Read Samo, Southern Amɔ 6 Bible Online

Amɔ 6 - Samo, Southern bible

Amɔ 6

¹Amɔɔsi tɔn pɛ: Kasɛn mɛnɛn bɛ́ giã-n *Siɔn, yii-nyɛɛ la, kasɛn mɛnɛn bɛ́ là nyantoro gɔ́ɔ̃ nɛ, Samarii kele kɛ la, bɔ̀n na á ka yɛ. Ka dinin lɛn man tɔrɔn tumaa a nyɛɛnaandɛnan goledɛnan lɛa. E, Izirayeli tɔrɔn man baa sii die kasɛn kɛn lɛn miãn li!

²«Ka bɔ Kalnee kiwi ka ga a ganaa. Ka n toa walan ka wo Hamati[5] kiwi gole kɛ nɛ, bɛ kio, ka n bɔyaa ka da Gaati, Filisiti minin kiwi kɛ nɛ. Bɛa kiwin lɛn man soɛ kasɛn wɔn lɛn manɛ? Ǹ gána lɛ n gole á la kaa wɔ nɛ?»

³Ka bɛ́ ká mà ka nə n nyɛnɛɛ bɔ̀n nɛ, ka á re kakaarɛbaa baɛ̃ ka da nɛ.

⁴Ka n wɛɛ piìn la, ǹ nə ǹ mɛnɛn nyaǹ kɔ ka don a díi sɔn nɛ, ka n giɛ̃ dankanan la, ǹ mɛnɛn bɛ́ mumuu. Ka dinin lɛn man tɔɔ kuru lɛ a sère ten sonboren soɛ̃, ka dinin lɛn man zìã lɛ a dii ten kasiɛ̃ wolen soɛ̃.

⁵Ka n loe kankanbiɛ bɛ̀ ka da tùtu wuu li. Ka n bɛ̀ dɛ ǹ màn diin zɛnɛɛ ka dinin wɔ lɛa, ká Davida bɛ́ á goã zɛnɛɛ lɔn.

⁶Ka n duvɛ̃ kɛ mii màn dadaran nɛ, ka n nyɔɔ gìĩ kɔɔ̃n kɛ loe, sɛnɛ, sii mɛn bɛ́ re Zozɛfu tɔrɔn kɛn yii, bɛa taasiɛ diɛ ka ganaa wa.

⁷Bɛ lɛ n ke sisia kəni, ka dinin lɛn man die woe bɛ̀rɛbaa ǹ bǎã nɛ, ka miãn nyɛɛnɛ. Ka gɔn bɔ ma din ganaa wolen kɛn, kaa zɔ́n zɛnaan lɛn tá re sàabiɛ!

⁸Dɛnaa Lawa Pàãyiidɛnaa nə́ n liɛ ka a din tɔ nɛ á pɛ kɛnɛn: Zakɔba tɔrɔn kɛn din gole kɔ kɛ tìĩ bɔ ma nyin ni, ǹ kion sonboren kɛn sii goon ba ma-a wa. Ma á re kiwi lɛ we a zɔ́ɔn gɔn, kɔnlɛ ka a gɔ́ɔ̃gɔɔ̃ ǹ mànan tumaa nɛ.

⁹Bɛ̀ sumu mɛn a minin nə́ n zɔ̃ ǹ nə́ goã fù, bɛa min fù lɛ dɔ á re giɛ̃.

¹⁰Ǹ dɔɔ̃n goon tá re die ǹ geren goɛ, a ǹ bɔ kion lɛ nɛ, a wo ǹ tã. Min mɛn yii bɛ́ tɔn koo, durii-n kion lɛ gɔ́ɔ̃ li, á re nɔ̀n diɛ bɛa dɛnaa la: «Min kɔsɔ tá kunun n ni ya?» Bɛ á re a lɛ sii: «Min kɔsɔ banban!» Á re pii-n dɔn: «N lɛ tã koe! A giala, Dɛnaa Lawa tɔ kɛ a n pii pelo wa.»

¹¹Sonbore, á ke: Bɛ̀ Dɛnaa Lawa boo da, kion dadaran kɛn man kiɛ. Kion bisinin kɛn man pupuri.

¹²Ka bin nə́ sùi yɛ baa sii gɛ̀fu la? Ka bin nə́ ǹ yɛ gɛ̀fu kɔsɛ ka diin kána nɛ? Wàa na a baa, ká taãn-pɛ sɛ bɔyaa ká baa sèwò lɛa, ká peperebaa bɔyaa ká baa kɔɔsɛ.

¹³Lodebaara kiwi kɛ lɛ a ná a màn kɔn lɛa wa, ka nə n nyɛnyɛɛ mà kasɛn nə́ bɛ lɛ kũ. Karnayimu kiwi ke pàã ná a lon, ká mà kasɛn nə́ bɛ si ka ka dinin pàã nɛ.

¹⁴Bɛ lɛ nɛ, pàã tumaa a Dɛnaa Lawa tɔ́n pɛ kɛnɛn: Izirayeli tɔrɔn lɛn, man die tɔrɔ kɔsɔ diɛ ka-a. Bɛ á re boe ka yii ni, a saa Lebo-Amaati kiwi lɛkoro ganaa gɔsɛ a lɛ̀gɔn la, a wo yǎa nyankɔrɔ lɛ kɛ nɛ tà kɛ lɛkoro-a gusin a lɛ̀gɔn la.