Read Samo, Southern Eze 46 Bible Online

Eze 46 - Samo, Southern bible

Eze 46

¹Dɛnaa Lawa a boo n ka kɛ dɔ nɛ: «Sumu gɔ́ɔ̃ a kiɛnlɛ ke a yɔrɔ n dia-n lɛ̀giala la, bɛ doamaa nɛ a goã tiɛ̃ nɛ dí nya ǹ lɛawaa sɔrɔ kɛ tumaa gɔ́ɔ̃ nɛ. Sɛnɛ, *susu ǹ pii laanka mui dii zɔ́n pinaa, ka doamaa nɛ, ka bũ ka da koo.

²Bɛ̀ goledɛnaa lɛ á boe kanaa die, a doamaa nɛ a wɔ ka dàã a kiɛnlɛ kɛ nɛ, a wo n naa kiɛnlɛ lɛ a gɔnɔn ganaa. Bɛ kio, wúlu-bɔlen lɛn na a *wúlu màn tiɛ̃ laanka a barka da Lawa nɛ ǹ wúlu mànan kɔ Lawa la. Bɛ kio, goledɛnaa lɛ nə n zuməə tán kiɛnlɛ lɛ baãbii a tɔn soo. Sɛnɛ, kiɛnlɛ lɛ n die goɛ̃ koo miɛ̃, yǎa wasamiɛ̃nɛ.

³Susu ǹ piin laanka mui dii zɔ́nɔn pinaa, Lawa a zaman gialakun kɛ tumaa kaa tán Dɛnaa Lawa yɔrɔ-a bɛa kiɛnlɛ lɛ lɛ-a.

⁴Goledɛnaa lɛ doamaa bɛ́ nɛ a mànan mɛnɛn dɛ wúlu màn tiɛ̃ lɛa, susu ǹ pii pinaa, sère nɛ sɔrɔ laanka sère gɔ̀lɔ̀ goon ne, wɔ̀lɔ̀ ná a ba ǹ ganaa wa.

⁵A die a *belee kilo pɔsɔɔ ti sère gɔ̀lɔ̀ gogoonmaa ganaa a da nɛ. A din bɛ́ li a belee mɛn ti sère nɛn lɛn ganaa, a bɛ ti ǹ ganaa. A die a nyɔɔ litiri sɔrɔ kaa belee kilo pɔpɔsɔɔ li.

⁶Mui dii zɔ́n pinaa, ǹ doamaa nɛ ǹ dii gɔ̀lɔ̀ goon dɛ, sère nɛ sɔrɔ laanka sère gɔ̀lɔ̀ goon ne, wɔ̀lɔ̀ ná a ba ǹ kɔn ganaa wa.

⁷Goledɛnaa lɛ die a belee kilo pɔsɔɔ ti dii gɔ̀lɔ̀ gogoonmaa laanka sère gɔ̀lɔ̀ gogoonmaa ganaa, Lawa gɔ ǹ wɔ lɛa. Sère nɛn kɛn wɔ paǹ li, bɛ̀ a gɔn kaa belee mɛn lɛ, a bɛ ti ǹ ganaa. A die a nyɔɔ litiri sɔrɔ kaa belee kilo pɔpɔsɔɔ li.

⁸Bɛ̀ goledɛnaa lɛ á die we kion lɛ nɛ, a wɔ ka dàã li a kiɛnlɛ kɛ nɛ, a wusoo a soo ka a din lɛ nɛ.

⁹Sɛnɛ, zaman lɛ a gialakun ke, bɛ̀ bɛn nə́ daa zɔ́n biikoon li, ǹ mɛnɛn bɛ́ re we ka gɔsɛ a lɛ̀gɔn la a wɔ ǹ kiɛnlɛ kɛ nɛ ǹ Dɛnaa Lawa guguru kɔ, bɛn die ǹ soo ka gusin a lɛ̀gɔn la a kiɛnlɛ kɛ nɛ. Min mɛnɛn dɔn bɛ́ re we ka gusin a lɛ̀gɔn la a kiɛnlɛ kɛ nɛ, bɛn die ǹ soo ka gɔsɛ a lɛ̀gɔn la wɔ kɛ nɛ. Bɛ̀ min mɛn wɔ ka kiɛnlɛ mɛn nɛ, ǹ dɛnaa nyan wusoo a soo ka bɛ-n wa. Kiɛnlɛ kɔsɔ mɛn yɔrɔ bɛ́ dia-n la, a soo ka bɛ nɛ.

¹⁰Goledɛnaa lɛ dɔ n die we kun ka zaman lɛ nɛ, bɛ̀ ǹ tá soe ǹ mɛn waáraa, a dɔ soo kunun ǹ ni.

¹¹Zɔ́n pinaan laanka lɛawaa dadaran nɛ, ǹ bɛ́ re dii gɔ̀lɔ̀ hinlaa sère gɔ̀lɔ̀ mɛn biɛ wúlu màn lɛa, ǹ *belee kilo pɔsɔɔ ti bɛ ganaa, Lawa gɔ ǹ wɔ lɛa. A din bɛ́ li a belee mɛn ti sère nɛn lɛn ganaa, a bɛ ti ǹ ganaa. A die a nyɔɔ litiri sɔrɔ kaa belee kilo pɔpɔsɔɔ li.

¹²Bɛ̀ goledɛnaa din tá li a Dɛnaa Lawa gɔ ka màn mɛn nɛ, ta wúlu màn tiɛ̃ nɛ hinlaa ta zɔ́ɔ da Lawa nɛ ǹ wúlu màn nɛ, kiɛnlɛ mɛn yɔrɔ bɛ́ dia-n lɛ̀giala la, ǹ bɛ bũ, a na a wúlu màn tiɛ̃ laanka a zɔ́ɔ da Lawa nɛ ǹ wúlu lɛ bɔ, ka a bɛ́ zɛnɛɛ susu ǹ pii pinaa lɔn. Bɛ̀ á nya á soo, ǹ tɔn kiɛnlɛ lɛ kũ ǹ tã a kio.

¹³Lɛ̀ goon sère nɛ mɛn bɛ́ wɔ̀lɔ̀ ná a ba a ganaa wa, ǹ die ǹ bɛ kɔ Dɛnaa Lawa la, wúlu màn tiɛ̃ lɛa baraabaraa. Bɛa wúlu lɛ nə n boe baayɛlɛ baayɛlɛ.

¹⁴Baraabaraa baayɛlɛ dɔn, ǹ wùsu kilo sooro lɔlɔkɔn ka nyɔɔ litiri paa nɛ, ǹ bɛ kɔ Dɛnaa Lawa la. Dɛnaa Lawa gɔ ǹ wɔ n ka bɛ nɛ, ǹ die ǹ bɛ zɛnaa miɛ̃ duduu.

¹⁵Sère nɛ kɛ nɛ, ka wùsu lɛ laanka nyɔɔ lɛ nɛ, ǹ doamaa nɛ ǹ bɛ kɔ Dɛnaa Lawa la wúlu màn tiɛ̃ lɛa, baraabaraa baayɛlɛ. Bɛ nə n zɛnaa miɛ̃ duduu.»

¹⁶Dɛnaa Lawa màn mɛn pɛ, bɛ n ka kɛ nɛ: «Bɛ̀ goledɛnaa lɛ ná a bǎã pɔrɔ á kɔ a nɛ mɛn la, bɛa bǎã lɛ n goɛ̃ bɛa nɛ lɛ wɔ lɛa. Bǎã lɛ n goɛ̃ a nɛ lɛ a yɛ ǹ nɛnyaanan wɔ lɛa, a dɛnaabaa dɔ a tɔrɔn ganaa miɛ̃ a woo.

¹⁷ Bɛ̀ goledɛnaa lɛ ná a dí-nyali mɛn gɔ ka bǎã nɛ, bɛa bǎã lɛ n die goɛ̃ bɛa dí-nyali lɛ wɔ lɛa, yǎa lɛ̀ posooro zɔ́n kɛ doe, a tɔn wusii a goledɛnaa lɛ wɔ biɛ. Goledɛnaa lɛ din bǎã mɛn kuru á kɔ a nɛgiĩn la, bɛ dinsɔɔ̃ n die goɛ̃ bɛn gɔn duduu.

¹⁸Goledɛnaa lɛ doamaa bie a zaman lɛ a min kɔn a bǎã kũ a si la ka pàã-n wa. A bɛ́ re bǎã mɛn koe a nɛnyaanan lɛn la, a doamaa nɛ a bɛ kuru a din wɔ nɛ, màn mɛn bɛ́ toɛ, a zaman lɛ a min kɔn wɔlɔ baran lui a din a bǎã ganaa wa.»

¹⁹Bɛ kio, wɔ ǹ bǎã mɛn bɛ́ gɔsɛ a lɛ̀gɔn la a kiɛnlɛ kɛ li, giĩ lɛ ma kũ á bɔ ka ma nɛ walan, á wɔ ka ma nɛ kion sonbore sonboren kɛn gɔ́ɔ̃ nɛ, ǹ mɛnɛn lɛn bɛ́ Lawa a wúlu-bɔlen wɔ lɛa. Bǎã kɔn na á goã a gɔ́ɔ̃ li, lɛ̀nyɛɛn gɔn la.

²⁰Á tɔ́n pɛ ma nɛ: «Ǹ bɛ́ re sii baraa sawaa ǹ wúlu mànan laanka zɛ̀rɛ si Lawa la ǹ wúlu mànan mɛnɛn dii, wúlu-bɔlen lɛn doamaa nɛ, ǹ nə ǹ kɔrɛ kanaa, ǹ Lawa gɔ ǹ mànan kɛn dɔn tã. Ǹ zɛnaa miɛ̃ màn mɛn bɛ́ toɛ ǹ baran wo ka màn kɔn nɛ sɔmɔ gɔ́ɔ̃ kɛ nɛ, ǹ sii saa ǹ kaa zaman lɛ ganaa wa.»

²¹Bɛ kio, á ma kũ á soo ma nɛ sɔmɔ gɔ́ɔ̃ kɛ nɛ, á bɔ ka ma nɛ sɔmɔ gɔ́ɔ̃ lɛ a gùrù sii tumaa ganaa. Sumu gɔ́ɔ̃ bɔnboɛɛn na á goã a gùrù sii lɛ a gogoonmaa ganaa.

²²Sumun mɛnɛn nə goã a gùrù sii lɛ tumaa ganaa, maǹ nə́ goã boɛboɛ: ǹ sasabaa na á goã gùrù yii pusi, ǹ pəməbaa na á goã gùrù yii pɔsɔɔ. A siimaa lɛ tumaa a pəməbaa na á goã goon.

²³Ǹ nə́ kungɔn dɔ ka kɔlɔ nɛ, ǹ nə́ bɛa sumu lɛ a gogoonmaa lɛnpɛnɛ nɛ. Maǹ nə́ goã ǹ nə́ kùsìn doa bɛa kungɔn lɛ ganaa, ǹ ná a lɛnpɛnɛ nɛ.

²⁴Giĩ lɛ tɔ́n pɛ ma nɛ: Kùsin manɛ. Lawa a kion lɛ a dí-nyalin man die zaman lɛ a wúlu mànan siĩ kɔrɛɛ walan.