Read Samo, Southern Eze 1 Bible Online

Eze 1 - Samo, Southern bible

Eze 1

¹ Masɛ Ezekieli lɛ̀ pɔsɔɔbaa ǹ wɔ li, a mui a siibaa ǹ wɔ a lɛawaa soorobaa ǹ wɔ pinaa, man má goã kun ka goa wolen kɛn nɛ Kebaara tà lɛ-a. Ma bɛ́ walan, lon nə́ n lɛ bũ, má siin yɛ Lawa a din nyaa siin lɛa.

² Bɛ á zɛnɛɛ, bɛ̀ ǹ nə́ woo ka kii Zoakini ni bɛ̀rɛbaa ǹ bǎã nɛ, á dɔ lɛ̀ sooro. Bɛa lɛ̀ soorobaa ǹ wɔ lɛ a mui a lɛawaa soorobaa ǹ wɔ pinaa,

³Dɛnaa Lawa boo da ka masɛ Buuzi a nɛ Ezekieli ni, *Baabilonii minin gána nɛ, Kebaara tà lɛ-a. Dɛnaa Lawa a pàã gisĩ masɛ la walan.

⁴Ma bɛ́ giɛ, bɛ̀ la a piɛ̃ kaara á ke, á n toa gɔsɛ a lɛ̀gɔn la á n die. Labara gangabiɛ na á goã a nyɛɛnɛ, la ń tɛ pii bɛ̀ a bɛ bii kukuru kɔn. Tɛ fúlu kɔn na á goã bɛa labara lɛ lɛnpɛnɛ, a bii kɛ na á goã tɛ pii ka zan tɛ-pɛle bɛ́ lɔn.

⁵ Màn yiikoonaa sii kɔn na á goã labara lɛ bii, ka n pɛ mà minbuiinin manɛ.

⁶Ǹ gogoonmaa yɔrɔ na á goã màn sii, ǹ nyàa dɔn màn sii.

⁷Ǹ kèrèn man nə́ goã pepere, ǹ gòãn nə́ ka dii ten gòon tɔ́nɔn bɛ́ lɔn, tɛ pii ka zan zɔnɛɛ bɛ́ lɔn.

⁸Minbuiin nɛ gɔn na á goã nyàan lɛn gogoonmaa giulun, gɔn lɛ a gogoonmaa yɔrɔ n dia-n kanaa a lɛ̀ gùrù sii kɛ googoonmaa la. Màn yiikoonaa sii lɛ tumaa yɔrɔn laanka ǹ nyàan lɛn dɔn man nə́ goã miɛ̃.

⁹Ǹ nyàan lɛn lɛwɔnɔn maǹ nə́ goã n doɛ kɔn. Bɛ̀ ǹ tá woe bǎã mɛn nɛ, ǹ laadoo ba a ganaa, ǹ nə n bɔyaa wa. Ǹ gogoonmaa na á goã woe a din nyɛɛn pepere.

¹⁰ Ǹ yɔrɔ lɛ na á goã boe-n minbuiin nɛ wɔ li. Ǹ siimaa lɛ tumaa, yàra yɔrɔ na á goã ǹ gogoonmaa gusin, dii gɔ̀lɔ̀ yɔrɔ nə́ ǹ gɔsɛ. Giogialatã-a yɔrɔ na á goã ǹ siimaa lɛ tumaa dɔ lon.

¹¹Ǹ tumaa nyàa na á goã sii. Maǹ nyàa paa lɛ boe lon, ǹ nə́ ǹ doɛ kɔn-a. Nyàa lɛ a màn paa kɔsɔ kɛ na á goã n koe ǹ gɔ̀nɔn lɛ.

¹²Didie na á goã woe a din nyɛɛn pepere. Ǹ bɛ giɛ li ǹ wo maa maǹ woe walan, ǹ laadoo ná a ba a ganaa, ǹ nə n bɔyaa wa.

¹³ A n ka tɛ nàn na á goã kuĩ màn yiikoonaan lɛn ganaa. A n ka tɛ buə̃ na á goã kuĩ ǹ ganaa. Tɛ lɛ na á goã n binbirin boe ǹ bii. Bɛa tɛ lɛ na á goã kiɛ min yii ni, la a tɛ-pɛ n boe a nɛ.

¹⁴Màn yiikoonaan lɛn man nə́ goã baa sii bɛ̀ ǹ woo bɛ̀ ǹ nə n bɔyaa, ǹ yii n fuu ka la a tɛ pɛ bɛ́ lɔn.

¹⁵ Ma bɛ́ giɛ màn yiikoonaan lɛn ganaa, bɛ̀ wotoro gòã á ke tán ǹ gogoonmaa li.

¹⁶Bɛ̀ ń wotoro gòãn lɛn yɛ, maǹ tɛ pii ka kɔlɔ kùsidɛnaa giɔ̀mɔ kaka-a kɛ bɛ́ lɔn. Ǹ zɛnaa ǹ gɔn kɛ tumaa n goon, ka maǹ nə́ ǹ wɔ kɔn nɛ.

¹⁷Bɛ̀ wotoro gòãn lɛn tá woe, maǹ boe la ǹ tɔ wɔ ka ǹ wàã sii tumaa nɛ, bɔyaa sii ná a ba a-n wa.

¹⁸ Wotoro gòãn lɛn gaganan kɛn, bɛn maǹ nə́ goã sasa, nyɛ́ɛ diɛ. Yii nànan maǹ nə́ goã ǹ siimaa lɛ tumaa a gaganan ganaa, ǹ ná a lɛnpɛnɛ nɛ.

¹⁹Bɛ̀ màn yiikoonaan lɛn tá woe, wotoro gòãn lɛn dɔn man tɔ we ǹ wàã li. Bɛ̀ màn yiikoonaan lɛn nə́ yoo ǹ nə́ n bɔ tán, wotoro gòãn lɛn dɔn man yui, ǹ nə n bɔ tán.

²⁰Ǹ bɛ giɛ li ǹ wo maa maǹ woe walan. Wotoro gòãn lɛn dɔn man nə́ goã yui kunun ǹ ni. A giala, màn mɛn bɛ́ á goã woe ka màn yiikoonaan lɛn nɛ, a din lɛ dɔ na á goã woe ka wotoro gòãn lɛn nɛ.

²¹Bɛ̀ màn yiikoonaa lɛn nə́ n zɔ̃, wotoro gòãn lɛn dɔn man nə n zoɛ̃, bɛ̀ ǹ nə́ golee, wotoro gòãn lɛn dɔn man golee. Bɛ̀ ǹ nə́ yoo ǹ nə́ n bɔ tán, wotoro gòãn lɛn dɔn man yui, ǹ nə n bɔ tán. A giala, màn mɛn bɛ́ á goã woe ka màn yiikoonaan lɛn nɛ, a din lɛ dɔ na á goã woe ka wotoro gòãn lɛn nɛ.

²² Màn na á bɔ á n nyɔmaa lon sɔsɔɔ ka bara bɛ́ lɔn, màn yiikoonaan lɛn gogoonmaa mìi la. Bɛa màn lɛ na á goã tɛ pii, ka *mu nyuù wole bɛ́ lɔn.

²³Bɛa bara lɛ giulun lon, maǹ nə́ goã ǹ nyàa màn papaa lɛ boe, bɛ̀ ǹ nə ǹ doa kɔn. Nyàan lɛn màn papaa dɔ na á goã, ǹ nə́ bɛn koe ǹ dinin lɛ.

²⁴ Ǹ bɛ́ ǹ nə́ yoo ǹ nə́ woe, má ǹ nyàa ka wuu ma. A n ka mu gole wuu bɛ́ lɔn, ka Pàãyiidɛnaa kɛa ginii bɛ́ lɔn. Ǹ wuu na á goã boe ka sɔraasi zaman gole lɛ wuu ni. Bɛ̀ ǹ nə́ golee, maǹ nə́ goã n nyàan lɛn gisĩ,

²⁵lɛn goon tɔ́n bɔ bara lɛ-n lon ǹ mìi lalan.

²⁶ Bara mɛn lɛ goã ǹ mìi lalan, kii dankan a kɔnboe na á goã bɛ lalan, tɛ pii ka kɔlɔ bɔlaan kɛ bɛ́ lɔn. Min a kɔnboe dɔ na á goã bɛa kii dankan lɛ lalan lon.

²⁷ Bɛa dɛnaa lɛ na á goã tɛ pii ka zan bɛ́ lɔn. A saa a binbin wɔlɔ ganaa a da lon, a n ka tɛ na á goã kuĩ a lɛnpɛnɛ. A saa a binbin wɔlɔ ganaa a da tán, a n ka tɛ na á goã kuĩ a lɛnpɛnɛ, wɔlɔ fúlu da bii.

²⁸Wɔlɔ fúlu mɛn lɛ goã a lɛnpɛnɛ, bɛ na á goã ka lamɛn bɛ́ lɔn, la a kaa pinaa. Bɛa wɔlɔ fúlu lɛ na á goã Dɛnaa Lawa a siĩnbaa kɛa kɔnboe lɛa. Ma bɛ yɛ lɔn, má bɔ má mɛnaa tán ma lɛ la. Má tɔ́n min goon lɛ ma boo diɛ.