Read Samo, Southern Amɔ 8 Bible Online

Amɔ 8 - Samo, Southern bible

Amɔ 8

¹Dɛnaa Lawa wusoo á mán mɛn nyaa ma-n doo, da nɛ mərə ne, kaka piɛ̃.

²Á tɔ́n nɔ́n da ma la: «Amɔɔsi, n yii n wàa mɛn ganaa?» Má tɔ́n pɛ nɛ: «Ma yii n da nɛ mərə ganaa, kaka piɛ̃.» Dɛnaa Lawa tɔ́n pɛ ma-n kɛnɛn: — Maa zaman, Izirayeli minin lɛn goa biikoo dɔ, ka da nɛ mərə kɛ wɔ bɛ́ lɔn ma a re ǹ toɛ walan doo wa.

³Dɛnaa, maa Lawa n kɛ pii: «Bɛa pinaa kɛ lɛ nɛ, ǹ bɛ́ loe mɛn loe kii a kion, bɛ á re n bɔyɛɛ a gɛ̀ wuu baa. Gere gigiã á re boe, ǹ tá re geren lɛn zuĩ tán kanaa bǎã yii ni. Bǎã lɛ á re goɛ̃ kiĩn ni.»

⁴Kasɛn mɛnɛn bɛ́ mɛnɛɛ doobaan la ka ń giɛ li mà ka nɔmaa-wɔlen dɛ ka n bɔ gána lɛ nɛ, ka n too kɔ boo kɛ li:

⁵Ka dinin lɛn man pii: — Mui dii zɔ́n kɛ n die nyɛɛ biĩ, wɔ tɔn wɔa dɔǹɔn lɛ bũ? *Susu ǹ pii kɛ n die kiɛ̃ biĩ, wɔ tɔn wɔa màn nàn sã? Wɔ n die màn boe a zɔɔ̃ ǹ màn lɛ, wɔ màn da a giɔ̀mɔ li, wɔ a zɔɔ̃ ǹ gɔn bɔyaa wɔ minin koã nɛ.

⁶Wɔ n die nɔmaa-wɔle pii ka wɔrɔ nɛ, wɔ n baa bɛ̀rɛn lɛa. Wɔ n die doobaa lonkoe ka kɔsɔ nɛ. Wɔ á re wɔa *belee we din siɛ̃!

⁷Dɛnaa Lawa tɔ́n pɛ kɛnɛn: Izirayeli minin tá ǹ dinin gole koe ǹ kiwi a lɛa. Man nə n liɛ ka ǹ gána lɛ nɛ kəni. Ma yiri á re boe ka ǹ nya ǹ dí kɛ kɔn nɛ duduu wa.

⁸Bɛ lɛ n ke, tán tá re bìn diɛ. Gána lɛ a minin tumaa á re gɛ̀ wuu pii. Tán tumaa á re yui lon bɛ̀ a gisĩ, ka Niili tà kɛa mu bɛ́ lɔn, bɛ̀ a pã a toɛ̃. Tán tá re wusii a da a bǎã nɛ ka bɛa tà kɛ lɛ a mu bɛ́ lɔn.

⁹Dɛnaa Lawa wusoo á pɛ kɛnɛn: Bɛa pinaa kɛ lɛ nɛ, ma á re wasa diɛ yii-sã ganaa penleen tiɛɛ̃n nɛ. Ma á re wɔlɔ tii tán la wasa yii ni.

¹⁰Ma á die kaa zɔ́nɔn kɛn bɔyɛɛ, ma ǹ baa foo-ziziɛ̃ pinaa lɛa. Ma á die kaa loen kɛn tumaa bɔyɛɛ, ma ǹ baa gɛ̀ wuu lɛa. Min tumaa á die gɛ̀ koa ǹ mɔnaa we, min tumaa á die n mìi koɛ̃, ka nɛgiĩ goon toto na á gã. Sii mɛn bɛ́ re koɛ bɛ la kəni, bɛa re koe biɛ.

¹¹Dɛnaa Lawa pɛ kɛnɛn: Á ke lɛawaan tá die, ma á re bòo diɛ gána lɛ nɛ. Màn-bii wɛɛ a bòo bie wa, mu wɛɛ a mu boro bie wa. Sɛnɛ, Dɛnaa Lawa a boo kɛ a mu boro n die minin kuĩ.

¹²Maǹ die siɛ gána lɛ a gusin a lɛ̀gɔn la ganaa ǹ wo a lɛ̀nyɛɛn li, bɛ kio, ǹ nə n toa a gɔsɛ a lɛ̀gɔn la, ǹ wo a lɛ̀giala li, ǹ baa si ǹ bɔ kànaa ǹ wɔ kànaa, ǹ nə́ giɛ li mà ǹ Lawa a boo lɛ ma, sɛnɛ ǹ ba re miɛ wa.

¹³Bɛa pinaa kɛ lɛ nɛ, nɛniɛ sonboren kɛn laanka tɔntɔraa tenən kɛn, bɛn tá re giɛ̃ mu boro gɔn.

¹⁴Min mɛnɛn bɛ́ n liɛ ka Samarii kiwi a dì kɛ tɔ nɛ, ǹ mɛnɛn bɛ́ pii mà Dan tɔrɔn dì kɛ yii die a goã koo, ǹ mɛnɛn bɛ́ mà Bɛɛr-Sebaa a wùlu-bɔ kɛ a sii die a goã a gòãn la miɛ̃, bɛn tá re boe ǹ kaa, ǹ nə́ ǹ ba re boe la ǹ yoo doo duduu wa.