Read Samo, Southern Amɔ 7 Bible Online

Amɔ 7 - Samo, Southern bible

Amɔ 7

¹Dɛnaa, maa Lawa màn mɛn nyaa ma nɛ, bɛ á ke: Man má yɛ á bisinin paã. Bɛ á zɛnɛɛ, ǹ buu mɛn kuru kii wɔ lɛa, bɛ̀ bɛ́ á ke a ná a giala kɔ á n wusii piɛ̃.

²Bisinin lɛn bɛ́ ǹ nə́ gána lɛ a buu tumaa sɔ̃ ǹ nə́ nya, má tɔ́n pɛ kɛnɛn: «Dɛnaa, maa Lawa ma nə n nyankoe, Zakɔba tɔrɔn lɛn siɛ̃n toa ǹ nɛ, bɛ bie wa, maǹ die wàa biɛ? Ǹ nə́ ke ǹ nə́ ǹ ba tɛ dɔn dinin wa!»

³Dɛnaa Lawa tɔ́n sii lɛ a zɛnaa lɛ da, á pɛ mà bɛa re n zɛnɛɛ doo wa.

⁴Dɛnaa Lawa lɛ màn mɛn nyaa ma-n doo, bɛ á ke: Dɛnaa Lawa lɛ na á lɛ dia tɛ la, á n dɔlɔ boe ne. Tɛ lɛ a gusuũ tán mu gole kɛ piɛ̃, a n gána gialaa kuĩ.

⁵Má tɔ́n pɛ kɛnɛn: «Dɛnaa, maa Lawa, ma nə n nyankoe, a toa miɛ̃. Bɛ bie wa, Zakɔba tɔrɔn kɛn man die wàa biɛ? Ǹ nə́ ke ǹ nə́ ǹ ba tɛ dɔn dinin wa!»

⁶Dɛnaa Lawa tɔ́n sii lɛ a zɛnaa lɛ da. Á pɛ mà bɛa re n zɛnɛɛ doo wa.

⁷A màn mɛn nyaa ma-n bɛ kio, bɛ á ke: Maa Dɛnaa Lawa na á goã golee-n lon kungɔn pepere goon lalan, ka màn zɔɔ̃ ǹ biɛ ná a gɔn.

⁸Dɛnaa Lawa tɔ́n nɔ̀n da ma la: «Amɔɔsi, n yii n wàa mɛn ganaa?» Má tɔ́n pɛ nɛ: «Màn zɔɔ̃ ǹ biɛ nɛ.» Dɛnaa Lawa tɔ́n pɛ ma nɛ: «Á ke, man die biɛ diɛ maa zaman Izirayeli minin lɛn li ma ga ǹ ganaa. Ǹ kɔkɔrɔbaa lɛ taman yii, ma a re ǹ toɛ walan doo wa.

⁹Ma á re Izaaki tɔrɔn kɛn laanka Izirayeli tɔrɔn wúlu bɔ ǹ bǎãn ziziɛ̃, ma á re zia biɛ Zeroboamu tɔrɔn kɛn ganaa.»

¹⁰Bɛ lɛ kio ne, Betɛli kiwi a wúlu-bɔle Amasiya minin dia mà ǹ wo pɛ Izirayeli tɔrɔn kii Zeroboamu ni kɛnɛn: «Amɔɔsi n tán dù bose Izirayeli tɔrɔn lɛn bii. A bɛ́ boo mɛn tumaa diɛ, gána lɛ a minin ba boe la ǹ tá sii ǹ ganaa doo wa.

¹¹A giala Amɔɔsi na á pɛ: Zeroboamu á re giɛ̃ zia la, Izirayeli minin kɛn tumaa á re woe bɛ̀rɛbaa ǹ bǎã nɛ, ǹ wɔlɔ á re lui ǹ gána ganaa.»

¹²Bɛ kio, Amasiya tɔ́n pɛ Amɔɔsi ni: «Lawa a boo gii-dali, woo n nə n bɔ kànaa. Baa si n wo Zudaa gána nɛ. N tá re n Lawa a boo gii-dali baa ǹ dí nyɛɛ walan, n nə n lɛ-a ǹ bii yɛ walan.

¹³Sɛnɛ, n nyan toa n pɛ mà n nə n Lawa a boo gii diɛ Betɛli doo wa. A giala, Betɛli kiwi lɛ n kii a giã ǹ bǎã lɛa, gána lɛ a bǎã gole lɛa.»

¹⁴Amɔɔsi tɔ́n Amasiya lɛ si á pɛ nɛ: «Ma bie ma goã Lawa a boo gii-dali lɛa wa, ma bie Lawa a boo gii-dali tɔrɔ dɔ din lɛa wa. Man má goã tɔɔn-lɛduə̃li lɛa, da nɛ-kɔlen[6] nə́ goã ma lon.

¹⁵Sɛnɛ, Dɛnaa Lawa masɛ kũ tɔɔn kio, á tɔ́n pɛ ma nɛ mà ma wo asɛ a boo gii da asɛ a zaman, Izirayeli tɔrɔn kɛn manɛ.

¹⁶Sisia kəni Amasiya, n too kɔ Dɛnaa Lawa a boo li: Táa ń pɛ mà ma baran Lawa a boo gii da Izirayeli wɔ paǹ li wa, mà ma baran sɛ̀ pɛ Izaaki tɔrɔn kɛn ganaa wa!

¹⁷Bɛ lɛ na á toa Dɛnaa Lawa á kɛ pii: N lɔ á re kɔrɔbaa zɛnɛɛ kiwi lɛ gɔ́ɔ̃ nɛ, ǹ tá re n nɛgiĩn laanka n nɛlɔn dii zia la, ǹ tá re n tán zoɛ̃ ka biɛ nɛ, ǹ gii min kɔsɔn bii. N dinmaa kɛ á re giɛ̃ Lawa doɛ̃baã wolen gána nɛ. Ǹ tá re Izirayeli minin kɛn goɛ ǹ wo ǹ ne bɛ̀rɛbaa ǹ bǎã nɛ, ǹ wɔlɔ á re lui ǹ gána kɛ ganaa.»