Read Samo, Southern Dan 4 Bible Online

Dan 4 - Samo, Southern bible

Dan 4

¹Kii lɛ wusoo á pɛ kɛnɛn: — Masɛ Nebukadenezɔɔrɔ-n má goã maa kion, yii-nyɛɛ la, ma foo yii n kɔɔ̃nɛ maa kii kion kɛ nɛ.

²Ǹ kɔn pinaa tèlò-n, ma bɛ́ nyuù ni, má narɛɛ kɔn wɔ, á nyɛ́ɛ da ma ganaa parsiini. Ma siin mɛnɛn yɛ, ǹ nə́ ma yiri lɔlɔkɔn parsiini.

³Má tɔ́n pɛ máa ǹ *Baabilonii gána a doɛ̃-wɔlen tumaa sɔkɔn maa piɛ, màn mɛn bɛ́ toɛ, ǹ ma a narɛɛ lɛ a binyəə pɛ ma nɛ.

⁴Kɔ́lɔnbaalin nə́ daa, wɔ-kũlin ni, doɛ̃-wɔlen ne ka bòon ne. Ǹ bɛ́ ǹ nə́ wɔ kion, má maa narɛɛ lɛ pɛ ǹ nɛ. Sɛnɛ, ǹ boo la ǹ ná a giala pɛ ma-n wa.

⁵Bɛ kio ne, Danayeli dɔ́ tɔ́n wɔ. A din lɛ nɛ ǹ tá bíi Bɛlsazaara a kɔnpɛ ka maa lawa kɛ tɔ nɛ, lawa sonboren lɛn yiri na á goã a lon. Má narɛɛ lɛ a boo da a yii-n kɛnɛn:

⁶«Kɔ́lɔnbaalin goledɛnaa Bɛlsazaara, ma á doɛ̃, máa lawa sonboren kɛn yiri tá nsɛ lon, sii-durii kɔn ba piɛ̃ n ganaa wa. Ma sii mɛn yɛ maa narɛɛ lɛ gɔ́ɔ̃ nɛ, bɛ pɛ ma nɛ, n na a giala dɔ pɛ ma nɛ.

⁷Ma bɛ́ waa nɛ, ma màn mɛn yɛ, bɛ n ka kɛ nɛ: Máa man giɛ bɛ̀ da goon nə́ ke kanaa lɛ bii, da lɛ a sasabaa miã banban.

⁸Da lɛ gole kɔ, á gegere kɔ, a sasabaa woo yǎa lon a labaran ganaa, ta min nə kanaa lɛ gùrù mɛn-a, a yii na a ganaa.

⁹Da lɛ a luu na á goã siĩni, á goã nɛ koe giãgiã, màn-bii goã yii la min tumaa wɔ lɛa. Don mànan man nə́ goã giɛ̃ a wúlu li, bàanan man nə́ goã ǹ kii doe a gùrùn ganaa, màn tumaa a màn-bii na á goã boe a din lɛ nɛ.

¹⁰Ma bɛ́ waa nɛ, ma màn mɛn yɛ, bɛ n ka kɛ nɛ: Máa man giɛ, bɛ̀ lon a dia dí-a wole sonbore goon nə́ ke, á n toa lon, á gisĩ tán.

¹¹Á paraa ka pã, á pɛ kɛnɛn: Ka da lɛ kuru ka daa, ka a gùrùn bɔbɔ, ka a luu sɔlɔ ka bɔ-a, ka a nɛ pɛsɛ̃, ń giɛ don mànan kɛn tá baa sii ǹ nə n bɔ a giulun, ń giɛ bàanan kɛn tá yui, ǹ nə n bɔ a gùrùn ganaa.

¹²Sɛnɛ, ka a giala piri laanka a gòonən toa tán, a goã tán buu-n don, fɔlɔ laanka zan zɔraka ná a lɛnpɛnɛ! Pele á die n toɛ lon bɛ̀ a na a gɔ̀nɔn basã, buu ke boe tán, á die bɛ soɛ̃ kun ka don mànan nɛ.

¹³A taasiɛ á re n bɔyɛɛ, minbuiinin taasiɛ ná a re yii a lon doo wa, tɔɔn taasiɛ á re n koe la. Á re goɛ̃ bɛ gɔ́ɔ̃ nɛ yǎa lɛ̀ sɔbaa.

¹⁴Bɛa dɔlɔ boo ke, lon na dia wolen man nə́ daa pɛ, boo kɛ lɛ, lon a dia dí-a wolen man nə́ daa pɛ, màn mɛn bɛ́ toɛ, minbuiinin nə dɔ̃, mà Lawa mɛn bɛ́ lon sɔsɔɔ, bɛ n minbuiinin kiibaa mìi la. Bɛ̀ a din tá li mà a kɔ min mɛn la, a n koe bɛ la, a din nə din gisĩi wole siɛ a da kiibaa la.

¹⁵Masɛ kii Nebukadenezɔɔrɔ narɛɛ mɛn wɔ, a din nə ka kɛ nɛ. A bɛ́ màn mɛn giala pii, a nə nsɛ Bɛlsazaara ganaa, n bɛ pɛ ma nɛ. A giala, maa gána lɛ a doɛ̃-wɔlen tumaa bii, min kɔn yɛ, á boo la a ná a giala pɛ ma-n wa. Sɛnɛ, nsɛ á boe la. A giala, lawa sonboren kɛn yiri tá n lon.»

¹⁶Danayeli lɛ ǹ nə́ bíi Bɛlsazaara, kii a boo lɛ nyɛ́ɛ da a ganaa, a ná a yiri din lɔlɔkɔn. Á golee, boo din ba n diɛ la wa. Kii lɛ din tɔ́n pɛ nɛ: «Bɛlsazaara, narɛɛ kɛ laanka a giala baran n yiri lɔlɔkɔn wa.» Bɛlsazaara tɔ́n na a lɛ si á pɛ: — Maa dɛnaagiĩ, toa bɛ̀ narɛɛ lɛ yɔrɔ n dianɛ n zɔ́ɔn la. A bɛ́ sii mɛn giala pii, toa bɛ̀ a yɔrɔ n dianɛ n ziadɛnan la.

¹⁷Ma nə́ n da yɛ, gole, gegere, a sasabaa woo yǎa lon a labaran ganaa, min nə́ n toɛ kanaa paǹ tumaa nɛ a yii ná a ganaa.

¹⁸A luu na á goã siĩni, a nɛ n gigiã, min tumaa goã màn-bii yii la. Don mànan man nə́ goã n susui a wúlu li, bàanan nə́ goã ǹ kii doe a gùrùn la.

¹⁹Kii, bɛa da kɛ lɛ, n din ni! A giala, n dɔ nə n gole kɔ, ń pàã yɛ ka da kɛ lɛ bɛ́ lɔn. N golebaa lɛ nə́ n da wɔlɔ la, á woo yǎa lon, n goledɛnaabaa lɛ woo yǎa kanaa paǹ tumaa ganaa.

²⁰Bɛ kio, n nə n lon a dia dí-a wole sonbore goon yɛ, bɛ nə́ n toa lon, á n gisĩ tán. A na á goã parɛɛ á n pii kɛnɛn: «Ka da lɛ kuru, ka kakã! Sɛnɛ, a giala piri ke, ka bɛ toa tán buu ni don, fɔlɔ laanka zan zɔraka ná a lɛnpɛnɛ. Pele á re boe lon a pã a ganaa, á re buu soɛ̃ kun ka don mànan nɛ, yǎa lɛ̀ sɔbaa.»

²¹Danayeli mà kii ganaa: «Narɛɛ lɛ bɛ́ màn mɛn giala pii, Lawa mɛn bɛ́ lon sɔsɔɔ, bɛ bɛ́ mà màn mɛn, sii mɛn bɛ́ re masɛ a dɛnaagiĩ kii yii, bɛ n ka kɛ nɛ:

²²Ǹ tá re n lui ǹ nə n bɔ minbuiinin bii, n tá re giɛ̃ kun ka don mànan nɛ. N tá re buu soɛ̃ ka dii bɛ́ lɔn, pele á re goɛ̃ bɛ̀ a n gɔ̀nɔn basã. N tá re goɛ̃ bɛ gɔ́ɔ̃ nɛ lɛ̀ sɔbaa, yǎa n doɛ̃, mà Lawa mɛn bɛ́ lon sɔsɔɔ lɛ-n, minbuiinin kiibaa mìi la, a bɛ́ li a kɔ min mɛn la, a n koe bɛ la.

²³Á pɛ dɔn, mà ǹ da lɛ giala piri toa tán. Bɛ giala n ka kɛ nɛ: Bɛ̀ ń dɔ̃ ǹ mɛn waáraa mà lon a Lawa n màn tumaa mìi la, a kiibaa lɛ á re wusii a dɔ n ganaa.

²⁴Kii, maa doree n ka kɛ nɛ, ma á koe n la: N sii baraan kaa, n kɔ peperebaa lɛ, n nə n mɛnaa minin la kɛ dɔ kaa, n makara bɔ doobaan ganaa. Bɛ̀ ń lɛ kɔ ń zɛnaa miɛ̃, kɔntan màn tá tɔn miɛ n yii-nyɛɛ li.»

²⁵Sii lɛ tumaa nə́ n zɛnaa kii Nebukadenezɔɔrɔ nɛ.

²⁶Lɛ̀ goon, boo lɛ a diɛ kio, ǹ kɔn pinaa, a na á goã n gòãn boboe kɔn a kii kion kɛ a kala la Baabilonii gána nɛ.

²⁷Á n toa walan á pɛ: «Baabilonii kiwi gole lɛ á ke! Masɛ din nə má dɔ, maa kiibaa ǹ bǎã lɛa. Bɛ lɛ n die toɛ minin nə dɔ̃ mà pàã gole tá masɛ lon, mà gugurubaa tá masɛ a kiibaa lɛ nɛ.»

²⁸Bɛa boo lɛ din nya a lɛ-n wa, bɛ̀ lɛn goon bɛ́ á bɔ lon á pɛ nɛ: «Kii Nebukadenezɔɔrɔ, man pii n ni, máa kiibaa lɛ nə́ n si n la.

²⁹Ǹ tá re n lui ǹ nə n bɔ minbuiinin bii, n tá re goɛ̃ kun ka don mànan nɛ, n tá re buu soɛ̃ ka dii wɔ bɛ́ lɔn. N tá re goɛ̃ bɛ gɔ́ɔ̃ nɛ lɛ̀ sɔbaa, yǎa n doɛ̃ mà lon a Lawa gole lɛ n minbuiinin kiibaa mìi la, mà a bɛ́ li dɔn a kɔ min mɛn la, mà a n koe bɛa dɛnaa la.»

³⁰A din bǎã-n gɔrɔ, sii lɛ nə́ n zɛnaa Nebukadenezɔɔrɔ nɛ: Ǹ nə́ loo ǹ nə́ bɔ minbuiinin bii, a na á goã buu soɛ̃ ka dii bɛ́ lɔn, pele na á goã a gɔ̀nɔn basɛ̃. A mìi ka pã á sɔsɔrɔ kɔ ka giogialatã-a nyàa ka nɛ, a gòon tɔ́nɔn nə́ n baa sosolo ka bàan gòon tɔ́nɔn bɛ́ lɔn.

³¹Nebukadenezɔɔrɔ pɛ kɛnɛn: — Lɛ̀ sɔbaa lɛ lɛ bɛ́ á pã, masɛ Nebukadenezɔɔrɔ nə́ n yii saa má dia lon ǹ kɔn pinaa, minbuiinin taasiɛ wusoo á wɔ ma nɛ. Lawa mɛn bɛ́ lon sɔsɔɔ, a yii n koo yǎa duduu, má barka da bɛ nɛ. Má a tɔ bɔ, má a guguru kɔ: A giala, a goledɛnaabaa lɛ a nyɛɛ wa, a kiibaa kɛ na a tan yǎa duduu.

³²Kanaa minin tumaa ba màn kɔn lɛa a yɔrɔ-a wa. A din foo sii nə n zɛnɛɛ, lon a dia dí-a wolen laanka kanaa minin wɔ paǹ li. Min kɔn banban, bɛ boo la a na a gɔn kũ, a pɛ nɛ: «Wàa mɛn sii n ka kɛ nɛ n tá zɛnɛɛ?»

³³A din bǎã-n gɔrɔ, minbuiinin taasiɛ wusoo á daa wɔ ma nɛ. Gugurubaa mɛn goã ma lon maa kiibaa lɛ gɔ́ɔ̃ nɛ, zín laanka siĩnbaa mɛn goã ma la, bɛn nə́ wusoo ǹ nə́ n kɔ ma la. Maa yiri kɔmala wolen laanka ma kiodɛnaa dadaran nə́ n nanaa ǹ nə́ daa ga ma li, ǹ nə́ wusoo ǹ nə́ ma koa maa kiibaa la, màn nə́ wusoo á mɛ maa golebaa li, á la lɛlɛ ń wɔ kɛ nɛ.

³⁴Bɛ lɛ na á toa, masɛ Nebukadenezɔɔrɔ á lon a Kii lɛ tɔ boe sisia, ma na a tɔ siɛ lon, man gugurubaa diɛ a tɔ la. A giala, a nya ǹ dí tumaa n siĩni, a zɛnaa ǹ sii tumaa n pepere. Min mɛnɛn bɛ́ din gole kɔ ǹ sii zɛnɛɛ, pàã tá a lon a bɛn gisĩ.