Read Samo, Southern Eze 39 Bible Online

Eze 39 - Samo, Southern bible

Eze 39

¹Minbuiin a nɛ, maa boo kɛ da Gɔgu wɔ paǹ li, n pɛ mà masɛ Dɛnaa Lawa n kɛ pii: «Mesɛki tɔrɔn laanka Tubaali tɔrɔn nyɛɛnaandɛnaa gole Gɔgu, ma á die n gialaa.

²Ma á re n boe gɔsɛ a lɛ̀gɔn la gɔ́ɔ̃ li ma n baã ma soo n ne, n zia baa Izirayeli a kele yii bǎãn kɛn ganaa.

³Ma á re n dii, yǎa n nə n gɔsɛ a gɔn kɛ boe n sa kɛ ganaa n daɛ. Ma á re n kiɛn kɛn gɔsiɛ n gusin a gɔn ma ǹ kaa.

⁴N din ni, n sɔraasin ni ka zaman mɛn tumaa dɔ bɛ kunun n ni, ka tumaa á re giɛ̃ Izirayeli a kelen kɛn la. Ma á re n gere koe zèwon la, bàan mɛn tumaa bɛ́ siĩ mui, ka don màn babaraan tumaa nɛ.

⁵N tá re giɛ̃ don. Ma din Dɛnaa Lawa n má pɛ, ma din a da ǹ boo ne.

⁶Ma á re tɛ kiɛ Magɔgu gána kɛ laanka tà lɛ-a minin kɛn la, ǹ mɛnɛn bɛ́ taasɛ, mà ǹsɛn tá là nyantoro la. Ǹ tá re doɛ̃ bɛa biikoo li, mà masɛ din nə Dɛnaa Lawa lɛa.

⁷Ma á re ma tɔ a sonborebaa kɛ nyɛɛ maa minin Izirayeli tɔrɔn kɛn bii. Ma a re toɛ ǹ ma tɔ sonbore kɛ ziziɛ̃ doo wa. Bɛa biikoo li kəni, tɔrɔ kɔsɔn tá re doɛ̃, mà ma din nə Dɛnaa Lawa sonbore lɛa, Izirayeli gána nɛ.

⁸Á ke, ma lɛawaa mɛn boo da, á die, á dɔ á nya. Ma din Dɛnaa Lawa a da ǹ boo ne.

⁹Izirayeli tɔrɔn lɛn kiwi minin tá re soe, ǹ ziabaa ǹ mànan kaa kɔn la, ǹ tɛ da ǹ ganaa: goóro bɔnboɛɛnɛn laanka a dadaran nɛ, san laanka kiɛn nɛ, bàbàlan laanka dɔ̀rɔ̀n nɛ. Ǹ tá re tɛ koa ǹ màn yii yǎa lɛ̀ sɔbaa.

¹⁰Ǹ laadoo ba re doe a ganaa ǹ wo gɔn yɔ don wa, ǹ ba re da kuri daã-n wa. A giala, maǹ die tɛ koɛ ka ziabaa ǹ mànan kɛn lɛn nɛ. Min mɛnɛn nə ǹ mànan goa, ǹ tá re bɛn wɔn goɛ, min mɛnɛn nə ǹ mànan si ǹ la, ǹ tá re bɛn wɔn sii ǹ la. Ma din Dɛnaa Lawa a da ǹ boo ne.

¹¹Bɛa biikoo li kəni, ma á re bǎã boe ma koa Gɔgu a bĩ ǹ bǎã lɛa, ǹ die ǹ na a yala fɔ̃ walan Izirayeli gána nɛ, kiɛ̃ wolen nyankɔrɔ basa kɛ nɛ, yìsi mu gole kɛ a lɛ̀giala gɔn la. A bĩ ǹ bǎã lɛ á re kiɛ̃ wolen kurii kiɛ̃ ganaa. Ǹ tá re Gɔgu laanka a sɔraasin tumaa biĩ walan, ǹ bɛa bǎã lɛ bii mà "Gɔgu a zaman a nyankɔrɔ basa".

¹²Izirayeli tɔrɔn lɛn tá re ǹ gere biĩ mui sɔbaa gɔ́ɔ̃ nɛ, màn mɛn bɛ́ toɛ, ǹ *gɔ̀ bɔ ǹ bɔ gána lɛ ganaa.

¹³Zaman lɛ tumaa á re ǹ gere biĩ. Bɛ̀ masɛ maa gugurubaa nyaa ǹ mɛn pinaa, ǹ tumaa foo á re kɔɔ̃n koe. Ma din Dɛnaa Lawa a da ǹ boo ne.

¹⁴Ǹ tá re minin boe ǹ nə ǹ koa a tɔ-a, bɛ̀ mui sɔbaa lɛ kiɛ̃, bɛn nə n bibiə̃ gána lɛ nɛ duduu, geren mɛnɛn bɛ́ tɔn tán, ǹ bɛn goa ǹ nə ǹ bĩ, ǹ gɔ̀ bɔ ǹ bɔ gána lɛ ganaa.

¹⁵Bɛn man die n bibiĩ gána lɛ nɛ ǹ dí lɛa, bɛ̀ ǹ nə́ minbuiin nɛ we yɛ tán, ǹ tii da kɔn la a gienli, màn mɛn bɛ́ toɛ yala-fɔ̃lin lɛn nə yɛ ǹ saa, ǹ bĩ "Gɔgu a zaman a nyankɔrɔ basa" kɛ nɛ.

¹⁶Kiwi goon tá re yii dinin ǹ na a tɔ kɔ "zaman". Gɔ̀ á re n boe a n bɔ gána lɛ ganaa ka bɛa yɔrɔ lɛ nɛ.»

¹⁷ Dɛnaa Lawa wusoo á pɛ ma nɛ: — Minbuiin a nɛ, n too kɔ: «A pɛ bàanan manɛ, màn mɛn tumaa bɛ́ piɛ̃ lon, ka don mànan tumaa nɛ, mà ǹ bɔ bǎã tumaa nɛ ǹ da n lɛ sɔkɔn, *wúlu màn kɛa lɛa ma ń die koe ǹ la, ma bɛ́ re wúlu gole mɛn boe Izirayeli kelen kɛn la. Ǹ tá re siĩ yii walan ǹ baa màn-bii lɛa, ǹ minbuiin nɛ mà mi.

¹⁸Ǹ tá re sɛ̀mɔɔn kɛn siĩ soɛ̃, ǹ kanaa a nyɛɛnaandɛnan kɛn mà mi. Maǹ die goɛ̃ ka sère gɔ̀lɔ̀n bɛ́ lɔn, sère tenən ne, butumun laanka dii gɔ̀lɔ̀n nɛ, ǹ tumaa n ka Basan a tɔɔ nyɔɔnaan kɛn bɛ́ lɔn, bɛ̀ ǹ wúlu bɔ ǹ nɛ.

¹⁹Ma nə ǹ bíi, ma á bɛa wúlu màn kɛ lɛ koe ǹ la. Ǹ tá re siĩ nyɔɔ soɛ̃ ǹ kã, ǹ mà mi, a n tɔ ǹ nɛ.

²⁰Màn bii ǹ bǎã lɛ nɛ, ǹ tá re n dinin toe ka sùin laanka ǹ da baa-a wolen siĩ ni, ka sɔraasin kɛn tumaa siĩ ni. Ma din Dɛnaa Lawa a da ǹ boo ne.

²¹Ma á re ma din a gugurubaa kɛ nyɛɛ tɔrɔn bii. Ma bɛ́ re dɔlɔ mɛn boe tɔrɔn lɛn ganaa man din pàã nyaa nɛ, ǹ tumaa á re bɛ yii.

²²A kũ bɛa pinaa kɛ lɛ ganaa kəni a woo, Izirayeli tɔrɔn lɛn tá re doɛ̃ mà ma din nə Dɛnaa Lawa lɛa.

²³Tɔrɔ kɔsɔn tá re doɛ̃, mà Izirayeli tɔrɔn lɛn sii baraa na á toa, ǹ nə́ woo bɛ̀rɛbaa ǹ bǎã nɛ, a giala, ǹ nə́ ma bɔlɔ tii. Bɛ lɛ na á toa má n yɔrɔ bɔyaa má bɔ ǹ la, má ǹ wɔ ǹ zɔ́ɔn gɔn, ǹ nə́ ǹ tumaa dɛ zia la.

²⁴Bɛ̀ ń yaa má n yɔrɔ bɔyaa má bɔ ǹ la, ǹ gɔgɔrɛbaa ǹ siin lɛn laanka ǹ piã ǹ siin lɛn manɛ má ǹ kũ li.»

²⁵Sɛnɛ, masɛ Dɛnaa Lawa n kɛ pii: «A kũ sisia ganaa, ma á re makara boe Izirayeli minin ganaa, kɛn Zakɔba tɔrɔn lɛa. Ǹ bɛ́ sii mɛn gɔ́ɔ̃ nɛ, ma á re ǹ wɛɛ ma ǹ bɔ bɛ nɛ. Ma a re toɛ min ma tɔ sonbore kɛ puusə kɔ doo wa.

²⁶Ǹ sii baraa mɛn tumaa zɛnaa ma nɛ, ma sìi mɛn da ǹ ganaa bɛ taman yii, ǹ yiri á die boe ka bɛa sìi lɛ nɛ. Ǹ tá re wusii ǹ giã ǹ gána lɛ nɛ ka là nyantoro ne, min kɔn ná a re yii a nyɛ́ɛ da ǹ ganaa wa.

²⁷Bɛ̀ má ǹ waa má ǹ bɔ tɔrɔ kɔsɔn bii, ma á re ǹ soekɔn, ǹ wɔlɔ ń lui ni ǹ zɔ́ɔn kɛn ganaa. Ma á re sii zɛnɛɛ ǹ nɛ tɔrɔ kɔsɔ damata kɛn yii ni, ma ma din a Lawa taãnbaa kɛ nyaa ǹ nɛ.

²⁸Ǹ tá re doɛ̃ bɛa biikoo li kəni, mà ma din nə Dɛnaa, ǹ Lawa lɛa. A laanɛ má ǹ goa má woo ǹ ne tɔrɔ kɔsɔn li, ma á re wusii ma ǹ sɔkɔn ǹ dinin tán la. Ma a re ǹ kɔn din toɛ walan doo wa.

²⁹Ma á re ma din Yiri kɛ koe Izirayeli tɔrɔn la, ma a re n yɔrɔ bɔyɛɛ ma bɔ ǹ la doo wa. Ma din Dɛnaa Lawa a da ǹ boo ne.»