Read Samo, Southern Oz 5 Bible Online

Oz 5 - Samo, Southern bible

Oz 5

¹Lawa a wúlu-bɔlen lɛn, ka n too kɔ! Izirayeli minin lɛn, ka n too kɔ doɛ̃: Kii a sumu minin lɛn, ka n too da! Sii kɛ lɛ a kiri n die kuĩ ka dinin mìi ni. A giala, kaa zɛnaa ǹ sii kɛ na á kan baa Misipaa kiwi, a na á biɛ baa ká koa Tabɔɔrɔ kele kɛ la,

²a na á nyankɔrɔ zuzulu baa ka fɔ̃ Sitimu kiwi. Sɛnɛ, masɛ Dɛnaa Lawa á re a dɔlɔ boe ka tumaa ganaa.

³Masɛ á Efrayimu tɔrɔn kɛn doɛ̃, Izirayeli tɔrɔn kɛn sii kɔn ba durii-n masɛ ganaa wa. Efrayimu tɔrɔn, ka kɔrɔbaa zɛnaa. Izirayeli tɔrɔn, ka *gɔ̀ da ka dinin ganaa.

⁴Ǹ zɛnaa ǹ sii lɛ din ba toɛ ǹ yii wɔ ǹ wusoo ǹ da ǹ Lawa li wa. A giala, kɔrɔbaa ǹ taasiɛ lɛ tá ǹ yiri ni. Ǹ ba masɛ Dɛnaa Lawa doɛ̃ wa.

⁵Izirayeli tɔrɔn din gole kɔ kɛ lɛ n toɛ min nə ǹ dɔ̃. Izirayeli tɔrɔn laanka Efrayimu minin kɛn tá re kiɛ, ǹ sii kɔkɔrɔ zɛnaa taman yii. Zudaa minin kɛn dɔn dinin tá re talɛɛ kunun ǹ ni.

⁶Ǹ tá re die ka ǹ tɔɔ dadaran laanka ǹ tɔɔ bisinin ni mà maǹ giɛ Dɛnaa Lawa li. Sɛnɛ, ǹ ba re yii wa. A giala á soo á n bɔ ǹ bii.

⁷A giala, ǹ nə́ Dɛnaa Lawa bebele, ǹ nə́ kikio nɛn yɛ. Sisia kəni, kànaa laanka mui goon, ǹ gána lɛ á re yui.

⁸Ka bɛn pɛ Gibeya kiwi, ka bɛn pɛ Ramaa kiwi, ka lɛn da Bɛti-Avɛn kiwi: Haya! Bɛnzamɛn tɔrɔn lɛn, kaa zɔ́ɔn tá ka kio.

⁹Dɔlɔ-bɔ kɛa pinaa, Efrayimu tɔrɔ kɛ kɔn ba re goɛ̃ wa. Sii mɛn bɛ́ a re sàabiɛ wa, man bɛ lɛ nyɛɛ Izirayeli tɔrɔn manɛ.

¹⁰Zudaa tɔrɔn nyɛɛnaadɛnan kɛn man minin lɛa, ǹ wuru gèlè toɛ walan bɛ̀ ǹ wɔ ǹ miãn lon. Masɛ foo n die yui ǹ dinin lɛn li, ka mu tii á ke lɔn.

¹¹Ǹ tá re boe Efrayimu tɔrɔn kɛn yii ni, ǹ tá re mɛnɛɛ ǹ la kiri wɔ ǹ bǎã nɛ. A giala, ǹ dinin man nə́ n laa sii kooro zɛnaa ganaa.

¹²Bɛ lɛ n ke, masɛ Lawa á die kɔǹgɛ̀ biɛ Efrayimu tɔrɔn kɛn ganaa, ma á re busulɛ biɛ Zudaa minin kɛn ganaa.

¹³Efrayimu tɔrɔn kɛn nə́ ǹ dinin busu dɔ̃, Zudaa tɔrɔn dɔn nə́ ǹ busu dɔ̃. Bɛ lɛ nɛ, Efrayimu minin nə́ woo Asiirii, ǹ nə́ minin dia kii gole kɛ li. Sɛnɛ, bɛa boe la a kaa busu kɛ nya wa, a boe la a ka si kaa busu kɛ la wa.

¹⁴Man die n biɛ ka yàra bɛ́ lɔn Efrayimu tɔrɔn kɛn ganaa, man baa ka yàra ten bɛ lɔn Zudaa minin ganaa. Ma dinmaa n die ǹ tɔtoɛ̃ ma kiɛ̃. Man die woe ǹ ne, min kɔn dɔ ná a re yii a ǹ si ma la wa.

¹⁵Masɛ n die n la boe ǹ ganaa, yǎa ǹ golee ǹ dinin sã li, ǹ giɛ ma li. Bɛ̀ fuu nə́ ǹ yɛ, ǹ tá re ma basa boe.