Read Samo, Southern Oz 8 Bible Online

Oz 8 - Samo, Southern bible

Oz 8

¹Ka bɛn pɛ! Bɔ̀n nə́ n tele á die Dɛnaa Lawa a kion lɛ gialaa, ka giogialatã bɛ́ lɔn. A giala, ǹ nə́ maa lɛ kɔ kɔn la lɛ ziziɛ̃, ǹ nə́ n piã ka maa dí-pɛn kɛn nɛ.

²Ǹ tá re n lɛ dii ma li: «Wɔa Lawa, Izirayeli minin man ka wɔ nɛ, wɔ tá n doɛ̃!»

³Izirayeli minin nə́ n piã ka sii bǐɛ̃ nɛ. Zɔ́ɔn lɛn dinin nə n ta ǹ gialaa!

⁴Ǹ nə́ kiin koa, ma ba a siére-a wa, ǹ nə́ goledɛnan bɔ, má n ma zii kɔ ǹ la wa. Ǹ nə́ ǹ wɔrɔ laanka ǹ sana goa, ǹ nə́ dìn zɛnaa nɛ. Ǹ dinin papaã ǹ wɔ lɛ dɔ n ka bɛ nɛ.

⁵Samarii minin lɛn, kaa diin nɛ nyín kɛ lɛ, ma ba li wa. Bɛ lɛ na á toa ma foo yoo ka li. Yǎa biĩ kəni, ka tɔn goɛ̃ zɛrɛbaãdɛnan lɛa?

⁶Kaa diin nɛ nyín lɛ, a n boe Izirayeli gána nɛ, dí-dɔ̃li kɔ́n na á zɛnaa, A bie Lawa lɛa wa! Taãn nɛ, Samarii minin diin nɛ nyín lɛ á re pɔpɔsɛ.

⁷Bɛ̀ n piɛ̃ lɔnlɔɔn yoo, n tá re la piɛ̃ yii. Bɛ̀ *belee mìi bɔ wa, a wùsu boe wa. Ta a na á bɔ dɔn dinin, tiin man bii.

⁸Izirayeli minin wɔ ziziɛ̃, ǹ nə́ ke tɔrɔ kɔsɔn bii ka màn mɛn bɛ́ a là ná a banban.

⁹Efrayimu tɔrɔn kɛn man ka don dundunun bɛ́ lɔn, ǹ ba n mɔrɛ min-a wa. Maǹ nə́ woo Asiirii gána nɛ, ǹ nə́ ǹ lɛ pii màn mɛn bɛ́ toɛ ǹ giaárabaa yɛ.

¹⁰Ǹ nə́ tɔrɔ kɔsɔn gɔgɔ ka mànan nɛ sɛnɛ, a laanɛ ǹ nə́ bɛ zɛnaa, sisia kəni, man die ǹ soekɔn. Kànaa ka boɛɛn nɛ, kii gole kɛ bɛ́ re guĩ mɛn diɛ ǹ mìi ni, ǹ tá re nɔmɛɛ bɛa guĩ gɔn.

¹¹Efrayimu minin man nə́ *wúlu bɔ ǹ bǎã gigiã dɔ, ǹ sii baraa sawaa ǹ bǎã lɛa. Sɛnɛ, bɛa wúlu bɔ ǹ bǎãn lɛn dinin man nə́ ǹ kaa sii baraa zɛnaa ganaa.

¹²Ta man má maa dí-pɛn kɛn kiɛ̃ gunyin duu goon má kɔ ǹ la, a n die sii tii biɛ ǹ gɔn.

¹³Maǹ wúlu boe ma ganaa ka tɔɔn nɛ, ǹ siĩ soɛ̃ á lɛa. Sɛnɛ, masɛ Dɛnaa Lawa a lɛ koe ǹ wúlu mànan lɛn ganaa wa. Sisia, ma yiri a boe ka ǹ sã ǹ siin kɛn nɛ wa, ma nə ǹ sii baraan kɛn nimii. Ǹ doamaa nɛ, ǹ wusoo ǹ wo Ezipti.

¹⁴Izirayeli minin kɛn yiri bɔ ka ǹ zɛnaali ni, ǹ nə́ kion sonboren dɔdɔ. Zudaa minin kɛn, bɛn nə́ kungɔn dɔ, ǹ nə́ ǹ kiwi gigiã lɛnpɛnɛ nɛ. Sɛnɛ, ma á re tɛ diɛ ǹ kiwin lɛn ganaa, tɛ á re ǹ duru ǹ bǎã kakan kɛn kuĩ.