Read Samo, Southern Eze 19 Bible Online

Eze 19 - Samo, Southern bible

Eze 19

¹Dɛnaa Lawa tɔ́n pɛ ma nɛ mà ma foo ziziɛ̃ ǹ loe kɛ lɔ Izirayeli minin nyɛɛnaandɛnan kɛn wɔ paǹ li:

²N náa yàra dan lɛ, waa-n tán kun ka yàra san nɛ, waa-n tán yàra tenən bii, a na á goã a nɛnyaanan toe.

³A ná a nɛ lɛ goon too, bɛ́ daa á yàra kaka baa. Á n daraa siĩ kũ ganaa, á minbuiinin dinin sɔ̃.

⁴Gána kɔsɔn ná a boo ma minin lɛ-n, bɛn nə́ nyankɔrɔ fɔ̃ ǹ nə́ kũ ni, ǹ nə́ zan da a nyin ni, ǹ nə́ baã, ǹ nə́ woo-n Ezipti gána nɛ.

⁵Yàra dan lɛ bɛ́ á n yii da á fɔ̃, foo doa ǹ bǎã bɛ́ a banban doo wa, a ná a nɛ lɛ a kɔsɔ kũ, á too á yàra kaka baa.

⁶A bɛ́ á yàra kaka baa, á goã n bibiĩ kun ka yàra san nɛ. Á n daraa siĩ kũ ganaa, á minbuiinin dinin sɔ̃.

⁷Á kiin kɛbɔlɔ kaa, á ǹ kiwin yuyu. A wɔɔsaa lɛ bɛ́ á bɔ, nyɛ́ɛ gána lɛ a minin kũ.

⁸Gána kɔsɔn mɛnɛn bɛ́ ǹ lɛnpɛnɛ, bɛn nə́ soo ǹ giã ǹ bǎãn nɛ, ǹ nə́ daa a lɛnpɛnɛ. Ǹ nə́ biɛ koa nɛ, ǹ nə́ kũ, ǹ nyankɔrɔ mɛn fɔ̃, bɛ́ kũ.

⁹Ǹ nə́ da màn nɛ, zan kɛ ná a nyin ni, ǹ nə́ woo kɔ Baabiloniin kii la. Ǹ nə́ woo da kele yala-n, màn mɛn bɛ́ toɛ, min baran a lɛ ma Izirayeli kelen kɛn la doo wa.

¹⁰N dan kɛ na á goã ka *rezɛ̃ da bɛ́ lɔn, ǹ nə́ zumu mu lɛkoro-a. Mu gigiã lɛ taman yii, a na á goã nɛ koe, a n luu lɛa ka kɛkɛ.

¹¹A gùrùn man nə́ goã ǹ tan dadara, a gùrùn nə́ kiin kiibaa ǹ bàlàn baa. Rezɛ̃ da lɛ gole kɔ, á la ǹ miã dan manɛ. A sasabaa lɛ taman yii, a gùrùn lɛn gigiãbaa taman yii, ta min dɔ wɔlɔ n sɔsɔɔ, a n yii.

¹²Sɛnɛ, ǹ nə́ woɛ̃ ka foo ne, ǹ nə́ zũ tán. A nɛ mɛn kaa tán, lɛ̀giala a piɛ̃ kɛ bɛ laa, a gùrù dadaran lɛn nə́ laa, tɛ nə́ ǹ kũ.

¹³Sisia kəni, ǹ nə́ rezɛ̃ da lɛ zumu don gɔ́ɔ̃ nɛ, ǹ nə́ zumu tán fu gere la.

¹⁴Tɛ soo da lɛ gùrùn ni, a ná a gùrùn laanka a nɛ kũ. Gùrù dadaran ba rezɛ̃ da lɛ ganaa doo wa, kiin kiibaa ǹ bàlà a yii a ganaa doo wa. Kɛa loe kɛ n siĩni a n lɔ foo ziziɛ̃ ǹ loe lɛa.