Read Samo, Southern Oz 1 Bible Online

Oz 1 - Samo, Southern bible

Oz 1

¹ Kɛ n Dɛnaa Lawa a boo lɛa, á pɛ Beeri a nɛgiĩ Ozee ne, Izirayelin kii Zoasi a nɛgiĩ Zeroboamu a kiibaa biikoo li. A na á kɔnpɛ ka Zudaa gána a kiin kɛn dɔn gogoonmaa a kiibaa biikoo ne: Oziasi wɔ nɛ, Zoatamu wɔ nɛ, ka Ahaazi laanka Ezekiasi wɔ nɛ.

²Dɛnaa Lawa boo mɛn pɛ Ozee ne mà a pɛ a zaman nɛ, bɛa giala kɔ n ka kɛ nɛ. A na á kɛ pɛ Ozee lɛ nɛ: «Lɔ mɛn bɛ́ á n din kɔ kɔrɔbaa la, woo, n bɛ saa n lɔ lɛa, n tá re nɛnyaanan yii a ganaa bɛa kɔrɔbaa lɛ gɔ́ɔ̃ nɛ. A giala, gána lɛ a minin man nə n dinin baa ka lɔ kɔrɔn bɛ́ lɔn, ǹ nə́ n dɔ̀ɔ̃ wɔ masɛ Dɛnaa Lawa nɛ.»

³Bɛ lɛ nɛ Ozee kiɛ̃ á woo Diblayimu a nɛlɔ Gomɛɛrɛ saa a lɔ lɛa. Bɛ́ nɔ̀ si, á nɛgiĩ yɛ la.

⁴ Dɛnaa Lawa tɔ́n kɛ pɛ nɛ: «A tɔ kɔ Zizereyɛli. A giala, Zehu tɔrɔn kɛn nə gɛ̀ mɛn dɛ Zizereyɛli, kànaa ka boɛɛn nɛ, ma á re bɛa gɛ̀ dòo boe ǹ ganaa, ma á re Izirayeli tɔrɔn kɛn gána a kiibaa nyɛɛ.

⁵Ǹ kɔn pinaa, ma á re Izirayeli a ziabaa ǹ pàã kɛ nyɛɛ, Zizereyɛli a nyankɔrɔ lɛ kɛ nɛ.»

⁶Lɔ lɛ wusoo á nɔ̀ si, á nɛlɔ yɛ. Dɛnaa Lawa pɛ Ozee ne: «Bɛ tɔ kɔ "Lo-Urukama", bɛ giala "ma a re makara boe n ganaa wa". A giala, ma a re makara boe Izirayeli tɔrɔn kɛn ganaa doo, ma ǹ sii baraa toa ǹ nɛ wa.

⁷Sɛnɛ, Zudaa minin kɛn, ma á re makara boe bɛn ganaa. Ma din Dɛnaa Lawa nə ǹ Lawa lɛa, ma din nə die ǹ kirisibiɛ. Sɛnɛ, ma bie re ǹ kirisibiɛ ka sa-n wa, gɔya sa bie wa, zia bie wa, sùin bie wa, sùi da-baalin bie wa.»

⁸Gomɛɛrɛ bɛ́ á Lo-Urukama lɛ na nyɔ ganaa, á wusoo á nɔ̀ si, á nɛgiĩ yɛ doo.

⁹Dɛnaa Lawa pɛ kɛnɛn: «Bɛ tɔ kɔ "Lo-Amii" bɛ giala mà "maa zaman bie doo wa". A giala, ka bie maa zaman lɛa doo wa, masɛ dɔ bie kaa wɔ lɛa doo wa.»