Read Samo, Southern Eze 31 Bible Online

Eze 31 - Samo, Southern bible

Eze 31

¹Izirayeli minin goa lɛ a lɛ̀ fulugoonbaa ǹ wɔ, a mui sɔɔbaa ǹ wɔ a lɛawaa bibinaa pinaa, Dɛnaa Lawa boo da ma nɛ á pɛ:

²«Minbuiin a nɛ, kɛ pɛ Eziptin kii *Faarahɔn laanka a zaman nɛ: N pàã a golebaa ke, man die zoɛ̃ kɔn ka wàa nɛ?

³Á ke Asiirii na á goã ka Liban da kaka kɛ bɛ́ lɔn, A gùrùn nə́ siĩni, luu lɛa ka kɛkɛ, a wúlu ná a tan. A na á goã sasa taãn-taãnɛ, a mìi la woo n doa labaran ganaa.

⁴Mu na á toa á gole kɔ, tán giulun mu na á toa á sasa kɔ. A bɛ́ zumii-n bǎã mɛn nɛ, a mu lɛ n baa sii á n bɛ lɛnpɛnɛ. A na a mu ziin lɛn yɔrɔ diɛ dan kɛn tumaa la don.

⁵Bɛ lɛ na á toa, á sasa kɔ á la da gialakunun kɛn tumaa nɛ. A bɛ́ yui tán, a gùrù tenən nə́ mɔnaa, a gùrùn nə́ sɔsɔrɔ kɔ, mu gigiã lɛ taman yii.

⁶Bàanan tumaa na á goã kii doe a gùrùn la, don siĩn tumaa na á goã nɛ yii a din lɛ giulun, tɔrɔ tumaa a zaman na á goã giɛ̃ a din lɛ a wúlu li.

⁷A sasabaa lɛ taman yii, a gùrùn kɛn dadarabaa taman yii, a na á goã siĩni, a giala, a gòonən man nə́ goã woe yǎa mu gole ganaa.

⁸ Lawa a dù gɔrɔ kɛ nɛ, da kaka kɛ kɔn dɔ li wa. Siprɛsi da kɛ kɔn ba n zoɛ̃ a gùrù tenən ganaa wa, gɔ́rɔ da kɔn gùrùn ba n zoɛ̃ a gùrùn ganaa wa, da kɔn din ba n zoɛ̃ a ganaa ka siĩnbaa nɛ, Lawa a dù gɔrɔ kɛ-n wa.

⁹Man má goã má a gùrùn mɔnaa, má siĩnbaa kɔ la nɛ. Edɛn dù gɔrɔ a dan lɛn tumaa, ǹ mɛnɛn nə goã Lawa a dù gɔrɔ lɛ nɛ, bɛn yii na á goã boe li.»

¹⁰Bɛ́ lɛ na á toa masɛ Dɛnaa Lawa á kɛ pii kii wɔ paǹ li: «Da kaka lɛ bɛ́ á gole kɔ, a mìi la woo n doa labaran ganaa bɛ lɛ na á toa din gole kɔ wɔ a foo ne.

¹¹Bɛ lɛ n ke má loo má wɔ tɔrɔn tumaa a kii kɛ gɔn, màn mɛn bɛ́ toɛ a baraabaa mɛn zɛnaa, kii lɛ bɛ dòo bɔ a ganaa.

¹²Tiin mɛnɛn bɛ́ ǹ kakaarɛbaa la tɔrɔn tumaa wɔ nɛ, bɛn nə́ kuru ǹ nə́ daa, ǹ nə́ kiɛ̃ ǹ nə́ toa tán. A gùrùn nə́ mɛnaa tentenen la, ka nyankɔrɔ basan tumaa nɛ, ǹ nə́ yiyiɛ ǹ nə́ kakaa tà gòãn tumaa nɛ. Kanaa a tɔrɔn tumaa kiɛ̃ ǹ nə́ n bɔ a wúlu li, ǹ nə́ toa tán.

¹³Bàanan tumaa na á goã die miɛ̃ da gere lɛ la tán, don siĩn tumaa na á goã die wɛɛ tán a gùrùn lɛn bii.

¹⁴Bɛ na á n zɛnaa, màn mɛn bɛ́ toɛ, da mɛn bɛ́ ǹ nə́ mu kiɛ a ganaa á n boe, bɛ baran n din saa lon, ka a mìi la daa a dɔ labaran ganaa wa. Ka bɛ dɔ nɛ, ta mu na á la a yii ni, a baran n saa din gole kɔ li, a n din soɛ kɔ ǹ miãn man wa. A giala, dan nɛ ka minbuiinin ni, ǹ tumaa n die giɛ̃, ǹ tumaa n die woe tán giulun, minbuiinin woo ǹ bǎã kɛ nɛ yala-n.»

¹⁵Masɛ Dɛnaa Lawa a da ǹ boo á ke: «Da kaka lɛ bɛ́ re woe geren piɛ ǹ mɛn pinaa, don tumaa ná a gɛ̀ koa. A din taman yii, má pìi kɔ nyankɔrɔ gole kɛ lɛ tán giulun, má a tàn kɛn mu kurəə, ma mu gole lɛ kũ má gole ne. A din lɛ a lɛa nɛ, má toa wɔlɔ tii Liban kele kɛ la, a din lɛ dɔ a lɛa nɛ, masɛ toa da tumaa gã don.

¹⁶Man má toa da lɛ mɛnaa, màn mɛn bɛ́ toɛ, a wo kun ka ǹ miãn nɛ geren piɛ. Tɔrɔ kɔsɔn ná a mɛnaa wuu ma, ǹ gɔ̀nɔn bìn da nyɛ́ɛ gɔn. Edɛn dù gɔrɔ a dan kɛn, Liban dan kɛn mɛnɛn siĩnbaa bɛ́ á goã á la ǹ miãn wɔ nɛ, ǹ nə́ mu yii sɔnbɔraanɛ, bɛn tumaa foo á re basɛ̃ da lɛ a mɛnaa gɔ́ɔ̃ nɛ.

¹⁷Tɔrɔn mɛnɛn lɛ nə goã giɛ̃ a wúlu li, ǹ nə́ n doe lɛ, bɛn lɛn dɔn man die woe kun ni geren piɛ, ǹ wo minin kɛn yaa ǹ nə́ ǹ dɛ zia la.

¹⁸Edɛn dù gɔrɔ a dan kɛn mɛn nə n zoɛ̃ n ganaa ka siĩnbaa laanka golebaa nɛ? Sɛnɛ, ǹ nə́ ke ǹ nə́ n dɔ gisĩ, ǹ nə́ n da tii li kunun ǹ ni. N tá re wɛɛ tán soroman kɛn bii, n min mɛnɛn lɛn kakã ka gɔya nɛ. Sii mɛn bɛ́ re Faarahɔn laanka a zaman tumaa yii, a din lɛ n ka kɛ nɛ. Ma din Dɛnaa Lawa a da ǹ boo ne.»