Read Samo, Southern Eze 21 Bible Online

Eze 21 - Samo, Southern bible

Eze 21

¹Dɛnaa Lawa boo da ma nɛ á pɛ:

²— Minbuiin a nɛ, n yɔrɔ dia gusin a lɛ̀gɔn la. Sɛ̀ pɛ gusin a lɛ̀gɔn la dɛnan kɛn ganaa, n paraa wɔ gusin a lɛ̀gɔn la a daã kɛ wɔ paǹ li.

³Kɛ pɛ gusin a lɛ̀gɔn la a daã lɛ wɔ paǹ li: «Ka n too kɔ masɛ Dɛnaa Lawa a da ǹ boo li: Á ke, man die tɛ diɛ n ganaa. Da buruu tumaa nɛ, a gere tumaa nɛ, á re bɛn kuĩ. Bɛa tɛ gole kɛ lɛ a re nimi wa. Á re màn tumaa kuĩ, a saa gusin a lɛ̀gɔn la ganaa, a wo gɔsɛ a lɛ̀gɔn la yaa.

⁴Min tumaa á re doɛ̃ kəni, mà masɛ Dɛnaa Lawa din ni ma tɛ lɛ da, min kɔn dɔ a re boe la a nimi wa.»

⁵Má tɔ́n pɛ: «E, Dɛnaa Lawa, minin man pii, mà masɛ n boo tì dinsɔɔ̃ diɛ minin ganaa.»

⁶Dɛnaa Lawa wusoo á boo da ma nɛ á pɛ:

⁷— Minbuiin a nɛ, n yɔrɔ dia Zeruzalɛmu la. Yoo ǹ wúlu bɔ ǹ bǎãn kɛn gialaa, n maa boo da Izirayeli gána ganaa.

⁸A pɛ Izirayeli gána nɛ, mà masɛ Dɛnaa Lawa a da ǹ boo á ke: «Masɛ Dɛnaa Lawa n die n gialaa. Ma á re maa gɔya sa woɛ̃, ma min peperen laanka min baraan waa, ma ǹ bɔ gána lɛ nɛ.

⁹Ma bɛ́ re min peperen laanka min baraan wɛɛ ma ǹ bɔ a nɛ, bɛ lɛ na á toa ma á re maa gɔya sa lɛ woɛ̃ min tumaa li, a saa gusin a lɛ̀gɔn la ganaa, a wo gɔsɛ a lɛ̀gɔn la yaa.

¹⁰Min tumaa á re doɛ̃ kəni, mà masɛ Dɛnaa Lawa n ma gɔya sa woɛ̃ má bɔ a kii ni, ma a woe a-n doo wa.»

¹¹Minbuiin a nɛ, n kii kũ n gini là-paparɛɛ taman yii. Gini ǹ tumaa yii ni.

¹²Bɛ̀ ǹ nə́ nɔ̀n da n la mà wàa na á baa n tá gini, a pɛ ǹ nɛ, mà n boo mɛn ma, mà bɛ lɛ a lɛa nɛ. Min tumaa foo á re biɛ niɛ̃, min tumaa pàã á re nyɛɛ, min tumaa gɔ́ɔ̃ á re n lɔlɛkɔn, min tumaa gù á re giɛ̃. Á ke, bɛa sii lɛ á die, á dɔ á nya dinin. Ma din Dɛnaa Lawa a da ǹ boo ne.

¹³Dɛnaa Lawa wusoo á boo da ma nɛ á pɛ:

¹⁴— Minbuiin a nɛ, maa boo gii kɛ da n pɛ kɛnɛn: «Dɛnaa Lawa a da ǹ boo á ke: Gɔya sa á ke, ǹ ná a lɛ bɔ, ǹ nə́ zɔnɔ sɔnbɔraanɛ!

¹⁵A lɛ na á n lɔ minin bɔlɔ-kurii taman yii, a gɔ̀nɔn na á n zɔnɔ, tɛ pii taman yii.

¹⁶Má kɔ ǹ la máa ǹ na a lɛ tuturu, má kɔ ǹ la máa ǹ na a lɛ lɔ, ǹ boo la ǹ saa ǹ gɔn, ǹ wɔ basaã-kɔle kɛ gɔn. Dɛnaa Lawa a da ǹ boo ne.

¹⁷Minbuiin a nɛ, n lɛ dɛ, n lɛ dɛ kɔsɛkɔsɛ! Gɔya sa á ke maa zaman lɛ gialaa, á ke Izirayeli a nyɛɛnaandɛnan tumaa gialaa. Gɔya sa n die ǹ laanka maa zaman lɛ dii kun. Bɛ lɛ nɛ, n kii kũ.

¹⁸Nɔmaa gole n ka kɛ nɛ. Ma din Dɛnaa Lawa a da ǹ boo ne.

¹⁹Minbuiin a nɛ, maa boo kɛ pɛ: N gɔn tɔ kɔn lɛ. Bɛ̀ á dɔ gunyin paa, gunyin sɔɔ, màn die a wusoo a mɛ gɔya sa lɛ a minin dɛ li miɛ̃. Gɛ̀ dɛ ǹ gɔya sa nɛ, á minbuiin dɛ á wɔlɔ lɛnpɛnɛ nɛ.

²⁰Má min doa ǹ kiɛnlɛn tumaa lɛ-a, ka gɛ̀ dɛ ǹ gɔya sa ná a gɔn. A n tɛ zuĩ ka la a tɛ-pɛ bɛ́ lɔn, a lɛ na á n lɔ gɛ̀-dɛ taman yii, màn mɛn bɛ́ toɛ nyɛ́ɛ minin kũ, màn mɛn bɛ́ toɛ min gigiã mɛnaa.

²¹Haya, gɔya lɛ bɔle-a! A dɛ bɛ̀ n wo gusin, n bɔyaa n dɛ bɛ̀ n wo gɔsɛ, n nyan bǎã kɔn din toa wa.

²²Masɛ dɔ n die gɛ̀ dii ka ma gɔnɔn paanan nɛ, ma foo mɛn yoo ke, yǎa man foo nyɛɛ. Ma din Dɛnaa Lawa a da ǹ boo ne.»

²³Dɛnaa Lawa a da ǹ boo á ke:

²⁴— Minbuiin a nɛ, zii màn paa lɔ tán, Baabiloniin kii lɛ bɛ́ re koe ziin mɛnɛn lɛ a da zia baa. Bɛa ziin lɛn doamaa nɛ, ǹ soo gána goon ne. Zii lɛ a gogoonmaa a giala kɔ ǹ bǎã nɛ, gɔn nyín zɛnaa, a gòon nə́ dia-n kiwi goon la.

²⁵Zia nɛn lɛn man die Zii lɛa goon siɛ ǹ wo Amɔn tɔrɔn kiwi Rabaa kɛ gialaa, ǹ kɔsɔ dɔ saa, ǹ wo Zeruzalɛmu kiwi kɛ gialaa Zudaa gána nɛ, kiwi mɛn lɛ bɛ́, ǹ nə́ kungɔn dɔ ǹ ná a lɛnpɛnɛ nɛ.

²⁶Baabiloniin kii na á goã zii màn paa lɛ a sawaa kɔn-a ǹ bǎã nɛ, á n dí nyɛɛ giɛ sii giala li. A na á goã kiɛnɛn zuzuĩ lon, nɔ̀n didiɛ dìn la, gigiɛ màn foon ganaa.

²⁷Kiɛ lɛ na á mɛnaa a gusin, á nyaa mà Zeruzalɛmu ni. Kii lɛ maǹ ziabaa ǹ lɛ-dɛ wɔ kɔsɛkɔsɛ, ǹ minin dɛ lɛ a gú da ǹ ziabaa ǹ màn dadaran doa kiwi lɛ a kiɛnlɛ-a, ǹ bèlèn dɔ, ǹ nyankɔrɔ fɔ̃!

²⁸Zeruzalɛmu minin man die bɛa dí kɛ lɛ biɛ soɛ lɛa. A giala, minin nə́ goã ǹ nə́ n lɛ kɔ ǹ la, mà ǹsɛn tá re n doe ǹ lɛ. Sɛnɛ, mà ǹ tá re woe bɛ̀rɛbaa ǹ bǎã nɛ, mà bɛ á re ǹ yiri diɛ ǹ sii baraa lɛ nɛ.

²⁹Bɛ lɛ na á toa masɛ Dɛnaa Lawa gole á ke pii: «Ka n wusii ma yiri diɛ kaa sii baraan lɛn nɛ, ka n ma bɔlɔ tii woone. Kaa zɛnaa ǹ siin lɛn tumaa n nyɛɛ mà ka dinin zɛ̀rɛ nɛ. Ka bɛ́ ka dinin la nyɛɛ miɛ̃, haya! Ǹ tá re ka kuĩ, ǹ wo ka nɛ bɛ̀rɛbaa ǹ bǎã nɛ.

³⁰Nsɛ, Izirayeli minin nyɛɛnaandɛnaa, min kooro babaraa ke, n too kɔ: N tá re n sii baraa zɛnaa kɛ lɛ diɛ, a lɛawaa á die.

³¹Ma din Dɛnaa Lawa gole n kɛ pii: Ǹ tá re n kiibaa ǹ bafolo laanka n gɛ̀lɛ boe ǹ bɔ n mìi-a, siin nə n bɔyaa. Min mɛn bɛ́ tán, bɛ á re yui lon, min mɛn bɛ́ lon, bɛ á re gisĩ tán.

³²Basaã woo basaã, man die basaã din taãn kɛ koe Zeruzalɛmu ni! Bɛa basaã lɛ miã din tɔn yɛ duduu wa. A n die goɛ̃ miɛ̃ yǎa bɛa sii lɛ a zɛnaali wole die.»

³³ Minbuiin a nɛ, maa boo gii kɛ da: Amɔn tɔrɔn nə sɔ mɛn kɔ ma ganaa, masɛ Dɛnaa Lawa n kɛ pii ǹ wɔ paǹ li: «A pɛ ǹ nɛ: Gɔya sa á ke! Ǹ nə́ woɛ̃, ǹ nə́ bɔ a kii ni, ǹ ná a lɛ lɔ, ǹ nə́ die minin bɔlɔ kuri ni. A n die tɛ kiɛ, ka la a tɛ-pɛ bɛ́ lɔn.

³⁴Ka bɛ́ n foo doɛ taasiɛ kooron laanka soɛ boon ganaa, ǹ mɛn waáraa, gɔya sa lɛ á re Lawa tɔ ziziɛ̃ wole babaraan kɛn wìi niɛ̃. A lɛawaa á die ǹ lon, ǹ tá re ǹ sii baraa zɛnaa lɛ lɛ diɛ.

³⁵Ka kaa gɔya san lɛn kaa ǹ kii ni. Ma á re dɔlɔ boe ka ganaa kaa bɔ ǹ bǎã kɛ nɛ, kaa yɛ ǹ gána kɛ nɛ.

³⁶Ma foo á re yui ka li, ma dɔlɔ bɔ ka ganaa, ma ka wɔ min gagasan gɔn, min mɛnɛn dí bɛ́ ka minin dɛ nɛ.

³⁷Tɛ á re ka kuĩ, ka mà á re kiɛ tán gána lɛ nɛ. Minin yiri din ba re gisĩ ka-n doo wa. A giala, ma din Dɛnaa Lawa a da ǹ boo ne.»