Read Samo, Southern Amɔ 9 Bible Online

Amɔ 9 - Samo, Southern bible

Amɔ 9

¹Má maa Dɛnaa yɛ golee-n lon *wúlu bɔ ǹ bǎã kɛ lalan. A na á goã kɛ pii: «Bìbìn kɛn mìi yiyiɛ, kiɛnlɛn kɛn nə bìn dada. A wuru a n kɔ ǹ tumaa lɛ. Ta ǹ mɛnɛn nə́ la, ma á re bɛn dii ka gɔya sa nɛ. Ǹ kɔn ba re boe la a baa si a la wa, ǹ kɔn ba re n boe a-n wa.

²Ta ǹ dinin man nə́ woo yǎa geren piɛ, ma á re ǹ wɛɛ walan ma soo ǹ ne. Ta maǹ nə́ dii lon, ma á re ǹ gisĩ ma ǹ kaa tán.

³Ta maǹ nə́ woo n duru Karmɛli kele kɛ mìi ni, ma á re woe giɛ ǹ li walan, ma ǹ kũ ma gisĩ ǹ ni. Ta maǹ nə́ n duru masɛ la yìsi mu giulun, ma á re yìsi mu li ǹ miɛ̃ kɛ diɛ ǹ ganaa, bɛ á re sɔn dodoe ǹ ganaa walan.

⁴Ta ǹ nə́ woo bɛ̀rɛ baa ǹ zɔ́ɔn li, ma á re yui zia nɛ ǹ ganaa walan, ǹ nə ǹ dɛ. Man die n yii soe ǹ ganaa, ǹ ba re yii-nyɛɛ goon yii wa, yǎa bɔ́n!»

⁵Bɛ̀ pàã tumaa a Dɛnaa Lawa nə́ n gɔn da tán lɛ ganaa lɔn gɔrɔ a n bìn diɛ. Min tumaa nə n duwi. Tań lɛ tumumaa n yui ka Niili tà kɛa mu bɛ́ lɔn, a wusoo bɛ̀ a waa, ka bɛa tà lɛ a mu bɛ́ lɔn.

⁶Min mɛn a giã ǹ bǎã á ke lon, asɛ mɛn bɛ́ á lon zɛnaa á kɔ tán lɛ, yìsi mu bíi bɛ̀ a kaa tán la, a tɔ mà Dɛnaa Lawa.

⁷Dɛnaa Lawa n kɛ pii: Izirayeli minin lɛn, ka dɔn laanka Etiopii minin kɛn man goon masɛ gɔn. Má ka waa má ka bɔ Ezipti gána nɛ. Má Filisiti minin kɛn dɔn waa má ǹ bɔ Kafutɔɔrɔ kiwi, má Siirii minin kɛn waa má ǹ bɔ Kiiri kiwi.

⁸Á ke, Izirayeli gána lɛ na á sii baraa zɛnaa, Dɛnaa Lawa na á n yii soo a ganaa á pɛ kɛnɛn: «Man die ǹ dii lenlen ma ǹ bɔ kanaa. Sɛnɛ, Zakɔba tɔrɔn kɛn, ma a die bɛn tumaa dii wa.» Dɛnaa Lawa a da ǹ boo ne.

⁹Sonbore, á ke: «Man die bìn diɛ Izirayeli tɔrɔn kɛn ganaa tɔrɔ kɔsɔn bii, ka ǹ bɛ́ màn zazaaboe ka tɛ̀mɛ-n lɔn, kɔlɔ boɛɛn kɔn din ba re soe a mɛnaa tán wa.

¹⁰Maa zaman lɛ a sii baraa-zɛnaalin mɛnɛn bɛ́ pii, ma baraa ba ǹsɛn yii wa, ma a ba n mɔrɛ ǹsɛn ganaa wa, gɔya sa n die ǹsɛn lɛn dinin dii.»

¹¹ Dɛnaa Lawa n kɛ pii: "Davida a kiwi" kɛ n ka mɔnaa zìã bɛ́ lɔn, á ziziɛ̃. Sɛnɛ bɛa pinaa kɛ lɛ nɛ, yala bɛ́ a kungɔn kɛa paǹan mɛnɛn ganaa, ma á re bɛn titiɛ̃. A bǎãn mɛnɛn nə kaa, ma á re wusii ma bɛn dɔ. Ma á re goɛ ma koa lon, a goã ka a bɛ́ lɔn lɛlɛ.

¹²Bɛa biikoo li kəni, Edɔmu minin kɛn bǎãn mɛnɛn nə goã, tɔrɔ kɔsɔn mɛnɛn tumaa bɛ́ maa wɔ lɛa lɛlɛ, bɛn tá re Izirayeli tɔrɔn lɛn wɔ biɛ. Dɛnaa Lawa a da ǹ boo ne, a din dɔn die bɛ zɛnɛɛ.

¹³Dɛnaa Lawa wusoo á kɛ pɛ doo: Á ke, biikoo á re die, kaa-piɛ waáraa á die n biɛ wuru dí a yoo lɛa doo, rezɛ̃ tɔtɔrɛɛ a nya á die n biɛ màn nàn diɛ a biikoo lɛa doo. Duvɛ̃ dii tá re baa sii tán kelen mii ni a da tentenen mui.

¹⁴Man die wusii ma maa zaman, Izirayeli minin lɛn sii bɔyaa ma da a giala la. Kiwin mɛnɛn nə ziziɛ̃, ǹ tá re wusii ǹ bɛn dɔ, ǹ giã ǹ nɛ. Ǹ tá re *rezɛ̃ dan zuzumi ǹ bɛa duvɛ̃ mi. Ǹ tá re dù gɔrɔn boboe, ǹ bɛa mànan bii.

¹⁵Ma á re wusii ma da ǹ nɛ ǹ gána nɛ, ma gána mɛn lɛ kɔ ǹ la. Ǹ gòãn tá re we tán walan, min ná a re boe la a ǹ loo doo wa. Masɛ, kaa Dɛnaa Lawa lɛ a da ǹ boo n ka bɛ nɛ.