Read Samo, Southern Eze 28 Bible Online

Eze 28 - Samo, Southern bible

Eze 28

¹Dɛnaa Lawa boo da ma nɛ á pɛ:

²Minbuiin a nɛ, a pɛ Tiiri kiwi kɛ a kii ni mà masɛ Dɛnaa Lawa a da ǹ boo á ke: A giala, n nə́ n din gole kɔ, ń pɛ mà nsɛ n lawa lɛa, giã-n lawabaa ǹ kii dankan la, yìsi mun kɛn bii. A da yaa n nə n minbuiin nɛ lɛa, n bie Lawa lɛa wa. Sɛnɛ, n dɔ á ke, ń nə́ n din baa ka Lawa bɛ́ lɔn...

³Á ke, n tá sii doɛ̃ ń la Danieli ni. Sii-durii kɔn banban, mà n nə n ba bɛ doɛ̃ wa.

⁴Ń naforo yɛ n sii-doɛ̃ kɛ laanka n yiri kɛ barka nɛ, ń sana laanka wɔrɔ gigiã yɛ ń kaa màn nɛ.

⁵N sii-doɛ̃ gole lɛ taman yii, n pii-kɔ lɛ taman yii, n naforo lɛ mɔnaa. N naforo lɛ nɛ, ń nə́ n saa li, ń nə́ n din gole kɔ.

⁶Bɛ lɛ nɛ, masɛ Dɛnaa Lawa á kɛ pii: N bɛ́ ń nə́ n din baa lawa lɛa,

⁷Á ke man die tiin kɔnɔn kiɛ n ganaa, tɔrɔ mɛn a minin bɛ́ baraa ǹ nə́ la ǹ miãn wɔ nɛ. N màn sonboren mɛnɛn yɛ ka n din a sii-doɛ̃ kɛ nɛ, ǹ tá re gɔya sa woɛ̃ bɛn li, ǹ tá re n siĩnbaa kɛ ziziɛ̃.

⁸Ǹ tá re n nyin we tii li, n tá re gɛ̀ baraa we, yìsi mu bii.

⁹Min mɛn lɛ bɛ́ re n dii, n yii a we n pɛ mà nsɛ n Lawa lɛa? N nə n minbuiin nɛ lɛa, n bie Lawa lɛa min kɛ lɛ gɔn die n foɛ̃ wa.

¹⁰Tiin tá re n dii, n tá re tɔrɔ kɔsɔn gɛ̀ kɛ tɔrɔ we, ma din nə má pɛ, ma din Dɛnaa Lawa a da ǹ boo ne.

¹¹Dɛnaa Lawa wusoo á boo da ma-n kɛnɛn:

¹²«Minbuiin a nɛ, foo ziziɛ̃ ǹ loe lɔ Tiiri kiwi lɛ la. N pɛ ǹ nɛ, mà masɛ Dɛnaa Lawa n kɛ pii: Nsɛ lɛ a sii tumaa lɛ na á goã piɛ̃ nɛ, n sii-doɛ̃ ke, bɛ dɔ kɔn, n siĩnbaa kɛ dɔ lɛ pã.

¹³Ma nə ń goã Edɛn, Lawa a dù gɔrɔ kɛ nɛ. Ǹ ná a kungɔn dɔ ka kɔlɔ sonboren ne, ǹ ná a lɛnpɛnɛ nɛ: Kɔlɔ tã bonbon ne, a lɔɔdɛnaa nɛ, a fu ni, a buu buruu ni, a tɛ-pɛle ne, a buu buruu tì ni, a bɔlɔn nɛ, a tã nɛ, a bɔlɔn buu buruu dɛnaa nɛ. N maàn kɛn laanka n pìin ni, n nə ń bɛn zɛnaa ka sana nɛ. Maǹ nə́ ǹ zɛnaa ka sana nɛ n din a zɛnaa pinaa.

¹⁴N din lon màn yiikoonaa tɛ-pɛle, man má n koa máa n minin tamaa. Ma nə ń goã Lawa a kele sonbore kɛ la, ń goã woe bɛ̀ n nə n bɔyaa, kɔlɔ tɛ-pɛlen kɛn bii.

¹⁵A kũ n zɛnaa pinaa ganaa, n zɛnaa ǹ sii na á goã siĩni, yǎa baraabaa ke, á daa á yɛ n ganaa sisia.

¹⁶N pii-kɔ lɛ bɛ́ á gole kɔ, kakaarɛbaa la n yii ni, ń nɔmaa ń sii baraa zɛnaa. Bɛ lɛ n ke ma á n diɛ kun ka min kooron ne, n wɔlɔ ń lui-n Lawa a kele kɛ ganaa. Nsɛ lon màn yiikoonaa minin-tamaali lɛ, ma á re n lui, ma n bɔ kɔlɔ tɛ-pɛlen kɛn bii.

¹⁷Ma n nə́ n din gole kɔ n siĩnbaa kɛ taman yii, Ń toa n siĩnbaa lɛ nə́ n sii-doɛ̃ kɛ ziziɛ̃, man die n lui ma n dia tán, man die sìi diɛ n ganaa, n miã kiin yɔrɔ-a.

¹⁸N sii baraa damata kɛ lɛ taman yii, n mɛnaa minin la kɛ lɛ, n pii-kɔ gɔ́ɔ̃ nɛ, ń nə́ n Lawa guguru kɔ ǹ bǎãn lɛn ziziɛ̃. Bɛ lɛ n ke ma á re yui ka tɛ nɛ n kiwi lɛ bii, bɛa tɛ lɛ á re n kuĩ. N tá re ton biɛ tán, n gamaa wolen tumaa yɔrɔ-a.

¹⁹Tɔrɔ kɔsɔn mɛnɛn tumaa bɛ́ n doɛ̃, bɛn tá re n kaãbiɛ n sii ganaa. N tá re nyɛ́ɛ da ǹ màn biɛ, n tá re papaɛ̃ duduu.»

²⁰ Dɛnaa Lawa boo da ma nɛ á pɛ:

²¹Minbuiin a nɛ, n yɔrɔ da Sidɔn kiwi kɛ la, n yoo ǹ gialaa, n masɛ a boo gii kɛ da a minin manɛ.

²²Masɛ Dɛnaa Lawa n kɛ pii: Á ke, nsɛ Sidɔn kiwi kɛ lɛ, ma á die n gialaa. Maa zɛnaa ǹ siin taman yii, minin tá re ma guguru koe Sidɔn kiwi. Ma bɛ́ re dɔlɔn mɛnɛn boe n ganaa, ma maa Lawa sonborebaa kɛ nyaa nɛ, minin tá re doɛ̃ ka bɛ lɛ-n kəni, mà ma din nə Dɛnaa Lawa lɛa.

²³Ma á re piɛ̃ busu babaraa diɛ n la, mà tá re goɛ̃ tán n ziin la, zia á re yui n paǹ tumaa-a, bɛ lɛ n die toɛ n minin lɛn gigiã gã. Ǹ tá re doɛ̃ ka bɛ lɛ-n kəni, mà ma din nə Dɛnaa Lawa lɛa.

²⁴Bɛ kio, nyan ba re Izirayeli minin kɛn toɛ̃ doo wa, nyan ba re ǹ gòã foɛ̃ doo wa, min mɛnɛn dɔn bɛ́ ǹ lɛnpɛnɛ, bɛn kɔn dɔ a re ǹ puusə koe doo wa. Ǹ tá re doɛ̃ ka bɛ lɛ-n kəni, mà masɛ din nə Dɛnaa Lawa gole lɛa.

²⁵Masɛ Dɛnaa Lawa n kɛ pii: «Izirayeli tɔrɔn kɛn bɛ́ pɛsiɛ̃-n tɔrɔ kɔsɔn mɛnɛn bii, bɛ̀ masɛ nə́ ǹ waa bɛn bii ma ǹ sɔkɔn ǹ mɛn waáraa, ma á re nyɛɛ tɔrɔ kɔsɔn kɛn manɛ, máa masɛ din nə Lawa sonbore lɛa. Izirayeli minin lɛn tá re giɛ̃ ǹ dinin tán la, masɛ goã má bǎã mɛn lɛ kɔ maa dí-nyali Zakɔba la.

²⁶Ǹ tá re giɛ̃ a nɛ ka là nyantoro ne, ǹ kionən dɔdɔ, ǹ *rezɛ̃ da zuzumu. Ǹ tá re giɛ̃ a nɛ ka là nyantoro ne, a giala, ǹ lɛkoro lɛ-a minin mɛnɛn tumaa bɛ́ ǹ puusə koe, masɛ á re dɔlɔ boe bɛn ganaa. Ǹ tá re doɛ̃ kəni, mà masɛ din Dɛnaa Lawa nə ǹ Lawa lɛa.»