Read Samo, Southern Eze 37 Bible Online

Eze 37 - Samo, Southern bible

Eze 37

¹Dɛnaa Lawa Pàã gisĩ ma la. Á ma bɔ á soo ma nɛ ka a din Yiri kɛ pàã nɛ, á woo ma da tán nyankɔrɔ lɛ kɛ bii. Bɛa bǎã lɛ na á goã piɛ̃-n ka gere wen ne.

²Á ma kũ, wɔ́ bɔ ǹ li, wɔ́ ǹ lɛnpɛnɛ. Á ke, maǹ nə́ goã mɔnaa-n tán taãn-taãnɛ, nyankɔrɔ lɛ lɛ nɛ, ǹ nə́ laa-n ka kakaka.

³Lawa tɔ́n nɔ̀n da ma la á pɛ: «Minbuiin a nɛ, wen kɛn tá boe la ǹ wusoo ǹ yiikoonaabaa yɛ doo?» Má a lɛ si kɛnɛn: «Dɛnaa Lawa, n din nə bɛ doɛ̃!»

⁴Á tɔ́n pɛ ma nɛ: — Maa a boo gii da wen lɛn manɛ n pɛ ǹ nɛ: «We laan lɛn, ka n too kɔ Dɛnaa Lawa a boo li.

⁵Wen lɛn, Dɛnaa Lawa n kɛ pii ka nɛ: Á ke, ma á re wusii ma fɔfoã da ka nɛ, màn mɛn bɛ́ toɛ ka yii wusoo a kaa.

⁶Ma á re biɛn kiɛ ka nɛ, ma siĩ da ka ganaa, ma gɔ̀nɔn ki kɔ lɛ, ma fɔfoã da ka nɛ, màn mɛn bɛ́ toɛ, ka yii wusoo a kaa. Ka á re doɛ̃ ka bɛ-n kəni, mà ma din nə Dɛnaa Lawa lɛa.»

⁷Dɛnaa Lawa boo lɛ pɛ ma-n lɔn, ma dɔ́ da miɛ̃. Ma bɛ́ boo lɛ diɛ ǹ mɛn waáraa, bìn-diɛ bɔ, sii kɔn nə́ n zɛnaa: Wen lɛn mɛnɛn bɛ́ kun, didie nə́ n zɔ̃ á dɔ ǹ miã li.

⁸Ma bɛ́ giɛ, bɛ̀ biɛn nə́ ke ǹ ganaa, siĩ bɔ ǹ ganaa, á gɔ̀nɔn ki kɔ ǹ lɛ. Sɛnɛ, fɔfoã na a goã ǹ nɛ wa.

⁹Lawa tɔ́n pɛ ma nɛ: — Maa boo gii da yiikoonaabaa ǹ piɛ̃ kɛ nɛ, n pɛ nɛ: «Yiikoonaabaa ǹ piɛ̃, bɔ kanaa gùrù sii kɛ li n da kaa geren kɛn ganaa, màn mɛn bɛ́ toɛ, ǹ yii wusoo a kaa.»

¹⁰ Lawa boo lɛ pɛ ma-n lɔn, ma dɔ́ da miɛ̃. Fɔfoã daa wɔ ǹ nɛ, ǹ yii kaa, ǹ nə́ yoo ǹ nə́ golee ǹ gòãn la. Sɔraasi damata nɛ!

¹¹Lawa tɔ́n pɛ ma nɛ: — Minbuiin a nɛ, gere wen kɛn lɛn, Izirayeli tɔrɔn lɛn tumaa a kaa-kun ni. Á ke, Izirayeli tɔrɔn lɛn man pii: «Wɔ wen nə́ laa, foo doa ǹ bǎã ba wɔ lon doo wa, wɔa wɔ ziziɛ̃.»

¹²Bɛ lɛ taman yii, maa boo kɛ da ǹ nɛ n pɛ ǹ nɛ, mà masɛ Dɛnaa Lawa a da ǹ boo á ke: Maa minin lɛn, á ke, ma á re kaa yalan lɛn buĩ, ma ka waa ma ka bɔ kaa yalan lɛn nɛ, ma da ka nɛ Izirayeli gána nɛ.

¹³Maa minin lɛn, bɛ̀ má kaa yalan lɛn bũ ǹ mɛn waáraa, bɛ̀ má ka waa má ka bɔ kaa yalan lɛn nɛ ǹ mɛn waáraa, ka á re doɛ̃ bɛa biikoo li, mà ma din nə Dɛnaa Lawa lɛa.

¹⁴Ma á re ma din a yiikoonaabaa ǹ piɛ̃ kɛ diɛ ka nɛ, màn mɛn bɛ́ toɛ, ka yii wusoo a kaa. Ma á re wusii ma ka koa kaa gána lɛ nɛ. Ka á re doɛ̃ bɛa biikoo li kəni, mà bɛ̀ masɛ Dɛnaa Lawa boo mɛn da, mà man bɛ lɛ zɛnɛɛ. Ma din Dɛnaa Lawa a da ǹ boo ne.

¹⁵Dɛnaa Lawa boo da ma nɛ á pɛ:

¹⁶— Minbuiin a nɛ, gɔn lɛkoro saa, n kɛ kiɛ̃ a ganaa kɛnɛn: «Zudaa tɔrɔn laanka Izirayeli tɔrɔn mɛnɛn bɛ́ kun.» Gɔn lɛkoro kɔsɔ saa, n kiɛ̃ bɛ ganaa kɛnɛn: «Zozɛfu tɔrɔ Efrayimu a minin laanka Izirayeli tɔrɔn mɛnɛn tumaa bɛ́ kun.»

¹⁷Bɛa gɔn lɛkoron lɛn kaa kɔn para li, màn mɛn bɛ́ toɛ, ǹ nə n baa goon toto, ǹ goã gɔn goon lɛa n gɔn.

¹⁸Bɛ̀ n zaman lɛ a minin lɛn nə́ nɔ̀n da n la mà n bɛ́ sii mɛn zɛnɛɛ, mà n ba a giala pii ǹsɛn man wa,

¹⁹n die n pɛ ǹ nɛ, mà masɛ Dɛnaa Lawa n kɛ pii ǹ ni: «Gɔn lɛkoro mɛn bɛ́ Zozɛfu wɔ lɛa, a nɛgiĩ Efrayimu tɔrɔn laanka ǹ tá-kun wole Izirayeli tɔrɔn kɛn gɔn, man die bɛ siɛ ma naa kɔn ka gɔn lɛkoro kɛ nɛ, ǹ mɛn bɛ́ Zudaa tɔrɔn wɔ lɛa. Ma á re ǹ biɛ gɔn lɛkoro goon, ǹ tá re goɛ̃ goon ma gɔn.»

²⁰N bɛ́ re sɛ́wɔ kiɛ̃ gɔn lɛkoron mɛnɛn lɛn ganaa, ǹ gũ n gɔn, n golee min tumaa yɔrɔ-a ǹ yɛ.

²¹A pɛ ǹ nɛ, mà masɛ Dɛnaa Lawa n kɛ pii: «Izirayeli minin lɛn nə wo bǎãn mɛnɛn tumaa nɛ, ma á re ka wɛɛ walan ma ka sɔkɔn, ma wusoo ma da ka ka nɛ, kaa gána nɛ.

²²Ma á re ka biɛ tɔrɔ goon lɛa gána lɛ nɛ, Izirayeli gána a kelen kɛn la. Kii goon tá re giɛ̃ ka tumaa mìi la. Ka a re goɛ̃ wɔlɔ paa doo wa, ka a re goɛ̃ niɛ̃-n kɔn gána màn paa doo wa.

²³Kaa dìn kɛn nɛ, kaa sii bɔbɔnɛɛn laanka kaa Lawa bɔlɔ tii siin kɛn nɛ, ka a re ka dinin gɔgɔrɛ koe ka bɛn nɛ doo wa. Ka goã bǎã mɛn tumaa nɛ, ka ń sii baraa lɛ zɛnɛɛ, ma á re ka wɛɛ, ma ka bɔ walan. Ma á re *gɔ̀ boe ka ganaa, ka á re maa zaman biɛ, ma dɔ á re kaa Lawa biɛ.

²⁴ Maa dí-nyali Davida n die giɛ̃ ka tumaa mìi la kii lɛa, ka tumaa lɛduə̃li goon toto lɛa. Ka á re tɔ we a kɔnpɛ ka maa sii yɔrɔ bɔ ǹ boon kɛn nɛ, ka á re maa landa boon kɛn tamaɛ, ka kɔ ǹ lɛ.

²⁵Ma gána mɛn lɛ kɔ maa dí-nyali Zakɔba la, ka digolon nə goã ǹ nə́ giã gána mɛn lɛ nɛ, ka dɔn tá re giɛ̃ a nɛ, kaa nɛnyaanan laanka kaa nɔ̀ɔnɔn nə giã a nɛ, yǎa duduu. Maa dí-nyali Davida á re goɛ̃ kaa nyɛɛnaandɛnaa lɛa, yǎa duduu.

²⁶Ma á re lɛ kɔ kɔn la we ka ka nɛ là nyantoro a paǹ li. Bɛ n die goɛ̃ lɛ kɔ kɔn la lɛa ka laanka masɛ bii yǎa duduu. Ma á re giã ǹ bǎã koe ka la, ma kaa zaman mɔnaa. Ma á re maa giã ǹ bǎã doe ka bii, yǎa duduu.

²⁷ Ma á re goɛ̃ kun ka nɛ. Ma á re kaa Lawa biɛ, ka dɔn tá re maa zaman biɛ.

²⁸Maa giã ǹ bǎã mɛn bɛ́ re goɛ̃ ka bii yǎa duduu, bɛ̀ má bɛ́ dɔ ǹ mɛn waáraa, tɔrɔ kɔsɔn tá re doɛ̃, mà ma din Dɛnaa Lawa n Izirayeli *yoreen koe.»