Read Samo, Southern Oz 2 Bible Online

Oz 2 - Samo, Southern bible

Oz 2

¹Ǹ kɔn pinaa, Izirayeli minin lɛn tá re mɔnɛɛ, ka yìsi mu lɛ-a ǹ nyɔɔsɔ̃ bɛ́ lɔn, min ná a boe la a zɔɔ̃ wa, min ná a boe la a nimi wa. Lawa pɛ ǹ nɛ bǎã mɛn nɛ "Ka bie maa zaman lɛa doo wa", á re wusii a pɛ ǹ nɛ walan "Lawa yiikoonaa a minin"!

²Zudaa minin laanka Izirayeli minin ni, bɛn tá re wusii ǹ kaa kun. Ǹ tá re kiã goon toto boe, ǹ koa ǹ dinin mìi la, Gána lɛ á re kiɛɛrɛ koe ǹ ganaa. A giala, sii lɛ bɛ́ re n zɛnɛɛ Zizereyɛli ǹ mɛn pinaa, lɛawaa gole ne.

³Ka pɛ ka dɔɔ̃ngiĩn lɛn manɛ: «Amii, maa zaman.» Ka pɛ ka dɔɔ̃nlɔn lɛn manɛ: «Urukama, ma á re makara boe ka ganaa.»

⁴Ka kiri wɔ kaa náa lɛ ganaa, ka kiri wɔ a ganaa taãn-taãnɛ. A giala, a ba maa wɔ lɛa doo wa, ma dɔ ba a dɔ wɔ lɛa doo wa. A kɔrɔbaa ǹ nyaǹan kɛn a yɔrɔ nɛ, yǎa a bɛn tuturi. A naarɛbaa ǹ mànan kɛn a bɔlɔ-a, yǎa a bɛn wɛɛ.

⁵Bɛ bie wa, man die sɔlɛɛ ma a tontoro da. Ma á re a tontoro diɛ ka a yɛ pinaa bɛ́ lɔn. A gána lɛ á re don biɛ, ma á re bɔyɛɛ ma baa ka bǎã gere bɛ lɔn, ma á re toɛ mu boro dɛ a gã.

⁶A nɛnyaanan kɛn, ma a re makara boe ǹ ganaa wa, a giala, a na á ǹ yɛ kɔrɔbaa gɔ́ɔ̃ nɛ.

⁷Ǹ dan lɛ na á kɔrɔbaa zɛnaa. Lɔ mɛn lɛ nə ǹ yɛ, bɛ na á sìi da ǹ sii zɛnaa. A giala, á goã á pɛ kɛnɛn: «Ma n die baa sii maa tɔntɔraan lɛn kio. Ǹsɛn mɛnɛn bɛ maa màn-bii laanka maa mi ǹ mu koe ma la, mɔnaa sonbore laanka gɛ̀sɛ sonbore ne, nyɔɔ laanka duvɛ̃ nɛ.»

⁸Bɛ lɛ n ke, masɛ Lawa á re nyan we a bɔ ǹ zii lɛ, ma á re kungɔn doe ma a nyɛɛnaan tã nɛ, a re a zii lɛ yii a kɔ lɛ doo wa.

⁹Á re baa sii a tɔntɔraan lɛn kio, sɛnɛ a re doe ǹ ganaa wa. Á re giɛ ǹ li, sɛnɛ, a re ǹ yii wa. Bɛa biikoo li á re pii: «Man die wusii ma wo ma zuũ bibinaa lɛ li, a giala, maa tá walan nə́ goã soɛ á la maa pelo ǹ kɛ nɛ.»

¹⁰Sɛnɛ, a doɛ̃ mà *belee ke, ka duvɛ̃ laanka nyɔɔ kɛ nɛ, mà ma din nə má kɔ asɛ la wa. Ma din dɔ-n má wɔrɔ laanka sana gigiã kɔ la. Sɛnɛ, á sana lɛ saa á *Baali nyín zɛnaa nɛ!

¹¹Bɛ lɛ na á toa, ma á re maa belee kuĩ ma si la, a kurii biikoo li, ma á re maa rezɛ̃ kuĩ ma si la, a ma biikoo li. Sère ka mɔnaa laanka gɛ̀sɛ sonbore mɔnaa ke, ǹ mɛnɛn lɛn bɛ́ a sìi duri, ma á re bɛn wɛɛ, ma ǹ bɔ a ganaa.

¹²Sisia kəni, man die a sìi boe ma da kanaa a tɔntɔraan lɛn yii ni: Min kɔn dɔ a re boe la a si ma la wa.

¹³Ma á re a foo kɔɔ̃nbaa ǹ siin kɛn tumaa sàabiɛ: A zɔ́nɔn nɛ, a mui dii zɔ́nɔn nɛ ka a susu ǹ piin ni, ka lɛsɔkɔn kɛn tumaa nɛ á ǹ zɛnɛɛ.

¹⁴Ma á re a *rezɛ̃ dan laanka a gɔ́rɔ dan kɛn ziziɛ̃. A na á goã pii, mà bɛ lɛ na asɛ a saraa lɛa, asɛ a tɔntɔraan lɛn nə́ kɔ asɛ la. Sɛnɛ masɛ Dɛnaa Lawa á re ǹ bɔyɛɛ ma ǹ baa nyan tewonən lɛa.

¹⁵A wúlu mànan tã Baali ganaa lɛawaan mɛnɛn li ma á re bɛn dɔlɔ boe a ganaa. A na á goã a gɔn ganaa ǹ zanan kɛn laanka a bɔlɔ-a ǹ gii kɛn we, bɛ̀ a baa si a tɔntɔraan lɛn kio. Ma dinmaa ke, a yiri bɔ ka ma nɛ! Dɛnaa Lawa a da ǹ boo ne.

¹⁶A bɛ́ miɛ̃, ma á re wusii ma bebele, ma kũ ma da tán, ma a foo wɔraa ǹ boon da nɛ.

¹⁷Ma á re wusii ma a rezɛ̃ wuru kɛ kɔ la walan, Koe nyankɔrɔ ke a tɔ n Akɔɔrɔ[1], ma á re bɛ biɛ foo doa ǹ bǎã lɛa. Á re koe ma lɛ walan ka a nɛniɛmaa waáraa kɛ bɛ́ lɔn, ka a soo Ezipti gána-n biikoo kɛ bɛ́ lɔn.

¹⁸Ma din Dɛnaa Lawa a da ǹ boo á ke: «Bɛa pinaa kɛ nɛ, N tá re ma bii "n zuũ", n ba re "Baali" tɔ kɛ koe ma-a doo wa.

¹⁹Dì Baali tɔn kɛn, ma a re toɛ bɛn kɔn soo n lɛ-n doo wa. Min kɔn din yiri a die goɛ̃ ǹ tɔn nɛ doo wa.

²⁰Bɛa pinaa kɛ nɛ, maa zaman lɛ taman yii, ma á re lɛ kɔ kɔn la we ka don mànan nɛ, bàanan nɛ lon, ka màn baaran nɛ tán. Sa nɛ, gɔya sa nɛ, ziabaa ǹ mànan kɛn tumaa nɛ, ma á re ǹ yiyiɛ, ma ǹ bɔ gána lɛ nɛ. Ma á re toɛ gána lɛ a minin nə nyuù wɔ kiĩni.

²¹Man die luu diɛ n la ma din wɔ lɛa yǎa duduu: Man die luu diɛ n la ka yɔrɔ kɛ nɛ: Peperebaa nɛ, sonborebaa nɛ, kɔn-narɛɛ laanka makara-doɛ̃ nɛ.

²²Man die luu diɛ n la ma din wɔ lɛa, ka bɔlɔgoondɛnaabaa nɛ. Bɛa biikoo li, n tá re ma doɛ̃ Dɛnaa Lawa lɛa.»

²³Dɛnaa Lawa a da ǹ boo ne: Bɛa pinaa kɛ lɛ nɛ, ma á re n nyii, ma á re n nyii lon la, lon tá re n nyii tán la.

²⁴Tán dɔ á re n nyii belee la, duvɛ̃ nɛ, ka nyɔɔ nɛ. Bɛ tumaa á re n nyii Zizereyɛli[2] a nyankɔrɔ lɛ kɛ la.

²⁵ Ma a re maa zaman biɛ màn tɔrɔ lɛa ma da gána lɛ nɛ. Min mɛn bɛ́ a tɔ n "Ma a re makara boe n ganaa wa" ma á re makara boe bɛ ganaa. Min mɛn bɛ́ a tɔ n "Maa zaman bie wa" ma á re pii bɛ nɛ "maa zaman". Asɛ dɔ á re pii: «Maa Lawa».