Read Samo, Southern Eze 8 Bible Online

Eze 8 - Samo, Southern bible

Eze 8

¹Wo bɛ̀rɛbaa ǹ bǎã-n lɛ a lɛ̀ sɔrɔbaa ǹ wɔ, a mui sɔrɔbaa ǹ wɔ a lɛawaa soorobaa ǹ wɔ pinaa, man má goã giã-n tán maa kion, Zudaa gána a min golen sii yɔrɔ-bɔlen kɛn nə́ giã-n tán ma yɔrɔ-a. Bɛa biikoo li, Dɛnaa Lawa pàã gisĩ ma la walan.

² Ma bɛ́ giɛ, bɛ̀ màn kɔn nə́ ke ka minbuiin nɛ bɛ́ lɔn. A kũ a bɔsɔ̃ bǎã ganaa a da tán, bɛ na á goã tɛ lɛa. A kũ a bɔsɔ̃ bǎã lɛ ganaa a wo lon, bɛ na á goã tɛ pii ka zan bɛ́ lɔn.

³Á màn kɔn dia ma la ka gɔn bɛ́ lɔn, á ma kũ ma mìi ka ganaa. Bɛ kio, Lawa a sii-nyaa gɔ́ɔ̃ nɛ, Lawa yiri ma saa lon, á woo ma nɛ Zeruzalɛmu. Wɔ ǹ kiɛnlɛ mɛn bɛ́ gɔ́ɔ̃ li, a yɔrɔ n dia-n gɔsɛ a lɛ̀gɔn la, a na á ma da tán walan. Ga Lawa lɛ li ǹ dì kɛ dɔ na á goã walan, Lawa bɛ́ a goã lɛ koe ǹ mɛn lɛ ganaa duduu wa.

⁴ Á ke, Izirayeli minin Lawa kɛ a siĩnbaa na á goã walan, kɔnboe ka sii-nyaa kɛ nɛ má goã má yɛ nyankɔrɔ basa kɛ nɛ.

⁵Dɛnaa Lawa tɔ́n pɛ ma nɛ: «Nsɛ minbuiin a nɛ, n yii saa lon, n nə n yɔrɔ dia gɔsɛ a lɛ̀gɔn la.» Má n yii saa lon, má n yɔrɔ dia gɔsɛ a lɛ̀gɔn la, bɛ̀ ga Lawa lɛ li ǹ dì kɛ á ke *wúlu bɔ ǹ bǎã kɛa wɔ ǹ kiɛnlɛ-a, gɔsɛ a lɛ̀gɔn la.

⁶Á wusoo á pɛ ma nɛ: «Nsɛ minbuiin a nɛ, ǹ bɛ́ dí mɛn nyɛɛ, n yii tá a ganaa? Izirayeli tɔrɔn lɛn man sii bɔbɔnɛɛ dadaran zɛnɛɛ kànaa, màn mɛn bɛ́ toɛ, masɛ soo man bɔ maa kion sonbore kɛ nɛ. N tá re sii bɔbɔnɛɛ dadara kɔsɔn dɔn dinin yii.»

⁷Bɛ kio, á ma kũ á woo ma-n sumu gɔ́ɔ̃ kiɛnlɛ kɛ lɛ-a kanaa. Ma bɛ́ giɛ, bɛ̀ yala á ke kungɔn ganaa.

⁸Á tɔ́n pɛ ma nɛ: «Nsɛ minbuiin a nɛ, kungɔn lɛ fɔ̃ a woo.» Má fɔ̃ á woo, wɔ ǹ bǎã yɛ kungɔn lɛ ganaa.

⁹Á tɔ́n pɛ ma nɛ: «Minin kɛn bɛ́ sii baraa bɔbɔnɛɛ mɛn zɛnɛɛ kànaa, wɔ n ga a ganaa.»

¹⁰Má wɔ, má ga. Ma màn mɛn yɛ, bɛ n ka kɛ nɛ: Màn nɔ̀ giɛɛraa tán wolen kɛn tɔrɔ tumaa nyín ni, tɔɔ gɔ̀dɛnan kɛn tumaa wɔ nɛ ka Izirayeli tɔrɔn kɛn dìn tumaa nyín ni, ǹ nə́ zɛnaa kungɔn lɛ ganaa, ǹ ná a lɛnpɛnɛ nɛ.

¹¹Izirayeli tɔrɔn lɛn *min gole sii yɔrɔ-bɔle pɔsɔbaa na á goã golee-n bɛa màn nyínin lɛn yɔrɔ-a, Safã a nɛgiĩ Yazanyawuu kɛ n kunun ǹ ni, didie a nyɔɔ gìĩ kɔɔ̃n tã ǹ màn ná a gɔn. Da yon gìĩ kɔɔ̃n kɛa tɛmaa na á goã yui lon ka labara bɛ́ lɔn[2].

¹²Dɛnaa Lawa tɔ́n pɛ ma nɛ: «Nsɛ minbuiin a nɛ, Izirayeli tɔrɔn lɛn min golen bɛ́ sii mɛn zɛnɛɛ wɔlɔ tì li, n yii tá a ganaa ke? Didie na a dì kion. A giala, maǹ pii mà Dɛnaa Lawa yii ba ǹsɛn ganaa wa, mà Dɛnaa Lawa gána lɛ din toa walan.»

¹³Á tɔ́n pɛ ma nɛ: «N tá re wusii doo n sii bɔbɔnɛɛ dadara kɔsɔn yɛ, ǹ ná a gialaa zɛnɛɛ.»

¹⁴Dɛnaa Lawa a kion kɛ a wɔ ǹ kiɛnlɛ mɛn bɛ́ gɔsɛ a lɛ̀gɔn la, á ma kũ á woo ma-n walan. Má bɛ giɛ bɛ lɔn nə́ ke giã-n tán walan, ǹ nə́ Tamuuzu[3] a gɛ̀ wuu pii.

¹⁵Á tɔ́n pɛ ma nɛ: «Minbuiin a nɛ, táa n kɛ yɛ? N tá re sii bɔbɔnɛɛ kɔsɔn yii doo, ǹ nə́ dadara ǹ nə́ la kɛn manɛ.»

¹⁶Bɛ kio, á n bɔyaa ma nɛ, á woo Lawa a kion lɛ a sumu gɔ́ɔ̃ nɛ. Ma bɛ́ Lawa a kion lɛ a wɔ ǹ kiɛnlɛ-a, bɛ̀ giĩ fuəwensooro á ke golee-n siã kɛ laanka wúlu bɔ ǹ bǎã kɛ bii, ǹ nə́ n dɔ̀ɔ̃ wɔ Dɛnaa Lawa a kion lɛ din ni, ǹ nə́ n yɔrɔ dia lɛ̀giala li, bɛ̀ ǹ kaa tán bɛ̀ ǹ wasa guguru kɔ.

¹⁷Á wusoo á pɛ ma nɛ: «Nsɛ minbuiin a nɛ, táa n yɛ? Zudaa tɔrɔn bɛ́ sii bɔbɔnɛɛn mɛnɛn zɛnɛɛ kànaa, á la yii ni. Sɛnɛ, ǹ ba toɛ bɛ dɔ din li wa. Maǹ gána lɛ gɔ́ɔ̃ piɛ̃ ka kakaarɛbaa ǹ siin ni, ǹ nə́ wusii we ma lon. Ǹ nə́ ke n nyin din koe da luu lɛ[4]!

¹⁸A bɛ́ miɛ̃, ma dɔ n die dɔlɔ boe ǹ ganaa ka ma foo ne. Ǹ makara a die ma kuĩ, ma ǹ toa walan wa. Ta ǹ nə́ n lɛ dɛ ma kio kɔsɛkɔsɛ, masɛ a re n too koe ǹ lon wa.»