Read Samo, Southern Dan 7 Bible Online

Dan 7 - Samo, Southern bible

Dan 7

¹Baabiloniin kii Bɛltazaara a kiibaa lɛ̀ bibinaa li, Danayeli bɛ́ waa-n tán, á n narɛ, á siin kɔnɔn yɛ. Danayeli bɛa narɛɛ lɛ a boo mìi dadaran kiɛ̃,

²á pɛ: — Ma siin mɛnɛn yɛ maa narɛɛ lɛ gɔ́ɔ̃-n tèlò-n, bɛn man ka kɛn nɛ: piɛ̃ gole na á yoo kanaa a lɛ̀ gùrù sii kɛ tumaa ganaa, á n yìsi mu panapana kɛ gialaa.

³ Tɔɔ màn gangabiɛ sii soo yìsi mu lɛ li, ǹ kɔn ná a goon ka ǹ miã-n wa.

⁴ A bibinaa kɛ n ka yàra bɛ́ lɔn giogialatã-a nyàan ná a lon. Ma bɛ́ giɛ, má yɛ, ǹ ná a nyàan lɛn woɛ̃ ǹ nə́ ǹ bɔ a ganaa, ǹ ná a din kũ ǹ nə́ da lon a gòã paa la, ka minbuiin nɛ bɛ́ lɔn, minbuiinin taasiɛ nə́ n kɔ la.

⁵Bɛ kio, bɛ̀ tɔɔ lɛ a paabaa ǹ wɔ á ke ka gòon màn gole kɔn bɛ́ lɔn. Á yoo á golee a wàã goon la, ka garasa we sɔɔ ná a lɛ-n, a sɔn nə́ ǹ ganaa. Ǹ nə́ tɔ́n pɛ nɛ, mà a yoo a golee lon duduu, a siĩ gigiã sɔ̃.

⁶Ma bɛ́ giɛ, bɛ̀ goon dɔ á ke ka goe bɛ́ lɔn, bàan nyàan ná a dɔ̀ɔ̃ nɛ, màn sii. Tɔɔ lɛ mìi na á goã sii, goledɛnaabaa nə́ n kɔ la.

⁷ Bɛ kio doo, maa tèlò a sii-yɛn lɛn gɔ́ɔ̃ nɛ, ma bɛ́ giɛ, bɛ̀ tɔɔ lɛ a siibaa ǹ wɔ á ke. Bɛa tɔɔ lɛ na á goã nyɛ́ɛ diɛ taãn-taãnɛ, pàã ná a lon á kiɛ̃ a bǎã la. A sɔn man nə́ goã dadara, fɔlɔ lɛa. A na á goã màn soɛ̃ ka bɛn lɛn nɛ, bɛ̀ a tɔtoɛ̃, a tɔtɔrɔ a gialakun la ká a gòãn nɛ. Tɔɔn mɛnɛn tumaa goã ǹ nə́ daa a nyɛɛnɛ, a na á goã tɔtɔ ka bɛn nɛ. Bɛn fù na á goã a ganaa.

⁸ Ma bɛ́ giɛ a bɛnɛn lɛn ganaa, má yɛ bɛ̀ bɛn boɛɛn goon nə́ ke á bɔ ǹ bii, á bɛn bibinaan kɛn màn sɔɔ woɛ̃. Yii nànan man nə́ goã bɛa bɛn boɛɛn lɛ ganaa ka minbuiin nɛ yii nànan bɛ́ lɔn. Lɛ dɔ́ goã a ganaa, á goã din gole kɔ ǹ boon didiɛ nɛ.

⁹ Ma bɛ́ giɛ doo, má kii dankanan yɛ ǹ nə́ ǹ kaa tán, giĩ zizi[1] goon daa giã tán. A mɔnaa na á goã fu piepie ka koara bɛ́ lɔn. A mìi ka na á goã fu paɛ̃paɛ̃ ka sère ka yoreen bɛ́ lɔn. A kii dankan kɛ na á goã ka tɛ n kuĩ a ganaa, a dankan lɛ gòãn man nə́ goã tɛ lɛa girigiri.

¹⁰ Tɛ daa n da wɔlɔ la ka tà mu bɛ́ lɔn, á kũ á daa bɔ a nyɛɛnɛ. Min gigiã na á goã dí nyɛɛ nɛ, min duu damata na á goã golee-n lon a nyɛɛnɛ. Kiri-kurulin nə́ giã tán, ǹ nə́ nya ǹ dín sɛ́wɔn lɛ bũ.

¹¹Man má goã giɛ miɛ̃, a giala, bɛn boɛɛn lɛ na á goã din gole kɔ ǹ boon didiɛ. Sɛnɛ, ma bɛ́ giɛ, má yɛ, ǹ nə́ tɔɔ siibaa ǹ wɔ lɛ dɛ, ǹ nə́ zũ tɛ girigiri ni, á kũ walan lenlen.

¹²Tɔɔ lɛ a gialakunun kɛn, bɛn goledɛnaabaa nə́ n si ǹ la. Màn dɔ nə́ n da ǹ nyin a sasabaa li, bɛ̀ biikoo kɔn baa doe.

¹³ Ma bɛ́ tɔn giɛ, ma màn mɛn yɛ maa tèlò a narɛɛ lɛ gɔ́ɔ̃-n doo, bɛ á ke: Má min yɛ ka min a nɛgiĩ bɛ́ lɔn, a n lon a labaran la die. Á daa yǎa giĩ zizi lɛ li, ǹ nə́ kũ ǹ nə́ daa nɛ a yɔrɔ-a.

¹⁴ Goledɛnaabaa nə́ n kɔ la, gugurubaa nɛ, ka kiibaa nɛ. Tɔrɔ tumaa a minin ni, gána tumaa wɔn nɛ, ka bɔlɔ woo bɔlɔ a pɛlen ne, bɛn man nə́ goã dí nyɛɛ nɛ. A goledɛnaabaa ke, bɛ na a tan yǎa duduu, a re nyɛɛ wa, a kiibaa kɛ a re ziziɛ̃ duduu wa.

¹⁵Masɛ Danayeli, ma yiri nə́ n lɔlɔkɔn, ma siin mɛnɛn yɛ, ǹ nə́ nyɛ́ɛ da ma-a.

¹⁶Min mɛnɛn lɛn nə goã golee-n walan, má tɔ́n nə n zɔ̃ má dɔ bɛn goon li, má nɔ̀n da la ka sii kɛ lɛ tumaa a giala taãn nɛ. Á n lɛ bũ, á siin lɛn giala pɛ ma nɛ kɛnɛn:

¹⁷«Tɔɔ dadaran kɛn lɛn màn sii, bɛ n nyɛɛ, mà kii màn sii á re yui tán.

¹⁸ Bɛ kio, kiibaa lɛ á re doe lon a Lawa gole a zaman ganaa, á re goɛ̃ ǹ gɔn miɛ̃ yǎa duduu.»

¹⁹Tɔɔ lɛ a siibaa ǹ wɔ ke, man má goã giɛ li, ma bɛa sii a woo ǹ bǎã yɛ foaãnɛ. Asɛ laanka gialakunun lɛn man nə́ goã tɔtɔ, á goã nyɛ́ɛ diɛ parsiini. A sɔn man nə́ goã fɔlɔ lɛa, a gòon tɔnɔn nə́ zan lɛa. A na á goã màn soɛ̃, bɛ̀ a tɔtoɛ̃, a tɔtɔrɔ a gialakun la.

²⁰Bɛn fù ke á goã tɔɔ lɛ mìi ni, má nɔ̀n da ka bɛ dɔ a sii ni. Bɛn kɔsɔ mɛn dɔ na a giala kɔ á bɔ, á kɛn lɛn màn sɔɔ nyanaa á kaa, má nɔ̀n da la ka bɛ dɔ a sii ni. Bɛa bɛn lɛ yii nànan man nə́ goã ǹ tan, ka a lɛ nɛ, á goã din gole kɔ ǹ boon didiɛ nɛ. A n ka asɛ na á goã gole, á la ǹ miãn kɛn manɛ.

²¹ Ma bɛ́ giɛ, má bɛa tɔɔ bɛn lɛ yɛ zia biɛ Lawa a minin ganaa, á n die boe ǹ la.

²² Sɛnɛ, giĩ gole zizi lɛ bɛ́ á daa, á sonbore kɔ lon a Lawa gole a minin lɛn la. Biikoo bɛ́ á dɔ, Lawa a minin lɛn nə́ kiibaa lɛ si ǹ nə́ giã la.

²³Ma nɔ̀n da min mɛn la, á wusoo á pɛ ma-n kɛnɛn: «Tɔɔ lɛ a siibaa ǹ wɔ kɛ n boo diɛ kiibaa siibaa ǹ wɔ paǹ li, die die kanaa, tɔtɔ ka kiibaa gialakunun kɛn tumaa nɛ. Bɛ n die kanaa tumaa wɔ̃woɛ̃ kɔn, a pɔpɔsɛ, a tɔtɔrɔ la.

²⁴ Tɔɔ bɛn fù kɛ n nyɛɛ mà kii fù n die yui bɛa pàã lɛ gɔ́ɔ̃ nɛ. Bɛn kio, goon kɔsɔ á re yui, á n tɔtɔ ka gialakunun kɛn lɛn nɛ. Bɛ á re kii sɔɔ dii.

²⁵ Á re boo diɛ lon a Lawa gole kɛ ganaa, a bɔ a minin kɛn yii ni. Á re giɛ li dinin a dí-pɛn laanka zɔ́nɔn biikoon bɔyaa. Lawa a minin lɛn tá re goɛ̃ a gɔn yǎa lɛ̀ sɔɔ ka talɛɛ.

²⁶Bɛ kio kəni, kiri á re n kuri, goledɛnaabaa á re n sii bɛa kii lɛ la, ǹ ziziɛ̃, a nya lenlen.

²⁷ Bɛa biikoo li, kiibaa mɛn tumaa á ke bǎã woo bǎã nɛ kanaa kɛ gɔ́ɔ̃ nɛ, bɛn tá re n koe lon a Lawa gole a minin lɛn la. Ǹsɛn kiibaa lɛ na a tan yǎa duduu, goledɛnan tumaa á re dí nyɛɛ ǹ nɛ, ǹ nə ǹ bɔlɔ si.»

²⁸Boo lɛ a nya ǹ bǎã n ka kɛ nɛ. Siin lɛn nə́ masɛ Danayeli yiri lɔlɔkɔn parsiini, ma gɔ̀nɔn nə́ n si ma la. Sɛnɛ, má bɛa boon lɛn toa ma din gɔ́ɔ̃ nɛ.