Read Samo, Southern Eze 48 Bible Online

Eze 48 - Samo, Southern bible

Eze 48

¹Tɔrɔn lɛn tɔn nə́ ke, ka ǹ bǎã giin ni: Dan tɔrɔn wɔ gii n die goɛ̃ gɔsɛ a lɛ̀gɔn la gɔ́ɔ̃ li, zii kɛ lɛkoro-a boe Etilɔn kiwi, a wo Lebo-Amaati kiwi, Hasaara-Enɔn nɛ, a Damaasi gána toa gɔsɛ a lɛ̀gɔn la, kunu Amaati ganaa. A n die siɛ gána lɛ ganaa lɛ̀giala gɔn la, a wo yǎa Yìsi mu gole kɛ ganaa lɛ̀nyɛɛnɛ.

²Dan tɔrɔn wɔ lɛ para li, a saa lɛ̀giala ganaa a wo lɛ̀nyɛɛn yaa, bɛ n Asɛɛrɛ tɔrɔn wɔ lɛa.

³Nɛfutalii tɔrɔn wɔ n Asɛɛrɛ tɔrɔn wɔ para li,

⁴Manaasee tɔrɔn wɔ n Nɛfutalii tɔrɔn wɔ para li,

⁵Efrayimu tɔrɔ wɔ n Manaasee tɔrɔn wɔ para li,

⁶Urubɛn tɔrɔn wɔ n Efrayimu tɔrɔn wɔ para li.

⁷Zudaa tɔrɔn wɔ n Urubɛn tɔrɔn wɔ para li, a saa lɛ̀giala ganaa, a wo lɛ̀nyɛɛn yaa.

⁸Zudaa tɔrɔn bǎã kɛ para li, a saa gèlè kɛ ganaa lɛ̀giala-n, a wo n doa Yìsi mu gole kɛ ganaa lɛ̀nyɛɛnɛ, ǹ die ǹ bǎã kɔn koa, ǹ mɛn a sasabaa bɛ́ re goɛ̃ goon ka tɔrɔn lɛn gogoonmaa wɔ nɛ. Bǎã lɛ a pəməbaa goã gùrù yii duu fuəwensooro (25 000). Lawa a kion lɛ n die goɛ̃ bɛ bii.

⁹Ka bɛ́ re bǎã mɛn kuri ka koa tán Dɛnaa Lawa wɔ lɛa, a sasabaa n die goɛ̃ gùrù yii duu fuəwensooro, a gɔ́ɔ̃ a pəməbaa goã gùrù yii duu fù (10 000).

¹⁰Bǎã lɛ a mɛn bɛ́ re doe Lawa a wúlu-bɔlen kɛn ganaa, a saa lɛ̀giala ganaa, a wo lɛ̀nyɛɛn li yìsi mu kɛ lɛ-a, bɛ n gùrù yii duu fuəwensooro, a saa gɔsɛ a lɛ̀gɔn la ganaa, a wo gusin a lɛ̀gɔn la yaa, bɛ n gùrù yii duu fù. Dɛnaa Lawa a kion lɛ n die goɛ̃ bii.

¹¹Ǹ Sadɔki tɔrɔn mɛnɛn koa Lawa a wúlu-bɔlen lɛa, bɛa bǎã lɛ n die doe bɛn ganaa. Ǹsɛn nə́ Dɛnaa Lawa a dí nya ka bɔlɔgoondɛnaabaa nɛ. Ǹ Lawa toa walan ka *Levii tɔrɔn kɛn nə́ ke ǹ nə́ zɛnaa lɔn, Izirayeli tɔrɔn Lawa bɔlɔ tii kɛa biikoo li wa.

¹²Bɛ lɛ nɛ, ǹ bǎã mɛn lɛ kuru gána lɛ nɛ, ǹ nə́ koa tán Lawa wɔ lɛa, kunu Levii tɔrɔn bǎã kɛ ganaa, bɛ lɛ n doe ǹ ganaa.

¹³Levii tɔrɔn kɛn, ǹ bǎã a pəməbaa doamaa nɛ a goã goon ka Lawa a wúlu-bɔlen kɛn wɔ nɛ. A sasabaa doamaa nɛ a goã gùrù yii duu fuəwensooro, a gɔ́ɔ̃ a pəməbaa goã gùrù yii duu fù.

¹⁴Bɛa bǎã lɛ kɔn ba n siɛ̃ wa, a lon ba n koe wa, a ba n koe min dɔ la wa. A giala a din nə gána lɛa bǎã sonbore lɛa, a na á n kɔ Dɛnaa Lawa la.

¹⁵Ǹ bǎã mɛn lɛ kuru ǹ nə́ koa tán, gùrù yii duusooro (5 000) tá gùrù yii duu fuəwensooro lɛ la, a sasabaa li. Bɛ n die goɛ̃ kiwi lɛ a bǎã kooro lɛa, kionən dɔ ǹ bǎã laanka tɔɔn buu sɔ̃ ǹ bǎã lɛa, kiwi lɛ din nə́ bii.

¹⁶A gùrùn lɛn tumaa a sasabaa n die goɛ̃ gùrù yii duu sii ka biɛsooro (4 500), gɔsɛ a lɛ̀gɔn la, gusin a lɛ̀gɔn la, lɛ̀giala laanka lɛ̀nyɛɛn nɛ.

¹⁷Bǎã kooro mɛn bɛ́ re n toɛ walan, á n kiwi lɛ lɛnpɛnɛ a wàã sii tumaa li, bɛa pəməbaa n die goɛ̃ gùrù yii biɛpaa ka posooro (250).

¹⁸Ǹ bǎã mɛn lɛ koa Dɛnaa Lawa wɔ lɛa, bǎã kɔn nə die goɛ̃ a tan gùrù yii duu fù a lɛ̀giala gɔn la, gùrù yii duu fù a lɛ̀nyɛɛn gɔn la. Ǹ tá re màn-bii boe bɛ lɛ nɛ, ǹ kiwi lɛ a dí-nyalin too ne.

¹⁹Bɛa bǎã lɛ a dí-nyalin man die boe Izirayeli tɔrɔn lɛn bii.

²⁰Ǹ bǎã mɛn koa Dɛnaa Lawa wɔ lɛa, wàã sii zɛnɛ kɔnlɛ nɛ, a gogoonmaa n gùrù yii duu fuəwensooro. Bɛ lɛ a talakɔn sii goon nə die kiwi lɛ a giã ǹ bǎã biɛ.

²¹Gialakun kɛ n die goledɛnaa wɔ biɛ. Bǎã mɛn nə n koa Dɛnaa Lawa wɔ lɛa, ka ǹ mɛn dɔ bɛ́ kiwi lɛ din a giã ǹ bǎã lɛa, goledɛnaa lɛ wɔ gii doamaa nɛ a n bɔ ǹ paanan nɛ. A n die goɛ̃ bǎã gialakunun kɛn lɛn para li, a sasabaa n gùrù yii duu fuəwensooro, a wo yǎa lɛ̀giala gɔn la a gèlè kɛ ganaa. Lɛ̀nyɛɛn gɔn la, a sasabaa n gùrù yii duu fuəwensooro, a n woe yǎa Yìsi mu gole kɛ lɛ dan ganaa. Bǎã mɛn nə n koa Dɛnaa Lawa wɔ lɛa, ka a kion sonbore kɛa dɔ ǹ bǎã nɛ, bɛn man die goɛ̃ gána lɛ a bǎã kuru a koa tán wole lɛ bii.

²²Levii tɔrɔn kɛn bǎã laanka kiwi lɛ a giã ǹ bǎã nɛ, bɛn man die goledɛnaa lɛ a bǎã lɛ niɛ̃ kɔn paa, a paǹ goon nə́ Zudaa tɔrɔn bǎã nɛ gɔsɛ a lɛ̀gɔn la, a goon kɛ n Bɛnzamɛn tɔrɔn bǎã nɛ gusin a lɛ̀gɔn la.

²³Tɔrɔ gialakunun kɛn dɔn bǎãn giin man ka kɛn nɛ: Bɛnzamɛn tɔrɔn kɛn gii n die siɛ lɛ̀giala gɔn la a gèlè kɛ ganaa, a wo yǎa Yìsi mu gole kɛ lɛ-a lɛ̀nyɛɛnɛ.

²⁴Simiɔn tɔrɔn kɛn gii n die goɛ̃ Bɛnzamɛn tɔrɔn wɔ para li, a saa lɛ̀giala ganaa, a wo lɛ̀nyɛɛn yaa.

²⁵Isakaara tɔrɔn wɔ n die goɛ̃ Simiɔn tɔrɔn wɔ para li,

²⁶Zabulɔn tɔrɔn wɔ goã Isakaara tɔrɔn wɔ para li,

²⁷Gaadi tɔrɔn wɔ goã Zabulɔn tɔrɔn wɔ para li, a saa a din lɛ̀giala lɛ ganaa, a wo kaa lɛ̀nyɛɛn lɛ.

²⁸Gaadi kiwi a gusin a lɛ̀gɔn la gèlè n die goɛ̃ gána lɛ gèlè lɛa. A n die n toɛ Tamaara kiwi lɛ̀giala-n, a wo Meribaa tà kɛ lɛ-a Kadɛsi kiwi, bɛ kio, a kɔ Ezipti a lɛ̀giala tà kɛ gɔ̀nɔn lɛ, a wo yǎa Yìsi mu gole kɛ lɛ-a.

²⁹Ka gána lɛ gii Izirayeli tɔrɔn lɛn bii ka bɛa yɔrɔ lɛ nɛ, ka didie wɔ gii kɔ la. Ma din Dɛnaa Lawa a da ǹ boo ne.

³⁰ Kiwi lɛ a wɔ ǹ kiɛnlɛn man ka kɛn nɛ. Izirayeli tɔrɔn lɛn gogoonmaa tɔ n die goɛ̃ kiɛnlɛ lɛ a gogoonmaa ganaa. Kungɔn ke gɔsɛ a lɛ̀gɔn la a sasabaa n gùrù yii duu sii ka biɛsooro, kiɛnlɛ sɔɔ n die goɛ̃ bɛ ganaa: Urubɛn a kiɛnlɛ nɛ, Zudaa wɔ nɛ ka Levii wɔ nɛ.

³²Kungɔn goon dɔ á re goɛ̃ lɛ̀giala gɔn la, a sasabaa n gùrù yii duu sii ka biɛsooro. Kiɛnlɛ sɔɔ n die goɛ̃ bɛ dɔ ganaa: Zozɛfu a kiɛnlɛ nɛ, Bɛnzamɛn wɔ nɛ, ka Dan wɔ nɛ.

³³Kungɔn lɛ a mɛn dɔ bɛ́ re goɛ̃ gusin a lɛ̀gɔn la, bɛ dɔ a sasabaa n gùrù yii duu sii ka biɛsooro. Kiɛnlɛ màn sɔɔ n bɛ dɔ ganaa: Simiɔn a kiɛnlɛ nɛ, Isakaara wɔ nɛ, ka Zabulɔn wɔ nɛ.

³⁴Kungɔn mɛn dɔ bɛ́ re goɛ̃ lɛ̀nyɛɛnɛ, bɛ dɔ a sasabaa n die goɛ̃ gùrù yii duu sii ka biɛsooro. Kiɛnlɛ sɔɔ n die goɛ̃ bɛ dɔ ganaa: Gaadi a kiɛnlɛ nɛ, Asɛɛrɛ wɔ nɛ, ka Nɛfutalii wɔ nɛ.

³⁵Kungɔn mɛn bɛ́ re kiwi lɛ lɛnpɛnɛ, a sasabaa n die goɛ̃ gùrù yii duu fulukiwisi (18 000). A kũ bɛa pinaa lɛ ganaa, kiwi lɛ tɔ n die goɛ̃ ka kɛ nɛ: "Dɛnaa Lawa tá kànaa".