Read Samo, Southern Zow 2 Bible Online

Zow 2 - Samo, Southern bible

Zow 2

¹Ka bɛn pɛ *Siɔn nɛ, ka pɛ gole, maa kele sonbore kɛ la. Gána lɛ a minin tumaa gɔ̀nɔn nə bìn diɛ. A giala Dɛnaa Lawa a lɛawaa lɛ n die. A lɛawaa lɛ diri.

²A pinaa n die wɔlɔ tì biribiri biɛ, min yii a die wɔlɔ yii wa. A n die goɛ̃ wɔlɔ tì lɛa. Á ke tɔrɔ kɔsɔn nə́ kɔn paã ǹ nə́ die. Ka tèlò bɛ́ lɔn, maǹ gigiã, kakaarɛ, ka bisin bɛ́ lɔn. Kɛ miã bin tɔn nə n zɛnaa wa, ǹ miã dɔ din ba re n zɛnɛɛ doo wa.

³Bɛ̀ ǹ nə́ n yɔrɔ dia bǎã mɛn nɛ, ka tɛ n kuĩ die. Bɛ̀ ǹ nə́ bɔ bǎã mɛn nɛ, ka tɛ na á bɔ walan. Ǹ bɛ́ ǹ tɔn daa wa, gána lɛ na á goã ka Edɛn dù gɔrɔ kɛ bɛ́ lɔn. Sɛnɛ ǹ kiɛ̃ kio, á n baa ka maǹ nə́ don dɛ. Màn kɔn ba liɛ ǹ la wa.

⁴ Bɛ̀ ń nə́ ǹ yɛ, ka sùin man baa la, bɛ̀ ń nə́ ǹ yɛ baa sii, ka sùidɛnaan manɛ.

⁵Maǹ paparɛ kelen koe kɔn, ǹ wuu n ka ziabaa ǹ fɔlɔ wotoro wuu bɛ́ lɔn, ka tɛ wuu bɛ́ lɔn buu gere kuĩ. Min kakan manɛ ǹ nə́ n yɔrɔ bɔ ǹ nə́ woe zia la.

⁶Tɔrɔn tumaa gɔ̀nɔn nə bìn diɛ ǹ nyɛɛnɛ min tumaa yɔrɔ ziziɛ̃.

⁷Maǹ baa sii ka sɔraasin bɛ́ lɔn, maǹ parɛ kungɔn kɛ la boe ka zia-baalin bɛ́ lɔn. Didie n woe a din nyɛɛn pepere, ǹ kɔn ba kanɛɛ a tá n boe a zii la wa.

⁸Ǹ kɔn ba ǹ miã nyɛnɛɛ wa, didie n koe a din a zii lɛ. Maǹ yui kun, bɛ̀ ǹ bɔ kiɛn bii ǹ kiɛ̃, màn kɔn ba ǹ kurii wa.

⁹Maǹ nə́ n diɛ kiwi lɛ gɔ́ɔ̃ la, baa sii kungɔnɔn kɛn la, kikiɛ kionən ne. Maǹ we ka fənɛtərən ne ka wurumunun wɔ bɛ́ lɔn.

¹⁰Tán nə bìn diɛ ǹ nyɛɛnɛ, lon nə ka a n die niɛ̃ a mɛnaa, wasa laanka mui ba folon kiɛ doo wa, leeren ba tɛ-pii doo wa.

¹¹Dɛnaa Lawa na a zia-baalin lɛn nyɛɛnɛ, a n paraa we. A sɔraasin lɛn man gigiã, ǹ ná a bɔlɔ sii. Dɛnaa Lawa a lɛawaa lɛ, lɛawaa gole ne á nyɛ́ɛ dɔ din diɛ. Die n die n boe a nɛ?

¹²Dɛnaa Lawa n kɛ pii: «A bɛ́ miɛ̃, ka wusoo ka da ma li sisia, ka ka foo tumaa nɛ. Ka n lɛ sɔɔ, ka wuu pɛ, ka gòã-kũ da ma ganaa.

¹³Ka n gɔ́ɔ̃ binyəə, bɛ á soɛ ka lala diɛ nɛ.» Ka wusoo ka da Dɛnaa Lawa li, kaa Lawa lɛ. Bǐɛ̃ gigiã na a din li, a din nə makara doɛ̃ wole lɛa, a foo a yui fufuu wa. A minin narɛɛ á gole, á boe la a dɔlɔ toa min ni.

¹⁴Die n doɛ̃, kɔntan á boe la a wusoo a n gɔ́ɔ̃ bɔyaa, a bǐɛ̃ gigiã zɛnaa ka nɛ. Bɛ á re toɛ ka da ka *belee laanka duvɛ̃ nɛ, Dɛnaa Lawa gɔ ǹ wɔ lɛa, kaa Lawa lɛ.

¹⁵Ka bɛn pɛ Zeruzalɛmu kiwi, ka lɛ-sɔɔ ǹ lɛawaa bɔ ka koa, ka zaman bii a tɔ-a.

¹⁶Ka zaman lɛ sɔkɔn, ka kɔn-yɛ gole zɛnaa. Ka min tumaa bíi: min golen ne, nɛ tenən ne, ka nɛnyaanan mɛnɛn dɔn dinin bɛ́ tɔn nyɔ mii. Lɔ tii ǹ zuũ soo a n bɔ kion. Lɔ tii dɔ soo a n bɔ kion.

¹⁷Wúlu-bɔlen kɛn dí nyɛɛ Dɛnaa Lawa a kion, bɛn nə golee wɔ ǹ kiɛnlɛ kɛ laanka *wúlu bɔ ǹ bǎã kɛ bii, ǹ wuu pɛ, ǹ Lawa nyankɔ kɛnɛn: — E, Dɛnaa Lawa, makara bɔ ǹ zaman lɛ-a. N nyan toa sìi nə n din wɔn kɛn kũ wa, n nyan toa tɔrɔ kɔsɔn nə ǹ da yaa lɛa wa. «Ǹ Lawa lɛ á maa kəni?» N nyan toa tɔrɔ kɔsɔn nə bɛ pɛ wɔ-n ma.

¹⁸Dɛnaa Lawa tá a gána lɛ narɛ á kiɛ̃, a minin lɛn makara kũ.

¹⁹Dɛnaa Lawa ná a minin lɛn nyankɔ si á kɛ pɛ ǹ nɛ: «A bɛ́ miɛ̃, ma á re wusii ma belee kɔ ka la, ka duvɛ̃ laanka nyɔɔ nɛ. Ka á re kiɛ̃ ka bɛn nɛ. Ma a re toɛ sìi ka kũ tɔrɔ kɔsɔn bii doo duduu wa.

²⁰Kaa zɔ́ɔn mɛnɛn bɛ́ n toɛ gɔsɛ a lɛ̀gɔn li ǹ nə́ die, ma á re bɛn lɛ goɛ ka ganaa, ma ǹ dia sɔsɔɔ, don bǎã gere ne. Ǹ mɛnɛn bɛ́ nyɛɛnɛ, ma á re bɛn nyɛnɛɛ ma ǹ kaa lɛ̀giala a tà mu kɛ li. Ǹ mɛnɛn bɛ́ kio, ma á re bɛn nyɛnɛɛ ma ǹ kaa lɛ̀nyɛɛnɛ a mu kɛ li. Ǹ tá re giɛ̃ walan, ǹ gìĩ bɔ kusi kusi. A giala, ǹ dɔn nə́ basaã gigiã kɔ.

²¹Màn mɛn tumaa bɛ́ tán la, ka baran nyɛ́ɛ baa wa. Ka bɛ̀ baa, ka n nyɛnyɛɛ. A giala, Dɛnaa Lawa á sii dadaran zɛnɛɛ.»

²²Don mànan lɛn, nyɛ́ɛ nyan ka kũ doo wa, buu á ke wusii piɛ̃ don. Dan nə́ ke nɛ koe, gɔ́rɔ dan laanka *rezɛ̃ dan nə́ ke nɛ lɛa kurututu.

²³Kasɛn, Siɔn minin lɛn, Dɛnaa Lawa taman yii, kaa Lawa lɛ, ka bɛ̀ baa, ka n nyɛnyɛɛ. Á re bǐɛ̃ koe ka-a ka la bibinaa nə taãlen kio. Bɛ̀ la a kaa biikoo dɔ, á re la koe ka la a biikoo li. Ká a bɛ́ ke á goã zɛnɛɛ lɔn lɛlɛ.

²⁴Bɛa biikoo li, bǎã tumaa á re piɛ̃ ka belee ne, mànan tumaa á re piɛ̃ ka duvɛ̃ laanka nyɔɔ buə ne, maǹ die piɛ̃ ǹ kaa.

²⁵Bisin nɛ muən ne, bisin tenən ne, bisin dadaran laanka tangiəə̃nən ne, kɛn lɛn má ǹ dia die ka gialaa, gigiã ka sɔraasin bɛ́ lɔn, bɛn nə basaã mɛn kɔ ka nɛ, lɛ̀ damata gɔ́ɔ̃ nɛ ma á re bɛ dòo sarɛɛ.

²⁶Ka á re màn bii sɔnbɔraanɛ ka kã ka á re loe loe, ka masɛ Dɛnaa Lawa, kaa Lawa lɛ tɔ bɔ nɛ. Ma din nə má kaãbaa ǹ siin zɛnaa ka nɛ, sìi á re maa zaman kɛ kuĩ doo duduu wa.

²⁷Ka á re doɛ̃, mà ma tá kun ka Izirayeli minin lɛn nɛ. Ka á re doɛ̃, mà masɛ, Dɛnaa Lawa din nə kaa Lawa lɛa, mà miã na á banban. Sìi á re maa zaman kɛ kuĩ doo duduu wa.