Read Samo, Southern Eze 17 Bible Online

Eze 17 - Samo, Southern bible

Eze 17

¹Dɛnaa Lawa boo da ma nɛ á pɛ:

²«Minbuiin a nɛ, boo tì da Izirayeli tɔrɔn lɛn manɛ, giməə da ǹ nɛ.

³A pɛ ǹ nɛ, mà Dɛnaa Lawa n kɛ pii: Giogialatã-a gole ne, a nyàan nə́ dadara kɔ, a nyàa kan nə́ sɔsɔrɔ kɔ, á ka pã ka kɛkɛ, a ka lɛ n sɛsia wɔkaka. A na á daa Liban kele la, á da kaka kɛ goon mìi na,

⁴a gùrù mɛn bɛ́ sasa á bɛ yiɛ, á woo ne pii-kɔlen gána nɛ, á woo da tán màn-sãlin kiwi.

⁵Á wusoo á gána lɛ a da goon gùrù saa, ǹ bǎã mɛn kɔsɔ, á zumu walan, á woo ne mu gigiã bǎã nɛ, á zumu walan ka tàaraa da bɛ́ lɔn.

⁶Da lɛ yoo, á *rezɛ̃ da baa, á n gùrùn nyɔmaa, ka màrà kusi bɛ́ lɔn á na á gùrùn lɛn yɔrɔ dia giogialatã-a lɛ la. Á n gòonən lɛ bɔ a giulun. Da lɛ rezɛ̃ da baa, á gùrùn bɔbɔ, á luu pã.

⁷Sɛnɛ, giogialatã-a gole kɔsɔ daa, a nyàan nə́ dadara, a ka n mɔnaa nɛ. Á ke rezɛ̃ da lɛ nə n gòonən dia giogialatã-a lɛ la. Á gùrùn bɔ á n yɔrɔ dia la a n giɛ mu gigiã li a li.

⁸A da yaa, maǹ nə́ goã ǹ nə́ zumu bǎã sonbore ne, ǹ nə́ zumu mu gole lɛ-a, màn mɛn bɛ́ toɛ a gùrùn bɔ, a nɛ kɔ, a rezɛ̃ da sonbore baa.

⁹A pɛ mà masɛ Dɛnaa Lawa gole n kɛ pii: Rezɛ̃ da lɛ á re bǐɛ̃ koe sonbore? Giogialatã-a bibinaa lɛ á re a gòonən lɛn woɛ̃, á re toɛ a nɛ bɛbɛnɛ, a laa. A gùrù diin mɛnɛn tumaa nə n woɛ̃, bɛn tá re laɛ. A woɛ̃ din bie sii kaka lɛa wa, a bie min gigiã sii dɔ lɛa wa!

¹⁰Á ke ǹ nə́ zumu, sɛnɛ, a re gole koe wa. Bɛ̀ lɛ̀giala piɛ̃ kɛ daa bìn da a ganaa, a tumaa á re laɛ. Sonbore, a bɔ tán bǎã mɛn lɛ nɛ, á re laɛ a gòãn la walan.»

¹¹Dɛnaa Lawa boo da ma nɛ á pɛ:

¹² — Wo pɛ piã-wɔlen lɛn manɛ mà ǹ tá boo kɛ giala miɛ ke? A giala á ke, Baabiloniin kii na á daa Zeruzalɛmu. Á Zeruzalɛmu a kii laanka a nyɛɛnaandɛnan kũ, á woo ǹ ne *Baabilonii gána nɛ.

¹³Á kii tɔrɔ goon kũ á lɛ kɔ kɔn la wɔ ka bɛ nɛ. Á pɛ nɛ, mà yǎa a nə n liɛ, mà asɛ á re goɛ̃ bɔlɔgoondɛnaa lɛa bɛa lɛ kɔ kɔn la lɛ gɔ́ɔ̃ nɛ. Á woo ka gána lɛ a min tɔnaan nɛ,

¹⁴màn mɛn bɛ́ toɛ gána lɛ pàã kiɛɛrɛ kɔ, a sii ná a boe la á woe nyɛɛn wa, a lɛ kɔ kɔn la mɛn wɔ, a boo la a bɛa sii toa a giala la.

¹⁵Sɛnɛ, á n gòãn doa kɔn ka Baabiloniin kii lɛ nɛ, á minin dia Ezipti gána nɛ, mà bɛn nə n dɔ asɛ lɛ, ka sùin laanka sɔraasi gigiã nɛ. Min mɛn bɛa siin kɛn lɛn tɔrɔ zɛnaa, á re bǐɛ̃ koe a gɔn? Á re n boe a nɛ? A bɛ́ á lɛ kɔ kɔn la lɛ ziziɛ̃, á re n boe a-n sonbore?

¹⁶A ma toa ma yii n koo, masɛ Dɛnaa Lawa a da ǹ boo á ke: «Ma kii mɛn lɛ koa pàã la, á re giɛ̃ bɛ lɛ a gána nɛ. A giala, a liɛ mɛn wɔ bɛa kii lɛ nɛ, á n lɛ bɔ, a lɛ kɔ kɔn la mɛn wɔ kun ni, á bɛ ziziɛ̃. A n die giɛ̃ bɛa kii lɛ a gána nɛ Baabilonii.

¹⁷Bɛ̀ Baabilonii minin kɛn nə́ bèlèn dɔ ǹ nə́ nyankɔrɔn fɔfɔ̃ ǹ mɛn waáraa, màn mɛn bɛ́ toɛ ǹ min gigiã dɛ, Eziptin kii kɛ a re boe la a n dɔ lɛ ka sii kɔn nɛ bɛa zia lɛ gɔ́ɔ̃-n wa. Haalɛ ta Eziptin kii lɛ nə́ n dɔ lɛ ka sɔraasi gigiã nɛ, haalɛ ta á zaman gigiã paã.

¹⁸A liɛ mɛn wɔ, á n lɛ bɔ, a lɛ kɔ kɔn la lɛ ziziɛ̃. Á goã á n lɛ kɔ taãn-taãnɛ, sɛnɛ, a din na á wusoo á siin kɛn lɛn tumaa zɛnaa. Bɛ lɛ na á toa, a ba re n boe a-n wa.

¹⁹Bɛ lɛ na á toa masɛ Dɛnaa Lawa gole á kɛ pii: A ma toa maa yiikoonaabaa kɛ gɔ́ɔ̃ nɛ, liɛ mɛn nə n wɔ ka bɔlɔgoondɛnaabaa nɛ, a sàn mɛn kɔ ka bɛa liɛ lɛ nɛ, a lɛ kɔ kɔn la mɛn ziziɛ̃, ma á re bɛa dɔlɔ diɛ a mìi ni.

²⁰Ma á re biɛ koɛ nɛ, maa kan tá re kuĩ. A naarɛbaa ǹ sii mɛn zɛnaa, Ma á re woe ne Baabilonii gána nɛ, ma á re dɔlɔ boe a ganaa walan.

²¹A sɔraasi kurun lɛn sɔraasi sonboren tumaa á re giɛ̃ zia la. Ǹ mɛnɛn bɛ́ re goɛ̃, bɛn tá re n pɛsɛ̃, ǹ wo bǎã tumaa nɛ. Ǹ tá re doɛ̃ ka bɛ-n kəni, mà ma din Dɛnaa Lawa má boo da.

²²Masɛ din Dɛnaa Lawa n kɛ pii: Ma á re da kaka kɛa gùrù ten boe a mìi ni, ma á re yiɛ ma bɔ a gùrù lɛwɔn ganaa lon, ma dinmaa n die zumi kele sasa goon mìi ni lon.

²³Man die zumi Izirayeli a kele sasa kɛ goon mìi ni. Á re gùrùn boe a nɛ kɔ, á re da kaka biɛ gole gole. Bàan tɔrɔ tumaa á re kiɛ la, ǹ tá re ǹ kii doe a gùrùn la.

²⁴Bɛa biikoo li kəni, da mɛn tumaa bɛ́ don, ǹ tá re doɛ̃ mà ma din nə Dɛnaa Lawa lɛa. Da mɛn nə́ ke lon, ma din nə boe ma daa. Ǹ mɛn nə́ ke tán, ma din nə siɛ ma da lon. Da mɛn yii bɛ́ koo, ma din nə dii. Da mɛn bɛ́ á gã, ma din nə wusii ma a yii kaa. Masɛ Dɛnaa Lawa, bɛ̀ má boo mɛn da, man bɛ lɛ zɛnɛɛ.»