Read Samo, Southern Oz 14 Bible Online

Oz 14 - Samo, Southern bible

Oz 14

¹Samarii minin doamaa nɛ ǹ nə n sii baraa giɔ̀mɔ saraa, a giala maǹ nə́ n piã ka ǹ Lawa nɛ. Zia á re ǹ dii ǹ gã, ǹ tá re ǹ nɛ tiɛɛ̃nɛn yɔyɔrɛ, ǹ tá re ǹ lɔ nɔ̀naan nɔ̀ wɔsɛ.

²Izirayeli, wusoo n da Dɛnaa Lawa, n Lawa li, a giala, n sii baraa lɛ na á toa n mɛnaa.

³Ka boo yɔrɔ bɔ ka wusoo ka da Dɛnaa Lawa li, ka pɛ nɛ: Sii baraa tumaa papaã, n lɛ kɔ sii sonbore tumaa ganaa. Wɔ n wɔ lɛgɔ́ɔ̃ ǹ boo koe n la *wúlu màn lɛa, dii gɔ̀lɔ̀n bǎã nɛ.

⁴Asiirii a boe la a wɔ kirisibaa wa, wɔ a re dii sùin la wa. Wɔ dinin gɔnɔn nə mànan mɛnɛn zɛnaa, wɔ a re pii bɛn man doo: "wɔa Lawa" wa. A giala nɛ toen nə kiɛ n din yele.

⁵Ma á re Izirayeli a piã ka Lawa-n kɛ boe ma bɔ a ganaa, ma a re narɛ ka ma foo tumaa nɛ. Maa foo yoo lɛ á re n kanɛɛ a n bɔ li.

⁶Man die goɛ̃ ka pele bɛ́ lɔn Izirayeli ganaa. A n die buũ koe ka da bɛ́ lɔn, a gòonən nə wɔ tán ka Liban a daã kɛ bɛ́ lɔn.

⁷Á re gɔnɔn nyoɛ̃, a siĩnbaa n die goɛ̃ ka Olive da bɛ́ lɔn, a gìĩ a kɔɔ̃nbaa n die goɛ̃ ka Liban wɔ bɛ́ lɔn.

⁸Min mɛnɛn nə goã giã nɛ a wúlu li, ǹ tá re wusii ǹ daa. Ǹ tá re wusii ǹ *belee kɔsɔ, ǹ tá re buũ koe ka *rezɛ̃ da bɛ́ lɔn, ǹ tá re a boo diɛ ka Liban a duvɛ̃ kɛ bɛ́ lɔn.

⁹Efrayimu, maa wàa n kɔn ka dìn kɛn nɛ doo. Ma din nə n lɛ sii, ma din nə n lɛduĩ. Masɛ n ka siprɛsi da bɛ́ lɔn, ma luu n tì biikoo yii li. N nɛ kɔ n boe masɛ li.

¹⁰Die yiri n wooro, a n bɛa mànan kɛn bɔ kɔn lɛ we? A yiri ná a tan a nə́ ǹ doɛ̃? Hiĩ Dɛnaa Lawa a ziin tá tele ne, min peperen tá re tɔ we la, sɛnɛ, piã-wɔlen tá re mɛnɛɛ.