Read Samo, Southern Eze 14 Bible Online

Eze 14 - Samo, Southern bible

Eze 14

¹Ǹ kɔn pinaa, Izirayeli tɔrɔn lɛn min golen sii yɔrɔ-bɔlen kɔnɔn nə́ daa ma li, ǹ nə́ giã tán ma yɔrɔ-a.

²Dɛnaa Lawa tɔ́n boo da ma nɛ á pɛ ma nɛ:

³— Nsɛ minbuiin a nɛ, minin kɛn lɛn dìn sii tá kaka ǹ ganaa. A din dìn lɛn manə ǹ kiɛ sii baraa zɛnaa ganaa. Ma á re toɛ bɛa minin lɛn nə nɔ̀n da ma la ka sii ni sonbore?

⁴Bɛ lɛ nɛ, boo da ǹ nɛ, n pɛ ǹ nɛ, mà masɛ Dɛnaa Lawa n kɛ pii: «Izirayeli tɔrɔn kɛn lɛn min mɛn a dìn sii bɛ́ kaka a ganaa, màn mɛn bɛ́ re diɛ sii baraa zɛnaa ganaa bɛ̀ á n toa bɛ la, á wusoo á daa nɔ̀n da Lawa a boo gii-dali la ka sii ni, masɛ dinmaa Dɛnaa Lawa n die a lɛ sii. Dì gigiã kɛ lɛ a tá a guguru koe, a dɔlɔ bɛ́ ka màn mɛn nɛ, ma á re bɛ diɛ a mìi ni.»

⁵Man die zɛnɛɛ miɛ̃ màn mɛn bɛ́ toɛ ma Izirayeli minin lɛn kũ ǹ dinin taasiɛ ganaa, a giala, ǹ tumaa nə́ n na ǹ nə́ n bɔ ma ganaa, ǹ dìn lɛn taman yii.

⁶Bɛ lɛ taman yii, a pɛ Izirayeli tɔrɔn lɛn manɛ, mà masɛ Dɛnaa Lawa n kɛ pii: «Ka wusoo ka daa, ka n bɔ dìn kɛn wɔlɔ li. Ka n yii saa ka bɔ bɛa sii bɔbɔnɛɛn kɛn la.»

⁷Min woo min a n Izirayeli tɔrɔ lɛa, hinlaa a n gùli lɛa giã-n Izirayeli gána nɛ, bɛ̀ ǹ mɛn nə masɛ toa walan á toa dì sii kaka kɔ a foo ne, màn mɛn bɛ́ re diɛ sii baraa zɛnaa ganaa, bɛ̀ á n yii doa bɛ la, bɛ kio á wusoo á woo Lawa a boo gii-dali li mà asɛ n nɔ̀n diɛ la ka sii ni, masɛ din Dɛnaa Lawa n die a lɛ sii.

⁸Man die n yɔrɔ diɛ bɛa Dɛnaa kɛ la. Ma bɛ́ re sii mɛn zɛnɛɛ nɛ, bɛ á re suusu biɛ, a min kɔsɔn doroo. Man die bɛa dɛnaa boe ma bɔ maa zaman kɛ bii. Ka á re doɛ̃ ka bɛ-n kəni, mà ma din nə Dɛnaa Lawa lɛa.

⁹Ta Lawa a boo gii-dali ni, bɛ̀ á toa ǹ nə́ bebele ǹ nə́ da boo-diɛ ganaa, masɛ din Dɛnaa Lawa n má bɛa boo gii-dali kɛ lɛ sã. Ma á re yui bɛa dɛnaa gialaa, ma dɛ ma bɔ maa zaman, Izirayeli minin kɛn bii.

¹⁰Min mɛn wo nɔ̀n da Lawa a boo gii-dali lɛ la, bɛa dɛnaa lɛ laanka Lawa a boo gii-dali lɛ á re n toɛ̃ ka ǹ sii baraa a guĩ ni.

¹¹Bɛ n die n zɛnɛɛ, màn mɛn bɛ́ toɛ, Izirayeli minin lɛn baran n wɔlɔ lui masɛ ganaa, ǹ papaã wa, ǹ baran *gɔ̀ dɔ da ǹ dinin ganaa, ka ma bɔlɔ tii siin kɛ nɛ wa. Sɛnɛ, ǹ tá re maa zaman biɛ, masɛ á re ǹ dɔn Lawa biɛ. Ma din Dɛnaa Lawa a da ǹ boo ne.

¹²Dɛnaa Lawa boo da ma nɛ á pɛ:

¹³«Minbuiin a nɛ, bɛ̀ gána mɛn a minin nə́ sii baraa zɛnaa masɛ nɛ, ǹ nə́ ma bɔlɔ tii, ma á re yui ǹ gialaa ma ǹ màn-bii ziziɛ̃, ma bòo kaa ǹ ganaa, ma ǹ minbuiinin laanka ǹ tɔɔn dɛ.

¹⁴Ta Nowee ǹ miã n bɛa gána lɛ nɛ, Danieli ni ka Zɔbu ni, bɛn min sɔɔ kɛ lɛ, ǹ peperebaa lɛ n die ǹ dininsɔɔ̃nɔn kirisibiɛ. Ma din Dɛnaa Lawa a da ǹ boo ne.

¹⁵Ma á re don màn babaraan diɛ gána lɛ nɛ, bɛn na a minin dɛ, ǹ gána lɛ gɔ́ɔ̃ kooro toa, min ná a boe la a n boe a nɛ a n kiɛ̃ wa, don mànan lɛn taman yii.

¹⁶Min sɔɔ kɛ lɛ, má ǹ boo da, ta bɛn man gána lɛ bii, ǹ ba boe la ǹ nə ǹ nɛgiĩn laanka ǹ nɛlɔn kirisibaa wa. Ǹ dininsɔɔ̃nɔn man die kirisibiɛ. Ka ma din Dɛnaa Lawa Yiikoonaa tɔ nɛ, gána lɛ gɔ́ɔ̃ kooro á die goɛ̃. Ma din Dɛnaa Lawa a da ǹ boo ne.

¹⁷Ma á boe la dɔn ma zia yiɛ ma kaa gána lɛ a minin ganaa, ma pɛ zia nɛn lɛn manɛ, máa ǹ wɔ gána lɛ nɛ, ǹ minbuiinin laanka tɔɔn dɛ.

¹⁸Min sɔɔ kɛ lɛ ma nə́ ǹ boo da, ta bɛn man gána lɛ bii, bɛ̀ masɛ din Lawa yiikoonaa ke golee li, ǹ ba boe la ǹ nə ǹ dinin nɛgiĩn laanka ǹ nɛlɔn kirisibaa wa. Ǹ dininsɔɔ̃nɔn man die kirisibiɛ. Dɛnaa Lawa a da ǹ boo ne.

¹⁹Ma á boe la dɔn ma piɛ̃ busu da gána lɛ a minin ganaa. Ma foo mɛn yoo gána lɛ li, ma á re a minbuiinin laanka a tɔɔn dii, ma ǹ bɔ a nɛ.

²⁰Haalɛ ta Nowee ǹ miãn man gána lɛ bii, ka Danieli laanka Zɔbu ni, bɛ̀ masɛ din Lawa yiikoonaa kɛ golee li, ǹ ba boe la ǹ nə ǹ nɛgiĩn laanka ǹ nɛlɔn dinin kirisibaa wa. Ǹ dininsɔɔ̃nɔn man die kirisibiɛ ǹ peperebaa taman yii. Ma din Dɛnaa Lawa a da ǹ boo ne.

²¹ Bɛ kio, Dɛnaa Lawa wusoo á pɛ ma nɛ: Dɔlɔ màn sii ni masɛ da Zeruzalɛmu kiwi lɛ mìi ni, ma tá a minbuiinin laanka a tɔɔn dii ni: zia nɛ, bòo ne, don màn babaraan nɛ, ka piɛ̃ busu ni.

²²Sɛnɛ, min gialakunun yii á re goɛ̃ koo, giĩn laanka lɔn nɛ. Ǹ tá re ǹ wɛɛ ǹ nə ǹ bɔ kiwi lɛ gɔ́ɔ̃ nɛ, ǹ tá re die ka yiɛ bɛ̀rɛbaa ǹ bǎã nɛ. Ka die ka ga ǹ giã ǹ gɔn laanka ǹ zɛnaa ǹ sii ganaa. Bɛa biikoo li, ma dɔlɔ gole mɛn laanka sii mɛn tumaa da Zeruzalɛmu mìi ni, ka foo á re basɛ̃.

²³Ǹ tá re ka foo basɛ̃, a giala, ka á re ǹ giã ǹ gɔn laanka ǹ zɛnaa ǹ siin lɛn yii. Ka á re doɛ̃ ka bɛ lɛ-n kəni, mà ma sii mɛn tumaa da kiwi lɛ mìi ni, mà ma bie má bɛ zɛnaa kooro wa. Ma din Dɛnaa Lawa a da ǹ boo ne.»