Read Samo, Southern Eze 32 Bible Online

Eze 32 - Samo, Southern bible

Eze 32

¹Izirayeli minin goa a wo bɛ̀rɛ́baa ǹ bǎã nɛ lɛ a lɛ̀ fulupaabaa ǹ wɔ, a mui fulupaabaa ǹ wɔ a lɛawaa bibinaa pinaa, Dɛnaa Lawa boo da ma nɛ á pɛ:

²«Minbuiin a nɛ, foo ziziɛ̃ ǹ loe lɔ Eziptin kii *Faarahɔn la, n pɛ: Ma nə́ n goã ka yàra ten bɛ́ lɔn tɔrɔn bii, ma nə́ n goã ka mu li ǹ màn babaraa bɛ́ lɔn mu gole li. Ma nə́ n goã n doe n tàn kɛn mu li, bɛ̀ n nə ǹ mu yii lɔlɔkɔn ka n gòãn nɛ, bɛ̀ n nə ǹ mu yii gɔgɔrɛ kɔ.

³Dɛnaa Lawa a da ǹ boo á ke: Bɛ̀ tɔrɔ gigiã nə́ n lɛ sɔkɔn ǹ mɛn waáraa, ma á re maa zɔ̀ɔ kɛ kiɛ n la ma n kũ, ǹ tɔ nə n baã ǹ da n nɛ mu lɛkoro-a.

⁴Ma á re n boe ma n zũ tán ma á re n zuĩ tán wɔlɔ fúlu-a, ma á re toɛ bàanan nə da kaa n gere la, ma á re toɛ don manan nə n siĩ sɔ̃, ǹ kã.

⁵Ma á re n gere diɛ tán kele la, ma á re nyankɔrɔ lɛ kɛ piɛ̃ ka n wen ne.

⁶Mà mɛn bɛ́ boe n gɔ̀nɔn nɛ kele lɛ la, ma á re tán goe ka bɛ nɛ a mi.

⁷ Bɛ̀ ń nə́ n yii nimi ǹ mɛn pinaa, ma á re pìi koe lon kɛ lɛ. Ma á re wɔlɔ tii leeren ganaa, ma á re labara koe wasa lɛ, mui dɔ a re folon kiɛ wa.

⁸Lon mànan mɛnɛn tumaa bɛ́ folon kiɛ, ma á re wɔlɔ tii ǹ ganaa n din a lɛa, ma á re wɔlɔ tii gána lɛ ganaa. Ma din Dɛnaa Lawa a da ǹ boo ne.

⁹Ma á re toɛ n mɛnaa lɛ a sii dɔ tɔrɔ gigiã ganaa, gánan gɔ́ɔ̃ nɛ, n bɛ́ n ba gánan mɛnɛn dinin doɛ̃ wa. Man die bɛ zɛnɛɛ ma tɔrɔ gigiã gɔ́ɔ̃ lɔlɔkɔn nɛ.

¹⁰Má bɛ́ re sii mɛn zɛnɛɛ n nɛ, bɛ á re nyɛ́ɛ diɛ tɔrɔ gigiã ganaa. Bɛ̀ má maa gɔya sa kɛ biə̃ ǹ kiin yɔrɔ-a, ǹ mìi ka á re yui a gole ka gurusuu. N bɛ́ re mɛnɛɛ ǹ mɛn pinaa, ǹ gɔ̀nɔn bìn diɛ a re nyɛɛ wa. Didie á re pàã diɛ ka a din ni.

¹¹A giala, Dɛnaa Lawa a da ǹ boo á ke: Baabiloniin kii kɛ á re die n gialaa ka zia nɛ.

¹²Ma á re toɛ a sɔraasin nə n zaman dɛ ǹ kaa tán. Ǹ tá kakaarɛ ǹ nə́ la gána tumaa wɔn manɛ. Màn mɛn bɛ́ toɛ Ezipti gána kɛ tá n din gole koe, ǹ tá re bɛ ziziɛ̃, ǹ tá re a zaman kɛ tumaa dii lenlen.

¹³A tɔɔn mɛnɛn tumaa goã mu kɛ lɛ-a, ma á re bɛn dii. Minbuiin nɛ gòãn ba re mu kɛ yii lɔlɛkɔn doo wa, tɔɔ gòon tɔnɔn ba re lɔlɛkɔn doo wa.

¹⁴Ma á re toɛ Ezipti a tà mu kɛ waa, ma á re toɛ a mu kɛ baa si ka nyɔɔ bɛ́ lɔn. Ma din Dɛnaa Lawa a da ǹ boo ne.

¹⁵Ma á re Ezipti gána kɛ ziziɛ̃, ma baa ka diə gole bɛ́ lɔn. Bɛ̀ má gána lɛ a mànan waa má ǹ bɔ a nɛ ǹ mɛn waáraa, bɛ̀ má a minin tumaa dɛ, ǹ tá re doɛ̃ bɛa biikoo li kəni, mà ma din nə Dɛnaa Lawa lɛa.

¹⁶Foo ziziɛ̃ ǹ loe lɛ n ka bɛ nɛ, a n die n loe, là-paparɛɛ taman yii. Tɔrɔn lɔn die ǹ lɔ, ǹ bɛa foo ziziɛ̃ ǹ loe lɛ lɔ Ezipti gána laanka a zaman tumaa la. Ma din Dɛnaa Lawa a da ǹ boo ne.»

¹⁷Izirayeli minin goa a wo bɛ̀rɛbaa ǹ bǎã nɛ lɛ a lɛ̀ fulupaabaa ǹ wɔ, a mui a lɛawaa fulusoorobaa ǹ wɔ li, Dɛnaa Lawa boo da ma nɛ á pɛ:

¹⁸— Minbuiin a nɛ, makara bɔ ǹ wuu pɛ Ezipti gána a zaman kɛ la. Wuu pɛ n Ezipti minin lɛn da zii, ǹ wo kun ka tɔrɔ kakan kɛn minin ni tán giulun, geren bǎã nɛ.

¹⁹Ka n taasɛ mà ka n soɛ ka miãn manɛ? Ka dɔn nə wo waa tán yàla-n, kun ka soroman kɛn nɛ!

²⁰Sonbore, zia min mɛnɛn bii, Ezipti minin lɛn tá re woe kun ka bɛn nɛ. Zia lɛ a biikoo dɔ. Ka Ezipti gána laanka a zaman tumaa nafɔ̃, ka kiɛ̃ ǹ nɛ!

²¹Sɛ̀mɔɔ kakan mɛnɛn nə wo gèren piɛ, ǹ mɛnɛn lɛn nə goã n doe lɛ, bɛn tá re pii ni: «Ǹ nə́ soroman lɛn dɔn dɛ zia la, ǹ nə́ ke ǹ nə́ wɔ ǹ nə́ daa waa tán yala-n.»

²²Asiiriin kii kɛ n walan, kun ka a sɔraasin ni. Ǹ ná a sɔraasin mɛnɛn dɛ zia la, a yala-n bɛn wɔn bii.

²³Asiirii minin yalan lɛn man tán giulun sɔsɔɔ. Ǹ yalan lɛn man kii lɛ wɔ lɛnpɛnɛ. Ǹ nə́ ǹ tumaa dɛ zia la, ǹsɛn mɛnɛn nə goã nyɛ́ɛ kiɛ minin ganaa, yiikoonaan kanaa kɛ nɛ.

²⁴Elamun kii kɛ dɔ n walan, kun ka a sɔraasin tumaa nɛ. A yala lɛ na a sɔraasin lɛn wɔ bii, ǹ nə ǹ mɛnɛn tumaa dɛ zia la. Soroman lɛn nə́ wɔ tán giulun, ǹsɛn mɛnɛn lɛn nə goã nyɛ́ɛ kiɛ minin ganaa, yiikoonaan kanaa kɛ nɛ. Ǹ dɔn gã n ke ka min gialakunun wɔn bɛ́ lɔn, bɛ n sìi lɛa ǹ mìi ni, ǹ nə́ woe ne.

²⁵Ǹ nə́ Elamun kii naa tán kun ka sɔraasi geren ne, ǹ nə ǹ mɛnɛn lɛn dɛ zia la, bɛn yala ná a wɔ da bii. Maǹ nə́ bɛa soroman kɛn lɛn tumaa dɛ zia la. A da yaa nyɛ́ɛ na á goã minbuiinin ganaa, yiikoonaan kanaa kɛ nɛ, ǹ dinin lɛn taman yii. Sɛnɛ, ǹ nə́ ke sìi gɔn, ǹ yala n geren bii, kun ka minin ni, ǹ nə ǹ mɛnɛn dɛ zia la.

²⁶Mesɛkin kii ni, ka Tubaalin kii ni, bɛn dɔn man walan, kun ka ǹ zia-baalin ni, ǹ sɔraasin yalan nə́ ǹ wɔn kaa bii. Bɛa soroman lɛn, ǹ tumaa gã zia la, a laanɛ ǹ nə́ goã nyɛ́ɛ kiɛ minin ganaa yiikoonaan kanaa kɛ nɛ.

²⁷Lɛlɛ a zia-baali kakan kɛn, ǹ nə ǹ geren bĩ kun ka bɛn nɛ wa. Bɛn man nə́ goã nyɛ́ɛ kiɛ minin ganaa, yiikoonaan kanaa kɛ nɛ. Sɛnɛ, ǹ nə́ ǹ gere bĩ kun ka ǹ ziabaa ǹ mànan nɛ, ǹ nə́ ǹ gɔya san kaa ǹ mìi li, ǹ gɛ̀-dɛ lɛ a gugurubaa mɛ ǹ we la.

²⁸Kasɛn Ezipti minin kɛn, ǹ tá re ka dɔn dii kun ka soroman kɛn nɛ, ka ǹ min mɛnɛn dɛ zia la, ǹ tá re ka gere biĩ kun ka bɛn nɛ.

²⁹Edɔmu minin tá walan, ǹ kiin laanka ǹ nyɛɛnaandɛnan nɛ. A laanɛ ǹ nə́ giĩ baa, maǹ nə́ ǹ dɔn gere bĩ kun ka gã zia la wole gialakunun kɛn nɛ. Ǹ soroman mɛnɛn bĩ, maǹ nə́ ǹ dɔn gere naa tán yala-n kun ka bɛn nɛ.

³⁰Gɔsɛ a lɛ̀gɔn la a goledɛnan kɛn tumaa tan, kun ka Sidɔn minin kɛn tumaa nɛ, ǹ mɛnɛn lɛn nə gã. A laanɛ ǹ nə́ goã nyɛ́ɛ kiɛ minin ganaa ǹ kakabaa kɛa lɛa, ǹ zɛnaa ǹ sii lɛ sìi da ǹ dinin ganaa. Soroman manɛ. Min mɛnɛn nə gã zia la, ǹ nə́ ǹ gere bĩ kun ka bɛn nɛ. Bɛa sìi kɛ nə ǹ ganaa, kun ka wo tii li wolen ne.

³¹Bɛ̀ Faarahɔn bɛa zaman damata kɛ lɛ yɛ, a dɔ foo á basɛ̃. Maǹ die a dɔ laanka a sɔraasin lɛn dii zia la. Ma din Dɛnaa Lawa a da ǹ boo ne.

³²Sonbore, man má Faarahɔn toa walan, máa nyɛ́ɛ kaa minin ganaa yiikoonaan kanaa kɛ nɛ. Sɛnɛ, ǹ tá re a din laanka a sɔraasin kɛn tumaa gere bĩ kun ka soroman nɛ, ǹ nə ǹ mɛnɛn lɛn dɛ zia la. Ma din Dɛnaa Lawa a da ǹ boo ne.