Read Samo, Southern Eze 12 Bible Online

Eze 12 - Samo, Southern bible

Eze 12

¹Dɛnaa Lawa boo da ma nɛ á pɛ:

² «Nsɛ minbuiin a nɛ, n bɛ́ giã-n tɔrɔn mɛnɛn bii, piã-wɔlen manɛ. Yiin tá ǹ lon, sɛnɛ, maǹ nə n piɛ̃, ǹ ba giɛ ǹ nɛ wa. Toon tá ǹ lon, sɛnɛ maǹ nə n piɛ̃, ǹ ba n too koe wa. A giala, piã-wɔle din taãn-taãnɛn manɛ.

³Nsɛ minbuiin a nɛ, n too kɔ! N mànan sɔkɔn, ka wo bɛ̀rɛbaa ǹ bǎã-n wole a mànan bɛ́ lɔn. N soo penleen tiɛɛ̃nɛ ǹ dinin yii ni, n woo. N die n soo n nə n bɔ bǎã kɛ nɛ, n wo bǎã kɔsɔ nɛ ǹ dinin yii ni. Kɔntan ǹ tá re doɛ̃ ka bɛ nɛ, màn ǹsɛn man piã-wɔlen lɛa.

⁴N die n nə n mànan goa ka wo gùli kɔ ǹ bǎã-n wole wɔn bɛ́ lɔn, soo ǹ ne penleen tiɛɛ̃nɛ ǹ dinin yii ni, wasamiɛ̃nɛ, n soo ǹ dinin yii ni ka wo bɛ̀rɛbaa ǹ bǎã-n wole bɛ́ lɔn.

⁵Yala fɔ̃ kungɔn ganaa ǹ dinin yii ni, n soo ka n mànan lɛn nɛ bɛa yala lɛ nɛ.

⁶N kaa n wìi li ǹ dinin yii ni, soo ǹ ne wɔlɔ tì li. N die n màn kɔ n yɔrɔ lɛ, màn mɛn bɛ́ toɛ, n baran ga gána lɛ ganaa wa. A giala, man die n biɛ sii a kɔnboe lɛa Izirayeli tɔrɔn lɛn manɛ.»

⁷A n pɛ ma-n lɔn, má zɛnaa miɛ̃ ka te. Má soo ka maa mànan lɛn nɛ penleen tiɛɛ̃nɛ, ka wo gùli kɔ ǹ bǎã-n wole a mànan bɛ́ lɔn. Wasamiɛ̃nɛ, má yala fɔ̃ kungɔn lɛ ganaa ka ma gɔn nɛ. Bɛ kio, má maa mànan goa wɔlɔ tì li má ǹ kaa ma wìi li, má soo ǹ ne ǹ dinin yii ni.

⁸A lɛawaa baayɛlɛ, Dɛnaa Lawa boo da ma nɛ, á pɛ ma nɛ:

⁹— Nsɛ minbuiin a nɛ, Izirayeli tɔrɔn piã-wɔlen lɛn maǹ nɔ̀n diɛ n la mà waa-n sii n ke n tá zɛnɛɛ.

¹⁰A pɛ ǹ nɛ: «Maa goledɛnaa mɛn bɛ́ Zeruzalɛmu, kɛ n bɛa gɔn waa ma n lɛa, kun ka Izirayeli tɔrɔn mɛnɛn tumaa bɛ́ Zeruzalɛmu.»

¹¹A pɛ ǹ nɛ kɛnɛn: Man sii a kɔnboe lɛa ka yɔrɔ-a. Ma zɛnaa lɔn, a n die n zɛnɛɛ ka nɛ miɛ̃. Ǹ tá re ka goɛ, ǹ wo ka nɛ bɛ̀rɛbaa ǹ bǎã nɛ.

¹²Goledɛnaa mɛn bɛ́ kun ka nɛ, bɛ á die a guĩ siɛ a da a wìi li wɔlɔ tì li. Ǹ bɛ́ re yala mɛn foɛ̃ kungɔn ganaa soo ǹ bǎã lɛa, á re soe ka bɛ nɛ. Á re màn koe a yɔrɔ lɛ, a ná a re boe la a gána lɛ yɛ ka a yii-n wa.

¹³ Sɛnɛ, masɛ Lawa á re kan koɛ nɛ a kũ. Ma á re woe ne *Baabilonii, Kalde gána nɛ. Á re giɛ̃ walan, a yii ná a re gána lɛ yii wa.

¹⁴Min mɛn tumaa bɛ́ a lɛnpɛnɛ, a lɛduə̃lin laanka a sɔraasin tumaa nɛ, ma á re bɛn sasawɛɛ, ǹ wo bǎã tumaa nɛ. Ma á re maa gɔya sa kɛ woɛ̃, ma ǹ kio loo ne.

¹⁵Bɛ̀ masɛ nə́ n sasawaa má ǹ kaa tɔrɔ kɔsɔn bii ǹ mɛn waáraa, bɛ̀ má ǹ pɛsɛ̃ má ǹ kaa gána kɔsɔn nɛ, ǹ tá re doɛ̃ bɛa biikoo li, ma masɛ din nə Dɛnaa Lawa lɛa.

¹⁶Min mɛnɛn bɛ́ re liɛ zia kɛ kio, bòo kɛ nɛ ka piɛ̃ busu kɛ nɛ, ma á re bɛn gialakunun toɛ walan. Bɛn bɛ́ re woe tɔrɔ kɔsɔn mɛnɛn bii, ǹ tá re ǹ dinin zɛnaa ǹ sii bɔbɔnɛɛn kɛn laakalɛɛ bɛn yii ni. Bɛn dɔn tá re doɛ̃, mà masɛ din nə Dɛnaa Lawa lɛa.

¹⁷Dɛnaa Lawa wusoo á boo da ma nɛ, á pɛ ma nɛ:

¹⁸— Nsɛ minbuiin a nɛ, n màn bii, bɛ̀ n gɔ̀nɔn nə́ bìn diɛ. N mu mi ka nyɛ́ɛ nɛ, ka gɔ́ɔ̃-bii ni.

¹⁹Bɛ kio, n pɛ gána lɛ a minin manɛ: «Dɛnaa Lawa n kɛ pii Zeruzalɛmu minin wɔ paǹ li, ǹ mɛnɛn bɛ́ Izirayeli gána nɛ: Ǹ tá re ǹ màn bii ka gɔ́ɔ̃-bii ni, ǹ nə ǹ mu mi ka sùsù ni. A giala, gána lɛ á re ziziɛ̃ kun ka a gɔ́ɔ̃gɔ́ɔ̃ ǹ màn tumaa nɛ, gána minin lɛn tumaa a kakaarɛbaa taman yii.

²⁰Minin bɛ́ kiwin mɛnɛn nɛ, bɛa kiwin lɛn kɛbɔlɔn tá re kiɛ, gána lɛ á re don biɛ. Ka á re doɛ̃ ka bɛ-n kəni, mà masɛ din nə Dɛnaa Lawa lɛa.»

²¹Dɛnaa Lawa boo da ma nɛ á pɛ:

²²Minbuiin a nɛ, wàa na á baa ǹ tá suusu kɛ diɛ Izirayeli gána wɔ paǹ li: — Biikoo á ke kiɛ̃, sii nyaa lɛn kɔn nə́ ke a ná a tɔn nə n zɛnaa wa.

²³A pɛ ǹ nɛ, mà masɛ Dɛnaa Lawa n kɛ pii: «Man die zɛnɛɛ ǹ nyan bɛa suusu kɛ boo da Izirayeli gána-n doo wa. Sɛnɛ, a pɛ ǹ nɛ mà siinyaa lɛ tumaa a zɛnaa ǹ lɛawaan nə́ diri.

²⁴Sii-nyaa kooron kɛn, gɔn-nɔɔ siin kɛn nɛ, bɛn kɔn ba re yii Izirayeli minin bii doo wa.

²⁵A giala, masɛ din nə Dɛnaa Lawa lɛa. Bɛ̀ ma màn mɛn pɛ, bɛa zɛnaa ba ǹ lɔloɛ wa. Man die ka toɛ ka yii n koo tɔrɔ piã-wɔlen lɛn, ma bɛ́ màn mɛn pii, ma bɛ zɛnaa. Ma din Dɛnaa Lawa a da ǹ boo ne.»

²⁶Dɛnaa Lawa wusoo á boo da ma-n doo á pɛ:

²⁷— Minbuiin a nɛ, Izirayeli tɔrɔn man kɛ pii n wɔ paǹ li: «Giĩ kɛ lɛ yii bɛ́ sii mɛn ganaa, a bɛ́ boo mɛn diɛ, sisia sii bie wa, a wɔlɔ á tɔn sɔsɔɔ.

²⁸Bɛ lɛ taman yii, a pɛ ǹ nɛ mà masɛ Dɛnaa Lawa n kɛ pii: Ma a da ǹ boon kɛn kɔn a sii ba re n lɔloɛ doo wa. Ma bɛ́ màn mɛn pii, bɛ lɛ n die n zɛnɛɛ. Ma din Dɛnaa Lawa a da ǹ boo ne.»