Read Samo, Southern Amɔ 1 Bible Online

Amɔ 1 - Samo, Southern bible

Amɔ 1

¹ Boon kɛn man Amɔɔsi a boon lɛa, tɔɔn-tooli lɛa Tekoa. Lawa siin mɛnɛn nyaa nɛ Izirayeli tɔrɔn wɔ paǹ li, bɛn lɛn man ka kɛn nɛ. Bɛa biikoo li, bɛ̀ Oziasi n Zudaa minin kii lɛa, kii Zoasi a nɛgiĩ Zeroboamu n Izirayeli minin kii lɛa. Bɛa siin lɛn zɛnaa kio ne lɛ̀ paa, tán tɔn bìn da.

² Amɔɔsi na á goã kɛ pii: Dɛnaa Lawa nə n toɛ *Siɔn kele la á n wɔɔsaa we, a nə n toɛ Zeruzalɛmu kiwi á n paraa we. Tɔɔn-lɛduə̃lin tɔɔn lɛduə̃ ǹ bǎãn kɛn nə́ ziziɛ̃, Karmɛli kele mìi kɛ bǎã gere baa.

³ Dɛnaa Lawa na á pɛ kɛnɛn: Damaasi minin kɛn nə́ sii baraa gigiã zɛnaa. Ǹ sii mɛn zɛnaa, á kiɛ̃ a bǎã la: A giala ǹ nə́ boo Galaati minin kɛn la ka fɔlɔ mànan nɛ, ǹ nə́ ǹ kakã. Bɛ lɛ nɛ, ma á ǹ zɛ̀rɛ biɛ, ma a re wusii maa da ǹ boo dɔ kio wa.

⁴Man die tɛ diɛ Hazayeli a kii kion ganaa, tɛ á re Bɛn-Hadaadi a kii kion kɛ kuĩ.

⁵Fɔlɔ bàlà mɛn bɛ́ Damaasi *kiwi a kiɛnlɛ kɛ la, ma á re bɛ yiɛ. Kii mɛn lɛ á ke, sii baraa nyankɔrɔ[1] basa kɛ nɛ, ma á re bɛ dii. Kii mɛn lɛ á ke foo kɔɔ̃nbaa ǹ kiwi[2] kɛ nɛ, ma á re dii. Bɛa biikoo li, ǹ tá re Siirii minin kɛn goɛ, ǹ wo ǹ ne Kiiri. Dɛnaa Lawa na á pɛ miɛ̃.

⁶ Dɛnaa Lawa na á pɛ kɛnɛn: Gaazaa minin kɛn nə́ sii baraa gigiã zɛnaa. Ǹ sii mɛn zɛnaa, á kiɛ̃ a bǎã la: A giala, ǹ nə́ zaman tumaa goa, Ǹ nə́ woo ǹ kɔ Edɔmu minin kɛn la. Bɛ lɛ nɛ, ma á ǹ zɛ̀rɛ biɛ. Ma a re wusii maa da ǹ boo dɔ kio wa.

⁷Ma á re tɛ kiɛ Gaazaa kiwi a kungɔnɔn kɛn ganaa, tɛ á re duru ǹ bǎã kakan kɛn kuĩ.

⁸Min mɛn lɛ á ke pàã la Asidɔdi kiwi, ma á re bɛ dii ma bɔ walan kiibaa lɛ bɛ́ min mɛn gɔn Asikalɔn, ma á re bɛ dii ma bɔ walan. Ma á re sii nyɛɛ Ekrɔn minin kɛn yii ni, Filisiti minin mɛnɛn bɛ́ re goɛ̃, ma á re bɛn dɔn dii lenlen. Dɛnaa Lawa na á pɛ miɛ̃.

⁹ Dɛnaa Lawa na á pɛ kɛnɛn: Tiiri minin kɛn nə́ sii baraa gigiã zɛnaa. Ǹ sii mɛn zɛnaa, á kiɛ̃ a bǎã la. A giala, ǹ nə́ zaman tumaa goa ǹ nə́ woo ǹ kɔ Edɔmu minin kɛn la. Ǹ lɛlɛ a lɛ kɔ kɔn la kɛ tamaa wa. Bɛ lɛ nɛ, ma á ǹ zɛ̀rɛ biɛ, ma á re wusii maa da ǹ boo dɔ kio wa.

¹⁰Ma á re tɛ kiɛ Tiiri kiwi a kungɔnɔn kɛn ganaa, tɛ á re a duru ǹ bǎã kakan kɛn kuĩ.

¹¹ Dɛnaa Lawa na á pɛ kɛnɛn: Edɔmu minin kɛn nə́ sii baraa gigiã zɛnaa. Ǹ sii mɛn zɛnaa, á kiɛ̃ a bǎã la. A giala, ǹ nə́ ǹ dɔɔ̃n Izirayeli minin lɛn loo ka gɔya sa nɛ, ǹ makara din nə ǹ kũ boɛɛn dinin wa. Ǹ foo na á goã yoo ne ǹ li miɛ̃, sii lɛ na á goã ǹ gɔ́ɔ̃-n miɛ̃. Bɛ lɛ nɛ, ma á ǹ zɛ̀rɛ biɛ, ma a re wusii maa da ǹ boo dɔ kio wa.

¹²Ma á re tɛ diɛ Teman kiwi kɛ ganaa, tɛ á re Bosira a duru ǹ bǎã kakan kɛn kuĩ.

¹³ Dɛnaa Lawa na á pɛ kɛnɛn: Amɔn tɔrɔn kɛn nə́ sii baraa gigiã zɛnaa. Ǹ sii mɛn zɛnaa, á kiɛ̃ a bǎã la. A giala, Galaati lɔn mɛnɛn bɛ́ nɔ̀ nɛ, ǹ nə́ bɛn nɔ̀ wɔsɔ, màn mɛn bɛ́ toɛ, ǹsɛn gána gole kɔ. Bɛ lɛ n ke, ma á ǹ zɛ̀rɛ biɛ, ma a re wusii maa da ǹ boo dɔ kio wa.

¹⁴Man diɛ tɛ kiɛ Rabaa kiwi a kungɔnɔn kɛn ganaa. Tɛ á re a duru ǹ bǎã kakan kɛn kuĩ, zia nɛn lɛ-dɛ wuu li zia la, piɛ̃ gole wuu li piɛ̃ a bɔ pinaa.

¹⁵Kii laanka a kialandɛnan nɛ, ǹ tá re ǹ tumaa gɔɛ ǹ wo ǹ ne. Dɛnaa Lawa na á pɛ miɛ̃.