsɛn li wa.»

¹⁶Dɛnaa Lawa ba li a ǹ yɛ doo wa. A dinmaa na á ǹ loo paǹ tumaa li. Min kɔn Lawa a wúlu-bɔlen guguru kɔ doo wa. Ǹ ba min zizin diɛ sii li doo wa.

¹⁷Haalɛ bibi, wɔ yii laa zii á gama-a gunun. Wɔ n yii da dɔmalɛ la wɔ fɔ̃. Wɔ n toa wɔa wɔlɔ lɛduə̃ ǹ bǎã nɛ, wɔ n yii da tɔrɔ kɔsɔ a daa la, wáa a wɔ kirisibaa. Sɛnɛ, màn kɔn!

¹⁸Maǹ gɔn diɛ wɔ ganaa, wɔ a boe la wɔ á n gòan boe kɔn doɛ̃ wa. Wɔa gɔn nyɔmɔɔ dɔ. Wɔa lɛawaa dɔ, wɔa wɔ nya.

¹⁹Min mɛnɛn bɛ́ wɔ kio lui, ǹ yii á fuu á la don a sian manɛ. Maǹ wɔ lui kelen la, maǹ kan koe wɔ nɛ diə ne.

²⁰Dɛnaa Lawa kii mɛn bɔ á kɔ wɔ la, a din kɛ lɛ n wɔ nyin lɛa, a din lɛ nɛ ǹ kan kũ. A da yaa wɔ goã taasɛ, wáa bɛ̀ a tá wɔ mìi la, wɔ á re bǎã yii tɔrɔ kɔsɔn bii.

²¹Ka á boe la ka n nyɛnyaa ka bɛ̀ baa, Edɔmu a zaman, nsɛ mɛn bɛ́ giã nɛ Usu gána nɛ. Sɛnɛ n dɔ á re Dɛnaa Lawa a foo yoo ǹ paan mu kɛ mii, a n yii kũ, n nə n tontoro da.

²²Siɔn kiwi, n dɔlɔ lɛ nya kəni. Lawa a re woe n ne bɛ̀rɛbaa ǹ bǎã-n doo wa. Sɛnɛ, nsɛ Edɔmu, Dɛnaa Lawa á re n sii baraan dɔlɔ boe n ganaa. Á re n sii baraan lɛn nyɛɛ bii-a panparaan nɛ.