Read Samo, Southern Eze 9 Bible Online

Eze 9 - Samo, Southern bible

Eze 9

¹Bɛ kio, má Dɛnaa Lawa lɛ ma lɛ diɛ kɔsɛkɔsɛ á pɛ: «Ka daa, kiwi lɛ a dɔlɔ bɔma-a dɔ. Didie na a basaã kɔ ǹ màn saa a gɔn.»

²Má tɔ́n giĩ sɔrɔ yɛ ǹ nə́ soo Lawa a kion gɔ́ɔ̃ li a kiɛnlɛ kɛ nɛ, ǹ mɛn lɛ yɔrɔ bɛ́ dia-n gɔsɛ a lɛ̀gɔn la. Didie a basaã kɔ ǹ màn na á goã a gɔn. Giĩ goon ná a goã ǹ bii ka mɔnaa gole ná a ganaa, sɛ́wɔ-kiɛ̃lin sɛ́wɔ kiɛ̃ ǹ màn kɛ n lɔɔ nɛ a maabɛlɛ ganaa. *Wúlu bɔ ǹ bǎã ke zan lɛa, ǹ nə́ daa, ǹ nə́ golee bɛ genli.

³Izirayeli minin Lawa kɛa siĩnbaa ke á goã lon màn yiikoonaan nyínin kɛn la, á yoo á n bɔ bɛn la, á woo Lawa a kion lɛ a kiɛnlɛ-a. Giĩ kɛ lɛ dɔnkɛ gole ná a ganaa, sɛ́wɔ kiɛ̃ ǹ màn dɔ ná a maabɛlɛ ganaa, Dɛnaa Lawa tɔ́n lɛ dia bɛ la

⁴ á pɛ nɛ: «Kiɛ̃ n nə n bibiə̃ Zeruzalɛmu kiwi lɛ gɔ́ɔ̃ nɛ. Giĩn mɛnɛn bɛ́ gini, ǹ nə́ wuu pii sii bɔbɔnɛɛn kɛn tumaa taman yii minin nə́ zɛnɛɛ kiwi lɛ gɔ́ɔ̃ nɛ, nyaǹ da bɛa giĩn lɛn nyanlɛ ganaa.»

⁵Má Dɛnaa Lawa lɛ ma pii gialakunun kɛn dɔn manɛ: «Ka kiɛ̃ ka kɔ a kio lɛ, ka kiwi minin lɛn dɛ. Ka nyan toa min makara ka kũ, ka toa walan wa.

⁶Min golen ne, giĩ tenən ne, nɛniɛ tenən ne, nɛnyaanan laanka lɔn nɛ, ka ǹ tumaa dɛ lenlen. Sɛnɛ, nyaǹ lɛ bɛ́ min woo min ganaa, ka nyan toa ka n mɔrɔ bɛ-a wa. Ka a giala kɔ maa kion lɛ ganaa.» Min goleen mɛnɛn bɛ́ kiãn lɛa ǹ nə́ goã Lawa a kion lɛ yɔrɔ-a, ǹ ná a giala kɔ ǹ nə́ bɛn dɛ.

⁷Dɛnaa Lawa tɔ́n pɛ ǹ nɛ: «Ka *gɔ̀ da maa kion lɛ ganaa. Ka soo ka wo minbuiin lɛ dɛ, ka a sumu gɔ́ɔ̃ pã nɛ.» Ǹ nə́ soo ǹ nə́ woo minbuiin lɛ dɛ kiwi lɛ gɔ́ɔ̃ nɛ.

⁸Ǹ bɛ́ minbuiin lɛ gialaa dii, ma dinsɔɔ̃-n má goã golee-n bii-a. Má tɔ́n na má kaa tán ma lɛ la má n lɛ dɛ má pɛ: «E, Dɛnaa Lawa! Izirayeli minin mɛnɛn nə la, n nə n die bɛn dii, n nə n foo nyɛɛ Zeruzalɛmu la?»

⁹Á tɔ́n pɛ ma nɛ: — Izirayeli minin laanka Zudaa minin sii baraa lɛ gole kɔ á la yii ni. Kakaarɛbaa gána lɛ pã, mɛnaa kɔn la kiwi lɛ pã. A giala, maǹ pii: «Dɛnaa Lawa gána lɛ toa walan, a yii a màn kɔn ganaa wa.»

¹⁰A bɛ́ miɛ̃, min makara a die ma kuĩ ma bɛ toa walan wa. Masɛ á die kaa zɛnaa ǹ sii lɛ a dɔlɔ diɛ ka mìi ni.

¹¹Bɛa biikoo li giĩ mɛn lɛ goã ka mɔnaa gole ná a ganaa, sɛ́wɔ-kiɛ̃ ǹ màn dɔ ná a maabɛlɛ ganaa, bɛ́ tɔ́n na a nya ǹ dí yɔrɔ nyaa, á pɛ: «N pɛ ma-n lɔn, má zɛnaa miɛ̃.»