Read Samo, Southern Eze 42 Bible Online

Eze 42 - Samo, Southern bible

Eze 42

¹Bɛ kio, giĩ lɛ ma kũ á n woe ma nɛ kanaa a sumu gɔ́ɔ̃ kɛ nɛ, á n yɔrɔ dia gɔsɛ a lɛ̀gɔn la. Kionən mɛnɛn bɛ́ bɛa sumu lɛ laanka Lawa a kion lɛ yɔrɔ-a walan, á ma kũ, á wɔ ka ma nɛ bɛn gɔ́ɔ̃ nɛ.

²Kionən mɛnɛn bɛ́ gɔsɛ a lɛ̀gɔn la a kiɛnlɛ lɛ wàãn li, bɛn sasabaa n gùrù yii paabiɛ, ǹ gɔ́ɔ̃ a golebaa n gùrù yii posooro.

³Sumu gɔ́ɔ̃ a gùrù yii fuə kɛ laanka sumu gɔ́ɔ̃ a bìbì kɛ yɔrɔ-a, kiɛ̃ ǹ bǎãn man nə́ goã kɔn mìi ni, sanabolo sɔɔ.

⁴Kiɛ̃ ǹ bǎã goon na á goã kionən lɛn yɔrɔ-a. A golebaa na á goã gùrù yii fù, dia-n woe sumu gɔ́ɔ̃ lɛ la. A sasabaa na á goã gùrù yii paabiɛ. Kionən lɛn wɔ ǹ kiɛnlɛn man nə́ goã gɔsɛ a lɛ̀gɔn la.

⁵Kionən mɛnɛn bɛ́ lon, bɛn gɔ́ɔ̃ goã kikiɛɛrɛ giulun wɔn kɛn laanka bii wɔn kɛn ganaa, a giala, kiɛ̃ ǹ bǎãn lɛn nə́ màn pɔrɔ ǹ ganaa.

⁶Bɛa kionən lɛn kaa kun na á n baa sanabolo màn sɔɔ, bìbìn dɔn nə́ ǹ ba ǹ giulun, ka sumu gɔ́ɔ̃n laanka sɔmɔ gɔ́ɔ̃n a bìbìn kɛn bɛ́ lɔn wa. Bɛ lɛ na á toa ǹ gɔ́ɔ̃ kiɛɛrɛ kɔ á la kionən kɛn wɔ nɛ, a kũ tán wɔn kɛn ganaa, a da bii wɔn kɛn yaa.

⁷Kanaa a sumu kɛ wàã li kungɔn mɛn bɛ́ kionən lɛn waã li, bɛn sasabaa na á goã gùrù yii posooro.

⁸Kionən lɛn dininmaan man gùrù yii posooro. Sɛnɛ, ǹ mɛnɛn bɛ́ dia-n Lawa a kion lɛ din la, bɛn sasabaa na á goã gùrù yii paabiɛ.

⁹Bɛ̀ n tá li n nə n toa sɔmɔ gɔ́ɔ̃ nɛ n da wɔ, wɔ ǹ kiɛnlɛ na á goã a din kionən lɛn giulun, dia-n woe lɛ̀giala la.

¹⁰Kion nɛn nə́ goã sumu gɔ́ɔ̃ a kungɔn kɛ ganaa dia-n woe lɛ̀giala li, ǹ yɔrɔ n dia-n sumu gɔ́ɔ̃ laanka Lawa a kion kɛ la,

¹¹kiɛ̃ ǹ bǎã nə́ ǹ bii. A din yii goon ne, ka kionən kɛn dɔn nɛ gɔsɛ a lɛ̀gɔn la. Ǹ sasabaa laanka ǹ gɔ́ɔ̃ a golebaa nɛ, ǹ dɔ ǹ gɔn nɛ, ǹ wɔ ǹ kiɛnlɛn laanka ǹ soo ǹ kiɛnlɛn nɛ, a din goon ne.

¹²Ǹ kiɛnlɛn lɛn man nə́ goã ka kion nɛn kɛn wɔn bɛ́ lɔn, ǹ mɛnɛn bɛ́ gusin a lɛ̀gɔn la. Kungɔn mɛn bɛ́ n koe Lawa a kion lɛ lɛ, kiɛ̃ ǹ bǎã lɛ a kiɛnlɛ na á goã bɛ yɔrɔ-a, lɛ̀giala gɔn la. Wɔ ǹ bǎã lɛ na á goã ka bɛ lɛ nɛ.

¹³Giĩ lɛ tɔ́n nə n toa ma ganaa: «Kion nɛn mɛnɛn bɛ́ gɔsɛ a lɛ̀gɔn la, ǹ mɛnɛn dɔn bɛ́ gusin a lɛ̀gɔn la, ǹ yɔrɔ n dia nɛ Lawa a kion lɛ la, bɛn man Lawa wɔn lɛa. Sonbore, wúlu-bɔlen mɛnɛn bɛ́ n mɔrɛ Dɛnaa Lawa ganaa, bɛn doamaa nɛ ǹ na a màn sonbore sonboren kɛn bii walan. Màn sonbore sonboren mɛnɛn bɛ́ Lawa wɔn lɛa, a gɔ ǹ màn kɛ nɛ, sii baraa sawaa ǹ wúlu mànan laanka zɛ̀rɛ si Lawa la ǹ wúlu mànan kɛn nɛ, ǹ doamaa nɛ, ǹ nə ǹ tumaa kaa walan. A giala, bǎã sonbore ne.

¹⁴Bɛ̀ wúlu-bɔlen lɛn nə́ wɔ bǎã sonbore kɛ nɛ, bɛ̀ ǹ tá re soe, ǹ mɔnaan mɛnɛn wɔ ǹ nə́ wúlu lɛ bɔ nɛ, ǹ doamaa nɛ ǹ bɛn waa ǹ nə ǹ kaa tán walan. A giala, bɛa mɔnaan lɛn man Lawa a dí nya ǹ wɔn lɛa. Ǹ doamaa nɛ, ǹ mɔnaa kɔsɔn wɔ. Bɛ̀ ǹ nə́ bɛ zɛnaa, bǎã mɛn nə n koa zaman kɛ wɔ lɛa, ǹ tá re boe la ǹ nə n mɔrɔ bɛ-a.»

¹⁵Giĩ lɛ kion lɛ gɔ́ɔ̃ zɔɔ̃ á nya. A bɛ́ á nya, kiɛnlɛ mɛn yɔrɔ bɛ́ dia-n lɛ̀giala gɔn la, á ma kũ, á woo soo ka ma-n walan, á sɔmɔ a kungɔn lɛ zɔɔ̃.

¹⁶Lɛ̀giala gɔn la a kungɔn, á bɛ zɔɔ̃ ka a màn zɔɔ̃ ǹ bàlà lɛ nɛ: bɛ na á goã gùrù yii biɛsooro (500).

¹⁷Gɔsɛ a lɛ̀gɔn la wɔ ke, á bɛ dɔ zɔɔ̃ gùrù yii biɛsooro.

¹⁸Á n bɔyaa a ná a gusin a lɛ̀gɔn la wɔ zɔɔ̃. Bɛ dɔ na á goã gùrù yii biɛsooro.

¹⁹Bɛ kio, á n pɛnɛ a ná a lɛ̀nyɛɛn la wɔ zɔɔ̃, bɛ dɔ na á goã gùrù yii biɛsooro.

²⁰Á gùrù sii lɛ tumaa zɔɔ̃. Ǹ tumaa a sasabaa na á goã goon. A gogoonmaa, gùrù yii biɛsooro. Bǎã mɛn bɛ́ bǎã sonbore lɛa, kungɔn kɛ lɛ na á bɛ laanka bǎã kooro kɛ na kɔn.