Read Samo, Southern Eze 40 Bible Online

Eze 40 - Samo, Southern bible

Eze 40

¹Wɔa goa a wo bɛ̀rɛbaa ǹ bǎã-n lɛ a lɛ̀ fuəwensoorobaa ǹ wɔ, mui bibinaa a lɛawaa fubaa ǹ wɔ pinaa, bɛ n kɔnpii ka Zeruzalɛmu kiwi kɛa yu lɛ̀ fulusiibaa ǹ wɔ nɛ. A din pinaa taãn lɛ nɛ, Dɛnaa Lawa pàã gisĩ ma la, á ma saa á woo ma-n walan.

² Lawa a sii-nyaa gɔ́ɔ̃ nɛ, má woo ma din yaa Izirayeli gána nɛ. Á ma da kele sasasa goon mìi ni walan, gusin a lɛ̀gɔn la. Mànan mɛnɛn nə goã bɛa kele lɛ a gusin a lɛ̀gɔn la, maǹ ka kiwi kɔn a kionən bɛ́ lɔn.

³ A bɛ́ á woo ma-n walan, ma bɛ́ giɛ, bɛ̀ giĩ goon nə́ ke golee-n kiɛnlɛ-a. A gɔ̀nɔn na á goã tɛ pii ka zan bɛ́ lɔn. Màn kɔn nə́ goã a gɔn ka bòosa biɛ bɛ́ lɔn, kun ka màn zɔɔ̃ ǹ bàlà nɛ.

⁴Giĩ lɛ nə n toa ma ganaa kɛnɛn: «Minbuiin a nɛ, ga doɛ̃, n too dɔ kɔ doɛ̃. Ma bɛ́ re màn mɛn tumaa nyɛɛ n nɛ, n yiri kɔ bɛ li taãn-taãnɛ. A giala, Lawa n giɛ li a sii nyaa n nɛ, bɛ lɛ na á toa á daa ka n nɛ bǎã kɛ lɛ nɛ. N bɛ́ re màn mɛn tumaa yii, n die n bɛ laakalaa Izirayeli tɔrɔn lɛn manɛ.»

⁵ Ma màn mɛn yɛ, bɛ á ke: kungɔn goon na á goã Lawa a kion lɛ lɛnpɛnɛ. Màn zɔɔ̃ ǹ bàlà na á goã giĩ lɛ gɔn, a sasabaa dɔ gùrù yii sɔrɔ. Gùrù yii goon nə́ dɔ santimɛtərə posooro. Á kungɔn lɛ a didimibaa zɔɔ̃, bɛ na á goã bàlà yii goon. Á ná a là a wo lon zɔɔ̃, bɛ dɔ na á goã bàlà yii goon.

⁶Kiɛnlɛ mɛn yɔrɔ bɛ́ dia-n lɛ̀giala gɔn la, giĩ lɛ daa walan, á dii bɛa banbaranan kɛn la. Á kiɛnlɛ mìi lɛ zɔɔ̃, bɛ na á goã bàlà yii goon. Kiɛnlɛ paabaa ǹ wɔ kɛ dɔ na á goã bàlà yii goon.

⁷Bǎã-lɛduə̃lin kion nɛn kɛn, bɛn gogoonmaa a sasabaa na á goã bàlà yii goon, ǹ gɔ́ɔ̃ a golebaa dɔ na á goã bàlà yii goon. Ǹ gɔ́ɔ̃ kuru kɔn-a ǹ kungɔnɔn kɛn didimibaa n gùrù yii sooro. Dàã a kiɛnlɛ mɛn bɛ́ gɔ́ɔ̃ li, bɛa golebaa n gùrù yii goon.

⁸Giĩ lɛ kiɛnlɛ-a ǹ dàã lɛ dɔ gɔ́ɔ̃ zɔ́ɔ̃.

⁹Bɛ na á goã gùrù yii kiwisi. A bìbìn kɛn didimibaa na á goã gùrù yii papaa. Dàã lɛ sɛ a kiɛnlɛ na á goã gɔ́ɔ̃ li.

¹⁰Wɔ ǹ kiɛnlɛ mɛn bɛ́ lɛ̀giala gɔn la, wɔlɔ lɛduə̃ ǹ kion nɛn man nə́ goã bɛ dɔ wàãn li: Kion nɛ sɔɔ n gusin, kion nɛ sɔɔ n gɔsɛ. Kion nɛn lɛn tumaa gɔ́ɔ̃ n goon, ǹ bìbìn dɔn didimibaa n goon.

¹¹Bɛ kio, á wɔ ǹ kiɛnlɛ lɛ zɔɔ̃. A gɔ́ɔ̃ a pəməbaa na á goã gùrù yii fù, a sasabaa na á goã gùrù yii fulusɔɔ.

¹²Kiɛnlɛ-lɛduəlin kion nɛn lɛn yɔrɔ-a ǹ wàã gogoonmaa n gùrù yii sɔsɔrɔ, kungɔnɔn tan ǹ sasabaa n gùrù yii goon.

¹³Kion gɔ́ɔ̃n lɛn yɔrɔ n dia-n kɔn la papaa. A saa gɔ́ɔ̃ goon ganaa, a wo gɔ́ɔ̃ kɔsɔ kɛ yaa, bɛ na á goã gùrù yii fuəwensooro.

¹⁴Bɛ kio, á bìbìn kɛn zɔɔ̃. Bɛn man nə́ goã gùrù yii pɔpɔsɔrɔ. Ǹ bǎã mɛn dɔ ǹ nə́ dàã lɛ lɛnpɛnɛ nɛ, bɛ n kunu bɛa bìbìn lɛn li.

¹⁵A saa dàã li a wɔ ǹ kiɛnlɛ gole kɛ ganaa a wo sumu gɔ́ɔ̃ a wɔ ǹ kiɛnlɛ kɛ yaa dàã lɛ nyɛɛnɛ, bɛ na á goã gùrù yii posooro.

¹⁶Fənɛtərən man kion lɛ lɛnpɛnɛ tɛ̀mɛn nə́ ǹ ganaa, dàã a kigiala gɔnɔn nɛ ka kungɔnɔn mɛnɛn bɛ́ kionən lɛn niɛ̃ kɔn. Ǹ nə́ sèwo da gɔn nyínin zɛnaa kungɔnɔn lɛn ganaa.

¹⁷Bɛ kio, á ma kũ á wɔ ma nɛ kanaa Lawa a kion lɛ a sɔmɔ-n. Ma màn mɛn yɛ, bɛ á ke: Maǹ nə́ sɔmɔ gɔ́ɔ̃ duwəə, kion nɛ pɔsɔɔ na á lɛnpɛnɛ.

¹⁸Banbaran mɛn bɛ́ kiɛnlɛ gogoonmaa nə́ n bɔ la, bɛ n kɔnpii ka kiɛnlɛn lɛn gɔ́ɔ̃ a golebaa nɛ. Bɛa banbaran lɛ la goã tán, á la sumu gɔ́ɔ̃ wɔ kɛ nɛ.

¹⁹Bɛ kio, á saa dàã a wɔ ǹ kiɛnlɛ kɛ ganaa, á zɔɔ̃ yǎa sumu gɔ́ɔ̃ a wɔ ǹ kiɛnlɛ kɛ yɔrɔ-a. Bɛ na á goã gùrù yii paabiɛ. Lɛ̀giala gɔn la wɔ a sii n ka bɛ nɛ. Gɔsɛ a lɛ̀gɔn la wɔ paǹ li,

²⁰kiɛnlɛ mɛn yɔrɔ bɛ́ dia-n walan, n bɔ a nɛ n wo kanaa sɔmɔ gɔ́ɔ̃ nɛ, á bɛa pəməbaa laanka a sasabaa zɔɔ̃.

²¹A bǎã lɛduə̃ ǹ kionən lɛn man sɔrɔ: sɔɔ gusin, sɔɔ gɔsɛ. A bii kuru kɔn-a ǹ kungɔnɔn laanka dàã kɛ nɛ, bɛ tumaa a golebaa n goon ka lɛ̀giala gɔn la a kiɛnlɛ kɛ wɔ nɛ. A sasabaa n gùrù yii posooro, a gɔ́ɔ̃ a golebaa n gùrù yii fuəwensooro.

²²A dàã nɛ, a fənɛtərən ne ka a sèwo da nyínin kɛn nɛ, bɛn sasabaa na á goã goon ka kiɛnlɛ kɛ wɔn nɛ, ǹ mɛn lɛ yɔrɔ bɛ́ dia-n lɛ̀giala la. A dii ǹ bǎã na á goã banbaran sɔbaa. Dàã lɛ na á goã a yɔrɔ-a.

²³Sumu gɔ́ɔ̃ kɛa wɔ ǹ kiɛnlɛn man nə́ goã, goon yɔrɔ n dia-n gɔsɛ a lɛ̀gɔn la a kiɛnlɛ kɛ la, goon dɔ yɔrɔ n dia-n lɛ̀giala gɔn la a kiɛnlɛ kɛ la. A saa kiɛnlɛ lɛ a goon ganaa, a wo a yɔrɔ-a wɔ yaa, giĩ lɛ bɛa bii kɛ zɔɔ̃: a na á goã gùrù yii paabiɛ.

²⁴Bɛ kio, á ma kũ á woo ma nɛ gusin a lɛ̀gɔn la. Ma màn mɛn yɛ walan bɛ á ke: kiɛnlɛ goon na á goã gusin a lɛ̀gɔn la. Á bɛa bìbìn laanka a dàã li zɔɔ̃. Ǹ dɔn sasabaa na á goã goon ka kɛn lɛn wɔ nɛ.

²⁵Fənɛtərən man nə́ goã kiɛnlɛ lɛ laanka dàã lɛ ganaa, ǹ ná a lɛnpɛnɛ. Ǹ dɔn man nə́ goã goon ka fənɛtərə gialakunun kɛn lɛn nɛ, lɛ̀giala laanka gɔsɛ a lɛ̀gɔn la. Ǹ sasabaa na á goã gùrù yii posooro, ǹ gɔ́ɔ̃ a golebaa na á goã gùrù yii fuəwensooro.

²⁶Bɛa kiɛnlɛ lɛ a dii ǹ banbaranan man nə́ goã sɔbaa, dàã lɛ yɔrɔ-a gɔrɔ. Sèwo da nyínin man nə́ goã a bìbìn lɛn paǹan paanan ganaa.

²⁷Sumu gɔ́ɔ̃ lɛ a kiɛnlɛ goã a tan, a yɔrɔ n dia-n gusin a lɛ̀gɔn la. Gusin a lɛ̀gɔn la, a saa kiɛnlɛ lɛ a goon ganaa a wo a yɔrɔ-a wɔ yaa, giĩ lɛ bɛa bii kɛ zɔɔ̃: a na á goã gùrù yii paabiɛ.

²⁸Bɛ kio, giĩ lɛ ma kũ, á bɔ ka gusin a lɛ̀gɔn la a kiɛnlɛ kɛ nɛ, á woo ka ma nɛ kion lɛ a sumu gɔ́ɔ̃ li. Á bɛa kiɛnlɛ lɛ zɔɔ̃, a pəməbaa na á goã goon ka gialakunun lɛn wɔ nɛ.

²⁹A dàã nɛ, a kion gɔ́ɔ̃n nɛ, a bìbìn ni, bɛn lɛn dɔn pəməbaa na á goã goon ka gialakunun kɛn lɛn wɔ nɛ. Fənɛtərən man nə́ goã dàã lɛ ganaa, ǹ ná a lɛnpɛnɛ. Ǹ sasabaa n gùrù yii posooro, ǹ gɔ́ɔ̃ a pəməbaa n gùrù yii fuəwensooro.

³⁰Dàãn man nə́ goã kion lɛ lɛnpɛnɛ. Ǹ sasabaa n gùrù yii fuəwensooro, ǹ gɔ́ɔ̃ a pəməbaa n gùrù yii sooro.

³¹A dàã lɛ a kiɛnlɛ na á goã dia-n kanaa sɔmɔ kɛ la. Sèwo da nyínin man nə́ goã a bìbìn kɛn ganaa. A wɔ ǹ kiɛnlɛ a banbaran na á goã kiwisi.

³²Bɛ kio, á ma kũ á bɔ lɛ̀giala gɔn li, á wɔ ka ma nɛ sumu gɔ́ɔ̃ lɛ nɛ. Á kiɛnlɛ kɛ zɔɔ̃, bɛa pəməbaa na á goã goon ka ǹ miã n nɛ.

³³A kion gɔ́ɔ̃n kɛn nɛ, a bìbìn ni ka a dàã nɛ, bɛn tumaa a pəməbaa na á goã goon ka gialakunun kɛn nɛ. Fənɛtərən man nə́ goã kiɛnlɛ lɛ laanka dàã lɛ ganaa, ǹ ná a lɛnpɛnɛ. Ǹ sasabaa n gùrù yii posooro, ǹ gɔ́ɔ̃ a pəməbaa n gùrù yii fuəwensooro.

³⁴A dàã lɛ a kiɛnlɛ yɔrɔ na á goã dia-n sɔmɔ gɔ́ɔ̃ kɛ la. Sèwo da nyínin man nə́ goã a bìbìn kɛn ganaa, ǹ paǹan paanan li. A dii ǹ banbaran na á goã kiwisi.

³⁵Bɛ kio, á daa ka ma nɛ gɔsɛ a lɛ̀gɔn la, kiɛnlɛ kɛ lɛ-a. Á bɛ zɔɔ̃, a pəməbaa na á goã goon ka gialakunun lɛn wɔ nɛ.

³⁶A kion gɔ́ɔ̃n nɛ, a bìbìn ni, a dàã nɛ ka a fənɛtərən ne, bɛn ná a lɛnpɛnɛ. A sasabaa na á goã gùrù yii posooro, a gɔ́ɔ̃ a pəməbaa na á goã gùrù yii fuəwensooro.

³⁷A dàã a kiɛnlɛ lɛ yɔrɔ na á goã dia-n kanaa a sɔmɔ gɔ́ɔ̃ kɛ la. Sèwo da nyínin man nə́ goã a bìbìn kɛn ganaa, ǹ paǹan paanan li. A dii ǹ banbaranan man nə́ goã kiwisi.

³⁸Kion goon na á goã doa-n dàã lɛ ganaa, a kiɛnlɛ n dia-n gɔsɛ-a lɛ̀gɔn la kiɛnlɛ kɛ la. Maǹ nə́ goã *wúlu màn tiɛ̃n kɛn pii walan.

³⁹Tabalan nə́ goã tán wɔ ǹ kiɛnlɛ lɛ a dàã li. Màn paa na á goã gusin, màn paa na á goã gɔsɛ. Maǹ nə́ goã wúlu màn tiɛ̃ kɛ a tɔɔn dii bɛn la, sii baraa sawaa ǹ wúlu mànan nɛ, ka zɛ̀rɛ si Lawa la ǹ wɔn nɛ.

⁴⁰Gɔsɛ a lɛ̀gɔn la dia-n die kanaa la, tabala màn paa na á goã tán wɔ ǹ kiɛnlɛ kɛ lɛ-a, para goon li. Tabala màn paa dɔ na á goã tán para kɔsɔ li, dia-n woe gɔ́ɔ̃ li, kunu dàã a kiɛnlɛ lɛ ganaa.

⁴¹A kaa kun nə tabala kiwisi, ǹ nə́ goã wúlu mànan lɛn dii la. Tabala sii na á goã wàã goon li, sii na á goã a wàã kɔsɔ kɛ dɔ li.

⁴²Kɔlɔ-sɛlɛɛ tabala màn sii na á goã tán wúlu màn tiɛ̃ wɔn lɛa. Ǹ sasabaa na á goã gùrù yii goon ka talɛɛ, ǹ gɔ́ɔ̃ a pəməbaa na á goã gùrù yii goon ka talɛɛ, ǹ là a wo lon na á goã gùrù yii goon. Ǹ bɛ́ ǹ nə́ goã wúlu màn tiɛ̃ laanka sii baraa sawaa ǹ wúlu kɛa tɔɔn zɛnɛɛ ka mànan mɛnɛn nɛ, maǹ nə́ goã bɛn kiɛ bɛa tabalan lɛn lalan.

⁴³Tabalan lɛn lɛkoron li, ǹ nə́ nyankɔrɔ bɔ ǹ nə́ ǹ lɛnpɛnɛ nɛ. Bɛa nyankɔrɔ lɛ a pəməbaa á doe gɔn tìsì li. Maǹ nə́ goã wúlu mànan siĩ kiɛ bɛa tabalan lɛn lalan.

⁴⁴Bɛ̀ ń sumu gɔ́ɔ̃ a kiɛnlɛ kɛ na, ń wɔ sumu lɛ gɔ́ɔ̃ nɛ, kion nɛ màn paa n sumu lɛ gɔ́ɔ̃ nɛ, loe-lɔlen wɔ lɛa. Goon nə gɔsɛ wɔ ǹ kiɛnlɛ a wàã ganaa a yɔrɔ n dia-n gusin a lɛ̀gɔn la, goon dɔ n gusin wɔ ǹ kiɛnlɛ lɛ a wàã ganaa, a yɔrɔ n dia-n gɔsɛ a lɛ̀gɔn la.

⁴⁵Giĩ lɛ tɔ́n nə n toa ma ganaa: Kion nɛ lɛ a ke a yɔrɔ n dia-n gusin a lɛ̀gɔn la, Lawa a wúlu-bɔlen wɔ n ka bɛ nɛ, ǹ mɛnɛn bɛ́ kion lɛ a dí nyɛɛ.

⁴⁶Kion nɛ lɛ a ke a yɔrɔ n dia-n gɔsɛ a lɛ̀gɔn la, Lawa a wúlu-bɔlen wɔ n ka bɛ nɛ, ǹ mɛnɛn bɛ́ *wúlu bɔ ǹ bǎã kɛa dí nyɛɛ. *Levii tɔrɔn bii, Sadɔki tɔrɔn kɛn dininsɔɔ̃nɔn man boe la, ǹ golee Dɛnaa Lawa yɔrɔ-a ǹ dí nya nɛ.bb

⁴⁷Giĩ lɛ sumu gɔ́ɔ̃ lɛ zɔɔ̃: A sasabaa na á goã gùrù yii paabiɛ, a gɔ́ɔ̃ a pəməbaa dɔ na á goã gùrù yii paabiɛ. A wàã sii na á goã zɛnɛɛ-n kɔnlɛ. Wúlu bɔ ǹ bǎã lɛ na á goã kion lɛ nyɛɛnɛ.

⁴⁸Á ma kũ á wɔ ka ma nɛ kion lɛ a dàã li. Bìbìn mɛnɛn bɛ́ a nɛ, á bɛn zɔɔ̃. A wàã goon wɔ n gùrù yii sooro, wàã goon kɛ dɔ wɔ n gùrù yii sooro. Kiɛnlɛ lɛ a pəməbaa na á goã gùrù yii sɔɔ wàã goon li, gùrù yii sɔɔ wàã kɔsɔ kɛ dɔ li.

⁴⁹Dàã lɛ a sasabaa na á goã gùrù yii fuə, a gɔ́ɔ̃ a pəməbaa na á goã gùrù yii fulupaa. Banbaranan man nə́ goã a ganaa, a dii ǹ bǎã lɛa. Bìbì màn paa kɔsɔ na á goã kiɛnlɛ-a wɔn kɛn li, goon nə́ wàã kɛ-a, goon kɛ dɔ n wàã kɛ-a.