Read Samo, Southern Eze 30 Bible Online

Eze 30 - Samo, Southern bible

Eze 30

¹Dɛnaa Lawa boo da ma nɛ á pɛ:

²Minbuiin a nɛ, maa boo kɛ da n pɛ: Dɛnaa Lawa a da ǹ boo á ke: Ka n lɛ dɛ ka pɛ: E! Lɛawaa mɛn tɔrɔ n ka kɛ nɛ!

³A giala, lɛawaa lɛ diri, Dɛnaa a lɛawaa lɛ diri. A n die labara lɛawaa biɛ, a n die tɔrɔn sii yɔrɔ bɔ pinaa biɛ.

⁴Zia á re we Ezipti gána nɛ. Bɛ̀ ǹ nə́ minin dɛ ǹ nə́ ǹ kaa tán Ezipti gána nɛ, a gɔ̀nɔn bìn diɛ á re doe Etiopii gána nɛ. Ǹ tá re ǹ gɔn mànan goɛ, ǹ kionən tá re kɛbɔlɔ biɛ.

⁵Etiopii minin ni, Puti wɔn nɛ, Ludu wɔn nɛ, Larabu gána wɔn nɛ, bɛa tɔrɔ lɔlɔkɔn kɛ lɛ tumaa á re kiɛ kunun ǹ ni zia la, haalɛ ma din tɔrɔn kɛn lɛn dɔn dinin minin.

⁶Masɛ Dɛnaa Lawa a da ǹ boo á ke: Ezipti a dɔmalɛ wolen kɛn tá re mɛnɛɛ zia la, a saa Migdɔli ganaa, a wo Siyɛni yaa. A bɛ́ n din koɛ a pàã mɛn taman yii, bɛ á re nyɛɛ. Ma din Dɛnaa Lawa a da ǹ boo ne.

⁷Ezipti á re diə gole biɛ, a la diə gole tumaa nɛ. A kiwin tá re kɛbɔlɔ dinsɔsɔɔ̃ biɛ.

⁸Bɛ̀ má tɛ da Ezipti gána kɛ ganaa ǹ mɛn waáraa, bɛ̀ má a dɔmalɛ wolen kɛn tumaa dɛ, ǹ tá re doɛ̃ bɛa biikoo li, mà ma din nə Dɛnaa Lawa lɛa.

⁹Bɛa pinaa kɛ lɛ nɛ, ma á re minin diɛ mu la ǹ goo ne, ǹ wo nyɛ́ɛ da Etiopii minin kɛn ganaa, ǹsɛn mɛnɛn bɛ́ taasɛ, mà ǹsɛn man là nyantoro la. Ezipti minin sii lɛ a pinaa, ǹ gɔ̀nɔn tá re bìn diɛ. Á ke, a lɛawaa á die.

¹⁰Masɛ Dɛnaa Lawa a da ǹ boo á ke: Man die Baabiloniin kii Nebukadenezɔɔrɔ diɛ Ezipti gialaa, a wo a zaman damata kɛ dɛ.

¹¹Kii lɛ laanka a zaman nɛ, kɛn lɛn kakaarɛ ǹ nə́ la tɔrɔn tumaa nɛ, ǹ tá re die ǹ ne, ǹ gána lɛ ziziɛ̃, ǹ tá re ǹ gɔya sa wɔ̃woɛ̃ Ezipti minin li, ǹ tá re gɛ̀ dii ǹ gána lɛ gɔ́ɔ̃ pã nɛ.

¹²Ma á re n tà gòã kɛ tumaa biɛ bǎã gere lɛa, ma á re n gána lɛ koe min kakaarɛn la, ma á re tiin diɛ ǹ wo n gána lɛ ziziɛ̃, ka a gɔ́ɔ̃gɔ́ɔ̃ ǹ mànan tumaa nɛ. Ma din Dɛnaa Lawa n má pɛ.

¹³Masɛ Dɛnaa Lawa a boo á ke: Ma á re ǹ dì kɛn yɔyɔrɛ, màn kooron kɛn ǹ tá ǹ guguru koe, ma á re bɛn papaɛ̃ ma ǹ bɔ Manfisi kiwi, kii a re yii a giã Ezipti gána mìi la doo wa. Ma á re nyɛ́ɛ kiɛ Ezipti gána lɛ nɛ.

¹⁴Man die Ezipti gána a gusin a lɛ̃ gɔn la kɛ ziziɛ̃, ma tɛ kaa Soan kiwi kɛ ganaa, ma dɔlɔ bɔ Tɛbu kiwi kɛ ganaa.

¹⁵Ma á re maa foo-yoo kɛa sii zɛnɛɛ Sini kiwi kɛ nɛ, bǎã kaka mɛn lɛ á ke Ezipti gána tamaɛ. Ma á re Tɛbu a zaman damata kɛ dii.

¹⁶Ma á re tɛ diɛ Ezipti gána kɛ ganaa, Sini kiwi na a là-paparɛɛ wɔ. Ma á re wɔ ǹ bǎã boe Tɛbu kiwi kɛ ganaa, zɔ́ɔn nə kaa Manfisi kiwi penleen tiɛɛ̃nɛ.

¹⁷Onu kiwi laanka Pibesɛti kiwi a giĩ tenən kɛn tá re giɛ̃ zia la. Ǹ tá re ǹ min gialakunun kɛn goɛ, ǹ wo ǹ ne bɛ̀rɛbaa ǹ bǎã nɛ.

¹⁸Bɛ̀ má Ezipti minin pàã kɛ ziziɛ̃ ǹ mɛn pinaa, wɔlɔ a re fúli Tapanɛsi bɛa pinaa wa. Ǹ pàã mɛn lɛ á ke toɛ ǹ tá n dinin gole koe, ma á re bɛ lɛ nyɛɛ ma bɔ kiwi lɛ nɛ. Labara tì á re n kumii kiwi lɛ ganaa, bǎã lɛ a minin tá re woe bɛ̀rɛbaa ǹ bǎã nɛ.

¹⁹Ma á re dɔlɔ boe Ezipti gána lɛ ganaa. Ǹ tá re doɛ̃ bɛa pinaa kəni, mà ma din nə Dɛnaa Lawa lɛa.

²⁰Ezipti minin goa a lɛ̀ fulugoonbaa ǹ wɔ, mui bibinaa a lɛawaa sɔbaabaa ǹ wɔ pinaa, Dɛnaa Lawa boo da ma nɛ á pɛ:

²¹— Minbuiin a nɛ, ma á re Eziptin kii *Faarahɔn a pàã kɛ nyɛɛ. Ka min gɔn bɛ́ yiɛ lɔn, min din ba re yii a dagòã da a ganaa, a kũ a da màn nɛ a yii, màn mɛn bɛ́ toɛ, bɛa gɔn lɛ nya, a wusoo a gɔya sa kũ doo wa.

²²Bɛ lɛ na á toa masɛ Dɛnaa Lawa á kɛ pii: «Á ke, man die Eziptin kii Faarahɔn kɛ gialaa. Man die a gɔnɔn paanan yiɛ. A gɔn lɛ a mɛn bɛ́ siĩni, man die bɛ dɔ yiɛ, ma ti a yiɛ wole kɛ lɛ ganaa, a gɔya sa kɛ nə n si la a mɛnaa.

²³Ma á re Ezipti minin lɛn sasawɛɛ ma ǹ kaa tɔrɔ kɔsɔn bii, masɛ á re ǹ pɛpɛsɛ̃ gána kɔsɔn nɛ.

²⁴Sɛnɛ, ma á re pàã koe Baabiloniin kii kɛ la, ma ma din a gɔya sa wɔ a gɔn. Ma Faarahɔn mɛn lɛ gɔnɔn yiyiɛ, á re gigini tán-a a zɔ́ɔn yɔrɔ-a, a kere.

²⁵Ma á re pàã koe Baabiloniin kii kɛ la. Sɛnɛ, Faarahɔn pàã á re nyɛɛ. Bɛ̀ má maa gɔya sa wɔ Baabiloniin kii kɛ gɔn ǹ mɛn waáraa, á re pepere Ezipti gána kɛ li. Ǹ tá re doɛ̃ bɛa biikoo li kəni, mà ma din nə Dɛnaa Lawa lɛa.

²⁶Ma á re Ezipti minin lɛn sasawɛɛ ma ǹ kaa tɔrɔ kɔsɔn bii, ma á re ǹ pɛpɛsɛ̃ gána kɔsɔn nɛ. Ǹ tá re doɛ̃ ka bɛ lɛ-n kəni, mà ma din nə Dɛnaa Lawa lɛa.»